Bamaburha Omwana w’Oburhabana!

Haligerere myaka minene eyi Abrahamu na Sara bashabene. Balilekere enju yabo ekwirire omu vile ye Uru, n’okuja kulama omu hema. Chiro akaba ntyo, Sara arhaliri alaka-laka bulala alilangalire Yehova.

Sara aliri achifija bwenene gurhe akaburha omwana. Naho, abwira Abrahamu ntya: ‘Nk’omuja-kazi wani Hagari, aburhire omwana, nakamubona nka mwana wani.’ Hagerere esiku, Hagari aburha omwana w’oburhabana. Ezino lyage lyaliri Ishmaeli.

Enyuma wa myaka minene, amango Abrahamu aligwerhe myaka 99 na Sara myaka 89, bageni 3 babalambagirira. Abrahamu abahamagala bayikale omu shi w’omurhi n’okusangira akalyo haguma nabo. Oyinji si abola bageni 3 baliri bantu nyabachi? Baliri bamalayika! Babwira Abrahamu ntya: ‘Omu mwaka gwayinjire mu kanola kasanzi, woyo na mukawe nji mwaburha omwana w’oburhabana.’ Sara aliri ayunviriza ebi bali baderha ey’anali omu hema. Achishekera n’okuwaza ntya: ‘Kweri si nakachiburha omwana, nobo nkala shajire bwenene ntya?’

Omu mwaka gwakulikiragaho, Sara aburha omwana w’oburhabana, nk’oku malayika wa Yehova analaganyaga. Abrahamu amuyirika oku zino lya Isaka, k’okuderha, “Masheka.”

Amango Isaka agwarha nka myaka 5 ntya, Sara obona Ishmaeli aly’ahambarira (ahangala) Isaka. Bulala Sara alilonzeze kulanga omugala, aja emunda Abrahamu ali n’okumubwira afukuze Hagari na Ishmaeli. Burhanzi, Abrahamu arhalilonzeze kujira ntyo. Aliko Yehova abwira Abrahamu ntya: ‘Oyunvirize Sara. Nashishikala Ishmaeli. Aliko ebilagane byani nji byayenera kugerera Isaka.’