Walimenyere Si?

Bulagurhe Ebiblia Enagalukira Binwa Biguma Biguma?

MANGO maguma abandisi be Biblia baliri bagalukira emisemwa y’eneyo chinwa oku chinwa. Rhuganire ku mpanvu 3 zakaba eyi zarhumaga abola bandisi bajira ntyo:

Amango yayandikagwa. Omu Izraeli ya mira hofi abantu boshi barhaliherhe eyabo yabo kopi y’Esheriya. Banene mubo bagendaga bayunviriza amango Esheriya yaliri yasomwa oku tabernakulo. (Kum. 31:10-12) Bikwanene kuba eyi haliri bintu binene byakarhumire omuntu ahugwa amango aliri ayunviriza anayumangire omu chigusho ch’abantu banene, mu bisanzi binene. (Ne. 8:2, 3, 7) Omu bihe bili nk’ebyola, okugalukira ebinwa bikulu kwakarhabere abantu bagale kuyibuka amandiko n’okukolesa ebiderherwemo. Kweri, okugalukira binwa bilebe kwakabarhabere kuyibuka ebintu by’akamaro by’omu sheriya Yehova abaga abahere.—Law. 18:4-22; Kum. 5:1.

Okuntu yayandikagwa. Bigabi biguma bye Biblia biyandikirwe nka nyimpo, omufano echitabu cha Zaburi, Wimbo wa Sulemani n’echa Maombolezo. Hali nyimpo zijira ekorasi, zinarhuma ebinwa byafarhana n’okurhabala abali baziyunviriza bazifarhe omu bwenge. Omufano, olole ebinwa biderherwe omu Zaburi 115:9-11: “Izraeli wee, mulangalire Yehova—bulala ye malibirhiro mabo na mpenzi yabo. Inju ya Haruni wee, mulangalire Yehova—bulala ye malibirhiro mabo na mpenzi yabo. Mwabo bayubahire Yehova, mulangalire Yehova—bulala ye malibirhiro mabo na mpenzi yabo.” Wabwene gurhe okugalukira ebyola binwa kwarhabere abantu bagale kubika obola bukweri bw’akamaro omu bwenge n’omu mirhima amango bali bayimpa?

Bulagurhe yayandikagwa. Abandisi be Biblia baliri bagalukira emistari y’akamaro. Omufano, amango Yehova abuza Abaizraeli kulya eshagama, alilonze oku Musa agalukire bwenene empanvu erhumire ababuza eshagama. Mungu alilonzeze abayereke okw’akalamo kaba omu shagama, k’okuderha okw’eshagama eshushanyize akalamo. (Law. 17:11, 14) Enyuma waho, amango entumwa n’abashamuka be Yerusalemu bayerekana enjira z’akamaro zakarhabala Abakristu bagenderere kusimisa Mungu, balishubire galukira akamaro k’okuchiyasya n’eshagama.—Mdo. 15:20, 29.

Chiro akaba okwe Biblia egalukire binwa biguma biguma, echola chirhalonzeze kuderha oku Yehova alonzeze rhugwarhe engeso y’okugalukira emistari ye Biblia. Omufano, Yesu aliderhere ntya: “Amango mwamasalira, murhagalukiraga ebyola binwa byenebyo.” (Mt. 6:7) Aliyerekene ebindi binwa bikwanene omu sala bipatene n’obulonza bwa Mungu. (Mt. 6:9-13) Bobola, chiro akaba rhurhagalukira binwa biguma byenebyo omu masala merhu, rhugwerhe orozo l’okugalukira buli mango chintu chilebe rhulonzeze Yehova arhuhereze.—Mt. 7:7-11.

Echinwa cha Mungu chifuhererwe n’eroho lyage lichesibwa, chigwerhe empanvu nyinja z’okugalukira binwa bilebe na mistari milebe. Eli njira nguma mu njira zinene Mwigiriza werhu Mukulu anakolesa omu kurhuyigiriza yirhupata enyungu.—Isa. 48:17, 18.