MWAZI G’OKUYIGA 23
Ogenderere Kukoleza “Echirimi ch’Omuliro gwa Yah”
“[Ebirimi by’obuzigire] guli muliro guli gwa guragura bwenene, chirimi ch’omuliro gwa Yah.”—WIM. 8:6.
OLWIMPO 131 “Kile Chenye Mungu Ameunganisha” (“Echi Mungu Ahebere Haguma”)
OKU BUGEKEa
1. Gurhe Ebiblia efasiriye obuzigire b’okuli?
EBIRIMI “by’obuzigire guli muliro guli gwa guragura bwenene, chirimi ch’omuliro gwa Yah. Amenji manene barhakagala kuzimya obuzigire, chiro n’enyinji zizibu-zibu zirhakarhuma bwahirigirha.”b (Wim. 8:6, 7) Amola mali mafasiriyo makwirire bwenene oku bilolere obuzigire b’okuli! Ebyola binwa bihebere omurhima abashabene: Mwakazigirana bwenene buli muguma n’owindi.
2. Bichi omulume n’omukazi bakwanene kujira yibachizera oku obuzigire bwabo burhali bwahola?
2 Bihemere obushiru bunene oku bantu bashabene, yibayerekana obuzigire buli muguma n’owindi amango moshi balamire. Omufano, omuliro gwakayorha gukolerere amango muntu mulebe ali ayongera mw’eshali. Nka ntaye ojirire ntyo, omuliro gwakahikira ahagwazima. Konakuguma n’obuzigire b’omulume n’okukazi, bwakagenderera kukomera amango bali bakomeza obwira ahagarhi kabo. Mango maguma omulume n’omukazi bakachiyunva nka obuzigire bwabo buli bwahola, ahanene amango bali bahurana ebibazo by’okubula efuranga, ebibazo by’amagala, changwa ebindi bibazo bilolere okuntu bakalemba abana babo. Bobola, akaba oli omu buhya, gurhe wakalanga “ebirimi by’omuliro gwa Yah” biyorhe bigulumire omu buhya bwenyu? Mu gunola mwazi, rhwaganira ku njira esharhu zakabarhabala y’obwira bwenyu bugenderera kukomera n’okugwarha obusiime omu buhya.c
MUGENDERERE KUKOMEZA OBWIRA BWENYU HAGUMA NA YEHOVA
Kuguma na Yusufu na Mariya, omulume n’omukazi bakenere kugwarha obwira bukomere haguma na Yehova (Olole echifungo cha 3)
3. Nka gurhe obwira bukomere haguma na Yehova bunarhabala omulume n’omukazi bagenderere kulanga obuzigire bwabo? (Muhubiri 4:12) (Olole n’efoto.)
3 Yibagenderera kulanga “ebirimi by’omuliro gwa Yah,” omulume n’omukazi bakwanene kukola bwenene yi balanga obwira bwabo buyorhe bukomere haguma na Yehova. Nka gurhe obwira bwabo bukomere haguma na Yehova bunagenderera kulanga obuhya bwabo? Amango omulume n’omukazi babwene oku obwira bwabo n’Eshe w’embingu buli bw’akamaro, babatayari kukulikira amahano mage, bulala mamanarhuma bagala kulwisa ebibazo byakarhuma obuzigire bwa buli muguma n’owindi bwahola. (Osome Muhubiri 4:12.) Balala bwagwerhe obwira bukomere haguma na Yehova, kandi banachihangana kuyiganya engeso zage nka: obwinja, okulembera, n’okubabalira. (Efe. 4:32–5:1) Amango omulume n’omukazi bamayerekana ezola ngeso byakabayorohera bwenene obuzigire bwabo bugenderere kukomera. Mwali-werhu Lena, wamamala myaka 25 eyali omu buhya aderhere ntya: “Biba biyorohere okuzigira n’okukenga omuntu oli w’ekiroho.”
4. Bichi byarhumaga Yehova achishoga Yusufu na Mariya oku bababage bazere ba Masiya walilaganyizwe?
4 Waza oku mufano guli omu Biblia. Amango Yehova achishoga omulume n’omukazi bakabere bazere ba Masiya walilaganyizwe, alichishogere Yusufu na Mariya kurhenga mu bantu banene b’omu buko bwa Daudi. Bulagurhe? Bulala buli muguma ali gwerhe obwira bukomere haguma na Yehova, kandi na Yehova ali rhegerere oku bakamuhebere oku nafasi y’oburhanzi omu buhya bwabo yi bugenderera kuba bwinja bwenene. Bichi omulume n’omukazi bashabene bakayiga kugerera omufano gwa Yusufu na Mariya?
5. Bichi abalume bakayiga kugerera omufano gwa Yusufu?
5 Yusufu aliri achihangana kukulikira obwerekezi bwa Yehova, n’echola chalirhumire aba mulume mwinja. Kasharhu ntya, ali habirwe obwerekezi burhengere emwa Mungu oku bilolere omulala gwage. Buli mango aliri akenga juba-juba, chiro n’amango birhaliyorohere okujira ntyo. (Mt. 1:20, 24; 2:13-15, 19-21) Omu kugenderera kukulikira obwerekezi bwa Mungu, Yusufu ali langire Mariya, omu kumurhabala, n’okugenderera kumushishikala. Ba nka wawaza oku bi Yusufu akolaga gurhe byalirhabere Mariya amuzigire n’okumukenga bwenene! Abalume bashabire bakayiga omufano gwa Yusufu, omu kugenderera kukolesa amahano m’Ebiblia yi bagala kushishikala omulala gwabo.d Amango wamakolesa amola mahano, chiro akaba oku byakakuhema kuhindamula bintu biguma wanayerekana oku ozigire mukawe, n’okukomeza obwira bwenyu omu buhya. Mwali-werhu w’omu Vanuatu, washabirwe hamagera myaka echubukire 20 aderhere ntya: “Amango bani amachihangana kukulikira obwerekezi bwa Yehova echola chinantabala kumukenga bwenene. Echola chinarhuma nachiyunva indi omu bulanzi, n’okugala kuchizera oku esimikiro arholere zili zinja bwenene.”
6. Bichi abakazi bakayiga kugerera omufano gwa Mariya?
6 Mariya naye aligwerhe obwira bukomere haguma na Yehova; ali chihanganire kugenderera kukomeza obwemere bwage yenyine. Alimenyere bwinja Amandiko. Aliri achihangana kujira okwage koshi yabona akasanzi k’okukengera bwenene oku byaliri ayiga. (Lu. 2:19, 51) Buzira ngangane, rhwakachizera oku obwira bwa Mariya haguma na Yehova bwalirhumire aba mukazi mwinja bwenene. Zene, bakazi banene bali bachihangana kujira nk’oku Mariya ajiraga. Omufano, mwali-werhu oyirikirwe Emiko aderhere ntya: “Amango naliri mulamba, naligwerhe eyani programe nyinja y’ekiroho. Aliko najire nashabwa, narhegera oku bani akwanene kusalira n’oku yumangira emparamyo y’omulala, narhegera oku nahwanzize kumulangalira anjirire ebyola bintu. Bobola nayinja kurhegera oku inkwanene kulanga obwira bwani haguma na Yehova buyorhe bukomere embere zage nyono nyenyine. Kugera buno inkala ntola ebisanzi by’okuba haguma na Mungu wani nyono nyenyine, omu kusalira, n’okusoma amandiko n’oku makengerako bwenene.” (Gal. 6:5) Mukazi wee, amango moshi wagenderera ku komeza obwira bwawe haguma na Yehova, balo apata chiro mpanvu zinene z’oku kusingiza n’okukuzigira.—Mez. 31:30.
7. Bichi omulume n’omukazi bashabene bakayiga kugerera omufano gwa Yusufu na Mariya oku bilolere okujira ubuharamye haguma?
7 Yusufu na Mariya baligenderere kukola haguma yibagenderera kukomeza obwira bwabo haguma na Yehova. Balirhegerere akachiro k’oku haramya Yehova haguma bowe nka mulala. (Lu. 2:22-24, 41; 4:16) Nkabaga byaliri byabakomerera okujira ntyo, ahanene amango omulala gwabo guyololoka n’okugwarha bana banene aliko bali chihanganire kujira ntyo. Guli mufano gwinja bwenene oku bantu bashabene zene! Akaba ogwerhe abana kuguma na Yusufu na Mariya, nkabaga byakakukomerera okuhika oku mbuganano changwa okurheganya akasanzi k’okukola emparamyo y’omulala. Nkabaga kandi byakakomera okurheganya akasanzi k’okuyiga haguma n’okusalira haguma nka mulume n’omukazi. Aliko muyibuke oku, amango muli mwaharamya Yehova haguma, mwayorha hofi naye n’okuyegerana buli muguma n’owindi. Muhebe obuharamye oku nafasi y’oburhanzi.
8. Bichi balala bashabene bagwerhe ebibazo bakajira yibayunguka bwenene n’obuharamye b’omu mulala?
8 Bichi wakajira akaba ogwerhe ebibazo omu buhya bwawe? Ewazo ly’okuba haguma yimukola obuharamye b’omulala lyakashusha nka lirhasimisize. Akaba ntyo kubiri, muchishoge kujira emparamyo y’ebintu bilebe biyufuhire ebi mwembi mwayemerere oku mwakaganirako. Okujira ntyo kwakomeza obwira bwenyu n’enyorha yenyu y’okukola ebintu by’ekiroho omu buhya.
MUGEZE EBISANZI HAGUMA
9. Bulagurhe omulume n’omukazi bakwanene kugeza ebisanzi haguma?
9 Abashabene kandi, bakachihangana kuleka obwira bwabo bukomere omu kuchihangana kugeza ebisanzi haguma. Amango wamajira ntyo, echola chakurhabala oyorhe omenyere amawazo n’okuntu balo changwa mukawe ali achiyunva. (Mwa. 2:24) Waza oku bi Lilia na Ruslan barhegeraga kasanzi kageke bamalire kujira obuhya, hamagera myaka erhalukire 15. Omukazi aderhere ntya: “Rhwayinja rhegera oku rhurhakagezeze bisanzi binene haguma okuntu rhwaliwazize. Esiku zoshi rhwaliri rhwageza olusiku omu kasi k’omubiri, akasi k’omunju, na buzinda okushishikala abana berhu. Rhwayinja kurhegera oku nkarhurhalonzeze ebisanzi by’okuba haguma rhwewe nka mulume n’omukazi, buli muntu akachibuganire eyali hale n’owabo.”
10. Nka gurhe omulume n’omukazi bakakolesa akanuni kali omu Waefeso 5:15, 16?
10 Bichi omulume n’omukazi bakajira yibachizera oku bali bageza ebisanzi haguma? Mwakarheganya akasanzi mwayinja mwaba haguma oku munali mwembi. (Osome Waefeso 5:15, 16.) Mwene-werhu w’omu Nigeria oyirikirwe Uzondu aderhere ntya: “Amango ndi napanga ebintu nakola inampebamo n’ebisanzi nakageza haguma na mukani n’okuheba akola kasanzi oku nafasi y’oburhanzi.” (Flp. 1:10) Waza okuntu muka mwimangizi muguma w’omuzunguluko w’omu Moldova oyirikirwe Anastasia, onakolesa bwinja akasanzi kage. Aderhere ntya: “Inachihangana kujira amakasi ikwanene kujira, amango bani ali akola amakasi malolere engambane zage. Enyuma waho rhwanaja rhwageza ebindi bisanzi eyi rhuli naye.” Aliko si gurhe wakajira akaba amakasi onakola manarhuma wagambwa kugeza ebisanzi haguma na mukawe changwa balo?
Makasi mahe mwakakola haguma mwabo nka mulume n’omukazi? (Olole echifungo che 11-12)
11. Makasi nyabachi Akila na Prisila baliri bakola haguma?
11 Omulume n’omukazi bakayiga omufano gwa Akila na Prisila. Bakristu banene b’omu kagana ka burhanzi balikengere oyola mulume na mukage. (Ro. 16:3, 4) Chiro akaba oku Ebiblia erhaderhere binene oku bilolere obuhya bwabo, eyerekene oku baliri bakola haguma, okuhubiri haguma, n’okurhabala abandi eyi banali bombi. (Mdo. 18:2, 3, 24-26) Kweri, amango Ebiblia eliyaderha eju ya Akila na Prisila, enazigana kubaderhako bombi haguma.
12. Bichi omulume n’omukazi bakajira yibayinja bageza ebisanzi haguma? (Olole n’efoto.)
12 Nka gurhe omulume n’omukazi bashabene bakayiganya omufano gwa Akila na Prisila? Owaze oku bintu binene bihemere mukole haguma woyo na mukawe. Ka mwakakola maguma mw’amola makasi eyi munali mwembi, ahali h’okumajira buli muguma bwage bwage? Omufano, Akila na Prisila baliri bahubiri haguma. Ka nenyu munachirheganya oku kahunda okujira ntyo? Kandi, Akila na Prisila baliri bakola haguma. Nkabaga woyo na mukawe changwa balo murhakola kasi kaguma, aliko si mwakabona ebisanzi by’okukola orhwasi rh’omunju haguma? (Muh. 4:9) Amango muli mwarhabalana buli muguma n’owindi kukola kasi kalebe mwanachiyunva nka muli mwakola nka ekipe, eyi munagwerhe orozo l’okuganira haguma. Robert na Linda bamamala myaka echubukire 50 eyi bashabene, baderhere ntya: “Omu kuderha okuli, rhurhajira bisanzi binene by’okugeza haguma omu kuchisiimisa. Aliko amango ndi nashuka amasahani, na mukani anazikaza kw’amenji changwa amango ndi nakola omu bustani naye anayinja rhwanakola haguma, inanyunva nsimire bwenene. Okukola haguma kunakomeza obwira bwerhu. Obuzigire bwerhu bunagenderera kukomera.”
13. Bichi omulume n’omukazi bakwanene kujira yibagwarha obuguma?
13 Oyibuke oku, arhali okwenge omulume n’omukazi banakola haguma k’okuderha oku bagwerhe obwira bukomere. Mwali-werhu muguma w’omu Brezil aderhere ntya: “Akalamo kerhu kayunjwire binene by’okukola, n’echola chakarhuma byarhuyorohera kuwaza oku rhuli rhwageza ebisanzi haguma, bulala rhulamire mu nju nguma. Nayigire oku birhuhemere kujira binene olekere okuba haguma konyine. Aliko kandi bimpemere nseze obwenge ku bani.” Hala ebi Bruno na mukage Tays banajira, yibayerekana oku buli muguma alagire oku windi. Aderhere ntya: “Amango rhuli rhwahumuka rhunaheba amatelefone merhu eburhambi, n’okusiimira kugeza akasanzi haguma buli muguma n’owindi.”
14. Akaba Omulume n’omukazi barhasiima kugeza ebisanzi haguma, bichi bakajira?
14 Aliko si gurhe byakaba, akaba woyo na mukawe changwa balo murhasiima kugeza akasanzi haguma? Nkabaga woyo na mukawe murhasiima ebintu bili kuguma changwa munagayisana. Bichi wakajira? Waza oku mufano g’omuliro rhwashambalagako burhanzi. Omuliro gurhahwanza kugulumira ahola hanaho. Bihemere ogenderere kuheba kw’eshali zizibu-zibu. Konakuguma nenyu bibahemere muhwanze kugeza haguma kasanzi kageke-kageke buli lusiku. Muchihangane kujira ebintu munasiima mwembi, s’arhali ebintu byakalerha entambala changwa obuhaka. (Yak. 3:18) Omu kujira orhuntu rhugeke-geke, mwakashuba kubona okuntu obuzigire ku buli muguma n’owindi bwashuba kukomera.
MUYEREKANE OBUKENGE KU BULI MUGUMA N’OWINDI
15. Bulagurhe obukenge buli bw’akamaro y’obuzigire ahakagarhi k’omulume n’omukazi bugenderera kukomera?
15 Obukenge buli bw’akamaro bwenene omu buhya. Buli nka ehewa enarhabala omuliro gugulumire bwenene. Buzira ogisijeni omuliro gunazima juba-juba. K’onakuguma, buzira bukenge, obuzigire ahakagarhi k’omulume n’omukazi bwakahola juba-juba. Omulume n’omukazi nka balibachihangana kuyerekana obukenge, banaba eyi bali bagenderera kukola haguma y’obuzigire bwabo bugenderera kukomera. Aliko obike omu bwenge oku, ech’akamaro kurhali kuchibaza akaba onayereka owenyu obukenge, aliko ech’akamaro kuli kuchibaza akaba mukawe changwa balo anachiyunva oku akengerwe. Penny na Aret bashabene hamagera myaka 25. Mwali-werhu Penny aderhere ntya: “Bulala rhunakengana buli muguma n’owindi, omu mulala gwerhu habere hantu hayunjwire obuzigire. Rhunachiyunva huru kuderha bulala rhumenyere oku buli muguma analaga oku mawazo m’owindi.” Bichi wakajira y’orhabala balo changwa mukawe, achiyunve oku kweri akengerwe? Rhuganire oku mufano gwa Abrahamu na Sara.
Bihemere omulume w’Omukristu ayereke mukage obukenge omu kuyunviriza bwinja-bwinja okuntu ali achiyunva (Olole echifungo che 16)
16. Bichi abalume bakayiga kugerera omufano gwa Abrahamu? (1 Petro 3:7) (Olole n’efoto.)
16 Abrahamu aliri akolera Sara oku bukenge. Arhaliri asuzagura amawazo ma Sara, analiri akenga okuntu aliri achiyunva. Mango maguma, Sara abwira Abrahamu kangana gurhe agayire, chiro anabwira Abrahamu oku yerhumire ebyola bibazo byamuhikira. Ka Abrahamu aliyuvirhe oburhe n’okuderha echintu chirhakwanene? Nanga. Alimenyere oku Sara ali mukazi onachicha bufi, onayemera n’esimikiro arholere. Abrahamu amuyunviriza n’okuchihangana kumala echibazo chage. (Mwa. 16:5, 6) Bichi echola chirhuyigirize? Balume wee, mugwerhe oburhwali b’okurhola esimikiro omu milala yenyu. (1 Ko. 11:3) Aliko echintu chiyerekene obuzigire wakajira, kuli kurhanga kuganira na mukawe embere orhole ensimikiro ahanene akaba eyola nsimikiro yamuhumako. (1 Ko. 13:4, 5) Omu mandi mango mukawe akachiyunva agwerhe omulago, byakanamuhema aderhe okuntu ali achiyunva. K’onakenga okuntu ali achiyunva omu kumuyunviriza bwinja-bwinja? (Osome 1 Petro 3:7.) Angela na Dmitry bashabene hamagera hofi myaka 30. Mwali-werhu Angela afasiriye okuntu eba anamurhabala achiyunve oku akengerwe buli mango. Aderhere ntya: “Dmitry aba tayari kunyunviriza amango ngwerhe omugayo changwa amango nshondere kuderha. Ananyunviriza chiro n’amango indi narukuza.”
17. Bichi abakazi bakayiga kugerera omufano gwa Sara? (1 Petro 3:5, 6)
17 Sara aliri akenga Abrahamu umu kushigikira ensimikiro zage. (Mwa. 12:5) Mango maguma, Abrahamu arhola ensimikiro y’okukaribisa abageni bamuhikiraga arhanalilangalire. Abwira Sara aleke ebyaliri ajira yarheganya omugati guzibu-zibu bwenene. (Mwa. 18:6) Sara ajira juba-juba n’okuyemera kujira ebi Abrahamu amubwirire ajire. Bakazi wee, mwakayiganya omufano gwa Sara omu kushigikira ensimikiro za ba balo. Amango mwamajira ntyo, mwanakomeza obuhya bwenyu. (Osome 1 Petro 3:5, 6.) Dmitry, rhwashambalagako omu chifungo chili ahala nyanya, afasiriye okuntu mukage anajira yachiyunva akengerwe. Aderhere ntya: “Inansima bwenene amango Angela ali achihangana kushigikira esimikiro zani chiro akaba zirhapatene n’ebyalilonzeze. Chiro akaba ebintu birhagendere bwinja arhayinja anderha-derha.” Binayoroha okuzigira omuntu okukengere!
18. Nyungu zihe omulume n’omukazi banapata amango bamagenderera kuchihangana y’obuzigire bwabo bukomera?
18 Zene, Shetani ali alonza kuhoza obuzigire buli ahagarhi k’omulume n’omukazi b’Abakristu bashabene. Ayinji oku nk’omulume n’omukazi bamaheza obuzigire ku buli muguma n’owindi, changwa barhachisiimene banahwanza kuja hale na Yehova. Aliko, obuzigire b’okuli burhakahirigirha haba na katyu! Bobola obuzigire omu buhya bwenyu bujage bwaba bulala buganirirwe omu Lwimpo lwa Sulemani. Mujage mwahigirira kuheba Yehova oku nafasi y’oburhanzi omu buhya bwenyu, omu kurheganya akasanzi k’okugeza haguma, omu kukenga okuntu buli muguma n’owindi ali achiyunva n’ebyakenere. Nka mujirire ntyo, obuhya bwenyu bwalerhera Yehova olukengo ntangiriro y’obuzigire bw’okuli na nka muliro gulangirwe bwinja; obuzigire bwenyu bwakomera amango moshi mulamire.
OLWIMPO 132 Sasa Tunakuwa Mwili Mumoja (Bunola Rhukala Rhuli Mubiri Muguma)
a Yehova ahere abantu oluhembo l’obuhya, lunarhabala omulume n’omukazi basiimire obuzigire bukomere ku buli muguma n’owindi. Aliko mango maguma, obola buzigire bwakahola. Akaba oli omu buhya, gunola mwazi gwakurhabala ogenderere kuzigira omuzigirwa wawe n’okugwarha obusiime omu buhya.
b Obuzigire b’okuli, burhahindamuka kandi bunagenderera, b’obuyirikirwe “birimi by’omuliro gwa Yah” bulala Yehova y’Eshoko y’obuzigire buli nk’obola.
c Nachiro wakaba oshabene n’omuntu orhali Mukristu, nkabaga wakabona amala mahano oku makakurhabala ku komeza obwira bwenyu.—1 Ko. 7:12-14; 1 Pe. 3:1, 2.
d Omufano, olole amahano m’akamaro mali omu myazi y’enkulikirane “Ndoa na Familiya” (Obuhya n’Omulala) chibonekene oku jw.org n’oku JW Library®.