MWAZI G’OKUYIGA 23
OLWIMPO 2 Ezino Lyawe we Yehova
Ezino lya Yehova—Liba ly’Akamaro ku Rhwabo
“‘Muli bahamirizi bani,’ ku Yehova aderhere.”—ISA. 43:10.
EBIRHWAYIGA
Rhwabona ebi rhwakajira yi rhuyerekena oku Yehova ali muchesibwa n’oku byoshi Shetani amuderhereko buli bubeshi.
1-2. Bichi birhuyemezeze kw’ezino lya Yehova liba ly’akamaro bwenene ku Yesu?
EZINO lya Yehova liri ly’akamaro bwenene ku Yesu. Inta windi muntu wajirire bingana n’ebyajirire omu kujira ezino ly’Eshe limenyikane. Nk’oku rhwabonaga omu mwazi gwageraga, Yesu aliyemerere afe y’ayerekana oku Yehova ali muchesibwa, na byoshi anakola biba by’ehaki. (Mk. 14:36; Ebr. 10:7-9) N’enyuma w’oburhegesi bwage bwa myaka chihumbi, Yesu nj’ayemera agalulire Eshe obukulu yi Yehova ahabwa obukuze boshi. (1 Ko. 15:26-28) Kandi obuzigire bwa Yesu ku Mungu buyerekene kangana gurhe aba mwira w’Eshe. Buli choshi Yesu ajirire Yehova chiyerekene okw’amuzigire bwenene.
2 Yesu ayinjaga oku gulu omu zino ly’Eshe. (Yoh. 5:43; 12:13) Ajira ezino ly’Eshe limenyikane oku banafunzi bage. (Yoh. 17:6, 26) Ayigiriza omu zino lya Yehova n’okukola ebisomerene binene mw’elyola zino. (Yoh. 10:25) N’amango asalira oku Yehova alange abanafunzi bage, amubwira okw’ajire ntyo “eju y’ezino lyage.” (Yoh. 17:11) Sasa lero, akaba ntyo ku Yesu aliri achiyunva eju y’ezino ly’Eshe, gurhe omuntu akaja achihala okw’ali Mukristu w’okuli aliko ey’arhenji ezino ly’Eshe wa Yesu arhanalikolesa?
3. Bichi rhwaganirako mu gunola mwazi?
3 Rhwabo nka Bakristu bali bakulikira ebishando bya Yesu, rhunakenga ezino ly’Eshe bwenene. (1 Pe. 2:21) Mu gunola mwazi, rhwabona bulagurhe Yehova ahere ezino lyage balala banatangaza “emyazi minja y’Obwami.” (Mt. 24:14) Rhwashuba kubona kangana gurhe ezino lya Yehova likwanene kuba ly’akamaro ku buli muguma werhu.
“ABANTU BAYIRIKIRWE OKU ZINO LYAGE”
4. a) Kasi kahe Yesu alihere abanafunzi bage embere agaluke embingu? b) Bibazo bihe rhwakachibaza oku bilolere akola kasi?
4 Embere Yesu agaluke omu mbingu, abwira abanafunzi bage ntya: “Mwahabwa emisi amango eroho lichesibwa lyabayinjako, mwanaba bahamirizi bani omu Yerusalemu, omu Yudea, omu Samariya yoshi, na kugera efasi za hale bwenene z’egulu.” (Mdo. 1:8) Bobola abanafunzi ba Yesu balikwanene kuhubiri emyazi minja buli hoshi, s’arhali omu Izraeli monyine. Buzinda, abantu b’amashanja moshi bakapatire orozo l’okuba banafunzi ba Yesu. (Mt. 28:19, 20) Aliko rhubwene oku Yesu aliderhere: “Nji mwanaba bahamirizi bani.” K’okuderha okw’abola banafunzi bahyahya barhalikwanene kumenya ezino lya Yehova, si buli hoshi bakajire balikwanene kuba bahamirizi ba Yesu? Ebyajaga byaba biderherwe omu Matendo sura 15 byakarhurhabala kushubiza kw’echola chibazo.
5. Gurhe entumwa n’abashamuka baliri e Yerusalemu bayerekenaga okw’abantu boshi bakwanene kumenya ezino lya Yehova? (Olole n’efoto.)
5 Omu mwaka gwa 49 N.K.Y., entumwa n’abashamuka baliri e Yerusalemu balijirire embuganano y’okuganira oku bilolere eby’abantu barhaliri Bayahudi balikwanene kujira yi bayemerwa nka Bakristu. Eyola mbuganano yahwere, Yakobo mwene-wabo Yesu aderha ntya: “[Petro] arhubalire bwinja-bwinja gurhe Mungu awazaga oku mashanja ob’oburhanzi, y’achishoga mw’abantu baheka ezino lyage.” Zino lya nde Yakobo aliri aderha? Omu kugalukira ebinwa by’omulebi Amosi, Yakobo ayongera ntya: “Omu kuntu abantu bayorhere balonze Yehova n’omurhima goshi haguma n’abantu b’amashanja moshi, bantu bayirikwa oku zino lyani, intyo ku Yehova aderhere.” (Mdo. 15:14-18) Obwene ahala kw’abala banafunzi bahyahya barhalikwanene kuyiga oku bilolere Yehova konyine, si kandi balikwanene ‘kuhamagalwa oku zino lyage.’ K’okuderha oku balikwanene kumenyesa abantu ezino lya Mungu, n’okumenyikana oku bandi bantu oku bayirikirwe kw’elyola zino.
Oku mbuganano y’ebaraza lirhambwire yabaga omu kagana ka burhanzi, abola balume bemena balirhegerere bwinja-bwinja okw’Abakristu bakwanene kuba bantu bayirikirwe oku zino lya Mungu (Olole echifungo 5)
6-7. a) Muhigo guhe gukulu gwarhumaga Yesu ayinja oku gulu? b) Yindi mpanvu ehe y’akamaro yarhumaga Yesu ayinja oku gulu?
6 Ezino Yesu k’okuderha “Yehova ali buchunguke.” Nechi, byanalibonekene bwinja oku ali njira Yehova akolesaga omu kuchungula boshi baherhe obwemere. Yesu ayinjaga oku gulu y’ahana akalamo kage eju y’abantu. (Mt. 20:28) Omu kulipa enchungu, ajirire bishobokane abantu ba buli buko bachunguke, nji banapate akalamo k’esiku n’amango.—Yoh. 3:16.
7 Aliko si, bulagurhe abantu balikenere enchungu? Eju y’ebyabaga omu bustani ye Edeni. Nk’oku rhwabonaga omu mwazi gwageraga, abazere b’oburhanzi, Adamu na Eva, balipingire Yehova nantyo baheza obushobozi b’okulama esiku n’amango. (Mwa. 3:6, 24) Aliko, hali echindi chintu ch’akamaro bwenene charhumaga Yesu ayinja oku gulu olekere okuchungula abantu. Ezino lya Yehova lyalizingisizwe bwenene. (Mwa. 3:4, 5) Che chirhumire byalihemere abantu bamenye oku nta chintu chibi Yehova ajirire, na ntyo ezino lyage lyanacheswa. Bulala Yesu aliri murhumwa wa Yehova analihekera ezino lyage, yenyine ye wakajirire echintu ch’akamaro bwenene omu kuchesa ezino lya Yehova.
Gurhe omuntu akaja achihala okw’ali Mukristu w’okuli aliko ey’arhenji ezino ly’Eshe wa Yesu arhanalikolesa?
8. Bichi balala boshi bagwerhe obwemere mu Yesu bakwanene bayunve bwinja?
8 Boshi bakagwarhire obwemere mu Yesu, babe Bayahudi changwa nanga, balikwanene kuyunva bwinja ngahe obuchunguke bwabo burhengerere; k’okuderha emw’Eshe wa Yesu, Yehova Mungu. (Yoh. 17:3) N’echindi, kuguma na Yesu, balikwanene bayirikwe oku zino lya Yehova. Banalikwanene kurhegera kangana gurhe bili by’akamaro elyola zino licheswe. Byalibahemere babiyunve bwinja yi bachunguka. (Mdo. 2:21, 22) Bobola, abanafunzi ba Yesu bemana boshi bakwanene kuyiga oku bilolere Yehova na Yesu. Ahola rhwamayunva bwinja echarhumaga Yesu amala esala lyage n’ebila binwa bili omu Yohana sura 17: “Nabamenyeseze ezino lyawe, na nashuba kulimenyesa, y’obuzigire wanzigire buba mubo nani imbe omu buguma haguma nabo.”—Yoh. 17:26.
“MULI BAHAMIRIZI BANI”
9. Gurhe rhwakayerekana kw’ezino lya Yehova lili ly’akamaro ku rhwabo?
9 Kugerera hano, rhwamabona oku yi rhuba banafunzi ba Yesu, rhukwanene kuchesa ezino lya Yehova. (Mt. 6:9, 10) Rhukwanene kubona ezino lya Yehova oku lye ly’akamaro bwenene kulusha amandi mazino moshi. Birhuhemere okujira ebijiro biyerekene oku ntyo ku rhuchiyunvirhe. Bobo si, bichi rhwakajira omu kuchesa ezino lya Yehova n’okuyerekana oku byoshi Shetani ashwekere ku Yehova bwaliri bubeshi?
10. Mufano guhe g’olushinja guderherwe omu sura ya 42 kugera 44 y’echitabu cha Isaya? (Isaya 43:9; 44:7-9) (Olole n’efoto.)
10 Echintu ch’akamaro rhukwanene kujira omu kuchesa ezino lya Yehova chiyerekenwe bwinja omu sura ya 42 kugera 44 y’echitabu cha Isaya. Mw’ezola sura Yehova ahemere abantu barhamuharamya bayerekane ebyemezo oku bamungu babo bali bamungu b’okuli. Nka kulala binaba oku tribinale, ahamagere abahamirizi bakabiyemeza. Aliko ntaye n’omuguma wakagala!—Osome Isaya 43:9; 44:7-9.
Rhunahana obuhamirizi oku nta windi Mungu olekere Yehova omu bi rhunaderha n’ebi rhunajira (Olole echifungo 10-11)
11. Bichi Yehova aderhere oku bilolere abantu bage, nk’oku biyerekenwe omu Isaya 43:10-12?
11 Osome Isaya 43:10-12. Yehova aderhere ntya oku bilolere abantu bage: “Muli bahamirizi bani, . . . nani indi Mungu.” Yehova abahemere bashubize kw’echila chibazo: “Hali owindi Mungu olekere nyono si?” (Isa. 44:8) Nerhu, rhuherhe olukengo l’okushubiza kw’echola chibazo. Kugerera ebinwa n’ebijiro byerhu, rhunahana obuhamirizi oku Yehova yenyine ye Mungu w’okuli. Ezino lyage lye lili enyanya w’amandi mazino moshi. Kugerera okuntu rhulamire, rhunayerekana oku rhuzigire Yehova bwenene rhunali bemane kuye, na chiro Shetani ajira gurhe yi birhukomerera. Mw’eyola njira, rhuherhe orozo l’okurhabala kuchesa ezino lyage.
12. Nka gurhe obulebi buli omu Isaya 40:3, 5 bwayeneraga?
12 Amango rhwamashigikira ezino lya Yehova changwa erenge lyage, rhunaba eyi rhuli rhwayiganya Yesu Kristu. Kandi Isaya alibere aderha oku hali omuntu ‘wakacheseze changwa wakarheganyize enjira ya Yehova,’ nk’okw’amahugulo m’eshishi maderhere. (Isa. 40:3) Nka gurhe obola bulebi bwayeneraga? Yowane Mubatiza alirheganyize Yesu enjira, wayinjaga omu zino lya Yehova anaderha omu zino lya Yehova. (Mt. 3:3; Mk. 1:2-4; Lu. 3:3-6) Obola bulebi bon’obola bwaliderhere ntya: “Obukuze bwa Yehova nji bwabonekana.” (Isa. 40:5) Nka gurhe byabaga ntyo? Amango Yesu ayinja oku gulu, aliyiganyize Yehova oku bushinganyanya, omu kuntu byakabonekene nka Yehova yenyine yi wanayinjire oku gulu.—Yoh. 12:45.
13. Gurhe rhawkayiganya Yesu?
13 Kuguma na Yesu, nerhu rhunahana obuhamirizi oku bilolere Yehova. Rhuba rhuhekere ezino lya Yehova, rhunabwira na buli muntu rhwabuganire oku bilolere ebijiro byage bisomeze. Aliko yi rhugala kujira ntyo bwinja-bwinja, kandi rhukwanene kumenyesa abantu byoshi Yesu akolere omu kuchesa ezino lya Yehova. (Mdo. 1:8) Yesu ye Muhamirizi wa Yehova mukulu, nerhu rhuli rhwamuyiganya. (Ufu. 1:5) Bichi bindi rhukwanene kujira yi rhuyerekana okw’ezino lya Yehova lili ly’akamaro bwenene ku rhwabo?
EZINDI NJIRA RHWAKAYEREKANAMO KW’EZINO LYA YEHOVA LILI LY’AKAMARO KU RHWABO
14. Nk’oku biyerekenwe bwinja omu Zaburi 105:3, gurhe rhunachiyunva oku bilolere ezino lya Yehova?
14 Rhunachishingira ezino lya Yehova. (Osome Zaburi 105:3.) Yehova anasima bwenene amango rhuli rhwachishingira ezino lyage. (Yer. 9:23, 24; 1 Ko. 1:31; 2 Ko. 10:17) ‘Okuchishingira ezino lya Yehova’ k’okuderha okuchivugiraye bulala ye Mungu werhu. Rhunachiyunva rhugwerhe olukengo amango rhuli rhwabwira abandi oku Yehova ali muchesibwa n’oku byoshi anakola anabikola omu haki. Rhurhakwanene kuyunva eshoni haba n’eliguma z’okubwira abarhunakola nabo, abarhunasoma nabo, abaturanyi berhu n’abandi oku rhuli Bahamirizi ba Yehova! Shetani alonzeze rhuleke kubwira abandi oku bilolere ezino lya Yehova. (Yer. 11:21; Ufu. 12:17) Omu bukweri, Shetani n’abalebi bage b’obubeshi banalonza abantu bayibagire ezino lya Yehova. (Yer. 23:26, 27) Aliko bulala rhuba rhusimire ezino lya Yehova rhunalonza gurhe rhwakamusingiza amango moshi rhwamapata orozo.”—Zb. 5:11; 89:16.
15. Okuhamagala ezino lya Yehova k’okuderha gurhe?
15 Rhwagenderera kuhamagala ezino lya Yehova. (Yoe. 2:32; Ro. 10:13, 14) Okuhamagala ezino lya Yehova kuheberwe mu binene olekere okufi menya ezino lyage n’okulikolesa. Rhunahikira kumenya Mungu nka muntu, rhwanamulangalira, n’okunihira kw’arhurhabala anarhuyerekeze. (Zb. 20:7; 99:6; 116:4; 145:18) Kandi okuhamagala ezino lya Yehova kuli kulimenyesa abandi n’engeso zage zinja, n’okubaheba omurhima bahungame n’okujira ebijiro byakarhuma Yehova abayemera.—Isa. 12:4; Mdo. 2:21, 38.
16. Gurhe rhwakayerekana oku Shetani ali mubeshi?
16 Rhuba tayari kuteseka eju y’ezino lya Yehova. (Yak. 5:10, 11) Amango rhwamayorha bemana ku Yehova omu chihe ch’ebibazo eyi rhwamayerekana oku Shetani ali mubeshi. Omu siku za Yobu, Shetani aliderhere ntya oku bilolere boshi banakolera Yehova: “Omuntu ahana buli chochi aherhe y’achungula akalamo kage.” (Yob. 2:4) Shetani alichihalire mpw’abantu bakakolera Yehova amango bali omu busime, s’aliko amango bamahurana ebibazo bakwanene kuleka Yehova. Omulume mwimana Yobu ayerekana k’obola buli bubeshi. Konakuguma, nerhu rhuherhe olukengo l’okuyerekana k’obola buli bubeshi; chiro Shetani ajira gurhe, rhurhakaha Yehova omugongo n’okuleka kumukolera. Rhwakachizera buzira ngangane oku Yehova agenderera kurhulanga eju y’ezino lyage.—Yoh. 17:11.
17. Nk’oku biyerekenwe omu 1 Petro 2:12, mu yindi njira ehe rhwakaha ezino lya Yehova m’obukuze?
17 Rhunakengesa ezino lya Yehova. (Mez. 30:9; Yer. 7:8-11) Bulala abantu bayinji oku rhuli Bahamirizi ba Yehova rhunahekere ezino lyage, ebi rhuli rhwajira byakalerhera Yehova erenge changwa bimusuzagurise. (Osome 1 Petro 2:12.) Che chirhumire, rhulonzeze kujira koshi rhwakagala yi rhusingiza ezino lya Yehova kugerera ebinwa n’ebijiro byerhu. Mw’eyola njira rhwalerhera Yehova obukuze chiro akaba oku rhurhashinganene.
18. Yindi njira ehe rhwakayerekanamo kw’ezino lya Yehova lili ly’akamaro bwenene ku rhwabo? (Olole n’amahugulo m’eshishi.)
18 Rhunabona kw’ezino lya Yehova lye ly’akamaro bwenene kulusha okw’abantu banarhubona. (Zb. 138:2) Bula gurhe chili chintu ch’akamaro? Bulala amango rhuli rhwajira ebintu bisimisize Yehova abantu bazigana kurhugaya n’okurhuderha kubi.a Yesu aliyemerere afe olufu lw’eshoni nka chishambo, aliko akengese ezino lya Yehova. ‘Alisuzagwire eshoni’ k’okuderha arhavaga ayubaha bwenene eju y’eby’abandi bakamuderhereko. (Ebr. 12:2-4) Alisezeze obwenge oku bilolere okujira obulonza bwa Mungu.—Mt. 26:39.
19. Gurhe onachiyunva oku bilolere ezino lya Yehova, na bulagurhe?
19 Rhunachishingira ezino lya Yehova, lunali lukengo ku rhwabo okuhamagalwa Bahamirizi ba Yehova. Bulala ezino lya Yehova lili ly’akamaro bwenene ku rhwabo, rhwagenderera kumusingiza na chiro abandi barhusuzagura. Ezino lya Yehova lili ly’akamaro bwenene chiro na kulusha olukengo lwerhu. Che chirhumire, muleke rhuhigirire kugenderera kusingiza ezino lya Yehova na chiro Shetani arhulikiza eminjugu-njugu eli gurhe. Nka rhujirire ntyo, rhwayerekana okw’ezino lya Yehova liba ly’akamaro bwenene ku rhwabo nk’oku liba ly’akamaro ku Yesu Kristu.
OLWIMPO 10 Singiza Yehova Mungu Werhu!
a Chiro n’omulume mwimana Yobu alirhondere kuchiwazako bwenene, amango bala balume basharhu baderha oku hali echintu chibi akwanene kuba ey’ajirire. Burhanzi, amango afisa abana bage n’okuheza ebirugu byage byoshi, “Yobu arhalijirire echaha arhanaderhaga oku hali echintu chibi Mungu ajirire.” (Yob. 1:22; 2:10) Aliko, amango bamushobeka n’okuderha oku hali echintu chibi akaba ey’ajirire, Yobu arhondera kuderha “ebinwa birhaherhe nda na mugongo.” Arhondera kuchiteteya omu kuntu achese erenge lyage ahali h’okuchesa ezino lya Yehova changwa erenge lyage.—Yob. 6:3; 13:4, 5; 32:2; 34:5.