Oyiganye Obushiru bwa Yesu omu Kasi k’Amahubiri

1. Ngeso ehe enarhuma abantu ba Yehova baba tofauti n’abantu ba mu linola gulu?

CHINTU chiguma chinarhuma abakozi ba Yehova baba tofauti n’Abakristu b’obubeshi, buba bushirua bajira omu kasi k’amahubiri. (Tit. 2:14) Aliko haly’amango wakachiyunva nk’orhachishagalukire akasi k’amahubiri. Nkabaga nawe wakachiyunva nka mushamuka muguma waligwerhe obushiru bwenene waderhaga ntya: “Hali amango nanyunva ntaherhe enyorha y’okuhubiri.”

2. Bichi byakarhuma mango maguma byakomera okugenderera kugwarha obushiru omu kasi k’amahubiri?

² Hali oku rhwakachiyunva rhusimire kukola ebindi bintu omu kasi ka Mungu olekere okuja oku mahubiri. Bulagurhe? Bulala amango rhuli rhwakola oku kasi k’okuyumbaka n’okukwiziza amaju m’echiteokrasi, rhuli rhwarhabala bene-berhu bapatirwe n’echinjira, changwa rhuli rhwabahira omurhima omu zindi njira, rhwakabona amalehe menja aho hanaho n’okuchiyunva bwinja. Rhunasimira ehali y’omurhula n’obuzigire rhunachibonera amango rhuli rhwakola na bene-berhu, rhunamenyere oku bene-berhu na bali-berhu banasima okubona ebi rhuli rhwabakolera. Oku bwindi, hali oku rhwakaba eyi rhwamamala myaka minene rhuli rhwahubiri omu eneo eyola yeneyo, aliko rhwanabona nk’amalehe menja mali mageke. Changwa rhwakabuganana n’abantu barhasimisizwe n’oburhumwa bwerhu, rhunamenyere oku kadiri obuzinda buli bwayegera bantu banene bakagenderera kurhupinga. (Mt. 10:22) Bichi byakarhurhabala rhugale kugendereza changwa rhuyongere obushiru bwerhu omu kasi k’okuhubiri?

3. Bichi rhwakayiga oku bilolere obushiru bwa Yesu buyerekenwe omu Luka 13:6-9?

³ Nka rhuwazize bwenene oku mufano gwa Yesu hali ebintu rhwakayiga oku bilolere okugwarha obushiru omu kasi k’amahubiri. Amango aliri akola akasi k’okuhuri oku gulu, nta mango ayemerere ayolokala. Ahubwe okw’esiku yizanagera agenderera kukola bwenene. (Osome Luka 13:6-9.) Kuguma n’omuhinzi w’emizabibu wamalaga myaka esharhu ey’ali akwiziza omurhi g’omutini aliko gwafunda yana, Yesu naye amalire myaka esharhu ey’ali ahubiri Abayahudi aliko banene mubo barhabaga banafunzi bage. Kuguma n’okoyola muhinzi w’emizabibu aligenderere kunihira ok’ogola mutini nji gwayana, Yesu naye arhalekaga kubahubiri arhanayolokalaga omu kasi k’amahubiri. Ahali h’okujira ntyo agenderera kukola bwenene omu kuntu abahume oku murhima.

4. Bintu bine bihe rhwaganirako omu mufano gwa Yesu?

⁴ Mu gunola mwazi rhwabona okuntu Yesu aliyerekene obushiru ahanene omu myezi ndarhu y’obuzinda y’akasi kage k’okuhubiri. Okuyiga oku bintu Yesu aliri ayigiriza n’okuyiganya eby’aliri ajira, byarhurhabala rhugwarhe obushiru zene. Leka rhuyige ku bintu bine omufano gwa Yesu gwakarhuyigiriza: 1) Alisezeze obwenge bwage oku bulonza bwa Yehova, 2) aseza obwenge oku bulebi bwe Biblia, 3) alilangalire oburhabale bwa Yehova 4) aligenderere kunihira oku hali abakamuyunvirize.

ALISEZEZE OBWENGE BWAGE OKU BULONZA BWA YEHOVA

5. Nka gurhe Yesu aliyerekene ok’okujira obulonza bwa Mungu ch’echintu ch’akamaro bwenene omu kalamo kage?

⁵ Yesu aliri ahubiri “emyazi minja y’Obwami” n’obushiru, bulala alimenyere oku k’akasi Mungu alilonzeze ajirage. (Lu. 4:43) Yesu alijirire akasi k’okuhubiri emyazi minja che chibage chintu ch’akamaro omu kalamo kage. Chiro na buzinda omu kasi kage k’amahubiri aliri abalama “arhenga omu vile anaja omu yindi, na vilaje oku yindi” y’ayigiriza abandi. (Lu. 13:22) Analikomeze abandi banafunzi yi baba bahubiri be myazi minja kuguma naye.​—Lu. 10:1.

6. Ngahe akasi k’amahubiri kabuganene n’ezindi ngabane rhwakagwarha? (Olole n’efoto.)

⁶ Na zene, akasi k’okuhubiri emyazi minja k’akasi k’akamaro bwenene Yehova na Yesu balonzeze rhukole. (Mt. 24:14; 28:19, 20) Akasi k’okuhubiri kabuganene n’ezindi ngabane zoshi rhwakakola. Omufano, rhunakola akasi k’okuyumbaka n’okukola oku Beteli yi rhurhabala akasi k’amahubiri kagenderere. Eyi rhwaha bene-berhu na bali-berhu oburhabale omu mango m’echinjira, rhurhaba rhulonzeze kubarhabala omu hali y’omubiri yonyine, si rhuba rhulonzeze kubarhabala bagenderere kugwarha ehali nyinja y’ekiroho ehirirwe mu n’okuhubiri. Amango rhwamarhegera akachiro k’okuhubiri, n’okuyibuka oku k’akasi kakulu Yehova alonzeze rhukole, rhwagwarha obushiru b’okugenderera kuhubiri oku kahunda. János, mushamuka muguma w’omu Hongrie, aderhere ntya: “Nanyibuka oku nta kandi kasi ke chiteokrasi kakaja oku nafasi y’okuhubiri.” K’akasi kakulu rhwahabirwe.

7. Bulagurhe Yehova alonzeze rhugenderere kuhubiri? (1 Timoteo 2:3, 4)

⁷ Rhwakayongera obushiru bwerhu omu mahubiri omu kubona abantu kuguma n’oku Yehova anababona. Alonzeze bantu banene nk’oku byakashobokana koshi bayunve emyazi minja banayemere okuli. (Osome 1 Timoteo 2:3, 4.) Che chirhumire ali arhukomeza rhumenye gurhe rhwakakola bwinja akala kasi k’okutangaza oburhumwa b’okuyokola abantu. Omufano, akatabu Obuzigire Bukushunike Ojire Abanafunzi karhuyerekere njira zinene zakarhurhabala rhurhonderese enganiro eyi rhugwerhe omuhigo g’okujira abanafunzi. Chiro akaba abantu barhayemerere kukolera Yehova zene, byakashobokana nji bayemere kumukolera embere amalibuko makulu mahwe. Omu mango mayinjire, hali oku nji bakayibuka ebi rhwabaga rhwababwirire banayemera kukolera Yehova. Aliko ebyola byoshi byakahikira nka rhugenderere kuhubiri.

ASEZA OBWENGE OKU BULEBI BWE BIBLIA

8. Nka gurhe okumenya obulebi bwe Biblia kw’alirhumire Yesu akolesa ebisanzi byage bwinja?

⁸ Yesu alimenyere bwinja okuntu amalebi m’omu Biblia malikwanene kuyenera. Alimenyere okw’akasi kage k’amahubiri kamala myaka esharhu n’enusu yonyine. (Da. 9:26, 27) Analimenyere bwinja obulebi bwaliyerekene mangochi na gurhe akafire. (Lu. 18:31-34) Bulala alimenyere ebyola byoshi byabaga byaderherwe, Yesu akolesa bwinja akasanzi kage nk’oku byakashobokana koshi. Echola chaja charhuma ahubiri n’obushiru y’amala akasi bamuhaga akole.

9. Bulagurhe obulebi bwe Biblia bunarhushunika rhuhubiri n’obushiru?

⁹ Okuyunva bwinja obulebi bwe Biblia kwakarhushunika rhuhubiri n’obushiru. Rhumenyere okw’akasanzi kayorhere embere linola gulu liharabiswe kayufuhire, rhunamenyere oku ebili byaba zene n’oborhere abantu bagwerhe bili byayerekana ebye Biblia yabaga yalebere oku bye byakayerekene esiku z’obuzinda. Rhuli rhwabona okuntu Oburhegesi Bukulu bw’Egulu bwe Angleterre ne Amérique buli bwalwa Entambala ne Russie n’abera bayo, n’echola chili chayeneza obulebi oku bilolere omwami we noro n’omwami we side bwakayenere omu “siku z’obuzinda” (Da. 11:40) Kandi rhumenyere bwinja ok’Oburhegesi Bukulu bw’Egulu, k’okuderha Angletere ne Amérique, bushushanyizwe n’ebishando by’esanamu nzibu-zibu ederherwe omu Danieli 2:43-45. Rhuchizerere ok’okuntu biderherwe m’obola bulebi, hanola hofi-hofi, Obwami bwa Mungu bwaharabisa amaguvernema m’abantu. Obola bulebi boshi buyerekene oku rhulamire hofi n’obuzinda, che chirhumire rhukwanene kukolesa ebisanzi byerhu bwinja omu kuhubiri emyazi minja n’obushiru.

10. Nka gurhe kandi Obulebi bwe Biblia bwakarhushunika rhuhubiri n’obushiru?

¹⁰ Kandi obulebi b’omu Biblia bunarhuma rhwayunva bwinja oburhumwa bwe Biblia. Rhujira nyorha nene y’okubwira abandi k’obola burhumwa. Mwali-werhu muguma oyirikirwe Carrie w’omu République Dominicaine aderhere ntya: “Ebilagane bya Yehova bihumire oku murhima biderhere oku bilolere amango mayinjire makwirire, binanshunika mbwire abandi oku bilolere okuli”. Ayongerere ntya: “Eyi mbona gurhe abantu yibalama akalamo kakomere zene, nanarhegera okw’ebyola bilagane birhandolere nyono nyenyine si bilolere n’abola bantu”. Obulebi bwe Biblia buyerekene oku Yehova ali haguma nerhu mw’akala kasi, n’echola chinarhuma rhwagenderera kuhubiri n’obushiru. Leila, olamire omu Hongrie, aderhere ntya: “Isaya 11:6-9 enanshunika mbwire abandi oku bilolere emyazi minja chiro na balala bashushire nka barhakayiyemera. Imenyere oku buli muntu akahindamuka kugerera oburhabale bwa Yehova.” Owindi Mwene-werhu oyirikirwe Christopher olamire omu Zambie, aderhere ntya: “Nkoku byabaga byaderherwe omu Marko 13:10, emyazi minja y’Obwami eli y’ayenera omu gulu lyoshi, inandi nachiyunva ngwerhe olukengo l’okuyeneza k’obola bulebi.” Bulebi buhe bwe Biblia bunakushunika nawe ogenderere kuhubiri?

ALILANGALIRE OBURHABALE BWA YEHOVA

11. Bulagurhe byalihemere Yesu alangalire oburhabale bwa Yehova y’agenderera kuhubiri n’obushiru? (Luka 12:49, 53)

¹¹ Yesu alilangalire oku Yehova amurhabala agenderere kuhubiri n’obushiru. Chiro akaba oku Yesu aliri achishoga bwinja ebinwa aderha omu kuhubiri, alimenyere ok’oburhumwa bwinja b’Obwami bwakarhumire bantu banene bakaliha na banene bakabupingire bwenene. (Osome Luka 12:49, 53.) Eju y’oburhumwa Yesu aliri ahubiri, abakulu b’edini balilonzeze turu zinene gurhe bakamuyirha. (Yoh. 8:59; 10:31, 39) Aliko Yesu anagenderera kuhubiri bulala alimenyere oku Yehova ali haguma naye. Aderhere ntya: “Intali nyenyine si Darha wantumaga ali haguma nani. . . . Arhandekere nyenyine bulala esiku zoshi nankola ebimusimisize.”​—Yoh. 8:16, 29.

12. Nka gurhe Yesu alibere arheganya abanafunzi bage bagenderere kuhubiri chiro akaba oku hakabere obupinzani?

¹² Yesu aliyibwise abanafunzi bage oku balikwanene kulangalira oburhabale bwa Yehova. Ababwira eturu n’eturu oku Yehova akabarhabere chiro n’amango bali balwisa obupinzani. (Mt. 10:18-20; Lu. 12:11, 12) Bulala alimenyere oku bantu banene nji bapinga emyazi minja, abwira abanafunzi bage oku bakwanene kubera merangwe. (Mt. 10:16; Lu. 10:3) Ababwira oku barhakwanene kuseza abantu barhalonzeze kuyunviriza oburhumwa. (Lu. 10:10, 11) Anababwira okw’amango bamarhondera kubalibuza banalibirha. (Mt. 10:23) Chiro akaba oku Yesu aligwerhe obushiru analilangalire Yehova, arhaliri achiheba omu buhanya oku busha.​—Yoh. 11:53, 54.

13. Bulagurhe wakachizera oku kweri Yehova akurhabala?

¹³ Rhukenere oburhabale bwa Yehova yi rhugenderera kuhubiri n’obushiru omu bupinzani yirhwahurana zene. (Ufu. 12:17) Bulagurhe wakachizera oku kweri Yehova akurhabala? Rhuganire oku sala lya Yesu liri omu Yohana 17. Yesu ahema Yehova alange entumwa zage, na Yehova ashubiza kw’elyola sala. Echitabu cha Matendo ya Mitume chiyerekene okuntu Yehova alirhabere entumwa zigenderere kuhubiri oku bushiru chiro akaba zaliri zahurana obupinzani. Kandi omu sala lyage, Yesu alihemere Yehova alange balala bakagwarhire obwemere omu by’entumwa zage zaliri zahubiri baheberwe mu nawe. Yehova arhasaga kuleka kushubiza oku sala lya Yesu, akurhabala kulala anarhabalaga entumwa.​—Yoh. 17:11, 15, 20.

14. Bula gurhe rhwakachizera oku rhwagala kugenderera kuhubiri n’obushiru chiro rhwaba mu bibazo bingana gurhe? (Olole n’efoto.)

¹⁴ Chiro akaba oku bili byagenderera kukomera kuhubiri n’obushiru, ok’obuzinda bwa linola gulu libi yi bwanayegera, rhwapata oburhabale boshi rhukenere. (Lu. 21:12-15) Kuguma na Yesu n’abanafunzi bage, rhunaleka abantu bachishoge akaba barhuyunviriza changwa nanga, rhurhanayemera rhwaja buhaka burhaherhe echi bumalire. Chiro n’amango akasi kerhu kamalahizwa, bene-berhu bagalire kugenderera kuhubiri emyazi minja bulala balangalire emisi ya Yehova s’arhali eyabo bonyine. Nka kulala Yehova aliri aha abakozi bage b’omu kagana ka burhanzi emisi, zene anarhuha emisi y’irhugala kugenderera “kuhubiri n’okumala akasi rhwahabirwe” omu njira emusimisize. (2 Ti. 4:17) Wakachizera okw’amango moshi ogenderere kulangalira Yehova, wagala kuhubiri oku bushiru.

ALIGENDERERE KUNIHIRA OKU HALI ABAKAMUYUNVIRIZE

15. Bichi biyerekene oku Yesu alichizerere okw’amahubiri mage magwarha amalehe menja?

¹⁵ Yesu alichizerere oku hakabere abantu bayunviriza emyazi minja, n’echola charhuma agenderera kushagalukira akasi. Omufano, oku buzindazinda b’omwaka gwa 30 N.K.Y., Yesu alibwene oku bantu banene baliri tayari kuyunviriza emyazi minja, anabashushanya n’eshwa lili tayari kushalulwa. (Yoh. 4:35) Hofi mwaka muguma enyuma waho, abwira abanafunzi bage okw’akasi “k’okushalula kalugire.” (Mt. 9:37, 38) Buzinda ashuba kukaziza: “Akasi k’okushalula kalugire . . . Muheme Omukulu w’akasi k’okushalula arhume abakozi b’okushalula.” (Lu. 10:2) Yesu aligenderere kuchizera oku hakabere abantu bakayunvirize emyazi minja, anasima okubona abantu bajira ntyo.​—Lu. 10:21.

16. Nka gurhe emifano ya Yesu eyerekene okw’aligwerhe amawazo menja oku bilolere akasi k’okuhubiri? (Luka 13:18-21) (Olole n’efoto.)

¹⁶ Yesu aliyigirize abanafunzi bage bagenderere kugwarha amawazo menja oku bilolere oburhumwa bwabo, n’okujira ntyo kwakabarhabere bagenderere kuhubiri n’obushiru. Rhuganire ku mifano ebiri. (Osome Luka 13:18-21.) Mu mufano muguma Yesu alishushanyize oburhumwa b’Obwami n’ehiburho hy’eharadali hinakula gwanaba murhi guzibu-zibu. K’okuderha oku bantu banene bakayunvirhe oburhumwa b’Obwami na ntacho chakabuzize yi birhaba ntyo. Kandi alikoleseze omufano gw’engezo omu kuyerekana okuntu oburhumwa bwinja b’Obwami bwakayenere bwenene omu gulu, n’okuhindamula akalamo k’abantu chiro akaba okw’abandi barhakabwene juba-juba oku bahindamukire. Nantyo Yesu arhabala abanafunzi bage babone ok’oburhumwa bwinja baliri bahubiri bwakaburhire amalehe menja.

17. Mpanvu zihe rhugwerhe z’akarhuma rhwagenderera kugwarha amawazo menja oku bilolere akasi k’okuhubiri?

¹⁷ Amango rhwamawaza okuntu akasi k’amahubiri yikarhabala bantu banene oku gulu lyoshi, rhwanachiyunva rhuheberwe omurhima rhugenderere kuhubiri. Buli mwaka amamiliyoni m’abantu bali bahika oku lwibuko n’okuyiga e Biblia haguma nerhu. Ebihumbi by’abantu bali babatizwa n’okukola haguma n’erhu kw’akala kasi k’okuhubiri. Rhurhamenyere bantu banga bachiyemera oburhumwa bwerhu, aliko rhumenyere oku Yehova ali agusha bantu kamama bafuma amalibuko makulu mayinjire. (Ufu. 7:9, 14) Yehova ye Mukulu w’akasi k’okushalula anamenyere oku hachili bantu banene bayemera emyazi minja, che chirhumire rhwabo rhugenderere kuhubiri tu.

18. Gurhe rhwakasima abandi barhubonage?

¹⁸ Esiku zoshi abanafunzi ba Yesu banamenyikana kugerera obushiru bwabo b’okuhubiri. Amango abantu babona okuntu entumwa zaliri zahubiri n’obushiru, “barhegera oku baliri haguma na Yesu.” (Mdo. 4:13) Rhulonzeze nerhu rhuhubiri n’obushiru n’obushagaluke, omu kuntu abantu bachibonere oku rhuli rhwayiganya Yesu.