Kuguma na Petro, Wakagenderera Kukolera Yehova

1. Gurhe Petro alijirire amango Yesu amurhabala ayirhe efi zinene kugerera echisomerene?

PETRO aligezeze obudufu boshi eyi ali arhega efi, aliko ntacho aliyirhire. Ech’okusomeza, Yesu amubwira ntya: “Oyegeze obwarho bwawe emuhengeri, muchimye emilaga yenyu, murhege efi.” (Lu. 5:4) Petro agwarha engangane oku nta fi n’enguma akayirhire, aliko ajira ebi Yesu amubwiraga. Petro n’abaliri akola nabo, bayirha efi kamama n’emilaga yahwanza kubereka. Amango barhegeera oku Yesu yewajiraga echola chisomerene, Petro n’abaliri nabo “basomerwa bwenene.” Petro aderha ntya ey’anasomerwe: “Oje hale nani, Waliha, bulala ndi muyabyaha.” (Lu. 5:6-9) Petro alichiyunvirhe ali wabusha, anachibona nk’arhakwanene kuba embere za Yesu.

2. Bulagurhe okuganira oku mufano gwa Petro kwakarhurhabala?

² Petro aligwerhe empanvu y’okuderha oku “ali munyabyaha.” Amandiko mayerekene oku mango maguma, aliri aderha n’okujira ebintu byaliri byarhuma achiganya buzinda. Mango maguma si onachiyunva oli kuguma na Petro? Ka hali ngeso nguma oli wachihangana kuyerekana omu borhere bwawe, changwa hali obuzamba wamalwisa mu myaka minene? Akaba ntyo kubili, ochizere oku omufano gwa Petro gwakurhabala. Nka gurhe? Owaze kw’echila: Nka Yehova alonzaga arhakayandikisize amagosa ma Petro omu Biblia. Aliko, ayandikisa amola magosa yimarhuyigiriza chintu chilebe. (2 Ti. 3:16, 17) Okuyiga oku bilolere ebi Petro agereremo, kwakarhurhabala rhurhegeere oku Yehova arharhulonzeza k’obushinganyanya. Alonzeze rhugenderere kumukolera chiro akaba rhugwerhe obuzamba.

3. Bulagurhe rhukwanene kugenderera kukolera Yehova?

³ Bulagurhe bili by’akamaro rhugenderere kukolera Yehova? Bulala amango rhwamachikoomeza kujira chintu chilebe, rhunachimenya bwinja-bwinja. Omufano: Amango muntu mulebe amayiga kuziha echidari, byakamuhema myaka minene y’amenya kuchiziha bwinja. Oku anali agenderera kuchiyiga, nkabaga akayinja akola magosa manene. Aliko, nkagenderere kuchikoomeza, akanagenderera kuchimenya bwinja. Chiro n’amango amamenya kuziha echidari bwinja, mango maguma akajira amagosa. Aliko chiro byakaba ntyo, arhakavunika omurhima. Aliko nkali agenderere kuchiyiga, kwanagenderera kuchimenya bwinja-bwinja. K’onakuguma, amango oli wachiyunva oku wamahima buzamba bulebe, nkabaga kandi wakashuba kukola amola magosa. Aliko rhwakagenderera kuchihangana yirhuhikira omuhigo gwerhu. Rhweshi rhunaderha changwa kujira chintu chilebe chakarhuma rhwachiganya buzinda; aliko, nka rhurhaluhire, Yehova akarhurhabala rhugenderere kujira amajambere. (1 Pe. 5:10) Lekaga rhuganire oku mufano gwa Petro g’okugenderera kukolera Yehova. Akababaro Yesu ayerekaga Petro chiro akaba oku aliri ajira amagosa, k’akarhushunika rhugenderere kukolera Yehova.

OKULWISA KWA PETRO KWALIMULERHERE EMIGISHO

4. Nk’oku biyerekenwe omu lwandiko lwa Luka 5:5-10, bichi Petro ashambere oku bimulolere, aliko gurhe Yesu alimuhebere omurhima?

⁴ Ebiblia erhaderhere bulagurhe Petro aliri achiyirika oku “ali munyabyaha,” changwa byaha byanyabachi aliri ashambalako. (Osome Luka 5:5-10.) Aliko nkabaga abaga eyi akolere amagosa makomere. Yesu alimenyere oku Petro aligwerhe obuba, nkabaga bulala Petro aliri achiyunva oku ntacho amalire. Aliko Yesu alimenyere oku Petro akagenderere kuyorha mwimana. Bobola Yesu abwira Petro n’obwirhonzi “omenye wayubaha.” Okuntu Yesu alinihiire Petro kwali murhabere ahindamule akalamo kage. Petro na mwene-wabo, y’ekala Andrea, balilekere akasi kabo k’okurhega efi, baba banafunzi b’amango moshi ba Masiya. N’eyola simikiro yabo yalibalerhere migisho minene.—Mk. 1:16-18.

5. Migisho ehe Petro alipatire bulala arhazigaga enkengero zage zibi zarhuma arhakulikira Yesu?

⁵ Petro alichibwenere bintu binene yewe nka mwanafunzi wa Kristu. Alibwene gurhe Yesu afumya abalwala, okufukuza abantu mw’abazimu, n’okufuula abafire.b (Mt. 8:14-17; Mk. 5:37, 41, 42) Kandi Petro alibwene echibonekezi chisomeze chiyerekene okuntu Yesu akabere Mwami w’Obwami bwa Mungu bw’amango mayinjire. Petro arhayibagiraga chiro echola chihe. (Mk. 9:1-8; 2 Pe. 1:16-18) Nechi, Petro arhakachibwenere ebyola byoshi nka arhakulikiraga Yesu. Alichiyunvirhe agwerhe obusiime bulala arhazigaga obuzamba bwage bwarhuma abula eyola migisho!

6. Ka Petro alihimire juba-juba obuzamba bwage? Fasiriya.

⁶ Chiro akaba ebya yunvaga n’ebya bonaga, Petro aligenderere kulwisa obuzamba bwage. Rhuganire kw’eyila mifano. Amango Yesu aliri aderha gurhe alibuka na gurhe afa y’ayeneza obulebi bwe Biblia, Petro amukalihira. (Mk. 8:31-33) Mango manene, Petro n’ezindi ntumwa baliri baja buhaka oku bilolere inde waliri mukulu bwenene. (Mk. 9:33, 34) Ebudufu embere Yesu afe, Petro acha mulume muguma ogurhwi. (Yoh. 18:10) M’obola budufu bonobo, Petro ayubaha n’okuhakana kasharhu oku arhenji mwira wage Yesu. (Mk. 14:66-72) Echola chali rhumire Petro alira bwenene.—Mt. 26:75.

7. Lukengo luhe Petro alihabirwe amango Yesu amala kufuuka?

⁷ Yesu arhalekereraga eyola ntumwa yage yavunikaga omurhima. Amango Yesu afuuka, ayereka Petro oku achigenderere kumuzigira. Yesu abwira Petro akole oku bwirhohye akasi k’okulagira entama zage. (Yoh. 21:15-17) Petro aliri tayari kujira ebi Yesu amubwiraga. Kandi, aliri omu barhanzi eroho lya Mungu lyashigaga amavurha oku Pentekose omu Yerusalemu.

8. Gosa lihe likomeere Petro alijirire omu Antiokia?

⁸ Chiro n’amango Petro amala kuba Mukristu mushigwa, alikwanene kugenderera kuchihangana kulwisa obuzamba bwage. Omu mwaka gwa 36 N.K.Y, Mungu arhuma Petro emwa Kornelio orhaliri Muyahudi, eyola munda Mungu ashiga Kornelio amavurha kugerera eroho lichesibwa. Echola charhabala Petro abone oku “Mungu arhajira kabolo” n’abarhali Bayahudi bakayinjire omu chibaga ch’Echikristu. (Mdo. 10:34, 44, 45) Enyuma waho Petro ahwanza kulya n’abantu b’amandi mashanja, chaliri chintu arhaliza kujira kurhenga mira. (Gal. 2:12) Aliko, Bakristu baguma Babayahudi baliri bachiyunva oku, Abayahudi barhalikwanene kulya n’abantu b’amandi mashanja. Amango Bayahudi baguma bagwerhe amawazo mali nk’amola bahika e Antiokia, Petro aleka kulya na bene-babo barhaliri Bayahudi nkabaga eju y’okuyubaha kugoseza Abayahudi bahindamukaga Bakristu. Amango entumwa Paulo abona obulya-lya bwa Petro, amuhanula embere z’abantu boshi. (Gal. 2:13, 14) Chiro akaba obuzamba bwage, Petro aligenderere kubera mwimana. Bichi byamurhabalaga?

BICHI BYARHABALAGA PETRO AGENDERERE KUBERA MWIMANA?

9. Nk’oku olwandiko lwa Yohana 6:68, 69 luyerekene, nka gurhe Petro ayerekanaga obwimana bwage?

⁹ Petro aliri mwimana; arhayemeraga echintu n’echiguma chamubuza kukulikira Yesu. Aliyerekene obwimana bwage amango Yesu aderha chintu chilebe abanafunzi bage barhaliyunvirhe. (Osome Yohana 6:68, 69.) Buzira kulingiriza changwa kulonza amafasiriyo, banene baleka kukulikira Yesu. Aliko Petro yewe nanga. Petro alimenyere oku Yesu yenyine ye gwerhe “ebinwa by’akalamo k’esiku n’amango.”

10. Nka gurhe Yesu aliyerekene oku achizerere Petro? (Olole n’efoto.)

¹⁰ Yesu arhajahikaga Petro. Obudufu buzinda bw’akalamo kage oku gulu, Yesu alimenyere oku Petro n’ezindi ntumwa bakamujahikire. Aliko Yesu alibwirire Petro oku achizerere oku, akagalukire n’okugenderera kuyorha mwimana. (Lu. 22:31, 32) Yesu alimenyere oku “omurhima gulonzeze . . . aliko, omubiri guzambire.” (Mk. 14:38) Bobola chiro n’amango Petro amala kulahira Yesu, Yesu yewe arhamujahikaga. Amango Yesu afuuka arhengerera Petro bwinja-bwinja eyi ali yenyine. (Mk. 16:7; Lu. 24:34; 1 Ko. 15:5) Ba nka wawaza kangana gurhe echola chalirhabere Petro, wabaga agwerhe mugayo gunene eju y’ebyaba akolere!

11. Nka gurhe Yesu alirhabere Petro achizere oku Yehova akamushishikere?

¹¹ Yesu alirhabere Petro achizere oku Yehova amushishikala. Amango Yesu afuuka, ahereza Petro n’ezindi ntumwa orozo l’okushuba kuyirha efi kugerera echisomerene. (Yoh. 21:4-6) Buzira ngangane, echola chisomerene chali yemezeze Petro oku Yehova akamushishikere oku bintu by’omubiri akalagirire. Nkabaga agola mango, entumwa Petro aliyibukire ebinwa Yesu aderhaga oku Yehova ashishikala balala “bagenderere kurhanga kulonza Obwami.” (Mt. 6:33) Ebyola byoshi byalirhabere Petro ahebe akasi k’okuhubiri oku nafasi y’oburhanzi omu kalamo kage, si arhali akasi k’okurhega efi. Alikolere akasi k’okuhubiri oku bushiru oku Pentekose omu mwaka gwa 33 N.K.Y, n’echola chalirhabere ebihumbi by’abantu bayemere emyazi minja. (Mdo. 2:14, 37-41) Enyuma waho arhabala Abasamariya n’abantu b’amandi mashanja bayemere Kristu. (Mdo. 8:14-17; 10:44-48) Kweri, Yehova alikoleseze Petro omu bulyo busomeze omu kulerha abantu ba buli buuko omu chibaga chage.

BICHI RHWAYIGIRE?

12. Nka gurhe omufano gwa Petro gwakarhurhabala akaba rhuli rhwalwisa obuzamba bugenderere?

¹² Yehova akarhurhabala rhugenderere kubera bemana. Buli mango birhaba biyorohere, ahanene amango rhuli rhwalwisa obuzamba bon’obo mu siku zinene. Hali amango obuzamba bwerhu bwakabonekana nka bukomere bwenene kulusha obu Petro aliri alwisa. Aliko Yehova akarhuhereza emisi yirhurhavunika omurhima. (Zb. 94:17-19) Omufano, mwene-werhu muguma alichihebere omu kalamo k’okulala n’ababo balume mu myaka minene amango arhaliza kuyiga okuli. Ahindamula akalamo kage loshi-loshi, n’okuhwanza kulama nk’oku amakanuni me Biblia maderhere. Aliko, mango maguma aligenderere kuchihangana kulwisa enkengero zibi. Bichi byamurhabalaga agenderere kulwisa? Afasiriye ntya: “Yehova anarhuhereza emisi.” Ayongerere ntya: “Kugerera eroho lichesibwa lya Yehova . . . , nayigire oku byakashoboka oku [genderera] kulambagira omu njira y’okuli . . . Yehova agenderere kunkolesa, chiro akaba oku ntashinganene, anagenderere kumpereza emisi.”

13. Nka gurhe rhwakayiga omufano gwa Petro guli omu Matendo 4:13, 29, 31? (Olole n’efoto.)

¹³ Nk’oku rhwabwene, Petro alijirire magosa malebe makomere bulala aliri ayubaha abantu. Aliko omu kusalira y’apata emisi, Petro aliri tayari kukola n’obushiru. (Osome Matendo 4:13, 29, 31.) Nerhu rhwakagala kulwisa n’okuhima obuba rhugwerhe. Ba nka wawaza oku byahikiraga mwene-werhu walichili musole oyirikirwe Horst walilamire omu chihugo che Allemagne, omu mango m’Evita lya Kabiri ly’Egulu Lyoshi. Amola mango abantu balihemerwe bayinje balamusana omu kuderha “Hitler Arhuyokola!” Chiro akaba oku Horst alimenyere oku okulamusana ntyo kuli kubi, mango maguma aliri alamusana ntyo bulala aliri ayubaha abalimu bage n’ababo banafunzi. Ahali hokumukalihira, abazere bage baliri basalira haguma naye eyi balibahema Yehova amuhereze obushiru. Kugerera oburhabale bw’abazere bage n’okulangalira Yehova, Horst apata emisi y’okuyorha buzira kushaganyika. Buzinda ayinja kurhegeera ntya: “Yehova arhanjahikaga haba n’akatyu.”c

14. Nka gurhe abangeri bagwerhe obuzigire banarhabala abali bachiyunva bavunikire omurhima?

¹⁴ Yehova na Yesu barharhulekerera. Petro amalire kuhakana Yesu, alikwanene kurhola esimikiro y’akamaro. Woyo nka mwanafunzi wa Yesu, ka waleka changwa wagenderera kuba mwanafunzi wa Yesu? Yesu alilakirire Yehova oku, obwemere bwa Petro burhaholaga. Yesu alibwirire Petro oku bilolere elyola sala, anayerekana oku alichizerere, oku buzinda Petro akahikire kugwarha emisi y’okukomeza bene-babo. (Lu. 22:31, 32) Petro akwanene kuba eyi aliri ahebwa emisi bwenene amango aliri awaza kw’ebyola binwa bya Yesu! Amango birhuhemere rhurhole esimikiro y’akamaro, Yehova akakolesa abangeri bagwerhe obuzigire barhuhebe omurhima yirhugenderera kuyorha bemena. (Efe. 4:8, 11) Mwene-werhu oyirikirwe Paul wamamala myaka minene eyi ali mushamuka, anachihangana kuhaana echirhulirizo chili nk’echola. Anabwira balala boshi bali balonza kuleka kukolera Yehova, oku bawaze okuntu Yehova abahamagalaga omu kuli. Naho anaja abarhabala bachizere oku Yehova agwerhe obuzigire bwimana burhankarhuma abalekerera. Amalire omu kuderha ntya: “Nabwene bantu banene bavunikire omurhima bagenderera kubera bemana kugerera oburhabale bwa Yehova.”

15. Nka gurhe omufano gwa Petro n’ogwa Horst eyerekene oku ebiderherwe omu Matayo 6:33 bili by’okuli?

¹⁵ Kuguma n’oku Yehova ahaga Petro n’ezindi ntumwa ebintu by’omubiri balikenere, nerhu arhuhereza ebintu by’omubiri rhukenere rhukaheba eby’Obwami oku nafasi y’oburhanzi omu kalamo kerhu. (Mt. 6:33) Horst rhwabaga rhwashambereko burhanzi, alilonzeze kuhwanza akasi k’obupainiya Enyuma w’Evita Lyakabiri ly’Egulu Lyoshi. Aliko analiri mukene bwenene, analigwerhe engangane oku arhapata efuranga zitosheze zamurhabala yagenderera kuyorha omu kasi k’amango moshi. Bichi alikwanene kujira? Alilonzeze alole akaba kweri Yehova amuhereza ebintu by’omubiri akenere, naho ageza eboso lyoshi omu kasi k’amahubiri amango m’entangulo y’omwimangizi w’omuzunguluko. Oku buzinda bw’eboso alisomerwe bwenene okubona omwimangizi amuhereza e anvelopi elimo efuranga aliko arhamenyaga nde wamuhagazo. Eyola anvelopi yalirimo efuranga zinene zakamurhabere omu kasi k’obupainiya mu myezi minene. Eyola mpano yalirhumire Horst achizera oku Yehova akagenderere kumushishikala. Kurhenga ago mango nakugenderera, aheba enyungu z’Obwami oku nafasi y’oburhanzi omu kalamo kage.—Mal. 3:10.

16. Bulagurhe rhwakayunguka binene, amango rhwamasoma oku bilolere Petro n’ebi ayandikaga omu maruba mage?

¹⁶ Petro alikwanene kugwarha obusiime bwenene bulala Yesu arharhengaga eburhambi bwage, nk’oku abaga amuhemere ajire! Yesu ali genderere kukoomeza Petro abe mwimana na mufano gwinja oku Bakristu. N’okuntu amukoomezaga kwakarhuyigiriza bintu binene byakamaro. Petro alibwirire abandi kw’ebyola bintu, anarhubwirire binene mubyo omu maruba mage mabiri ayandikiraga ebibaga omu kagana kaburhanzi, na zene amola amaruba chili chigabi che Biblia. Omu mwazi gukulikireho, gwaganira kunyibuso zigeke zirhengere mw’agola maruba n’okuntu rhwakazikolesa zene.