Okuntu Okuyubaha Mungu Kwakagenderera Kukulerhera Enyungu

1-2. Kuguma na Loti, chibazo chihe Abakristu bali bahurana zene?

AMANGO rhwamabona amabi mali oku gulu zene, rhwanachiyunva kuguma n’oku Loti naye aliri achiyuva. “Aligayisizwe bwenene n’olugenzi lubi lwa bantu babuzirashoni barhakenga amarhegeko,” bulala ali menyere oku Darha w’embingu arhasiima ebili ntyo. (2 Pe. 2:7, 8) Obuzigire n’obukenge Loti aligwere ku Mungu bwalimushunikire ashombe engeso z’obumaguza zibi bwenene z’abantu alilamire haguma nabo barhaliri bakenga amakanuni ma Yehova m’okuchigendesa. Nerhu zene rhulamire n’abantu barhakengere haban’akatyu amakanuni ma Yehova m’okuchigendesa. Chiro akaba ntyo, rhwakagenderera kugwarha olugenzi lwinja, nka rhugenderere kuzigira Mungu n’okumukenga bwenene.—Mez. 14:2.

² Yehova arhurhabere rhujire ntyo, kugerera ebinwa bihebere omurhima bili omu chitabu cha Mezali. Abakristu boshi, abalume n’abakazi, abasole n’abashaja, kweri bakayunguka omu kuganira oku mahano m’obwengehe mali mw’echola chitabu.

OKUYUBAHA MUNGU KUNARHULANGA

3. Nk’oku olwandiko lwa Mezali 17:3 luderhere, mpanvu nguma ehe yakarhuma rhwalanga omurhima gwerhu? (Olole n’efoto.)

³ Empanvu y’akamaro y’okulanga omurhima gwerhu g’omufano eli oku, Yehova anasuzuma omurhima gwerhu. K’okuderha oku Yehova anabona ebirhalukire eby’abantu bakagala kubona, kandi amenyere kweri rhuli bantu banyachi. (Osome Mezali 17:3.) Naye arhuzigira rhukagenderera kuwaza oku mahano mage makarhurhabala rhulame esiku n’amango. (Yoh. 4:14) Mw’agola mango rhurhakachibabazwa chiro n’olugenzi lubi, n’obubeshi bwa Shetani bwalinola gulu libi. (1 Yo. 5:18, 19) Amango rhwamayegera Yehova, obuzigire bwerhu n’obukenge rhumugwereko bwakomera. Bulala rhurhalonzeze kugayisa Darha w’embingu, rhwashomba chiro n’ewazo ly’okujira echaha. Amango rhwamashumikwa rhujire echintu chibi, rhwanachibaza ntya: ‘Nka gurhe nakaziga nababaza omuntu wanyerekere obuzigire bungana ntya?’—1 Yo. 4:9, 10.

4. Gurhe okuyubaha Yehova kwalangire mwali-werhu yarhashumikwa kujira echintu chibi?

⁴ Mwali-werhu oyirikirwe Marta w’omu Croatie waliri ashumikwa ajire eby’obubaraga, aderhere ntya: “Nalibwene oku bikomeere oku gwarha amawazo m’enja, n’okulwisa enyifinjo z’okulonza kujira echintu chilebe chirhakwirire. Aliko, okuyubaha Yehova kwalindangire.”b Nka gurhe okuyubaha Mungu kwalimulangire? Marta aderhere oku aliri akengera bwenene oku ngaruka okurhola ensimikiro zibi kunalerha. Nerhu rhukwanene kujira okola kon’oko. Engaruka ebihire bwenene, eli oku rhukagayisa Yehova, rhurhachiba oku musitari gw’abantu nji bamuharamya esiku n’amango.—Mwa. 6:5, 6.

5. Bichi wakayiga kugerera omufano gwa Leo?

⁵ Amango rhwamayubaha Yehova, rhwaba merangwe yirhurhakola obwira haguma n’abantu banachiheka kubi. Leo, olamire omu Congo Kinshasa aliyigire elyola somo. Enyuma wa myaka ene amala kubatizwa, arhondera kujira obwira n’abantu babi banakola ebintu bibi. Aliwazize oku, okujira ntyo kurhali kubi bulala nta chaha aliza kukolera Yehova. Enyuma wasiku zigeke abola bera bage bamushumika, ahwanza kunywa amavu manene anajira n’echaha ch’obubaraga. Naho arhondera kuwaza oku bintu abazere bage Babakristu balimuyigirize, na busiime bungana gurhe aligwerhe amango alichiri akolera Yehova. Byaba gurhe? Agalukirwa n’obwenge kugerera oburhabale abashamuka bamuhaga, agalukira Yehova. Zene, ali akola n’obusiime nka mushamuka kandi anali payiniya ominuzize.

6. Bakazi babiri bahe b’omufano rhukola kuganirako?

⁶ Lekaga rhuganire oku lwandiko lwa Mezali sura 9, mw’eyola sura rhwasoma oku bilolere bakazi babiri, muguma oshushanyize obwengehe, n’owindi oshushanyize obunganyi. (Huzanya na Waroma 5:14; na Wagalatia 4:24.) Oku rhunali rhwajira ntyo, rhuhebe omu bwenge bwerhu oku linola gulu lya Shetani liyunjulirene m’obubaraga n’ebye pornografi. (Efe. 4:19) Bobola, kuli kw’akamaro rhugenderere kugwarha obuba burhengere emwa Mungu n’okuyakira hale ebintu bibi. (Mez. 16:6) Che chirhumire, rhube balume changwa bakazi, rhweshi rhwakayunguka n’ebili omu Mezali sura 9. Buli muguma mwabola bakazi, aderhere oku ali ahamagala abantu barhagwerhe bwenge “changwa ebinganyi.” Buli muguma ali aderha: ‘Muyinje omu mwani mulye akalyo.’ (Mez. 9:1, 5, 6, 13, 16, 17) Aliko, engaruka zahikiraga balala bayemeraga obulalike zirhali ziguma.

OMENYE WAYEMERA OBULALIKE B’OMUKAZI W’ECHINGANYI

7. Nk’oku olwandiko lwa Mezali 9:13-18 luderhere, bichi binahikira balala banayemera obulalike b’omukazi orhagwerhe bwengehe? (Olole n’efoto.)

⁷ Rhusome oku bilolere obulalike “b’omukazi w’echinganyi.” (Osome Mezali 9:13-18.) Ali ahamagala n’omulenge gwenyanya bwenene balala barhagwerhe bwenge, ‘Muyinje emwani rhusangire akalyo.’ Byaja byaba gurhe? “Balala bafire barhagwerhe misi mu bali omo.” Nkabaga wakayibuka ebindi binwa by’omufano bili nk’ebyola bikolesezwe omu sura zirhanzi za Mezali. Omukazi “wenzerezi” n’omukazi “w’embaraga.” Barhubwirire oku: “Enju yage eganire oku lufu.” (Mez. 2:11-19) Mezali 5:3-10 egwerhe ogwindi mukonge oku bilolere owindi “mukazi w’enzerezi” ‘ey’amagulu mage maganire oku lufu.’

8. Nsimikiro ehe rhukwanene kurhola?

⁸ Balala balibayunviriza omulenge “g’omukazi w’echinganyi” bakwanene kuchishoga akaba bayemera changwa kulahira obulalike bwage. Nerhu rhwakarhola esimikiro eli nk’eyola. Gurhe rhwakajira akaba muntu mulebe amarhubwira rhujire obubaraga, changwa nka rhwamarhogera ahohan’aho oku foto z’epornografi?

9-10. Mpanvu zihe ziguma zirhumire rhukwanene kuchilanga n’ebijiro b’yobubaraga?

⁹ Hali mpanvu zinene zinja bwenene zirhumire rhukwanene kuchilanga oku chijiro ch’obubaraga. “Omukazi w’echinganyi” ayerekenwe nk’ali aderha mpu: “Amenji omuntu ayibaga mabamalokere.” “Amenji omuntu ayibire” byebichi? Ebiblia ehuzenye echijiro ch’obuhya omulume n’omukazi bashabene banasiimira nka menji masimisize. (Mez. 5:15-18) Omulume n’omukazi bashabene nk’oku esheriya enaderhere bagwerhe oruhusa l’okusiimira ekijiro ch’obuhya haguma. Aliko ngahe bilekene “n’amenji omuntu ali ayiba.” Amenji mayibirwe makahuzanywa n’ekijiro ch’obuhya chirhakwanene. Omuntu onajira echijiro ch’obubaraga anachikola omu bwibisho, nka kulala omwizi naye anayiba omu bwibisho. “Amenji omuntu ayibaga” manabonekana nka malokere amango abamayibaga bali bawaza oku ntamuntu njiwamenya ebibajiraga. Banaba eyi bali bachirhebeka, bulala Yehova anabona ebintu byoshi. Nta chintu chibi bwenene kulusha okuheza obwira bwerhu haguma na Yehova. Bobola rhurhakaderha oku rhwapatire “echintu chinja bwenene chilokere” n’obo charhumire rhwaheza obwira bwerhu haguma na Yehova. (1 Ko. 6:9, 10) Aliko, hali ebindi binene bwenene rhwakaheza.

¹⁰ Echijiro ch’obubaraga chakakoza eshonyi, chanarhuma wachiyunva nka ntacho omalire, wakaheka obukule orhalilonzeze, chakashanda n’emilala. Kweri, bili by’obwengehe okurhayemera obulalike b’omukazi orhali mwengehe n’ebilyo byage. Olekere okuheza obwira bwabo haguma na Yehova, banene banajira ebijiro by’obubaraga banapata amalwala makanarhuma bafa juba-juba. (Mez. 7:23, 26) Mezali sura 9 mustari gwe 18 emalirize ntya: “Abahisi bage bali omu nkumbu z’Eshinda.” Bobola si, bulagurhe banene bali bayemera obulalike bwage bubahekere oku buhanya?—Mez. 9:13-18.

11. Bulagurhe okulola epornografi kunalerha obuhanya bubi bwenene?

¹¹ Omurhego guli gwafarha bantu banene rhukwanene kuchilangako eli pornografi. Bantu baguma banawaza oku, okulola epornografi kurhakalerha obuhanya. Aliko, enahanyagaza abantu banaheza obukenge ku bowe bonyine, n’okubandi, kandi binakomerera bwenene omuntu kulekana n’eyola ngeso y’okuyilola. Amango omuntu amalola epornografi, binakomera okushanda amola mafoto omu bwenge bwage. Kandi, epornografi erharhabala omuntu amale enyifinjo zibi s’ahubwe enarhuma ezola nyifinjo zaba zinene bwenene. (Kol. 3:5; Yak. 1:14, 15) Nechi, banene banalola epornografi banahikira ah’abajira ebijiro bibi by’obubaraga.

12. Nka gurhe rhunayerekana oku rhuli rhwachihangana kuchilanga oku mafoto makuzusya enyifinjo z’okujira obubaraga?

¹² Gurhe rhukwanene kujira rhwabo nka Bakristu, amango amafoto m’epornografi mamachilerha oku telefone, oku tablete changwa oku televiziyo yerhu, buzira kumenya? Rhukwanene kuyasa amesho merhu ahohan’aho. Byakarhuyorohera kujirantyo, akaba rhumenyere oku echintu ch’akamaro bwenene rhugwerhe buli bwira bwerhu haguma na Yehova. Chiro n’efoto zirhali z’epornografia zakarhuma rhwagwarha amawazo m’obubaraga. Bulagurhe rhukwanene kuchilanga kuzo? Bulala rhurhalonzeze chiro kuwaza changwa kujira echintu choshi choshi ch’obubaraga. (Mt. 5:28, 29) Omushamuka muguma w’omu Thailand oyirikirwe David aderhere ntya: “Nanchibaza: ‘Chiro akaba amafoto marhali m’epornografi, ka byakasiimisa Yehova nkala nagenderera kumalola?’ Amawazo mali nk’amola mantabere njire ebintu by’obwengehe.”

13. Bichi byarhurhabala rhukole oku bwengehe?

¹³ Okuyubaha echintu choshi-choshi chakarhuma Yehova agaya, kwarhurhabala rhukole oku bwengehe. Okuyubaha Mungu “g’omurhondero g’obwengehe.” (Mez. 9:10) Rhubwene echola oku murhondero gwa Mezali sura 9, ah’obwengehe b’okuli buhuzenywe n’owindi mukazi.

RHUYEMERE OBULALIKE BURHENGERE OKU MUKAZI MWENGEHE

14. Bulalike buhe bulengene rhwasomere omu Mezali sura 9:1-6?

¹⁴ Osome Mezali 9:1-6. Hanola rhwamasoma oku bilolere obulalike burhengere emwa Yehova, yewe nka Mulemi werhu nashoko y’obwengehe boshi. (Mez. 2:6; Ro. 16:27) Hano lero rhwamasoma oku bilolere enju nzibu-zibu egwerhe enkingi mushanvu. Echola chiyerekene oku Yehova ali Mungu onahaana, kandi alonzeze kuha karibu buli yeshi olonzeze kuyiga oku bimulolere y’aba mwengehe.

15. Bichi Mungu arhuhemere rhujirage?

¹⁵ Yehova ali muchire onahaana bwenene. Kugerera omufano g’omukazi oshushanyize “obwengehe b’okuli,” rhubwene oku Yehova ali Mungu onahaana, kandi anarhuha ebintu binene binja bwenene. Eyola ngani eyerekene oku ahamagere abageni omu mwage, abashegere akalyo kanunire, enyama, n’edivayi arheganyize. (Mez. 9:2) Oku bwindi nk’oku omustari gwa 4 n’ogwa 5 guderhere: “Obwengehe b’okuli buli [bwabwira balala barhagwerhe bwenge] mpu muyinje: ‘Mulye omugati gwani.’” Bulagurhe rhukwanene kuyemera obulalike b’oyula mukazi? Yehova alonzeze abana bage babe bengehe banabe omu bulanzi. Yehova arhalonzeze oku amagosa merhu mamarhuyigirizage, naho oku buzinda rhuje rhwachiganya. Abikiire “obuhirhi balala banalambagira omu kunali.” (Mez. 2:7) Nka rhugwerhe obuba bukwanene ku Yehova, rhwayunva rhulonzeze kumusiimisa. Rhunakenga ehano lyage ly’obwengehe, kandi rhugwerhe obusiime b’okulikulikira.—Yak. 1:25.

16. Nka gurhe okuyubaha Mungu kwalirhabere Alain arhole esimikiro nyinja, n’echo chalerha nyungu zihe?

¹⁶ Rhulole gurhe oku gwarha obuba bukwanene kwarhabere Alain arhole esimikiro nyinja. Alain ali mushamuka w’echibaga anali mwalimu oku masomo, aderhere ntya: “Banene omu balimu rhunakola nabo, baliri balola e filme z’epornografi yibamenya binene oku bilolere echijiro ch’obuhya.” Aliko, Alain alimenyere oku obola buli bubeshi. Aderhere ntya: “Bulala nyubahire Mungu, nalahira burundu (loshi) kulola ezola filme. Kandi nafasiriya aberhu balimu echarhumire ntalola ezola filme.” Akolesa amahano “m’obwengehe b’okuli” ‘y’alambagira omunjira y’obumenyi.’ (Mez. 9:6) Baguma mw’abola balimu Alain aliri akola nabo balisomerwe na zene bali bayiga Ebiblia banali bahika oku mbuganano z’Echikristu.

17-18. Bintu bihe binja abayemerere obulalike nji bapata kugerera “obwengehe b’okuli” na bichi bakalingiriza? (Olole n’efoto.)

¹⁷ Yehova akoleseze emifano y’abola bakazi babiri yarhuyereka gurhe rhwakagwarha amango mayinjire malim’obusiime. Balala banayemera obulalike “b’omukazi w’echinganyi” banalonzeza obusiime omu kujira eby’obubaraga. Aliko barhababamenyere oku ebijiro byabo byabalerhera engaruka zibi omu mango mayinjire. Ebijiro byabo byabaheka oku lufu.—Mez. 9:13, 17, 18.

¹⁸ Balala bayemerere obulalike b’omukazi oshushanyize “obwengehe b’okuli,” amango mabo mayinjire nji marhaba kuguma n’amabalala bandi! Kandi bagwerhe obusiime bulala bagwerhe byoshi bakenere yi bagenderera kugwarha obwira bukomere haguma na Yehova. (Isa. 65:13) Kugerera omulebi Isaya Yehova aderha ntya: “Munyunvirize bwinja-bwinja, mwalya ebilyo bilokere, kandi mwagwarha omwishingo omu kulya ebilyo by’okuyumbaka omubiri loshi.” (Isa. 55:1, 2) Yirhwayiga kuzigira ebi Yehova anazigira n’okushomba ebi Yehova anashomba. (Zb. 97:10) Kandi, rhugwerhe obusiime b’okuhamagala abandi nabo bayinje bayige kugerera “obwengehe b’okuli.” Rhuli “nka bakozi bali bahamagala n’omulenge oku misozi y’evile n’okuderha: ‘Buli yeshi w’echiganyi ayinje hano.’” Enyungu rhwapata na balala bali bayemeera obulalike zirhali zakuhwera aho han’aho, zili zakugenderera n’okurhuma rhwalama esiku n’amango nka rhuli rhwalambagira omu njira y’obumenyi.—Mez. 9:3, 4, 6.

19. Nk’oku olwandiko lwa Muhubiri 12:13, 14 luderhere, bichi rhukwanene kuhigirira kujira? (Olole n’echisanduku “Okuyubaha Mungu Kunarhulerhera Enyungu.”)

¹⁹ Osome Muhubiri 12:13, 14. Obuba bwerhu ku Mungu bujage bwagenderera kurhulanga, bunarhurhabale rhugenderere kugwarha olugenzi lwinja, n’okuyorha hofi naye. Rhugenderere kuhamagala bantu banene nk’oku byakana shobokana yi balonza “obwengehe b’okuli,” bunabayigirize bulala rhuzigire Yehova bwenene, rhunamukengere n’omurhima gwerhu goshi.