Rutu na Naomi

Amango enzara yaliri omu Izraeli, mukazi muguma w’Omuizraeli waliyirikirwe Naomi, ahamira omu chihugo che Moabu haguma n’eba na bagala babiri. Enyuma waho eba wa Naomi afa. Mugala muguma ashaba Rutu n’owindi ashaba Orpa, baliri bakazi be Moabu. Ech’okugayisa, enyuma wa kasanzi kalebe, bagala ba Naomi nabo bafa.

Amango Naomi ayunva okw’enzara yahwere omu Izraeli, arhola edesiziyo y’okushuba kugaluka eka. Rutu na Orpa babalama haguma naye, aliko oku banali omu njira, Naomi ababwira ntya: ‘Mwaliri bakazi benja ku bagala bani, mwanali bazana benja emwani. Indozeze mwembi mushube mushabwe. Mugaluke emwenyu e Moabu.’ Abola bakazi bombi baderha ntya: ‘Rhukuzigire! Rhurhalonzeze rhukakuleka.’ Naomi agenderera kubabwira bagaluke. Oku buzinda, Orpa agaluka, aliko Rutu yewe abera. Naomi amubwira ntya: ‘Orpa amagalukira abantu b’obuuko bwage na bamungu bage. Ogaluke naye, oje emwa nyoko.’ Aliko Rutu amushubiza ntya: ‘Intakuleka. Abantu b’obuuko bwawe baba bantu b’obuuko bwani na Mungu wawe aba Mungu wani.’ Gurhe owazize Naomi alichiyunvirhe amango Rutu aderha ntyo?

Rutu na Naomi bageraga omu Izraeli ey’abantu bamarhondera kushalula eshahiri (obulezi). Lusiku luguma, Rutu aja kuhumbuza embeke omu shwa lya mulume muguma waliyirikirwe Bowazi, waliri mugala wa Rahabu. Ayunva oku Rutu ali mukazi w’Omumoabu wachishwekeraga ku Naomi. Abwira abakozi bage oku bayinje baleka mbeke zigeke enyuma omu shwa yi Rutu azihumbuza.

Mw’elyola golo, Naomi abaza Rutu ntya: ‘Omu shwa lya nde wahumbuzaga zene?’ Rutu ashubiza ntya: ‘Omu shwa lya mulume muguma oyirikirwe Bowazi.’ Naomi amubwira ntya: ‘Bowazi ali muguma omu bantu b’omulala gwa bani. Ogenderere kukola omu shwa lyage haguma n’abandi banyere. Ntaye wakuhambarira (wakuhangala) eyola munda.’

Rutu agenderera kuhumbuza omu shwa lya Bowazi kugera amango bamalaga kushalula. Bowazi arhegera oku Rutu ali akola bwenene anali mukazi mwinja bwenene. Mw’agola mango, nk’omulume afire buzira kuburha abana b’oburhabana, omuntu w’omulala gwage akashabire oyola mukazi wafisize eba. Naho Bowazi ashaba Rutu. Baburha omwana w’oburhabana bamuyirika Obedi, wayinjaga kuba shokulu wa Mwami Daudi. Abera ba Naomi basima bwenene. Baderha ntya: ‘Yehova arhangire kuguha Rutu, wakukolere ebinja bwenene, lero amaja aguha n’omunjukulu. Yehova akuzibwe.’