Omuja Walikengere Mungu

Yosefu aliri muguma w’omu bagala badorho ba Yakobo. Bakulu bage balibwene oku Yosefu ye mwana eshe anasima bwenene. Gurhe owazize baliri bachiyunva okubilolere Yosefu? Baliri bamuyunvira obongwa n’okushomba. Amango Yosefu alorha ebilorho bisomeze, abwira bene-babo ebyola bilorho. Bawaza okw’ebyola bilorho bilonzeze kuderha oku lusiku luguma nji bayinama embere zage. Lero, baja bashuba kumugaya bwenene!

Lusiku luguma bene-babo Yosefu baliri balagira entama hofi ne vile ye Shekemu. Yakobo arhuma Yosefu aje kulola akaba banakomere. Balangirire Yosefu aly’ayinja, babwirana ntya: ‘Mulole, olala onazigana kulorha ebilorho ayinjire. Rhumuyirhe bazawe!’ Bamufarha n’okumukabula omu chishimu. Aliko, Yuda, muguma wa mw’abola bene-babo aderha ntya: ‘Rhumenye rhwamuyirha! Si rhumuguze abe muja.’ Bobo baguza Yosefu ku bichira 20 bye arja oku bachuruzi be Midiani baliri baja e Misri.

Naho bene-babo Yosefu barhola omwambaro gwage bagudubika omu shagama y’empene bagurhumira eshe n’okuderha: ‘Ogula gurhali mwambaro gwa mugala wawe si?’ Yaboko awaza okw’echinyalubala chayirhire Yosefu. Agaya bwenene. Ntaye wakagalire kumurhuliriza.

Baguza Yosefu omu Misiri abe muja em’omukulu muguma w’oku bwami waliyirikirwe Potifa. Aliko Yehova aliri haguma na Yosefu. Potifa abona oku Yosefu ali mukozi mwinja n’okw’akanihirwa. Buzira kulegama, Potifa ajira Yosefu ayumangire buli chintu choshi aligwerhe.

Muka Potifa abona oku Yosefu akwirire bwenene anagwerhe emisi. Buli lusiku aliri abwira Yosefu abarage naye. Gurhe Yosefu alijirire? Alahira n’okuderha ntya: ‘Nanga! Kuli kubi. Bose wani anihire, nawe oli mukage. Nka baraga nawe, naba eyi namajirira Mungu echaha!’

Lusiku luguma muka Potifa ashonda kuseza Yosefu abarage naye. Amufarhira omu myambaro aliko alibirha. Potifa agalukire eka, mukage amubwira oku Yosefu alilonzeze kubaraga naye. Obola bwaliri bubeshi. Potifa ayunva burhe bunene n’okukabula Yosefu omu pirizo. Aliko Yehova arhayibagiraga Yosefu haba n’akatyu.