Inta Mango Rhunalekererwa

1-2. a) Bulagurhe rhwakaderha oku nta mango rhunalwisa ebibazo rhwabo rhwenyine? b) Bichi rhwaganirako mu gunola mwazi?

AMANGO rhwamagwarha ebibazo bikomere, hali oku rhwakachiyunva nka rhwayorhere rhwenyine omu hyarho hityuli hili omu muhengeri gwa hale guli m’omulaba. Aliko rhurhaba rhulekererwe amango rhuli rhwalwisa ebibazo. Darha w’obuzigire w’omu mbingu arhafa chakurhulolereza konyine gurhe yirhwalwisa ebibazo, s’alaganyize oku arhurhabala rhugale kubilwisa. Oku buzigire, Yehova alaganyize abakozi bage bemana ntya: “Nakurhabala.”​—Isa. 41:10.

² Mu gunola mwazi rhwabona gurhe Yehova anarhurhabala 1) omu kurhuyerekeza, 2) omu kurhuha ebi rhukenere, 3) omu kurhulanga, n’echa 4) omu kurhurhuliriza. Yehova arhulaganyize oku nachiro rhwahurana ebibazo bili gurhe omu kalamo kerhu nta mango nji arhuyibagira. Arhakafa arhukabulire. Bobuno, nta mango rhunalekererwa.

YEHOVA ANARHUYEREKEZA

3-4. Gurhe Yehova anarhuyerekeza? (Zaburi 48:14)

³ Osome Zaburi 48:14. Yehova amenyere oku rhurhakagala kuchiyerekeza si bihemere arhuyerekeze. Gurhe anayerekeza abakozi bage bemana mu zinola siku? Njira nguma anajiramo ntyo kuli kugerera e Biblia. (Zb. 119:105) Kugerera Echinwa chage chafuherwaga, Yehova anarhuyerekeza rhurhole esimikiro zinja zakarhulerhera obusime mu zinola siku n’okurhuyerekeza oku kalamo k’esiku n’amango.a Omufano, arhuyigirize okurhabika omujinya, okuba banihirwa omu bintu byoshi, n’okuzigira abandi bwenene kurhenga oku murhima. (Zb. 37:8; Ebr. 13:18; 1 Pe. 1:22) Amango rhwamayerekana engeso zinja zili nk’ezola zirhengerere emwa Mungu, rhwanaba bazere benja, balume changwa bakazi benja, na bera benja.

⁴ Echindi, Yehova ayandikisize omu Biblia engani z’okuli ziyerekene abantu bagerere omu bibazo bili nk’ebyerhu, banachiyunva nk’oku nerhu rhunachiyunva. (1 Ko. 10:13; Yak. 5:17) Amango rhwamasoma engani z’akalamo k’abola bantu rhwakayunguka chiro ahubwe mu njira ebiri. Ey’oburhanzi, rhwakarhegera oku gasi rhurhali rhwenyine, si hali abandi bantu bahurene ebibazo bili nk’ebyerhu banagala kubilembera. (1 Pe. 5:9) Eyakabiri, rhwamenya gurhe rhwakagala kulembera ebibazo byerhu eyi rhunashagalukire.​—Ro. 15:4.

5. Bande Yehova anakolesa omu kurhuyerekeza?

⁵ Kandi Yehova ahebere h’omupango omu kuntu aberhu Bakristu barhuyerekeze.b Omufano, abemangizi b’omuzunguluko banarhulambagirira oku kahunda yi barhuheba omurhima. Amajambo mabo manakomeza obwemere bwerhu n’okurhurhabala rhugendereze obuguma bwerhu busomeze. (Mdo. 15:40–16:5) Abashamuka omu chibaga nabo banajira okwabo koshi yi bamenya ehali ya buli muhubiri. (1 Pe. 5:2, 3) Abazere banayigiriza abana babo kuzigira Yehova, okuntu bakarhola esimikiro z’obwengehe, n’okugwarha engeso zinja. (Mez. 22:6) Abakazi b’embuguma bakulire ekiroho, banarhabala abakazi bachili bahya, banabalekera olwiganyo lukwirire, okubahanula n’okubahira omurhima oku buzigire.​—Tit. 2:3-5.

6. Gurhe rhwakajira yi rhuyunguka n’obwerekezi bwa Yehova?

⁶ Yehova ajirire akage kasi omu kurhuha obwerekezi rhukenere. Gurhe rhwakaja rhwayerekana oku rhuherhe eshukrani oku by’arhujirire? Mezali 3:5, 6 haderhere: “Olangalire Yehova n’omurhima gwawe goshi, s’orhanihiraga obwenge bwawe.” Amango rhwamajira ntyo, “anyorosya enjira [zerhu] zoshi,” k’okuderha, arhurhabala rhuyake ebibazo binene n’okugwarha akalamo kali m’obusime. Rhuherhe eshukrani nene okubona Yehova arhuyinji bwinja, anarhuzigire omu kuntu anarhuha amahano buli muguma werhu akenere!​—Zb. 32:8.

YEHOVA ANARHUHA EBI RHUKENERE

7. Njira zihe ziguma Yehova anarhuha mw’ebi rhukenere? (Wafilipi 4:19)

⁷ Osome Wafilipi 4:19. Olekere okurhuha obwerekezi bw’ekiroho, Yehova anagisha obushiru bwerhu b’okukola yi rhupata ebilyo, emishangi n’aharhwalama. (Mt. 6:33; 2 Te. 3:12) Chiro akaba oku biyunvikene okuderha oku rhwakalaga oku bintu by’omubiri rhukenere, Yehova arhuhirire omurhima rhurhavaga rhwayubaha bwenene eju yabyo. (Mt. 6:25.) Bulagurhe? Bulala nta mango Darha w’embingu nji alekerera abakozi bage bemana amango bali omu bibazo. (Mt. 6:8; Ebr. 13:5) Rhwakachizera echilagane chage chiderhere oku arhuha ebi rhukenere.

8. Bichi Yehova alikolere Daudi?

⁸ Waza okuntu Yehova arhabalaga Daudi. Amango m’ebihe bikomere omu myaka agezaga ey’ali omu buhungiro, Yehova alimurhabere apate eby’akenere yi yewe n’abasoda bage bagenderera kulama. Omu kuwaza okuntu Yehova amushishikere myaka minene, Daudi ayandika ntya: “Naliri musole, na zene namashaja, aliko ntasaga kubona omunyakunali alekererwe changwa abana bage yi bahemuza omugati.” (Zb. 37:25) Kuguma na Daudi, nawe wachibwenere omu kalamo kawe okuntu Yehova anashishikala abakozi bage bemana.

9. Gurhe Yehova anaha abakozi bage ebi bakenere amango hamaba ebinjira? (Olole n’efoto.)

⁹ Kandi Yehova anaha abakozi bage ebi bakenere amango hamarhengerera echinjira. Omufano, amango enzara ekomere yabaga omu kagana ka burhanzi, Abakristu ba mu fasi zinene baliri barhabala bene-babo na bali-babo baliri omu bulagirire omu kubaha ebi balikenere. (Mdo. 11:27-30; Ro. 15:25, 26) Zene, abantu ba Mungu banayerekana omurhima g’okuhana guli nk’ogola. Amango echinjira chamarhegerera, Yehova anashunika abantu bage oku buzigire bahane ebintu bilagirirwe nk’amenji, ebilyo, emishangi, n’amafumu oku bantu balamire emunda echinjira chagerere. Ekipe z’okuyumbaka zinaja kukwiziza Amachumbi g’Obwami gaharabikire. Abakozi ba Yehova baba juba-juba kurhabala abantu bahezeze ebintu n’abazigirwa babo omu kubarhuliriza n’okubahira omurhima kugerera e Biblia.c

10-11. Bichi wayigire omu mufano gwa Borys?

¹⁰ Chiro na balala barhaza kurhondera kumuharamya, Yehova anabaha n’omurhima goshi ebi bakenere. Intyo kon’oko, nerhu rhunalonza orozo l’okukolera oku bwinja balala barhaherhe obwemere buguma nerhu. (Gal. 6:10) Amango rhwamajira ntyo rhunagala rhabala abandi bamenye Yehova. Rhurhole omufano gwa Borys, diregtere muguma w’amasomo olamire omu Ukraine. Chiro akaba oku Borys arhali Muhamirizi wa Yehova, amango moshi aliri akolera oku bwinja abanafunzi b’Abahamirizi b’oku masomo mage n’okukenga obwemere bwabo. Amango Borys abona kw’alibirhe evita lyaliri ahalilamire, aje ahabere nka haba omurhula omu chihugo, bene-berhu bamurhabala. Buzinda Borys ahika oku Lwibuko l’olufu lwa Kristu. Omu kuwaza oku byageragamo, aderha ntya: “Abahamirizi ba Yehova baliri banshishikala bwenene, bobuno imperhe eshukrani nene.”

¹¹ Nerhu rhwakayiganya Darha w’olukogo w’omu mbingu omu kuyereka balala bali omu bulagirire obuzigire, babe bagwerhe obwemere buli kuguma n’obwerhu changwa nanga. (Lu. 6:31, 36) Rhulangalire k’obuzigire rhuli rhwabayereka bwabashunika balonze kuyiga binene oku bilolere Yehova n’okumuharamya haguma nerhu. (1 Pe. 2:12) Aliko, bachishoge kukolera Yehova changwa nanga, rhwabo rhwagwarha obusime bunene bunalerhwa n’okuhana.​—Mdo. 20:35.

YEHOVA ANARHULANGA

12. Bulanzi buhe Yehova alaganyize kw’aha abantu bage bowe nka chigusho? (Zaburi 91:1, 2, 14)

¹² Osome Zaburi 91:1, 2, 14. Zene, Yehova arhulaganyize oku arhuha obulanzi bw’ekiroho. Arhakafa ayemerere haba n’eliguma Shetani aharabise obuharamye b’okuli. (Yoh. 17:15) N’amango “amalibuko makulu” marhondera, rhwakachizera oku Yehova ayeneza echilagane chage ch’okulanga abantu bage omu hali y’ekiroho n’ey’omubiri.​—Ufu. 7:9, 14.

13. Gurhe Yehova analanga buli muguma bwage-bwage?

¹³ Gurhe Yehova analanga buli muguma bwage-bwage? Kugerera e Biblia, Yehova anarhurhabala rhurhegere ebinja n’ebibi. (Ebr. 5:14) Amango rhwamakulikira amakanuni mali omu Chinwa cha Mungu, rhunachilanga n’obuhanya bwakarhuhikira omu hali y’ekiroho n’ey’omubiri. (Zb. 91:4) Echindi, Yehova anarhulanga kugerera echibaga. (Isa. 32:1, 2) Nka rhukomerene na balala bazigire Yehova banakenga amakanuni mage, barhuhira omurhima rhurhazigaga amashumi mabi.​—Mez. 13:20.

14. a) Bulagurhe Mungu arharhulanga oku bibazo byoshi? b) Bichi Zaburi 9:10 erhuyemezeze? (Olole n’amahugulo m’eshishi.)

¹⁴ Mira, hali amango Yehova aliri alanga abakozi bage barhapatwaga na buhanya bulebe b’omubiri. Aliko, arhaliri ajira ntyo amango moshi. Ebiblia eyigirize ‘okw’ebibazo rhurhaliwazize byakahikira buli muguma werhu.’ (Muh. 9:11) Echindi, hali amango Yehova aliri aleka bakozi bage baguma balibuzwe chiro n’okuyirhwa, y’ayerekana oku Shetani ali mubeshi. (Yob. 2:4-6; Mt. 23:34) Na zene intyo ku binali. Chiro akaba oku Yehova arhamala ebibazo byerhu byoshi zene, rhwakachizera oku nta mango nj’alekerera balala bamuzigire.d​—Zb. 9:10.

YEHOVA ANARHURHULIRIZA

15. Gurhe rhunarhulirizwa kugerera esala, Echinwa cha Mungu n’aberhu Bakristu? (2 Wakorinto 1:3, 4)

¹⁵ Osome 2 Wakorinto 1:3, 4. Mango maguma rhunafisa, rhunayunva omulago changwa omugayo gunene. Nkabaga oli wagera omu hali egayisize omu kuntu oli wachiyunva nka wayorhere wenyine oku gulu. Hakaba eyi hali omuntu omenyere okuntu yi wachiyunva si? Nechi; Yehova ayinji gurhe yi wahiyunva. Arhamenyere okuntu yi wachiyunva konyine, si kandi anarhurhuliriza omu milago yerhu yoshi. Nka gurhe? Amango rhwamamulakirira omu sala, anarhuha “omurhula gwa Mungu guchubukire byoshi omuntu akagala kuyunva.” (Flp. 4:6, 7) Kandi rhunapata echirhulirizo amango rhwamayunva ebinwa Yehova arhubwirire bili omu Biblia. Omu Chinwa chage, Yehova anarhuyereka kangana gurhe arhuzigire, anarhuha obwengehe, n’obunihire. Oku mbuganano zerhu, Yehova anarhuhira omurhima kugerera ebinwa bisimisize bya bene-berhu na bali-berhu n’ebindi birhulirizo biyumangire oku Biblia.

16. Bichi wayigire kugerera ebi Nathan na Priscilla bageragamo?

¹⁶ Rhwakabona okuntu Yehova anarhurhuliriza n’okurhuhira omurhima kugerera Echinwa chage e Biblia, omu kuwaza oku hali Nathan na Priscilla, balamire omu États-Unis Bageragamo. Hamagera emyaka kurhenga bachishogere okuhamira omu fasi eli m’obulagirire bunene bw’abahubiri b’Obwami. Nathan aderhere ntya: “Rhwalilangalire oku Yehova agisha obushiru bwerhu.” Aliko, bayusize kugera omu ngabane yabo mpyaha, bahurana ebibazo binene by’amalwala n’eby’okubula efuranga. Buzinda byahema oyo mulume na mukage bagaluke emwabo. Aliko na chiro akaba ntyo bagenderera kulwisa echibazo ch’okubula efuranga. Nathan agenderere kuderha ntya: “Naliri nachibaza bulagurhe Mungu arharhugishire nk’oku rhwalilangalire. Byagera n’amango narhondera kuchibaza akaba hali echintu chibi najirire.” Aliko enyuma w’esiku Nathan na Priscilla barhegera oku nta mango Mungu alibalekerere mw’echola chihe ch’ebibazo. Nathan agenderere ntya: “Mw’ebyola bihe by’ebibazo, e Biblia yalibere nka mwira-werhu w’obwengehe waliri warhuhira omurhima n’okurhuha obwerekezi. Okuseza obwenge oku bilolere okuntu Yehova arhurhabere ahali h’okuseza obwenge oku bibazo byowe byonyine, kwarhurheganyize nji rhugale kulembera ebibazo by’amango mayinjire oku bwemere.”

17. Gurhe mwali-werhu oyirikirwe Helga apataga echirhulirizo? (Olole n’efoto.)

¹⁷ Bene-berhu na bali-berhu bakarhuha echindi chirhulirizo rhukenere. Nka gurhe? Waza oku mufano gwa Helga, olamire omu Hongrie. Amalire amakumi m’emyaka ey’ali alwisa ebibazo binene, byarhumaga avunika omurhima bwenene n’okuchiyunva nka ntacho achimalire chiro. Aliko amango amashuba kuwaza kw’ezola siku anabona gurhe Yehova aliri akolesa bene-berhu na bali-berhu omu kumuhira omurhima. Ayandikire ntya: “Yehova aliri antabala amango moshi amabona oku nta misi nchiherhe eju y’akasi kani k’omubiri, okushishikala omwana wani walilwere, n’ebindi n’ebindi. Mw’eyi myaka 30 yoshi yamagera, nta mango Yehova afundire kuyeneza echilagane chage ch’okuntuliriza. Anazigana kumpa emisi kugerera ebinwa bihirire omurhima abandi banambwira. Naliri nazigana kupata emesaje, amaruba, changwa ebindi binwa by’okumpira omurhima amango nalibikenere bwenene.”

18. Gurhe rhwakarhuliriza abandi?

¹⁸ Rhuherhe olukengo l’okuyiganya Mungu omu kurhuliriza abandi. Gurhe rhwakagala kujira ntyo? Rhwakabayunviriza bwinja, rhwanababwira ebinwa bihebere omurhima, n’okubarhabala n’ebintu bakenere. (Mez. 3:27) Rhunachihangana kurhuliriza abali balibuka baheberwe mu na balala barhaza rhondera kukolera Mungu. Amango abaturanyi berhu bamafisa, bamalwaza changwa bamapata ebindi bibazo bibalazize, rhunabalambagirira, rhwanabayunviriza, n’okubabwira oku mandiko me Biblia mahirire omurhima. Amango rhwamayiganya Yehova, “Mungu w’echirhulirizo choshi,” rhwarhabala aberhu bakristu balembere ebibazo, rhwarhabala na balala barhaza rhondera kukolera Yehova bayunve enyorha y’okumukolera.​—Mt. 5:16.

YEHOVA ALI NERHU AMANGO MOSHI

19. Bichi Yehova anarhujirira na gurhe rhwakamuyiganya?

¹⁹ Yehova analaga ku balala boshi bamuzigire. Arharhulekerera amango rhuli rhwalwisa ebibazo. Yehova anashishikala abakozi bage bemana nka kulala omuzere w’obuzigire anashishikala omwana wage. Anarhuyerekeza, anarhuha ebi rhukenere, anarhulanga, n’okurhurhuliriza. Rhunayiganya Darha w’obuzigire w’omu mbingu omu kurhabala abandi n’okubahira omurhima amango bali omu bibazo. Chiro rhwahurana ebibazo bingana gurhe, bivunire omurhima kangana gurhe, rhwakayorha eyi rhuchizerere oku esiku zoshi Yehova ali haguma nerhu. Arhulaganyize ntya: “Orhayubahaga, bulala ndi haguma nawe.” (Isa. 41:10) Echila chilagane chirhuyemezeze oku kweri nta mango rhunalekererwa!