Abrahamu na Sara Balikengere Mungu

Hofi ne Babeli, haliri evile eyirikirwe Uru. Abantu balilamire mw’eyola vile baliri baharamya bamungu banene, olekere Yehova. Aliko ahaliri mulume muguma omu Uru waliri waharamya Yehova yenyine. Ezino lyage aliri Abrahamu.

Yehova abwira Abrahamu ntya: ‘Orhenge ahamwenyu onaleke abantu b’omulala gwenyu, oje omu chihugo nakuyereka.’ Naho Mungu amulaganya ntya: ‘Nji waba shanja lizibuzibu, kandi nji najirira bantu banene ebintu binja oku gulu lyoshi eju yawe.’

Abrahamu arhalimenyere emunda Yehova aliri amurhuma, aliko alilangalire Yehova. Bobola Abrahamu, mukage Sara, eshe Tera, na Loti, k’okuderha omwana wa mukulu wage, bayerekana oku bakengere Mungu. Bashana ebintu byabo n’okuhwanza olugenzi lulehere.

Abrahamu aligwerhe myaka 75, amango yewe n’abantu b’omulala gwage bahika omu chihugo Yehova alilonzeze kubayereka. Echola chihugo chaliyirikirwe Kanaani. Eyola munda, Mungu aganira na Abrahamu amulaganya ntya: ‘Echila chihugo choshi chikuzungulukire, nji nachiha abana bawe.’ Aliko Abrahamu na Sara balikala bashajire eyi chiro nta mwana n’omuguma bagwerhe. Bobola si, gurhe Yehova ajaga ayenezaga echilagane chage?