Omulala Gwawe Gwakagwarha Obusime

1, 2. Bichi Yehova alonzeze emilala?

YEHOVA yewarhonderesaga obuhya ahakagarhi k’omulume n’omukazi barhanzi. Ebiblia ederhere oku amalire kulema omukazi murhanzi “amulerha emunda omulume ali.” Adamu asima bwenene, n’okola kwarhuma aderha ntya: “Halaga egufa ly’amagufa mani n’omunyofu gw’omunyofu gwani.” (Mwanzo 2:22, 23) Ebyola birhuyigirize oku Yehova asimire abantu bashabene bagwarhe obusime.

² Ech’okugayisa, kuli kubona oku bantu banene barhaherhe akalamo k’omulala kasimisize. N’obola, Ebiblia eyunjulirene enyigirizo zakarhabala abantu boshi b’omulala balame haguma oku busime.​—Luka 11:29.

EBI MUNGU AHEMERE ABALUME

3, 4. a) Gurhe umulume akwanene kujirira mukage? b) Bulagurhe omulume na mukage bakwanene ba babalirane?

³ Ebiblia ederhere oku omulume akwanene asime mukage, ana mukenge. Osome Waefeso 5:25-29. Omulume akwanene okugenderera kukolera mukage oku buzigire, amulange, anamulageko. Nta lusiku akwanene okumujira kubi.

⁴ Gurhe omulume akajira, nka mukage amagoma? Ebiblia ebwirire abalume ntya: “Mugenderere okusima bakenyu, murhanabarhunduliraga n’echishika.” (Wakolosai 3:19) Akaba oli mulume, oyibuke oku nawe onajira amagosa. Akaba osimire Mungu akubabalire, okwanene obabalire mukawe. (Matayo 6:12, 14, 15) Omulume na mukage bakwanene okubabalirana juba-juba, y’obuhya bwabo bugwarha obusime.

5. Bulagurhe omulume akwanene akenge mukage?

⁵ Yehova ahemere abalume bakenge bakabo. Omulume akwanene okuwaza bwenene kubyoshi mukage alagirire, n’ebyola bili by’akamaro bwenene. Nk’omulume arhakolere mukage nk’okubihemere, Yehova arhakayunviriza esala zage. (1 Petro 3:7) Yehova anabona abakazi, kuguma n’oku anabona abalume. Obuzigire omuntu aherhe ku Yehova, bo bwakarhuma Yehova omubona oku ali w’akamaro.

6. Okuba “mubiri muguma” k’omulume n’omukazi, k’okuderha gurhe?

⁶ Yesu aliderhere ok’omulume n’omukazi “barhachili babiri, s’aliko mubiri muguma.” (Matayo 19:6) Buli muguma, akwanene okubera mwimana oku wabo. (Mezali 5:15-21; Waebrania 13:4) Omulume akenere mukage, n’omukazi akenere omulume wage. (1 Wakorinto 7:3-5) Omulume akwanene okuyibuka oku “nta muntu wachigerere kugaya omubiri gwage; s’aliko, anagulisa n’okugushishikala.” K’okuderha ok’omulume akwanene okusima mukage n’okumushishikala. Ech’omukazi anasima okubunene, kuli ok’omulume wage amubere mwinja anamusime.​—Waefeso 5:29.

EBI MUNGU AHEMERE ABAKAZI

7. Bulagurhe omulala gukenere omwimangizi?

⁷ Buli mulala gukenere omwimangizi, kuli kuderha ok’olala w’okuguyerekeza y’abantu bamo balama haguma bwinja. Rhwasoma ntya omu lwandiko lwa 1 Wakorinto 11:3: “Erhwe lya buli mulume, ali Kristu; n’erhwe ly’omukazi, ali mulume; n’erhwe lya Kristu, ali Mungu.”

8. Gurhe omukazi akayerekana oku akengere omulume wage bwenene?

⁸ Abalume boshi banajira amagosa. S’aliko, amango omukazi ali ayemera amawazo m’omulume wage mu byoshi ali akola, n’okuganira haguma naye n’omurhima goshi, ebyola byanalerhera omulala goshi ebintu binja. (1 Petro 3:1-6) Ebiblia ederhere ntya: “Omukazi akwanene akenge omulume wage bwenene.” (Waefeso 5:33) Gurhe byakaba nk’omulume arhaherhe obwemere buli kuguma n’obwa mukage? Akwanene anamukenge bwenene. Ebiblia ederhere ntya: “Mwewe bakazi, mukenge abalume benyu, bulala akaba hali abarhakega omwazi, basimiswe kugerera oborhere bwa bakabo, kwabulala bachibwenere oku masu mabo bonyine oborhere byenyu buchere, bunayunjulirene bukenge bunene.” (1 Petro 3:1, 2) Omukazi oherhe engeso zinja, akarhabala omulume wage ayemere obwemere bwage anabukenge.

9. a) Gurhe omukazi akajira nk’arhasimire eby’omulume wage ajirire? b) Mpanulo zihe zilolere abakazi zili omu lwandiko lwa Tito 2:4, 5?

⁹ Gurhe omukazi akajira nk’arhasimire eby’omulume wage ajirire? Akwanene amubwire eby’awazize n’obukenge. Rhurhole omufano gwa Sara. Lusiku luguma abwira omulume wage, Abrahamu, echintu chi rhamusimisize. Aliko, Yehova abwira Abrahamu ntya: “Omuyunvirize.” (Mwanzo 21:9-12) Omulume w’omukristu arhazigana kukola ebye Biblia elahize, che chirhumire omukazi akwanene okuyemera eby’omulume wage aderhere. (Matendo 5:29; Waefeso 5:24) Oku bunene, omukazi oherhe obwenge anachihangana kushishikala omulala gwage. (Osome Tito 2:4, 5.) Amango omulume wage n’abana bage bali babona gurhe ali akola bwenene eju yabo, banamusima n’okumukenga bwenene.​—Mezali 31:10, 28.

10. Bichi Ebiblia ederhere oku bilolere okulekana n’okushanda obuhya?

¹⁰ Hali amango omulume n’omukazi, bakachishoga juba-juba okulekana changwa okushanda obuhya bwabo. S’aliko, Ebiblia ederhere ntya: “Omukazi arhalekanaga n’omulume wage.” Eshubire derha “ok’omulume arhakwanene okuleka mukage.” (1 Wakorinto 7:10, 11) Hakagera amango banalekana. S’aliko, bakwanene okuwaza bwenene embere balekane. Aliko si, bichi Ebiblia ederhere oku bilolere okushanda obuhya? Erhuyigirize oku Yehova ayemerere njira nguma yonyine y’okushanda obuhya. Chintu chiguma chakarhuma omulume n’omukazi bashanda obuhya, nka muguma mubo ajirire echijiro ch’obuhya n’owindi muntu orhali mulume wage, changwa mukage.​—Matayo 19:9.

EBI MUNGU AHEMERE ABABUSI

11. Oku bunene, bichi abana bakenere?

¹¹ Akaba oherhe abana, ogeze bisanzi binene haguma nabo. Abana benyu bakenere okuba haguma nenyu. N’oku bunene, bakenere mubarhabale bamenye Yehova.​—Kumbukumbu la Torati 6:4-9.

12. Bichi ababusi bakwanene okujira yi balanga abana babo?

¹² Egulu lya Shetani lili lyagenderera kubiha bwenene. Hali bantu baguma bakalonza okujira abana benyu kubi, changwa oku bafarhira emisi. Birhayorohere ku bazere baguma, oku ganirira ebyola n’abana babo. S’aliko, bakwanene okukomereza n’okubwira abana babo gurhe bakachilanga kw’abola bantu. Akaba oherhe abana, okwanene kubalanga.a​—1 Petro 5:8.

13. Gurhe ababusi bakwanene kuyigiriza abana babo?

¹³ Ababusi baherhe akasi k’okuyigiriza abana babo gurhe bakachigendesa bwinja. Gurhe wakayigiriza abana bawe? Abana bawe bakenere bayigirizwe, s’aliko amango wamabahana, orhakwanene kujira ntyo n’oburhe n’oku bubandi. (Yeremia 30:11) K’okuderha ok’orhabahanaga amango ochiyunvirhe oburhe. (Olole amahugulo ma 30, bukurasa bwa 223). Orhabavunaga omurhima omu kubabwira “ebinwa binacha nka mupanga.” (Mezali 12:18). Obabwire bwinja bulagurhe bakwanene bakenge.​—Waefeso 6:4; Waebraniya 12:9-11.

EBI MUNGU AHEMERE ABANA

14, 15. Bulagurhe abana bakwanene bakenge ababusi babo?

¹⁴ Yesu aligenderere kukenga Eshe esiku zoshi, chiro n’amango byalikomere okujira ntyo. (Luka 22:42; Yohana 8:28, 29) Konakuguma, abana nabo bakwanene bakenge ababusi babo, bulala ntyo ku Yehova alonzeze.​—Waefeso 6:1-3.

¹⁵ Akaba oli mwana, nkabaga onabona oku birhayolohere okukenga ababusi bawe. Aliko, oyibuke oku amango wamakenga, Yehova n’ababusi bawe banasimiswa nawe bwenene.b​—Mezali 1:8; 6:20; 23:22-25.

16. a) Gurhe Shetani anahiga ashumika emisole ekole ebintu bibi? b) Bulagurhe bili by’akamaro bwenene abera bawe babe bantu basima Yehova?

¹⁶ Shetani akakolesa abera bawe changwa eyindi misole, omu kukushumika okole ebintu bibi. Aba amenyere oku biba bikomere okulekana n’amashumi m’abandi. Rhurhole omufano gwa Dina, mwali wa Yakobo. Aliherhe abera barhalisimire Yehova. Ebyola byabalerhera bibazo binene, yewe n’omulala gwage. (Mwanzo 34:1, 2) Akaba abera bawe barhasima Yehova, hali okuntu nji bakakushumika okole echintu chinamugayisa. Nk’ojirire echintu chibi, wanagayisa omulala gwawe na Mungu, nawe wenyine, wanalibuka. (Mezali 17:21, 25) Chechirhumire, bili by’akamaro bwenene abera bawe babe bantu basima Yehova.​—1 Wakorinto 15:33.

OMULALA GWAWE GWAKAGWARHA OBUSIME

17. Bichi Mungu ahemere buli muntu omu mulala?

¹⁷ Nka buli muntu omu mulala amakola ebi Mungu amuhemere, barhakagwarha bibazo binene. Akaba oli mulume, osime mukawe, ona mukolere oku buzigire. Akaba oli mukazi, okenge omulume wawe, onachirhohye embere zage. Oyiganye omufano g’omukazi oderherwe omu lwandiko lwe Mezali 31:10-31. Akaba oli mubusi w’omulume changwa w’omukazi, oyigirize abana bawe gurhe bakasima Mungu. (Mezali 22:6) Akaba oli mulume, oyerekeze omulala gwawe omu “njira ekwirire.” (1 Timoteo 3:4, 5; 5:8) Akaba oli mwana, okenge ababusi bawe. (Wakolosai 3:20) Onayibuke oku rhweshi rhunagoma. K’okuderha oku rhukwanene kuba berhonzi n’okuhemana obubabale. Buli muntu omu mulala akabona empanulo Yehova amuhere omu Biblia.