Obwemere Bwage Bwamageregezwa

Abrahamu aliyigirize omugala Isaka kuzigira Yehova n’okulangalira ebilagane byage byoshi. Aliko, amango Isaka agwarha myaka 25 ntya, Yehova abwira Abrahamu ajire chintu chilebe chikomere bwenene kujira. Chintu chihe echola?

Mungu abwira Abrahamu ntya: ‘Wekalamawe, rhola mugala wawe w’echinege omuhane nka nterekero oku musozi omu chihugo che Moriya.’ Abrahamu arhalimenyere chiro bulagurhe Yehova amuhemere ajire ntyo. Aliko chirharhumaga arhakenga Yehova.

Esezi-sezi olusiku lwakulikiragaho, Abrahamu arhola Isaka na bakozi bage babiri bagenda e Moriya. Bamalire siku esharhu bali balambagira, bahwanza kulangira eyola misozi. Abrahamu abwira abola bakozi bage babalindire ahola, oku yewe na Isaka baja kuhana enterekero. Abrahamu ahesa Isaka eshali naye aheka akeri. Isaka abaza eshe ntya: ‘Ngahe enyama eli rhwaja kuhana nka nterekero?’ Abrahamu amushubiza ntya: ‘Mwana-wani, Yehova yenyine arhuhayo.’

Buzinda bahika k’ogola musozi, bayumbaka amazabahu. Naho Abrahamu ashweka Isaka amaboko n’amagulu n’okumulyamikiza oku mazabahu.

Abrahamu achomola akeri. Aho han’aho malayika wa Yehova amuhamagala kurhenga embingu: ‘Abrahamu! Omenye wakoromesa oyo murhabana! Namaja nabona k’oherhe obwemere mu Mungu, bulala waliri tayari kuhana mugala wawe nka nterekero.’ Naho Abrahamu abona entama y’omushakalume eyi amahembi mayo mazabire omu bishaka. Ashwekula Isaka aho han’aho n’okuhana eyola ngandabuzi nka nterekero ahali h’omugala.

Kurhenga olola lusiku na kugenderera, Yehova ahamagala Abrahamu mwira wage. Oyinji echarhumaga si? Abrahamu aliri ajira buli choshi Yehova amuhemere ajire, na chiro akaba arhalimenyere bulagurhe Yehova amuhemere ajire ntyo.

Yehova agalukira echilagane abaga ahere Abrahamu: ‘Nakugisha, kandi n’abana bawe baba banene bwenene.’ K’okuderha oku Yehova akagishire abantu benja boshi kugerera omulala gwa Abrahamu.