EBIBLIYOTEKE Y'OKU ENTERNETE ya W
Omunara g'Omulanzi
EBIBLIYOTEKE Y'OKU ENTERNETE
Ekihavu
  • EBIBLIA
  • EBITABU
  • EMBUGANANO
  • w23 Omwezi gwa garhano amap. 2-7
  • Okuntu Rhwakajira Amasala Merhu Mabe Menja Bwenene

Nta video eli mw'ebi oli walonza.

Orhubabalire birhagendekere bwinja amango waliri walonza evideo.

  • Okuntu Rhwakajira Amasala Merhu Mabe Menja Bwenene
  • Omunara gʼOmulanzi Gumenyesa Obwami bwa Yehova (gʼOkuyiga)—2023
  • Enkingo
  • Ebintu Bihuzenye
  • YESU ALIRI ARHOLA AKASANZI K’OKUSALIRA
  • BINTU BIRHANO BY’AKAMARO RHWAKAHEBA OMU SALA
  • Obone Olukengo Ogwerhe l’Okusalira oku Luli lw’Akamaro
    Omunara gʼOmulanzi Gumenyesa Obwami bwa Yehova (gʼOkuyiga)—2022
  • Esala: luli luhembo lurhengerere emwa Mungu
    Bichi Ebiblia Erhuyigirize?
  • Oyegere Mungu Kugerera Esala
    Siimira Akalamo Esiku n’Amango!—Oyige Ebiblia omu Kuganira
  • Okuntu Yehova Anashubiza Amasala Merhu
    Omunara gʼOmulanzi Gumenyesa Obwami bwa Yehova (gʼOkuyiga)—2023
Omunara gʼOmulanzi Gumenyesa Obwami bwa Yehova (gʼOkuyiga)—2023
w23 Omwezi gwa garhano amap. 2-7

MWAZI G’OKUYIGA 20

Okuntu Rhwakajira Amasala Merhu Mabe Menja Bwenene

“Musheshere emirhima yenyu emunda ali.”​—ZB. 62:8.

OLWIMPO 45 Mawazo ya Moyo Wangu (Amawazo m’Omurhima Gwani)

OKU BUGEKEa

Efoto: Mwene-werhu ali asalira omu bichanji bilengene omu lusiku. 1. Embere azuke. 2. Embere balye akalyo haguma n’omulala gwage. 3. Embere arhondere akasi k’amahubiri kugerera evideo konferance. 4. Amango ali ahantu harhulerere eyi abegerere. 5. Embere aje kulyama.

Rhwakasalira Yehova buli mango n’okumuhema obwerekezi mu buli chintu choshi rhunakola omu kalamo kerhu (Olole echifungo cha 1)

1. Bichi Yehova ahemere abakozi bage bajirage? (Olole n’efoto.)

EMWANDE rhwakaja amango rhukenere echirhulirizo n’obwerekezi? Rhumenyere echishubizo kw’echola chibazo. Rhwakayegera Yehova Mungu omu sala. Yehova arhubwirire rhujire ntyo. Ashondere rhumusalire buli kasanzi k’okuderha ‘rhumusalire buzira kuleka.’ (1 Te. 5:17) Rhwakachihangana kumuyegera omu sala buzira ngangane n’okumuhema obwerekezi mubuli chintu rhwakakola omu kalamo kerhu. (Mez. 3:5, 6) Bulala Yehova ali Mungu onahaana bwenene oku bisanzi byage, aderhere oku rhwakamusalira kanene okurhunashondere.

2. Bichi rhwaganirako mu gunola mwazi?

2 Rhugwerhe eshukrani enene bwenene emwa Yehova, bulala arhuhere orozo l’okumusalira. Nechi, chiro akaba rhugwerhe binene by’okukola, rhukwanene kugwarha akasanzi k’okusalira. Kandi rhukwanene kugwarha enyorha y’okujira amasala merhu mabe menja bwenene. Amango rhugwerhe eshukrani, rhwakapata omu Mandiko bintu binene by’okurhuheba omurhima n’okurhuyerekeza. Mu gunola mwazi, rhwayiga nka gurhe rhwakakulikira omufano gwa Yesu oku bilolere okuntu rhwakachihangana kujira okwerhu koshi yirhupata akasanzi k’okusalira. Kandi rhwaganira okuntu rhwakajira amasala merhu mabe menja omu kuhebamo bintu birhano by’akamaro.

YESU ALIRI ARHOLA AKASANZI K’OKUSALIRA

3. Bichi Yesu aliyigire oku bilolere esala?

3 Yesu alimenyere oku amasala merhu mali m’akamaro bwenene emwa Yehova. Bisanzi binene embere y’okuyinja oku gulu, aliri achibonera gurhe Eshe aliri ashubiza oku masala m’abalume n’abakazi bemana. Omufano, Yesu aliri ahaburhambi bw’Eshe amango aliri abona gurhe aliri ashubiza oku masala marhengere oku murhima, nk’ama Hana, ama Daudi, ama Eliya, n’amabandi kamama baliri bemana. (1 Sa. 1:10, 11, 20; 1 Fa. 19:4-6; Zb. 32:5) Echola che charhumaga Yesu ayigiriza abanafunzi bage bayinje bazigana kusalira n’obwizere!​—Mt. 7:7-11.

4. Bichi rhwayigire oku bilolere amasala ma Yesu?

4 Kugerera esala lyage yewe yenyine asaliraga emwa Yehova, Yesu alilekere olwiganyo abanafunzi bage bakwanene kukulikira. Omu mango m’akasi kage kamahubiri, Yesu aliri asalira oku kahunda. Aliri arhola akasanzi k’okuja eburhambi y’asalira bulala aligwerhe binene by’okukola, n’abantu baliri bazigana kuyorha eyi bamuzungulukire. (Mk. 6:31, 45, 46) Aliri azuka emiseke y’apata akasanzi k’okusalira eyanali yenyine. (Mk. 1:35) Mango maguma ntya, aligezeze obudufu boshi eyi ali asalira embere y’okurhola esimikiro y’akamaro. (Lu. 6:12, 13) Kandi Yesu alisalirire kanene obudufu embere afe, eyanasezeze obwenge omu kumala echigabi chikomeere ch’akasi kage ayinjaga kujira oku gulu.​—Mt. 26:39, 42, 44.

5. Nka gurhe rhwakayiganya Yesu amango rhuli rhwasalira?

5 Omufano gwa Yesu gwarhuyigirize oku chiro rhwaba rhugwerhe binene by’okukola, rhukwanene kurheganya akasanzi k’okusalira. Kuguma na Yesu, rhukwanene kugwarha ebisanzi by’okusalira. Rhwakazuka esezi-sezi rhwanasalira changwa rhwakasalira ebudufu amango abantu balyamire. Amango rhwamajira ntyo, rhwanaba eyirhulirhwayereka Yehova oku rhugwerhe eshukrani k’olola luhembo arhuhere lw’akamaro. Mwali-werhu oyirikirwe Lynne ayibukire gurhe aligwerhe eshukrani amango amenya ob’oburhanzi okw’agwerhe olukengo l’okusalira. Aderhere ntya: “Amango menya oku nakaganira na Yehova mu buli kasanzi, echola chalintabere nyinje namubona nka mwira wani muzigirwa, n’okulonza amasala mani mabe menja bwenene.” Nta ngangane banene mu rhwewe banachiyunva ntyo. Lekaga rhuganire oku bintu birhano by’akamaro rhwakaheba omu masala merhu.

BINTU BIRHANO BY’AKAMARO RHWAKAHEBA OMU SALA

6. Nk’oku olwandiko lwa Ufunuo 4:10, 11 luderhere, bichi Yehova akwanene kuhabwa?

6 Okuuze Yehova. Omu chibonekezi chisomeze bwenene, entumwa Yohana alibwene bashamuka 24 omu mbingu bali baharamya Yehova. Baliri bakuuza Mungu n’okuderha oku akwanene kuhabwa, “obukuuze n’olukengo n’obuhashe.” (Osome Ufunuo 4:10, 11.) Bamalayika bemana nabo bagwerhe empanvu zinene z’okuhereza Yehova olukengo. Bali omu mbingu haguma naye n’echola charhumire bagala kumumenya bwinja. Banabona engeso zage kugerera ebyanajira. Amango balibabona ebijiro bya Yehova, echola chinabashunika bamuhereze obukuuze.​—Yob. 38:4-7.

7. Bichi byakarhuma rhwakuuza Yehova?

7 Nerhu rhukwanene kukuuza Yehova omu masala merhu, rhwakajira ntyo omu kumubwira ebirhunazigira oku bimulolere na bulagurhe rhunamukenga. Amango oli wasoma n’okuyiga Ebiblia, ochihangane kurhegera engeso za Yehova zinakusimisa ahanene woyo wenyine. (Yob. 37:23; Ro. 11:33) N’abuzinda oje wabwira Yehova okuntu woyo wenyine oli wachiyunva eju y’ezola ngeso. Kandi rhwakakuuza Yehova bulala anarhurhabala rhwewe n’abandi Bakristu, k’okuderha, bene-berhu na bali-berhu. Amango moshi anarhushishikala n’okurhulanga.​—1 Sa. 1:27; 2:1, 2.

8. Mpanvu zihe ziguma zinarhuma rhwabwira Yehova koko? (1 Watesalonike 5:18)

8 Obwire Yehova koko. Rhugwerhe mpanvu zinene z’okubwira Yehova koko omu sala. (Osome 1 Watesalonike 5:18.) Rhwakamubwira koko kubuli chintu chinja rhugwerhe; bulala buli mpano yoshi rhugwerhe nyinja enarhenga emwage. (Yak. 1:17) Omufano, rhwakamubwira koko oku gulu lyerhu linja n’okubindi bintu binja bwenene alemere. Kandi rhwakayerekana eshukrani yerhu eju yakalamo kerhu, omulala gwerhu, bera berhu, n’obulangalire bwerhu. Kandi rhunabwira Yehova koko bwenene bulala arhurhabere rhugwarhe obwira bw’akamaro haguma naye.

9. Bulagurhe birhuhemere rhugwarhe eshukrani enene emwa Yehova?

9 Nkabaga byakarhuhema rhuchihangane kuwaza oku mpanvu rhwewe rhwenyine rhugwerhe z’okubwira Yehova koko. Rhulamire omu gulu liri mu bantu banene barhagwerhe eshukrani. Abantu banazigana kuwaza konyine oku bilolere okuntu bakapata ebibalonzeze ahali h’okuwaza okuntu bakayerekana eshukrani oku bibagwerhe. Nka rhwamahwanza kuyiganya engeso eli nk’eyola, rhwakayinja rhwahuuna konyine omu masala merhu. Yirhuchilanga kw’ebyola byoshi, birhuhemere rhugenderere kukuza n’okuyerekana eshukrani ku byoshi Yehova arhujirire.​—Lu. 6:45.

Mwali-werhu ayikere oku etaje y’enju yage ebudufu ali asalira. Ahaburhambi bwage hali ameza maliko akarne.

Nka rhugenderere kubwira Yehova koko oku bintu anarhujirira echola chakarhuma rhwalembera (Olole echifungo che 10)

10. Nka gurhe okugwarha eshukrani kwalirhabere mwali-werhu muguma kulembera? (Olole n’efoto.)

10 Okugwarha eshukrani kwakarhurhabala kulembera ebibazo. Rhuganire oku mufano gwa mwali-werhu oyirikirwe Kyung-sook, guli omu Munara g’Omulanzi gwa siku 15, Mwezi gwa 1, 2015. Bamupima obulwala bubi bwakansere kamahaha. Aderha ntya: “Echola chibazo ch’amagala chalirhumire navunika enzoka. Nalichiyunvirhe nka nahezeze buli chintu, nanaliyunvirhe nyubahire bwenene.” Bichi byamurhabalaga y’agala kulembera? Aderhere oku buli budufu embere y’okuja kulyama, aliri azigana kuja oku buzinda bw’enju yabo y’etaje n’okusalira n’omulenge gunene oku bilolere bintu birhano agwerhe kw’eshukrani byagerere mw’olola lusiku. Ebyola byaliri byarhuma arhachigwarha omugayo gunene n’okumushunika ayerekane obuzigire agwerhe ku Yehova. Alichibwenere gurhe Yehova anarhabala abakozi bage bemana amango bali bahurana ebigeregezo, kandi ayinja kurhegera oku hali bintu binene binja omu kalamo kerhu kulusha ebibazo. Kuguma na Kyung-sook, nerhu rhugwerhe empanvu zinene z’okubwira Yehova koko, chiro akaba yirhwahurana ebigeregezo bikomere. Okuyerekana eshukrani yerhu emunda ali kugerera esala kwakarhurhabala kulembera n’okugenderera kuyorha rhurhulerere.

11. Bulagurhe entumwa za Yesu zalikenere kugwarha obushiru amango Yesu amala kugaluka embingu?

11 Oheme Yehova akuhereze obushiru amango oli omu kasi k’amahubiri. Embere Yesu agaluke embingu, aliyibusize abanafunzi bage engabane baligwerhe y’okuhana obuhamirizi oku bimulolere “omu Yerusalemu, n’omu Yudeya yoshi, omu Samariya, na kugera efasi za hale bwenene z’egulu.” (Mdo. 1:8; Lu. 24:46-48) Bisanzi bigeke enyuma waho, abakulu b’Abayahudi bafarha ntumwa ebiri, k’okuderha, Petro na Yohana n’okubaheka embere we Sanhedrini, babwira abola balume bemana oku balekeraho kuhubiri, kandi babayubahisa. (Mdo. 4:18, 21) Gurhe Petro na Yohana balijire bajira?

12. Nk’oku olwandiko lwa Matendo 4:29, 31 luyerekene, bichi abanafunzi balijirire?

12 Chiro akaba oku abakulu b’edini lye Chiyahudi balibayubahisize, Petro na Yohana baderha ntya: “Akaba kuli kwinja omu masu ma Mungu oku bayunviriza mwabo ahali h’okuyunviriza Mungu, muche olubanja mwenyine. Aliko rhwabo rhurhakaleka kuderha oku bintu rhwabwene n’okuyunva.” (Mdo. 4:19, 20) Amango Petro na Yohana bashwekulwa, abanafunzi basalira bwenene emwa Yehova oku bilolere okuntu bakajira obulonza bwage. Basalira ntya: “Orhabale abaja bawe bagenderere kuderha echinwa chawe n’obushiru.” Yehova ashubiza kw’elyola sala lirhengere oku murhima.​—Osome Matendo 4:29, 31.

13. Bichi rhwakayiga kugerera omufano gwa Jin-hyuk?

13 Rhwakayiganya abanafunzi amango rhwamagenderera kuhubiri chiro n’amango abarhegesi bamarhulahiza. Bankawawaza oku mufano gwa mwene-werhu Jin-hyuk, washwekwaga eju y’esimikiro yage y’okulahira kuja omu chisoda. Omu prizo, alihabirwe engabane yokushishikala abandi bashwekwa baguma bashwekerwe ahabo-habo, aliko arhalihabirwe oruhusa l’okubabwira echindi-chindi chintu olekere ebilolere akasi alihabirwe, k’okuderha, arhakashambere nabo oku bilolere Ebiblia. Asalira y’apata obushiru n’amayeri akakolesa y’ahubiri abantu mu buli rozo loshi-loshi akapata. (Mdo. 5:29) Aderhere ntya: “Yehova alishubize oku masala mani omu kumpereza obushiru n’obwengehe, yingala kuhwanzisa mafunzo manene me Biblia naliri naongoza mu miniti erhano-erhano oku milyango y’abashwekwa. Naho omu budufu, naliri nayandika amaruba nakahereze abashwekwa omu lusiku lwakulikiraho.” Nerhu rhwakachizera oku Yehova arhurhabala rhukole bwinja akasi kerhu k’okuhubiri. Kuguma na Jin-hyuk rhwakasalira yirhugwarha obushiru n’obwengehe.

14. Bichi byakarhurhabala amango rhuli rhwahurana ebibazo? (Zaburi 37:3, 5)

14 Oheme Yehova oburhabale y’ogala kulembera ebibazo. Banene murhwabo yibalwisa ebibazo by’amagala, eby’omu bwenge, nk’okuheza omuzigirwa, okulwisa ebibazo by’omu mulala, amalibuko, changwa ebindi-bindi bibazo. N’ebindi bintu: nk’amalwala m’okuyahukira, amavita, byarhumire binene mw’ebyola bibazo byashuba kukomera bwenene orhakalola. Obwire Yehova bwinja-bwinja okuntu oli wachiyunva. Omubwire eju y’ehali yawe nk’oku wakanabwira mwira wawe w’okumurhima. Onachizere oku Yehova “akujirira chintu chilebe.”​—Osome Zaburi 37:3, 5.

15. Gurhe esala lyakarhurhabala “kulembera amango rhuli omu bibazo”? Lerha omufano.

15 Amango rhuli rhwasalira buzira kuleka, echola charhurhabala “kulembera ebigeregezo.” (Ro. 12:12) Yehova ayinji ebibazo abakozi bage bali bahurana nabyo, “anayunva amalira mabo m’okuhema oburhabale.” (Zb. 145:18, 19) Mwali-werhu Kristie oli payiniya ogwerhe myaka 29 ali chibwenere oku obola buli bukweri. Omu kasanzi arhaliwazize agwarha ebibazo by’amagala bikomere. N’echola charhuma agwarha omulago omu bwenge. Buzinda, bamumenyesa oku nyina naye agwerhe obulwala bukomere bwakanamuyirha. Kristie aderhere ntya: “Nayinja nasalira Yehova bwenene ampereze emisi y’okulembera buli lusiku. Nachihangana kukulikira eprograme oku kahunda y’obuharamye omu kuja oku mbuganano n’okujira efunzo lyani-lyani.” Ayongerere ntya: “Okusalira kwaliri kwantabala kulembera ebibazo bikomere. Nalimenyere oku buli mango Yehova ali haguma nani, n’echola chaliri chantabala nchiyunve ntulerere. Chiro akaba ebibazo byani by’amagala birhalihwere ahola-hanaho, Yehova ashubiza oku masala mani omu kumpa omurhula gwa ndani n’okurhuleza omurhima gwani.” Rhurhahira rhukayibirira oku “Yehova amenyere okuntu anayokola omu bigeregezo balala bachishwekere kuye.”​—2 Pe. 2:9.

Efoto: Mwene-werhu amarhola entambu z’okuhima echigeregezo. 1. Agenderera kusalira. 2. Amashanda e aplikasiyo oku tablete yage.

Y’ohima amashumi, 1) oheme Yehova akurhabale, 2) ojire okwawe koshi omu kuyaka ehali zakakuheka omu mashumi, 3) okomeze obwira bwawe haguma na Yehova (Olole echifungu che 16-17)

16. Bula gurhe rhukenere oburhabale bwa Yehova yirhugala kuhima amashumi?

16 Oheme Yehova akurhabale y’ogala kuhima amashumi. Rhwewe nka bantu barhashinganene, binarhuhema rhulwise buli mango amashumi m’okujira echintu chibi. Shetani ali ajira okwage koshi y’eyola ntambala erhukomerera bwenene. Njira nguma anahabula m’obwenge bwerhu, kuli kugerera ebintu by’okuchisimisa birhachere. Ebyola bintu by’okuchisimisa byakabumbya obwenge bwerhu amawazo mabi embere za Yehova makanarhuma rhwakola echaha chikomere.​—Mk. 7:21-23; Yak. 1:14, 15.

17. Enyuma y’okumala kuhema oburhabale omu sala bichi rhukwanene kujira yi rhuyaka amashumi? (Olole n’efoto.)

17 Rhukenere oburhabale bwa Yehova akaba rhushondere kuhima amashumi m’okujira echintu chibi. Yesu alihebere ebila binwa by’okuhema oburhabale omu sala ly’omufano: “Orharhulekaga mpu rhuje omu mashumi, aliko orhuyokole k’olala mubi.” (Mt. 6:13) Yehova alonzeze kurhurhabala, aliko rhukwanene kumuhema oburhabale. Enyuma y’okumala kuhema oburhabale omu sala, rhukwanene kandi kujira okwerhu koshi yi rhuyaka ebintu byoshi-byoshi byakarhuheba omu mashumi. Rhukwanene kujira okwerhu koshi omu kurhasoma changwa kuyunviriza amawazo mabi mashandere mu linola gulu lya Shetani. (Zb. 97:10) Rhwakayunjuza obwenge bwerhu amawazo makwirire omu kusoma n’okuyiga Ebiblia. Okugera oku mbuganano n’okukola akasi k’okuhubiri nabyo by’akarhurhabala kulanga obwenge bwerhu. Yehova alaganyize oku arhakarhuleka rhugeregezwe kulusha okuntu rhurhakagala kulembera.​—1 Ko. 10:12, 13.

18. Oku bilolere esala, bichi rhweshi rhukwanene kujira?

18 Buli muguma werhu akwanene kusalira zene bwenene kulusha mira y’agenderera kuyorha mwimana emwa Yehova mu zinola siku zizinda zikomeere. Yehova alonzeze rhumufungulire omurhima gwerhu goshi omu sala. (Zb. 62:8) Oyinje warheganya akasanzi k’okusalira buli lusiku n’omurhima goshi. Okuuze Yehova n’oku mubwira koko ku byoshi anajira. Omuheme oburhabale y’ogwarha obushiru omu kasi k’amahubiri. Omuheme akurhabale y’olembera echibazo choshi-choshi oli wahurana, onahime amashumi moshi wakaba oli walwisa. Omenye waziga echintu choshi choshi changwa omuntu yeshi-yeshi akubuza kusalira Yehova oku kahunda. Nka gurhe si Yehova anashubiza oku masala merhu? Rhwashubiza kw’echola chibazo ch’akamaro omu mwazi gukulikire.

GURHE WAKASHUBIZA?

  • Nka gurhe Yesu ayerekanaga oku alibwene oku esala liri ly’akamaro?

  • Bintu biguma bihe rhwakaderha omu masala merhu?

  • Bichi ohigirire kujira oku bilolere amasala mawe?

OLWIMPO 42 Sala ya Watumishi wa Mungu (Esala ly’Abakozi ba Mungu)

a Rhushondere amasala merhu mabe nka maruba marhengere oku murhima rhwarhumira mwira werhu muzigirwa. Aliko amango moshi birhashobokana oku rhupate akasanzi k’okusalira, kandi byakarhukomerera okumenya ebirhwaderha omu masala merhu. Gunola mwazi gwashambala kw’ebyola bintu bibiri by’akamaro.

    Ebitabu by’Ekihavu (2014-2025)
    Orhengemo
    Ojemo
    • Ekihavu
    • Orhumire abandi
    • Eby'osima
    • Copyright © 2025 Watch Tower Bible and Tract Society of Pennsylvania
    • Amakanuni m'Okukolesa Esite
    • Amakanuni
    • Amakanuni m'Okubika Esiri
    • JW.ORG
    • Ojemo
    Orhumire abandi