Okuntu Rhwakagenderera Kukomeza Obuzigire ku Buli Muguma n’Owindi

1-2. a) Bulagurhe entumwa Paulo aderhere oku obuzigire eli ngeso “y’akamaro bwenene”? b) Bibazo bihe rhwaganirako?

AMANGO entumwa Paulo aganira oku bilolere obwemere, obulangalire, n’obuzigire, alimalire omu kuderha oku “enkulu mw’ezola [ngeso] buli buzigire.” (1 Ko. 13:13) Bichi byarhumaga Paulo aderha ntyo? Omu mango mayinjire, rhurhakalagirira kugwarha obwemere omu bilagane bya Mungu by’egulu lihyahya, bulala ebi rhulangalire, byoshi nji byaba eyi byayenere. Aliko amango moshi nji rhwakenera kuyerekana obuzigire ku Yehova n’oku bandi bantu. Nantyo, obuzigire bwerhu ku Yehova n’oku bandi bantu nji bwagenderera kukomera amango moshi.

² Bulala rhwagenderera kukenera kuyerekana obuzigire, lekaga rhuganire kw’ebila bibazo bisharhu. Ech’oburhanzi, bulagurhe rhukwanene kuzigirana buli muguma n’owindi? Echa kabiri, munjira ehe rhunayerekanamo obuzigire ku buli muguma n’owindi? Echa kasharhu, gurhe rhwakajira y’obuzigire bwerhu buli muguma n’owindi buyorha bukomere?

BULAGURHE RHUKWANENE KUZIGIRANA BULI MUGUMA N’OWINDI?

3. Mpanvu zihe rhugwerhe z’okuyerekana obuzigire ku buli muguma n’owindi?

³ Bulagurhe bili by’akamaro rhuzigirane buli muguma n’owindi? Amango rhwamayerekana obuzigire ku bene-berhu, rhwanayerekana oku rhuli Bakristu b’okuli. Yesu alibwirire entumwa zage ntya: “Ahola abantu boshi bamenya oku muli banafunzi bani: Akaba muherhene k’obuzigire.” (Yoh. 13:35) Kandi, okugwarha obuzigire buli muguma n’owindi kunagendereza obuguma. Paulo aliderhere oku obuzigire chili “chifundo chishinganene ch’obuguma.” (Kol. 3:14) Aliko, hali eyindi mpanvu y’akamaro yakarhuma rhwayerekana obuzigire buli muguma n’owindi. Entumwa Yohana aliyandikiire bene-babo na bali-babo ntya: “Buli yeshi ozigire Mungu akwanene kuzigira na mwene-wabo.” (1 Yo. 4:21) Amango rhwamayerekana obuzigire buli muguma n’owindi, rhwanayerekana oku rhuzigire Mungu.

4-5. Fasiriya gurhe obuzigire bwerhu ku Mungu bufarhene n’obuzigire bwerhu ku buli muguma n’owindi.

⁴ Mu njira ehe obuzigire bwerhu bukomere ku Mungu bufarhene n’obuzigire rhunayereka bene-berhu na bali-berhu? Rhulole omufano g’okuntu ebirumbu byerhu by’omubiri n’omurhima biba bipatene. Amango munganga amalonza kupima e tansiyo, akaheba echipimo oku chifuba y’amenya gurhe omurhima gwawe guli gwakola. Bichi rhwakayiga kugerera akala kanuni?

⁵ Akaba munganga akamenya myazi milebe oku bilolere amagala, changwa omurhima gwerhu kugerera okufa chakuheba echipimo oku chifuba, nerhu rhwakamenya oku rhugwerhe obuzigire ku Mungu akaba rhugwerhe obuzigire oku bandi bantu. Nka rhwamarhegera oku rhurhachili rhwachiyunva oku rhuyerekane obuzigire bunene ku bene-berhu na bali-berhu k’oku rhwaliri rhwajira mira, nkabaga echola chakayerekana oku, obwira bwerhu haguma na Yehova bwazambire bwenene. Aliko amango rhugenderere kuyereka bene-berhu na bali-berhu b’Abakristu obuzigire, bili bimenyeso biyerekene oku obwira bwerhu haguma na Mungu nabo bukomere.

6. Nka gurhe okuzamba k’obuzigire bwerhu ku bene-berhu na bali-berhu chili chibazo chikomere? (1 Yohana 4:7-9, 11)

⁶ Akaba obwira bwerhu haguma na bene-berhu na bali-berhu bugenderere kuzamba, echola chili chibazo chikomere. Bulagurhe? Bulala echola chakayerekana oku rhuli rhwalonza kuhanyagaza obwira bwerhu haguma na Yehova. Entumwa Yohana arhuyibwisye omu kuderha ntya: “Olala orhazigire mwene-wabo ali abona, arhankazigira Mungu arhasaga kubona.” (1 Yo. 4:20) Bichi ebyola birhuyigirize? Yehova anasima bwenene amango “rhuzigirene buli muguma n’owindi.”—Osome 1 Yohana 4:7-9, 11.

GURHE RHUNAYEREKANA OBUZIGIRE KU BULI MUGUMA N’OWINDI?

7-8. Mu njira ziguma zihe rhwakayerekanamo obuzigire bwerhu ku buli muguma n’owindi?

⁷ Rhunabona hanene omu Chinwa cha Mungu, erhegeko liderhere “muzigirane buli muguma n’owindi.” (Yoh. 15:12, 17; Ro. 13:8; 1 Te. 4:9; 1 Pe. 1:22; 1 Yo. 4:11) Aliko, obuzigire eli ngeso eli ahakagarhi k’omurhima ahantu owindi muntu arhankabona. Bobola, gurhe rhwakajira y’obola buzigire bubonekana ku bene-berhu na bali-berhu? Kuli kugerera ebinwa n’ebijiro byerhu.

⁸ Hali njira zinene rhwakayerekanamo oku rhuzigiire bene-berhu na bali-berhu. Hala mifano miguma: “Mubwirane obukweri buli muguma n’owindi.” (Zek. 8:16) “Mugenderere kugwarha omurhula buli muguma n’owindi.” (Mk. 9:50) Mugende mwaba b’oburhanzi “kuyereka abandi obukenge.” (Ro. 12:10) “Muyegerezane buli muguma n’owindi.” (Ro. 15:7) “Mugenderere . . . kubabalirana buli muguma n’owindi.” (Kol. 3:13) “Mugenderere kuhekerana emizigo buli muguma n’owindi.” (Gal. 6:2) “Mugenderere kurhulirizana buli muguma n’owindi.” (1 Te. 4:18) “Mugenderere . . . Kuyumbakana buli muguma n’owindi.” (1 Te. 5:11) “Musalirirane buli muguma n’owindi.”—Yak. 5:16.

9. Bulagurhe okurhuliriza abandi eli njira y’akamaro eyerekene oku rhubazigire? (Olole n’efoto.)

⁹ Lekaga rhuganire ku njira nguma rhwakayerekanamo obuzigire oku bandi. Rhuganirage oku binwa Paulo aderhaga: “Mugenderere kurhulirizana buli muguma n’owindi.” Bulagurhe abandi eli njira nguma y’okubayereka oku rhubazigiire? Kuguma n’oku chitabu chiguma chifasiriye eby’Ebiblia chiderhere, echinwa “kurhuliriza” Paulo akolesaga, chifasiribwe oku “kuli kuba haguma n’omuntu n’okumuheba omurhima amango ali ahurana echibazo chikomere.” Bobola, amango rhwamarhuliriza mwene-werhu oli walibuka, rhwanaba eyi rhwamurhabere agenderere kukolera Yehova oku bwimana. Na buli mango rhwamarhuliriza mwene-werhu changwa mwali-werhu, rhwanaba eyi rhwamamuyereka oku rhumuzigire.—2 Ko. 7:6, 7, 13.

10. Gurhe akababaro n’okurhulirizanya bibuganene?

¹⁰ Okuyunva akababaro n’okurhuliriza, bili bintu bibuganene. Mu njira ehe bibuganene? Amango omuntu amayunva akababaro eju ya muntu mulebe oli walibuka, anaba eyi alonzeze kumurhuliriza n’okujira chintu chilebe yamurhabala. Bobola, okuyunva akababaro kunarhurhabala rhurhulirize abandi. Paulo afasiriye oku engeso ya Yehova y’akababaro oku bantu, y’enamushunika abarhulirize. Paulo aderhere oku Yehova ali “Darha w’obonjo bw’akasisi na Mungu w’echirhulirizo choshi.” (2 Ko. 1:3) Nk’oku amahugulo m’olula lwandiko maderhere, Paulo akoleseze echinwa “obonjo bwʼakasisi” omu kuyerekana okuntu rhunachiyunva amango rhugwerhe akababaro oku bandi. Bobola, “Mungu ayirikirwe Darha, changwa ishoko y’obonjo bw’akasisi bulala agwerhe akababaro kakomere oku bantu.” Kandi n’akola kababaro kanamushunika arhurhulirize “omu bigeregezo byerhu byoshi.” (2 Ko. 1:4) Kuguma nk’oku amenji m’eshoko manamala enyorha, Yehova anarhuliriza n’okumala enyorha ya balala bali omu milago. Gurhe rhwakayiganya Yehova omu kugwarha akababaro oku bandi n’okubarhuliriza? Njira nguma rhwakajiramo ntyo, kuli kukuza engeso zakarhurhabala rhuyunve akababaro n’okurhuliriza abandi. Ngeso zihe ziguma mw’ezola zakarhurhabala?

11. Nk’oku omu Wakolosai 3:12 na 1 Petro 3:8 haderhere, zindi ngeso zihe zarhurhabala rhuyereke abandi obuzigire rhunabarhulirize?

¹¹ Bichi byakarhurhabala rhugenderere kuzigirana, “rhunagenderere kurhulirizana buli muguma n’owindi” buli lusiku? Birhuhemere rhukuze engeso zili nk’ezila, okuchiyunva kuguma n’oku abandi bali bachiyunva, omu kuzigirana nk’abantu ba mulala muguma n’oku yerekana bwinja. (Osome Wakolosai 3:12; 1 Petro 3:8.) Nka gurhe ezola ngeso zakarhurhabala? Amango rhwamayerekana oku rhugwerhe akababaro ku bene-berhu n’okubayereka oku rhubalagireko bwenene, rhwagwarha enyorha nene y’okubarhuliriza amango bali balibuka. Kuguma n’oku Yesu aderhaga, “obunu bunaderha ebiyunjwire oku murhima. Omuntu mwinja anahana oku bintu binja bili omu bubiko bwage.” (Mt. 12:34, 35) Okurhuliriza bene-berhu na bali-berhu bali omu bulagirire, kweri eli njira y’akamaro y’okuyerekana obuzigire bwerhu.

GURHE RHWAKAJIRA Y’OBUZIGIRE BWERHU BULI MUGUMA N’OWINDI BUYORHA BUKOMERE?

12. a) Bulagurhe rhukenere kuba merangwe, yirhurhaheza obuzigire bwerhu ku buli muguma n’owindi? b) Chibazo chihe rhukola kuganirako?

¹² Rhweshi rhulonzeze “kugenderera kuzigirana buli muguma n’owindi.” (1 Yo. 4:7) Aliko, bili by’akamaro ku rhwabo kuyibuka omukonge Yesu ahanaga oku “obuzigire bwa banene [nji] bwahola.” (Mt. 24:12) Yesu arhaliderhere oku banene omu banafunzi bage bakalekere kuzigirana buli muguma n’owindi. Aliko, birhuhemere rhube merangwe yi rhurhayahukizwa n’engeso y’okubula obuzigire eli mu linola gulu. Oku rhunagwerhe elila wazo omu bwenge, leka rhuganire kw’echila chibazo ch’akamaro: Bichi byakarhurhabala rhumenye akaba obuzigire bwerhu ku bene-berhu na bali-berhu bukomere?

13. Bichi byakarhurhabala rhumenye akaba obuzigire bwerhu ku bene-berhu na bali berhu bukomere?

¹³ Njira nguma yakarhurhabala rhumenye akaba obuzigire bwerhu bukomere, kuli kulola okuntu rhunajira amango bintu biguma byamarhengerera omu kalamo. (2 Ko. 8:8) Inguma mw’ezola hali, eyerekenwe n’entumwa Petro: “Olekere ebindi byoshi, muyerekane obuzigire bunene ku buli muguma n’owindi, bulala obuzigire bunashukulira byaha binene.” (1 Pe. 4:8) Bobola, obuzamba n’okurhashinganana kw’abandi kwakageregeza obuzigire bwerhu.

14. Nk’oku olwandiko lwa 1 Petro 4:8 luyerekene, buzigire bwa nyabachi rhukenere? Fasiriya.

¹⁴ Lekaga rhuwaze bwinja bwinja oku binwa Petro aderhaga. Echigabi ch’oburhanzi ch’omustari gwa 8 chiderhere obuzigire buli gurhe rhukwanene kugwarha, k’okuderha “obuzigire bunene.” Echinwa Petro akolesaga “bunene” chitafsiribwe chinwa oku chinwa “kulambula.” Echigabi cha kabiri ch’ogola mustari, chiyerekene enyungu obola buzigire bunene bunalerha. Bunashukulira ebyaha bya bene-berhu na bali-berhu. Rhwakawaza omu njira eli nkeyila: Rhufarhe obuzigire bwerhu na fune ebiri, nka chiraka chakalambulwa, rhuchilambule rhunagenderere kuchilambula kugera aha chashukulira arhali chaha chiguma, changwa bibiri, s’aliko “byaha binene.” “Okushukulira” eli njira y’okuyerekana oku rhwababalire. Kuguma n’oku echiraka ch’akashukulira ezinga, obuzigire bwakashukulira obuzamba n’okurhashinganana kwa bene-berhu na bali-berhu.

15. Akaba obuzigire bwerhu ku bene-berhu na bali-berhu bukomere bwenene, bichi bindi rhwakagala kujira? (Wakolosai 3:13)

¹⁵ Obuzigire rhugwerhe oku bandi bukwanene kuba bukomere bwenene, yirhugala kubabalira oku rhashinganana kw’aberhu Bakristu k’okuderha chiro n’amango bikomere kujira ntyo. (Osome Wakolosai 3:13.) Amango rhwamagala kubabalira abandi, rhwanayerekana oku obuzigire bwerhu bukomere n’oku rhulonzeze kusimisa Yehova. Bichi bindi byakarhurhabala yirhubabalira amagosa m’abandi ahali h’okubabazwa nabuli choshi bakolere?

16-17. Bichi bindi byarhurhabala yi rhurhabika omu bwenge ebyaha bigeke-geke bya bene-berhu na bali-berhu? Fasiriya. (Olole n’efoto.)

¹⁶ Ochiseze oku ngeso zinja za bene-benyu na bali-benyu s’arhali oku buzamba bwabo. Rhuhuzanye eyila hali. Owaze oli omu chigusho chinene cha bene-benyu na bali-benyu. Mwagezeze akasanzi kasimisize haguma, n’oku buzinda mwamarhola efoto mweshi haguma. Naho, mwamarhola zindi foto ebiri eyi muwazize oku nkabaga ey’oburhanzi erhalikwirire. Ahola mukola mugwehe foto esharhu. Aliko, ku foto nguma mw’ezola, wanarhegera oku hali mwene-wenyu muguma orhalishekere. Gurhe wakajira eyola foto? Wayishanda bulala mugwerhe zindi foto ebiri, aha mweshi muli mwasheka kuhebamo n’oyola mwene-wenyu.

¹⁷ Rhujage rhwahuzanya ezola foto n’ebirhunabika omu bwenge bwerhu yirhubiyibuka. Rhuzigana kuyibuka ebisanzi binja rhwagezeze haguma na bene-berhu na bali-berhu. Aliko, nkabaga mango maguma mw’agola, mwene-werhu changwa mwali-werhu muguma, aliderhere changwa ajira echintu chirhugayisize. Gurhe walijirire amola mango? Rhurhakabishanda kuguma n’oku rhwakashanda inguma mw’ezola foto si? (Mez. 19:11; Efe. 4:32) Rwakashanda ebyaha bigeke geke bya bene-berhu na bali-berhu, bulala rhuyibukire ebisanzi bikwirire rhwagezeze haguma nabo. Ebihe bili nk’ebyola birhukwanene kusimira n’okubika omu bwenge.

BULAGURHE RHUKENERE BWENENE OBUZIGIRE MU ZINOLA SIKU?

18. Chintu chihe ch’akamaro oku bilolere obuzigire rhwaganirireko mu gunola mwazi?

¹⁸ Bulagurhe rhukwanene kugenderera kukomeza obuzigire bwerhu buli muguma n’owindi? Nk’oku rhwabaga rhwabwene, amango rhugwerhe obuzigire ku bene-berhu na bali-berhu, rhwabugwarha na ku Yehova. Gurhe rhwakajira yirhuyerekana oku rhugwerhe obuzigire ku bene-berhu na bali-berhu? Njira nguma y’okujira ntyo, kuli kubaha echirhulirizo. Rhwagala “kugenderera kurhulirizana buli muguma n’owindi” akaba rhugwerheneko akababaro. Gurhe rhwakagenderera kukomeza obuzigire bwerhu ku buli muguma n’owindi? Omu kubabalira amagosa ma bene-berhu na bali-berhu chiro akaba bikomere kujira ntyo.

19. Bulagurhe kuli kw’akamaro bwenene zene, kuyerekana obuzigire ku bene-berhu na bali-berhu?

¹⁹ Bulagurhe bili by’akamo bwenene zene kuyerekana obuzigire bwerhu ku buli muguma n’owindi? Lola empanvu Petro ahanaga: “Obuzinda bw’ebintu byoshi buli hofi. Bobola, . . . mugwarhaneko obuzigire bukomere buli muguma n’owindi.” (1 Pe. 4:7, 8) Oku obuzinda bwa linola gulu libi buli bwayegera, bichi rhwakalangalira? Yesu abwira abanafunzi bage ntya: “Amashanja moshi nji mabashomba eju y’ezino lyani.” (Mt. 24:9) Yirhugendereza obwimana bwerhu ku Yehova chiro akaba rhushomberwe, rhukenere kuyorha omu buguma. Byoshi Shetani y’ajira y’ashanda obuguma bwerhu byafa busha. Akaba rhugwerhe obuzigire ku bene-berhu na bali-berhu, Shetani arhagala haba nakatyu kuvuna obuguma bwerhu, bulala obuzigire chili “chifundo chishinganene ch’obuguma.”—Kol. 3:14; Flp. 2:1, 2.