Ezino lya Yehova​—Liba ly’Akamaro ku Yesu

1-2. a) Bichi Yesu alijirire obudufu b’obuzinda bw’akalamo kage oku gulu? b) Bibazo bihe rhwaganirako mu gunola mwazi?

LYALIRI golo lya lwakane, siku 14 mwezi gwa Nisani mwaka gwa 33 N.K.Y., eyi Yesu ali hofi kulenganywa, kuchirwa olubanja, kushobekwa, kulibuzwa n’okuyirhwa. Ali y’amamala kulya ebilyo bya Waliha omu chumba ch’enyanya haguma n’abaliyorhere bemena omu ntumwa zage. Bamalire kulya ebyola bilyo, Yesu abwira entumwa zage binwa binene bihebere omurhima. Na kasanzi kageke embere barhenge mw’echola chumba baliragamo, Yesu asalira esala ly’akamaro bwenene. Entumwa Yowane aliyandikire elyola sala. Liba omu Yohana sura 17.

² Elyola sala lirhuyerekere oku bichi Yesu aliri awazako bwenene mw’akola kasanzi? Nka gurhe elyola sala liyerekene bichi byaliri by’akamaro bwenene ku Yesu amango aliri hanola oku gulu? Leka rhuganire oku bishubizo by’ebyola bibazo.

“NABAMENYESEZE EZINO LYAWE”

3. Bichi Yesu aliderhere oku bilolere ezino lya Yehova, na bichi byalilonzeze kuderha? (Yoh. 17:6, 26)

³ Omu sala lyage, Yesu aderha ntya: “Nabamenyeseze ezino lyawe.” Nechi, aliderhere kabiri koshi oku amenyeseze abanfunzi bage ezino lya Yehova. (Osome Yohana 17:6, 26.) Bichi alilonzeze kuderha? Aliri alonza kuderha oku abamenyeseze ezino barhaliyinji si? Abanafunzi ba Yesu baliri Bayahudi, n’eju y’echola baliri eyi bamenyere ezino lya Yehova. Elyo zino liri omu mandiko m’echihebraniya hofi kali bihumbi mushamvu. Ch’echirhumire amango Yesu aderha mpu “nabamenyeseze ezino lyawe” arhaliri aderha oku abayigirize oku Mungu ye Yehova; s’ahubwe, oku abayigirize Yehova ali Mungu oli gurhe. Arhabala abanafunzi bage bamenye Yehova bwinja, bamenye omuhigo gwage oku bilolere egulu n’abantu, ebyakolere, ebi nj’akola, n’engeso zage. Yesu yenyine yi walimenyere Yehova ntyo.

4-5. a) Mufano guhe rhwakahana omu kuyerekana okuhikira kumenya ezino ly’omuntu k’okuderha gurhe? b) Gurhe abanafunzi ba Yesu bahikiraga kumenya Yehova bwinja ?

⁴ Omufano, rhuderhe oku mushamuka muguma w’omu chibaga chenyu oyiirikirwe David aba dogtere. Hamagera myaka minene ey’omuyinji. Aliko lero lusiku luguma wanapata echibazo ch’amagala wanayunva okenere dogtere wakakurhabala. Wanalibirhira oku bitaro oyola dogtere anakolako, anakolesa obumenyi bwage y’achungula akalamo kawe. Ezino ly’oyola mwene-werhu lyanaba eyi lyamakumenyesa echindi chintu chihyahya; arhali ntyo? Wanayunva wamasima bwenene oyola mwene-werhu kulusha oku waliri wamusima; n’amango wamayumva ezino lyage wanayibuka ebi akukolere. David arhachili mushamuka w’omu chibaga chenyu konyine, si kandi akala ali dogtere wachungulaga akalamo kawe.

⁵ Konakuguma, abanafunzi ba Yesu baliri eyi bamenyere ezino lya Yehova. Aliko bashuba kulibona oku liri ly’akamaro bwenene bulala Yesu alibarhabere bamenye Yehova bwinja. Bulagurhe rhwakaderha ntyo? Bulala Yesu aliri ayiganya Eshe omu binwa n’omu bijiro. Eju y’echola entumwa zage zalihikire kumenya Yehova bwinja omu kuyunviriza okuntu Yesu aliri ayigiriza n’omu kulola okuntu aliri akolera abantu.​—Yoh. 14:9; 17:3.

“EZINO LYAWE WAMPERE”

6. Mu njira nyabachi Yehova ahere Yesu ezino lyage? (Yoh. 17:11, 12)

⁶ Omu sala lyage, Yesu alisalirire ntya oku bilolere entumwa zage: “Obalange eju y’ezino lyawe wampere.” (Osome Yohana 17:11, 12.) K’okuderha oku Yesu akajire ayirikwa Yehova si? Nanga. Obwene ok’omu sala lyage, Yesu aliderhere ntya oku bilolere ezino lya Yehova: “Ezino lyawe.” K’okuderha Yehova lirhakabere zino lya Yesu. Sasa, bichi Yesu alilonzeze kuderha amango ayerekana oku ahabirwe ezino lya Mungu Yehova? Ech’oburhanzi, Yehova alirhumire Yesu aje kumuderhera. Aliyinjire omu zino ly’eshe anakola amakasi makomere kugerea elyola zino. (Yoh. 5:43; 10:25) Echa kabiri, ezino lya Yesu k’okuderha “Yehova ali buchunguke.” Nantyo, ezino lya Yesu liri mw’ezino lya Yehova.

7. Nka gurhe Yesu akabere muntu w’okuderhera Yehova? Ohane omufano.

⁷ Rhurhole omufano, oku murhegesi muguma akarhola omurhumwa waja kuderha omu zino lyage. Ebinwa by’oyola murhumwa byakagwarha echilo kuguma n’ebinwa oyola murhegesi yewe yenyine akaderhere. Konakuguma, Yesu aligwerhe oburhwali b’okuderhera Yehova bulala aliri murhumwa wage.​—Mt. 21:9; Lu. 13:35.

8. Bulagurhe Yehova aderhaga okuw’ezino lyage liri omu zino lya Yesu chiro n’embere ayinje oku gulu? (Kutoka 23:20, 21)

⁸ E Biblia enayirika Yesu Chinwa, Bulala Yehova alimukoleseze omu kubwira bamalayika n’abantu ebi Yehova alonzeze bamenye n’ebi alonzeze bajire. (Yoh. 1:1-3) Byakashobokana oku Yesu ye malayika Yehova arhumaga aje kushishikala Abaizraeli amango baliri omu rungu. Amango babwira Abaizraeli oku bakenge oyola malayika, Yehova aderha ntya: “Bulala ezino lyani limulimo.”a (Osome Kutoka 23:20, 21.) Yehova aderhaga ntyo bulala Yesu aliri amuderhera, ye wanaliri muntu wayerekanaga oku Yehova anajira buli chintu oku haki, n’okw’ali muchesibwa.

“DARHA, OKUZE EZINO LYAWE”

9. Kangana gurhe ezino lya Yehova lyaliri ly’akamaro ku Yesu ? Ofasiriye.

⁹ Nk’oku rhwanaganirire, chiro n’embere Yesu ayinje oku gulu, ezino lya Yehova lye lyaliri ly’akamaro ku yewe. Amango aliri oku gulu, kandi aliyerekene kangana gurhe ezino lya Yehova lili ly’akamaro ku yewe kugerera buli choshi aliri ajira! Oku buzinda-zinda bw’akasi kage oku gulu, Yesu ahema Eshe ntya: “Darha, okuze ezino lyawe.” Aho han’aho, Eshe amushubiza kugerera omulenge guli nka mukungulo gurhengere embingu: “Nalikuzize na nagenderera kulikuza.”​—Yoh. 12:28.

10-11. a) Nka gurhe Yesu alikuzize ezino lya Yehova? (Olole n’efoto.) b) Bulagurhe ezino lya Yehova lihemerhwe licheswe n’okukulwa kw’echisobe?

¹⁰ Yesu naye alikuzize ezino lya Yehova. Nka gurhe? Njira nguma ajiragamo ntyo, kwaliri kubwira abandi oku ngeso z’Eshe zisimisize bwenene n’ebijiro byage. Byalihemere ezino lya Yehova licheswe linakulwe kw’echisobe. Yesu aliyerekene oku echola chili ch’akamaro amango ayigiriza abanafunzi bage esala ly’omufano. Aderha ntya: “Darha oli omu mbingu, ezino lyawe licheswe.”​—Mt. 6:9.

¹¹ Bulagurhe ezino lya Yehova lyalikwanene kucheswa n’okukulwa kw’echisobe? Bulala, Shetani alibulire Yehova Mungu obukenge n’okumuderhera obubeshi omu bustani ye Edeni. Achihala oku Yehova ali mubeshi, mpu hali n’echintu chinja abishire Adamu na Eva. (Mwa. 3:1-5) Shetani ashuba kuyerekana oku Yehova anakola ebintu omu njira erhali y’ehaki. Obola bubeshi boshi bwazingisa erenge changwa ezino lya Yehova. Buzinda, omu siku za Yobu, Shetani aderha oku boshi banakolera Yehova banamukolera bulala hali echi balonzeze kumukulako. Obola bubeshi bwashuba kuyerekana oku nta muntu onazigira Yehova kurhenga oku murhima omu kuntu akagenderera kumukolera chiro ahurana ebibazo. (Yob. 1:9-11; 2:4) Byalihemere ebisanzi bigere by’okuyerekana nde mubeshi, eyi Yehova changwa Shetani.

“NAMALEKERERA AKALAMO KANI”

12. Bichi Yesu aliri tayari kujira bulala alizigire Yehova?

¹² Bulala alizigire Yehova bwenene, Yesu aliri tayari kujira byoshi akagala y’achesa ezino lya Yehova n’okulikula kw’echisobe. Aderha ntya: “Namalekerera akalamo kani.” (Yoh. 10:17, 18) Nechi, aliri tayari kufa eju y’ezino lya Yehova.b Bantu babiri bashinganyanya b’oburhanzi, Adamu na Eva, bowe balihere Yehova omugongo baja oku lunda lwa Shetani. Aliko, Yesu yewe aliri tayari kuyinja oku gulu n’okuyerekana kangana gurhe azigire Yehova. Yesu ajiraga ntyo kugerera byoshi aliri aderha n’ebyaliri akola omu kalamo kage. (Ebr. 4:15; 5:7-10) Aligenderere kuyorha mwimana ku Yehova kugera amango afaga olufu lw’amalumwa manene oku murhi gw’amalibuko. (Ebr. 12:2) Omu kujira ntyo ayerekana bwinja kw’azigire Yehova n’ezino lyage.

13. Bulagurhe Yesu yenyine ye walikwanene kuyerekana oku Shetani ali mubeshi? (Olole n’efoto.)

¹³ Byoshi Yesu aliri ajira omu kalamo kage byaliyerekene oku Shetani ye mubeshi s’arhali Yehova! (Yoh. 8:44) Yesu alimenyere Yehova bwinja-bwinja kulusha owindi muntu yeshi wachigerere kubaho. Akaba haliri echinwa ch’obukweri mu byoshi Shetani aderhaga oku bilolere Yehova, Yesu alikwanene kuchimenya bwinja. Aliko, Yesu alihigirire kugenderera kuderhera erenge changwa ezino lya Yehova. Chiro n’amango byalishushire nka Yehova amulekerere, Yesu aliri tayari kufa ahali h’okuha Eshe muzigirwa omugongo.​—Mt. 27:46.c

“NAMALIRE AKASI WAMPAGA”

14. Gurhe Yehova alihembere Yesu oku bwimana bwage?

¹⁴ Omu sala aderhaga oku buzinda bw’akalamo kage oku gulu, Yesu aderha ntya: “Namalire akasi wampaga nkole.” Alilangalire oku Yehova nj’amuhemba eju y’obwimana bwage. (Yoh. 17:4, 5) Yesu aligwerhe empamvu nyinja y’okulangalira Eshe. Yehova arhamulekaga ayorhe omu shinda. (Mdo. 2:23, 24) Afula Yesu, amuha n’echeo ch’enyanya bwenene omu mbingu. (Flp. 2:8, 9) Buzinda, Yesu arhondera kurhegeka nka Mwami w’Obwami bwa Mungu. Bichi obola Bwami bwalikwanene kuyeneza? Echigabi cha kabiri ch’esala ly’omufano chirhuyigirize: “Obwami bwawe buyinje. Obulonza bwawe bujirike oku gulu kuguma n’omu mbingu.”​—Mt. 6:10.

15. Bichi bindi Yesu nj’ayeneza?

¹⁵ Hanola hofi-hofi, Yesu arhondera evita ly’okulwisa abanzi ba Mungu, n’okuharibisa abantu babi oku Armagedoni. (Ufu. 16:14, 16; 19:11-16) Siku zigeke enyuma waho, nj’akabula Shetani omu abiso nj’afungirwamo eyarhakachigala kukola chintu. (Ufu. 20:1-3) Yesu nj’agalula omurhula n’obushinganyanya oku bantu boshi amango m’oburhegesi bwage bwa myaka chihumbi. Nj’afula abantu bafire. Nj’ajira egulu lyoshi libe paradizo. Omuhigo gwa Yehova nji gwayenera!​—Ufu. 21:1-4.

16. Gurhe akalamo nji kashusha enyuma wa myaka chihumbi?

¹⁶ Gurhe akalamo nji kashusha enyuma w’oburhegesi bwa myaka chihumbi bwa Yesu? Echaha n’okurhashinganana kw’abantu nji byaba eyi birhachiriho. Abantu nji barhachikenera okuhema obubabale bw’ebyaha byabo kugerera enchungu; nji barhachiba eyi bakenere omunvisikanyi changwa omudahwa. ‘Omwanzi muzinda, k’okuderha olufu, nj’aba eyi arhachiliho.’ Eshinda zoshi nji zayorha bwama. Abafire boshi nji baba eyi bafukire. Buli muntu oku gulu nj’aba eyi mushinganyanya.​—1 Ko. 15:25, 26.

17-18. a) Bichi nji byaba oku buzinda b’Oburhegesi bwa Myaka Chihumbi? b) Bichi Yesu nj’ajira amango ebisanzi byage by’okurhegeka nji byahwa? (1 Wakorinto 15:24, 28) (Olole n’efoto.)

¹⁷ Bichi bindi nji byaba enyuma w’oburhegesi bwa myaka chihumbi bwa Yesu? Agola mango, hali echintu ch’akamaro bwenene nji chaba. Nta muntu yeshi-yeshi nji washuba kugangana oku Yehova ali muchesibwa na Mungu w’ehaki. Nka gurhe? Omu bustani ye Edeni, Shetani abaga achihalire oku Yehova ali mubeshi, n’oku anarhegeka abantu kubi na buzira buzigire. Kurhangira agola mango, abantu banakolera Mungu bayerekene turu zinene k’okuntu Yehova anakola ebintu k’okuba kwinja bwenene. Che chirhumire oku buzinda b’Oburhegesi bwa Myaka Chihumbi, erenge lya Yehova nji lyaba eyi lyakulirwe kw’echisobe loshi. Nj’aba ey’ayerekene bwinja-bwinja oku ali Darha w’obuzigire w’omu mbingu.

¹⁸ Enyuma y’oburhegesi bwa myaka chihumbi bwa Yesu, buli muntu nj’aba ey’abwene oku byoshi Shetani aderhaga ku Yehova biba by’obubeshi. Bichi Yesu nj’ajira amango ebisanzi byage by’okurhegeka nji byahwa? Naye nj’ajira kuguma na Shetani apinge Yehova si? Nanga! (Osome 1 Wakorinto 15:24, 28.) Yesu nj’agalulira Eshe Obwami. Nj’achicha bufi oku burhegesi bwa Yehova. Nechi, tofauti na Shetani, Yesu nj’ayemera agalulira Eshe obukulu bwage boshi bulala amuzigire.

19. Kangana gurhe ezino lya Yehova liba ly’akamaro ku Yesu?

¹⁹ Nta ngangane Yehova aliyemerere aha Yesu ezino lyage! Yesu aliyerekene oku ali murhumwa wa Yehova oshinganene. Bobuno, kangana gurhe ezino lya Yehova liba ly’akamaro ku Yesu? Liba ly’akamaro bwenene kulusha echindi chintu choshi-choshi. Aliri tayari kufa eju y’elyola zino, nj’anaba tayari kugalulira Yehova buli chintu choshi oku buzinda bw’oburhegesi bwage bwa myaka chihumbi. Nkagurhe rhwakayiganya Yesu? Nji rhwaganira kw’echola chibazo omu mwazi gwakulikiraho.