Bulagurhe Rhukwanene Kuyubaha Yehova?

1-2. Nk’oku olwandiko lwa Zaburi 25:14 luderhere, bichi rhukwanene kujira akaba rhulonzeze kugwarha obwira bukomeere haguma na Yehova?

NGESO zihe owazize oku zili z’akamaro akaba olonzeze kugenderera kugwarha obwira bukomere na muntu mulebe? Nkabaga wakashubiza oku abera benja bakwanene kuzigirana n’okurhabalana buli muguma n’owindi. Nkabaga orhakawaza oku obuba eli ngeso y’akamaro y’ogwarha obwira bukomere haguma na muntu mulebe. Aliko, nk’oku olwandiko gunola mwazi guyumangireko luderhere, balala balonzoze kugwarha obwira bukomere haguma na Yehova bakwanene “kumuyubaha.”—Osome Zaburi 25:14.

² Chiro akaba rhwamakolera Yehova mu myaka engana gurhe, rhweshi rhukwanene kugenderera kumukenga bwenene. Aliko si okuyubaha Mungu k’okuderha gurhe? Gurhe rhwakayiga kuyubaha Yehova? Nabichi rhwakayiga oku bilolere okuyubaha Mungu kugerera omufano g’omwishingizi Obadiya, Omudahwa Mukulu Yehoyada, n’Omwami Yehoashi?

OKUYUBAHA MUNGU K’OKUDERHA GURHE?

3. Nka gurhe obuba bwakarhulanga? Ofasiriye.

³ Rhwakayunva obuba amango rhwamarhegera oku hali echintu chilebe chakarhubabaza. Obuba buli nk’obola bwakaba bwinja bulala bwakarhurhabala rhurhole esimikiro zinja. Okuyubaha oku rhwakachikuba (kukumbagala) kunarhuma rhurhalambagira hofi-hofi n’ebibale bizibu-zibu. Okuyubaha oku koromeka kwarhushunika rhuchilange oku hali yakarhulerhera obuhanya. Okuyubaha oku rhwakaheza obwira bwerhu n’amuntu mulebe rhuzigire kwakarhulanga rhumenye rhwaderha changwa kujira chintu chilebe chirhakwirire.

4. Buba nyabachi Shetani alonzeze abantu bagwarhe oku bilolere Yehova?

⁴ Shetani alonzeze oku abantu bagwarhe obuba burhakwanene ku Yehova. Shetani alishumikire Elifazi aderhe oku Yehova ali Mungu onachiholera, mukali n’oku ntacho rhwakajira yirhumusiimisa. (Yob. 4:18, 19) Shetani alonzeze rhuyubahe Yehova, nantyo rhuleke kumukolera. Aliko rhurhakwanene kuyubaha Yehova; rhukwanene kuyiga kumukenga n’okuyubaha kumubabaza.

5. Okuyubaha Mungu k’okuderha gurhe?

⁵ Omuntu ogwerhe obuba bukwanene ku Mungu anamuzigira, anamukenga bwenene, kandi arhalonza kujira echintu choshi-choshi chakahanyagaza obwira bwage haguma naye. Yesu naye “aliyubahire Mungu.” (Ebr. 5:7) Arhaliri ajanjabala embere za Yehova. (Isa. 11:2, 3) Ahali hokujira ntyo, aligwerhe buzigire bunene bwenene ku Yehova, analilonzeze kumukenga. (Yoh. 14:21, 31) Kuguma na Yesu, nerhu rhunayerekana oku rhumukengere bwenene, n’okumuyubaha, bulala agwerhe obuzigire, ali mwengehe, w’okunali, anagwerhe misi minene. Kandi rhumenyere oku Yehova arhuzigiire bwenene n’oku anasimiiswa n’okuntu rhunayemera amahano mage. Yehova anayunva omugayo amango rhwamamubulira obukenge, aliko rhukamukenga rhunasimiisa omurhima gwage.—Zb. 78:41; Mez. 27:11.

RHWAKAYIGA KUYUBAHA MUNGU

6. Njira ehe nguma y’akarhurhabala rhuyige kuyubaha Mungu? (Zaburi 34:11)

⁶ Rhurhaburhwa eyi rhugwerhe obuba ku Yehova, rhukwanene kuyiga kujira ntyo. (Osome Zaburi 34:11.) Njira nguma rhwakajiramo ntyo kuli kulolereza obulemi. Amango rhwamarhegera okuntu ebintu Yehova alemere biyerekene obwengehe bwage, n’obuzigire arhugwerheko, byanarhuma rhwamukenga bwenene n’okumuzigira. (Ro. 1:20) Mwali-werhu oyirikirwe Adrienne aderhere ntya: “Eyindola ebintu byoshi Yehova alemere, n’okubona okuntu Yehova ali mwengehe, binansomeza n’okuntabala ntegere oku Yehova ab’amenyere echankabera chinja.” Bulala buli mango aliri awaza kw’echola, aderha ntya: “Intaba ndozeze kujira echintu choshi-choshi chakahanyagaza obwira bwani haguma na Yehova, bulala y’ewandemaga.” Orhole bisanzi bilebe mulinola boso, okengeere bwenene oku chintu chilebe Yehova alemere. Okujira ntyo kwarhuma wakenga Yehova bwenene n’okumuzigira loshi.—Zb. 111:2, 3.

7. Gurhe esala lyakarhurhabala rhugwarhe obuba bukwanene ku Yehova?

⁷ Enjira rhwakakuzam’obuba bwerhu ku Mungu, kuli kumusalira oku kahunda. Amango rhulirhwasalira Yehova buli mango, kurhwanagenderera kumumenya bwinja. Amango moshi rhulirhwahema Yehova arhuhe emisi yirhugala kulembera ebibazo, rhwanayibuka kangana gurhe agwerhe emisi. Nka rhugenderere kubwira Yehova koko oku mpano arhuhere y’Omugala wage, rhwanayibuka kangana gurhe Yehova abarhuzigiire. Kandi amango rhwamalakirira Yehova arhurhabale oku chibazo rhugwerhe, rhwanaba eyi rhuyibukire oku ali mwengehe bwenene. Amasala mali nk’amola manarhurhabala rhukenge Yehova bwenene. Kandi, manarhuma rhwahigirira bwenene kuchilanga kujira echintu choshi-choshi chakabihya obwira bwerhu haguma naye.

8. Bichi rhwakajira yirhurhaheza obuba bwerhu ku Mungu?

⁸ Rhwakagenderera kugwarha obuba bukwanene ku Mungu omu kugenderera kuyiga Ebiblia, eyirhunagwerhe omuhigo g’okuyiga chintu chilebe kugerera emifano minja, n’emifano mibi elimo. Lekaga rhuganire ku mifano ebiri y’abakozi bemana ba Yehova, k’okuderha, Obadiya mwishingizi w’enju ya Mwami Ahabu n’Omudahwa Mukulu Yehoyada. Rhwabona bichi rhwakayiga kugerera Omwami Yehoashi we Yuda, warhonderaga bwinja aliko buzinda aleka kukolera Yehova.

OGWARHE OBUSHIRU KUGUMA NA OBADIYA

9. Nka gurhe obuba Obadiya aligwerhe ku Yehova bwalimurhabere? (1 Wafalme 18:3, 12)

⁹ Ahantu hoburhanzi Ebiblia ederhere ku Obadiya,b emuderhereko ntya: “Obadiya aliyubahire Yehova bwenene.” (Osome 1 Wafalme 18:3, 12.) Nka gurhe obuba bukwanene bwalirhabere Obadiya? Bwalimurhabere abe muntu onaderha okuli, na munihirwa, naho Mwami amujira mwishingizi w’eby’omunju yage. (Huzanya na Nehemia 7:2.) Obuba Obadiya aligwerhe ku Mungu bwalimuhereze kandi obushiru bunene, kweri alikenere eyola ngeso. Alilamire omu mango m’oburhegesi b’Omwami mubi Ahabu, waliri “mubi bwenene omu masu ma Yehova, kulusha [abami] boshi bamurhangaga.” (1 Fa. 16:30) Kandi, muka Ahabu yekala Yezebeli waliri aharamya Baali, alishombere Yehova bwenene, analiri achihangana kubuza buli yeshi waliri aharamya Yehova omu bwami bw’amoko ekumi bwe Izraeli. Anayirha chiro banene omu balebi ba Mungu. (1 Fa. 18:4) Nta ngangane, Obadiya aliri aharamya Yehova omu bihe bikomere bwenene.

10. Bichi biyerekene oku Obadiya aligwerhe bushiru bunene bwenene?

¹⁰ Nka gurhe Obadiya aliyerekene obushiru bunene? Amango Yezebeli arhondera kuhiga abalebi ba Mungu yabayirha, Obadiya arhola abalebi 100 mubo ababisha omu “bigusho bya makumi marhano makumi marhano, abaheba omu lukunda anagenderera kubahereza omugati n’amenji.” (1 Fa. 18:13, 14) Nka Yezebeli amenyaga oku Obadiya abishire abola balebi, akamuyirhire naye. Kweri byakashobokana oku Obadiya naye aliyubahire, arhalilonzeze bamuyirhe. Aliko, Obadiya alizigiire Yehova na balala baliri bamukolera, kulusha okuntu alichizigire yewe yenyine.

11. Nka gurhe abakozi ba Yehova ba mu zinola siku zerhu bali kuguma na Obadiya? (Olole n’efoto.)

¹¹ Banene omu bakozi ba Yehova zene, balamire omu bihugo akasi kerhu kalahizwemo. Kuguma na Obadiya, bene-berhu na bali-berhu bazigirwa balahire kuleka kukolera Yehova. Chiro akaba ntyo, yibayerekana oku bagwerhe obukenge oku barhegesi. (Mt. 22:21) Balibayerekana oku bayubahire Mungu omu kumukenga ahali h’abantu. (Mdo. 5:29) Bali bajira ntyo omu kugenderera kuhubiri emyazi minja n’omu kujira embuganano haguma eyi banachibishire. (Mt. 10:16, 28) Bali bajira okwabo koshi yi bene-babo na bali-babo bagenderera kupata ebibakenere, yibakomeza obwira bwabo haguma na Yehova. Rhuganirage oku mufano gwa mwene-werhu Henri, walilamire mu chihugo chiguma ntya ch’omu Afrike emunda akasi kerhu kalilahizwe mu mango maguma. Amango akasi kerhu kalilahizwe eyola munda, mwene-wehu Henri aliri achihana oku bulonza y’ahekera bene-babo na bali-babo ebitabu. Ayandikire ntya: “Nyono mba muntu onayunva eshoni. Bolola menyere bwinja-bwinja oku obukenge bunene nayerekere Yehova b’obwarhumire nagwarha obushiru nalikenere.” Obwene nko’gwerhe obushiru kuguma na Henri si? Wakabugwarha nk’ogwerhe obuba bukwanene ku Mungu.

OBE MUNIHIRWA KUGUMA N’OMUDAHWA MUKULU YEHOYADA

12. Nka gurhe Omudahwa Mukulu Yehoyada na mukage, baliyerekene obwimana bukomere ku Yehova?

¹² Omudahwa Mukulu Yehoyada, aliyubahire Yehova, kandi obola buba bwamushunika abe munihirwa anaheba abandi omurhima n’abo baharamye Yehova. Ebyola byalibonekene amango, Ataliya, mwali wa Yezebeli, anyakura obwami, n’okuhwanza kurhegeka nka mwami-kazi we Yuda omu njira erhakwanene. Abantu baligwerhe empanvu ziyunvikene z’okuyubaha Ataliya. Aliri munizi analigwerhe enyorha enene y’okuba mwami-kazi, naho alonza gurhe akayirha abanjukulu bage boshi, yagala kurhambula! (2 Ny. 22:10, 11) Muguma mw’abola bana, k’okuderha, Yehoashi, alifumire bulala muka Yehoyada, yekala Yehoshabedi alimubishire. Yehoyada na mukage, balibishire oyola mwana banagenderera kumushishikala. Omu kujirantyo, Yehoyada na mukage balirhabere kulanga omuburhwa w’omu chizazi cha Daudi wakabere Mwami. Yehoyada aliri mwimana ku Yehova arhazigaga okuyubaha Ataliya kwamubuza kujira amenja.—Mez. 29:25.

13. Amango Yehoashi ayeneza myaka mushanvu, gurhe Yehoyada alishubire kuyerekana obwimana?

¹³ Kandi Yehoyada aliyerekene oku ali mwimana ku Yehova amango Yehoashi ayeneza myaka mushanvu, ajira omupango na nkagwanayeneraga Yehoashi akabere Mwami, muntu walikwanene kushokola echirhi cha Daudi. Nk’ogola mupango gurhayeneraga, Yehoyada akayirhirwe. Kugerera oburhabale bwa Yehova ogola mupango gwayenera. Yehoyada, alirhaberwe n’abakulu, na Balawi, bayimika Yehoashi abe Mwami, na Ataliya bamuyirha. (2 Ny. 23:1-5, 11, 12, 15; 24:1) Yehoyada “ajira endagano haguma na Yehova na Mwami n’abantu oku bakagenderere kuba bantu ba Yehova.” (2 Fa. 11:17) Kandi Yehoyada aheba “abalanzi b’emilyango mizibu-zibu oku milyango mizibu-zibu y’enju ya Yehova, y’omuntu yeshi orhachere omu njira yoshi-yoshi arhajagamo.”—2 Ny. 23:19.

14. Mu njira ehe Yehoyada alihabirwe olukengo bulala alikengere Yehova?

¹⁴ Yehova abaga aderhere ntya: “Balala banampereza olukengo, Nani nabaha olukengo.” Omufano, Yehova aligishire Yehoyada. (1 Sa. 2:30) Ebijiro binja bya Yehoyada byayandikirwe omu Biblia yibirhuyigiriza. (Ro. 15:4) Amango Yehoyada afa, alihabirwe olukengo l’okuhambwa “omu Vile ya Daudi haguma n’abami bulala ajirire amenja omu Izraeli, oku bilolere Mungu w’okuli n’enju yage.”—2 Ny. 24:15, 16.

15. Bichi rhwakayiga kugerera engani ya Yehoyada? (Olole n’efoto.)

¹⁵ Engani ya Yehoyada yakarhurhabala nerhu rhugwarhe obuba ku Yehova. Abashamuka bakayiganya omufano gwa Yehoyada omu kuwaza buli mango mu njira zihe bakagala kulangamo echibaga. (Mdo. 20:28) Abakala bashajire bakayiga kugerera omufano gwa Yehoyada amango bali bayubaha Yehova n’okugenderera kuba bemana, Yehova akabakolesa yayeneza obulonza bwage. Yehova arhabajahika. Abachiri misole nabo, bakamuyiganya amango bali bayereka bene-berhu na bali-berhu bashajire oku babazigiire n’okubayereka obukenge, ahanene balala bakolere Yehova mu myaka minene oku bwimana. (Mez. 16:31) Oku buzinda, rhweshi rhwayiga esomo lilebe kugerera abakulu na Balawi balishigikire Yehoyada. Rhweshi rhushigikire oku bwimana “abali barhuyerekeza” omu kubakenga.—Ebr. 13:17.

ORHABAGA KUGUMA NA MWAMI YEHOASHI

16. Bichi biyerekene oku Mwami Yehoashi arhaliri muntu mwinja?

¹⁶ Yehoyada alirhabere Mwami Yehoashi abe muntu mwinja. (2 Fa. 12:2) Bolola amango Mwami alichiri musole ali lonzeze kusiimisa Yehova. Aliko, buzinda Yehoyada amala kufa, Yehoashi ahwanza kuyunviriza abarhwali bebigamba. Naho byaba gurhe? Ahwanza “kukolera enkingi zichesibwa n’ebishushanyo.” (2 Ny. 24:4, 17, 18) Chiro akaba oku Yehova aligayire bwenene “agenderera kubarhumira abalebi yi babagalula aliko balahira kubayunviriza.” Chiro barhayunvirizaga Zakariya mugala wa Yehoyada, orhaliri mulebi na Mudahwa wa Yehova konyine s’aliko analiri muzala wa Yehoashi. Yehoashi ayirha Zakariya, n’obo omulala gwa Zakariya balirhabere Mwami Yehoashi bwenene.—2 Ny. 22:11; 24:19-22.

17. Bichi byalijire byahikira Yehoashi?

¹⁷ Yehoashi arhagendereraga kugwarha obuba bukwanene ku Yehova, na buzinda ebintu byayinja kubiha. Yehova abaga aderhere ntya: “Balala banasuzagura nani nabakolera n’akasuzaguro.” (1 Sa. 2:30) Abasoda bageke be Siriya bahima Yehoashi eyi “anagwerhe basoda banene bwenene,” kandi “banamukoromesa bwenene”. Buzinda Abanyasiriya bamala kugenda, abakozi ba Yehoashi bamuyirha bulala naye aliyirhire Zakariya. Abantu babona oku oyola mwami aliri mubi bwenene, n’oku arhakanahambirwe aha baliri bahamba abami.”—2 Ny. 24:23-25.

18. Nk’oku olwandiko lwa Yeremia 17:7, 8 luyerekene, gurhe rhwakajira yirhurhaba kuguma na Yehoashi?

¹⁸ Bichi rhwakayiga kugerera omufano gwa Yehoashi? Aliri nka murhi gugwerhe emizi erhagerere hale omu budaka, gwalikenere oburhabale b’ogwindi murhi b’okubushigikira. Buzinda amango omuntu waliri amurhabala amala kufa, k’okuderha Yehoyada, Yehoashi ahwanza kuyunviriza abarhwali barhaliri bakenga Yehava, arhanachigendereraga kubera mwimana emwa Yehova. Ogula mufano gurhuyerekere oku rhurhakwanene kukenga Mungu konyine bulala abantu b’omu mulala gwerhu n’abandi Bakristu b’omu chibaga barhuyerekere olwiganyo l’okujira ntyo. Yirhugenderera kukomera ekiroho rhukwanene kukomeza obwira bwerhu haguma na Yehova omu kugenderera kumuyubaha omu njira ekwanene, omu kusoma Echinwa chage buli lusiku, okuchikengerako, n’omukusalira.—Osome Yeremia 17:7, 8; Kol. 2:6, 7.

19. Bichi Yehova arhuhemere rhujirage?

¹⁹ Kweri Yehova arharhuhemere rhujire bintu binene bwenene. Ebyarhuhemere rhujire bili omu chitabu cha Muhubiri 12:13, haderhere ntya: “Oyubahe Mungu w’okuli onakenge amarhegeko mage, bulala echola ch’omuntu akwanene kujira.” Amango rhwamayubaha Mungu, rhwagala kulwisa ebibazo by’amango mayinjire, n’okubera bemana kuguma na Obadiya na Yehoyada. Nantacho charhukula omu bwira bwerhu haguma na Yehova.