Yehova Arhayibagiraga Yosefu Chiro

Amango Yosefu aliri omu pirizo, Farao, mwami we Misiri alorha ebilorho, na nta muntu wakagalire kubifasiriya. Muguma omu bakozi ba Farao amubwira oku Yosefu akagala kufasiriya ebyola bilorho. Aho han’aho Farao aderha oku balerhe Yosefu.

Farao amubaza ntya: ‘Wakagala kufasiriya ebilorho byani si?’ Yosefu abwira Farao ntya: ‘Echihugo che Misiri chagwarha bilyo binene mu myaka mushanvu, hanakulikira yindi myaka mushanvu y’enzara. Ochishoge muntu muguma ogwerhe obwengehe wayinja agusha ebilyo omu nguli (amadepo), y’abantu bawe nji barhafa n’enzara.’ Farao ashubiza ntya: ‘Woyo yi nachishogere! Olekere nyono, woyo we waba muntu wakabiri oherhe obukulu bwenene omu Misri!’ Nka gurhe Yosefu agalaga kufasiriya ebilorho bya Farao? Yehova yi wamurhabalaga agale kujira ntyo.

Mu myaka mushanvu yakulikiragaho, Yosefu agusha ebilyo omu madepo. Naho, enzara yaba omu gulu lyoshi nk’oku Yosefu anabaga aderhere. Abantu baliri barhenga eyi n’eyi buli hoshi banayinja kugula ebilyo emunda Yosefu ali. Eshe wa Yosefu abere ayunva oku hali ebilyo e Misiri, arhuma bagala ekumi eyola munda baje kugula y’ebilyo.

Bagala ba Yakobo baja kulola Yosefu, naye abamenya aho han’ahola. Aliko bene-babo bowe barhamumenyaga. Bayinama embere zage, nk’okw’analorhaga amango alichili musole. Yosefu alonza amenye akaba bene-bebo banachiyangana. Naho ababwira ntya: ‘Muli bapererezi. Mulonzeze kumenya obuzamba bw’echihugo cherhu.’ Baderha ntya: ‘Nanga! Rhuba barhabana 12 ba nda nguma, rhwarhenga e Kanaani. Muguma mu rhwabo afire n’omuziba (omuherezi) gwerhu gwayorhere na darha.’ Naho Yosefu ababwira: ‘Munderhere oyola mwene-wenyu mudorho yi nyemera ebi muli mwambwira.’ Bagaluka eka emunda eshe ali.

Amango ebilyo bishuba kuhwera ogola mulala, Yakobo ashuba kurhuma abagala e Misiri. Lero baja bagenda na Benyamini, mwene-wabo mudorho. Y’ageregeza bene-babo, Yosefu ahira echikombe chage che arja omu mufuko gw’embeke gwa Benyamini, aja abashobeka oku bachiyibire. Amango abakozi ba Yosefu babugana echola chikombe omu mufuko gwa Benyamini, bene-babo bagaya bwenene. Babwira Yosefu okw’abahane bowe ahali ha Benyamini.

Yosefu abano oku bene-babo bahindamukire. Arhachigalaga kugenderera kubisha okuntu aliri achiyunva. Ahwanza kulira bwenene n’okuderha ntya: ‘Nyono Yosefu, mwene-wenyu. Darha anachibaho si?’ Bene-babo basomerwa bwenene. Ababwira ntya: ‘Mumenye mwachiyunva kubi eju y’ebimwanjirire. Mungu yi wantumaga enola munda y’alanga akalamo kenyu. Mujage mwajira juba-juba mulerhe darha hano.’

Bagaluka emwabo n’okubwira eshe eyola myazi minja n’okumulerha e Misiri. Enyuma wa myaka minene, Yosefu n’eshe bashuba kubonana.