Oyiganye Bamalayika Bemana

1-2. a) Mu njira ehe rhurhali kuguma na bamalayika? b) Mu njira ehe rhuli kuguma na bamalayika?

RHWABO bakozi ba Yehova, rhuli chigabi ch’omulala gugwerhe obuzigire gunamuharamya. Ogola mulala guheberwe mu bene-berhu na bali-berhu b’omu gulu lyoshi n’amamiliyoni ma bamalayika bemana. (Da. 7:9, 10) Amango rhwamawaza ku bamalayika, rhwakawaza mu njira ehe barhali kuguma nerhu. Omufano, embere rhulemwe bamalayika babaga eyi babaho. (Yob. 38:4, 7) Bajira misi minene bwenene kurhulusha. Bali bachesibwa banali banya-kunali oku lugero rhurhakafa rhwahikiire rhwabo nka bantu barhashinganene.​—Lu. 9:26.

² Aliko, chiro akaba oku rhurhali kuguma na bamalayika, hali njira zinene rhuli kuguma nabo. Omufano, kuguma na bamalayika, nerhu rhwakayerekana engeso zinja za Yehova. Rhugwerhe obuhuru b’okuchishoga kuguma na bamalayika. Buli malayika ajira elyage zino, obwage-bwage borhere, banagwerhe engabane zirhali kuguma omu kasi ka Yehova. Nerhu ntyo kon’oko. Kuguma na bamalayika, nerhu rhukwanene kuharamya Omulemi werhu.​—1 Pe. 1:12.

3. Bichi rhwakayiga oku bilolere bamalayika bemena?

³ Bulala rhugwerhe bintu binene rhubuganeneko na bamalayika, emifano yabo minja yakarhuheba omurhima n’okurhuyigiriza. Bobola, rhwakayiga bintu binene binja oku bibalolere. Mu gunola mwazi, rhwabona nka gurhe rhwakayiganya obwirhohye bwa bamalayika bemana, obuzigire bwabo oku bantu, okulembera kwabo, n’okuntu banakola n’obushiru y’echibaga chigenderera kuyorha chichere.

BAMALAYIKA BABA BERHOHYE

4. a) Gurhe bamalayika banayerekana obwirhohye? b) Bichi biyerekene oku bamalayika baba berhohye? (Zaburi 89:7)

⁴ Bamalayika bemana baba berhohye. Chiro akaba bagerere mu binene, bagwerhe emisi, obwengehe, banakenga obwerekezi bwa Yehova. (Zb. 103:20) Amango bali bayeneza engabane Yehova abahere, barhachibanda omu chifuba haba n’akatyu oku bilolere ebi bali bajira, barhanakolesa emisi bagwerhe yi bachilerhera erenge. Banajira byoshi Yehova abahemere oku busime chiro akaba amazino mabo marhamenyikene.a (Mwa. 32:24, 29; 2 Fa. 19:35) Barhayemera abantu babahe obukuze bakahere Yehova. Bichi birhuma bamalayika baba berhohye bwenene? Bulala baba bazigire Yehova banaba bamukengere bwenene.​—Osome Zaburi 89:7.

5. Gurhe malayika muguma aliyerekene obwirhohye amango ahanula entumwa Yohana? (Olole n’efoto.)

⁵ Rhuganire ku chintu chiguma chiyerekene oku bamalayika baba berhohye. Hofi omu mwaka gwa 96 N.K.Y., malayika muguma ezino lyage lirhamenyikene, ayereka Yohana ebintu bisomeze. (Ufu. 1:1) Gurhe Yohana alijirire amango abona echola chibonekezi? Alonza kuharamya malayika. Aliko, oyola malayika amubuza aho han’aho omu kumubwira ntya: “Obe merangwe! Orhajiraga ntyo! Indi muja konyine kuguma nawe na kuguma na bene-benyu . . . Oharamye Mungu!” (Ufu. 19:10) Echishubizo cha malayika chaliyerekene obwirhohye! Oyola malayika arhalilonzeze kuhabwa obukuze changwa obukenge. Aho han’aho arhabala Yohana aseze obwenge ku Yehova Mungu. Malayika arhachiyunvaga ali w’akamaro kulusha Yohana. Chiro akaba malayika abaga akolere Yehova mu mango manene, analigwerhe misi minene kulusha Yohana, abwira Yohana oku bwirhohye oku naye ali muja kuguma naye. Chiro akaba oku malayika alikwanene kuhanula Yohana, arhakalihiraga eyola ntumwa yalikala eshajire. Ahali h’okujira ntyo, aganira naye oku bwirhonzi. Byakashobokana oku malayika alibwene oku Yohana ayubahire.

6. Gurhe rhwakayiganya obwirhohye bwa bamalayika?

⁶ Gurhe rhwakayiganya obwirhohye bwa bamalayika? Kuguma na bamalayika, nerhu rhulolenze kukola binene omu kasi ka Yehova buzira kuchitapa eju y’ebi rhuli rhwayeneza changwa okuchibona nka rhwe rhugwerhe empano zili kwago-kwago. (1 Ko. 4:7) Oku bwindi, rhurhakwanene kuchiyunva oku rhuli b’akamaro kulusha abandi bulala rhwamakolera Yehova mu myaka minene changwa eju y’empano zilebe rhugwerhe. Kweri, oku rhunagwerhe ngabane zinene ku rhunakwanene kuchibona oku rhuli badorho. (Lu. 9:48) Kuguma na bamalayika, rhulonzeze kukolera abandi. Rhurhanaba rhulonzeze okw’abandi bantu babone oku rhuli b’akamaro kubalusha.

7. Gurhe rhwakayerekana obwirhohye amango birhuhemere kuhanula muntu mulebe?

⁷ Rhwakayerekana kandi obwirhohye amango birhuhemere kuhanula muntu mulebe, abe ali werhu Mukristu changwa mwana werhu. Mango maguma binarhuhema kuhana ehano buzira kubisha echintu n’echiguma. Aliko kuguma na malayika wahanulaga Yohana oku bwirhonzi, amango rhuli rhwahanula omuntu, nerhu rhwakaba wazi na buzira kurhuma achiyunva avunikire omurhima. Akaba rhurhali rhwachibona oku rhuli b’akamaro kulusha abandi, byarhurhabala rhuhane ehano liyumangire oku Biblia omu njira y’obukenge n’obuzigire.​—Kol. 4:6.

BAMALAYIKA BANAZIGIRA ABANTU

8. a) Nk’ok’olwandiko lwa Luka 15:10 luderhere, gurhe bamalayika banayerekana obuzigire bwabo oku bantu? b) Gurhe bamalayika banarhurhabala omu kasi k’okuhubiri? (Olole n’efoto.)

⁸ Bamalayika barhaba hale n’abantu changwa barhachicha oku bantu, s’ahubwe banazigira abantu. Banagwarha obusime amango omunya-byaha amahungama, k’okuderha amango entama yali yaherere yamagalukira Yehova changwa amango omuntu amahindamula enjira zage n’okugaluka omu kuli. (Osome Luka 15:10.) Kandi bamalayika banarhurhabala omu kasi k’amahubiri. (Ufu. 14:6) Chiro akaba oku barhahubiri abantu masu oku masu, bakarhuyerekeza kuhubiri muntu mulebe olonzeze kuyiga oku bilolere Yehova. Kweri, rhurhakayemeza bwinja-bwinja oku bamalayika banarhuyerekeza ku buli muntu. Omu bukweri, Yehova akakolesa ezindi njira; nk’eroho lyage lichesibwa lirhabale abantu balonzeze kuyiga oku bimulolere changwa kuyerekeza abakozi bage kw’abola bantu. (Mdo. 16:6, 7) Chiro akaba ntyo, anakolesa bamalayika bwenene. Bobola, amango rhuli rhwahubiri emyazi minja rhwakachizera oku bamalayika barhurhabala.​—Olole echisanduku “Amasala Mabo Malishubizwe.”b

9. Nka gurhe rhwakayiganya obuzigire bamalayika bajira oku bantu?

⁹ Nka gurhe rhwakayiganya obuzigire bamalayika bajira oku bantu? Amango bamatangaza oku muntu mulebe agalukire Yehova, rhunayunva obusime kuguma na bamalayika. Rhwakajira koshi rhugalire yi rhushuba kumuyegereza n’okumuyereka obuzigire. (Lu. 15:4-7; 2 Ko. 2:6-8) Rhwakayiganya kandi bamalayika, omu kukola koshi rhugalire omu kasi k’amahubiri. (Muh. 11:6) Kuguma n’oku bamalayika banarhurhabala omu kuhubiri emyazi minja, nerhu rhwakalonza enjira rhwakarhabala mu bene-berhu na bali-berhu omu kasi k’amahubiri. Omufano, nkabaga rhwakapanga kuhubiri haguma n’omuhubiri orhagwerhe obufundi! Rhwakarhabala bene-berhu na bali-berhu bakala bashajire changwa ab’ebilema.

10. Bichi rhwakayiga kugerera ebi Sara agereremo?

¹⁰ Gurhe rhwakajira amango ehali rhulimo erharhuyemererere rhukole byoshi rhulonzeze kukola omu kasi ka Yehova? Hali eyindi njira rhwakapata y’okukola haguma na bamalayika omu kasi k’amahubiri. Rhuganire oku bi mwali-werhu Sarac w’omu chihugo che Inde agereremo. Enyuma y’okukola myaka 20 ey’ali painiya, Sara alwala arhakanachigalire kurhenga omu buliri. Alivunikire omurhima bwenene. Aliko, Sara ashuba kugwarha obusime bwage bulala alipatire oburhabale b’obuzigire burhengere ku bene-babo na bali-babo b’omu chibaga na kugerera eprograme yage nyinja y’okusoma e Biblia. Kweri, alikwanene kukomera ehali yage mpyahya y’agala kuhubiri. Bulala arhakagalire kuyikala y’ayandika amaruba, byalimuhemere ahubiri kugerera etelefone. Bobola, ayinja ahamagala abantu alikwanene kugalukira, bamumenyesa abandi bantu bakasima bayige e Biblia. Byaja byaba gurhe? Mu myezi migeke, Sara alikala agwerhe mafunzo me Biblia 70, arhakanachigalire kumaongoza yewe yenyine! Bobola, ahana mafunzo maguma oku bantu b’omu chibaga. Banene mw’abola aliri ayigiriza Ebiblia bakala bali bahika oku mbuganano. Bamalayika banagwarha busime bunene b’okukola haguma na bene-berhu na bali-berhu banajira byoshi bagalire omu kasi k’amahubiri kuguma na mwali-werhu Sara!

BAMALAYIKA BANAYEREKANA ENGESO Y’OKULEMBERA

11. Gurhe bamalayika bemana bayerekene okulembera bwenene?

¹¹ Bamalayika bemana banayerekana olwiganyo lwinja oku bilolere okulembera. Hamagera ebihumbi by’emyaka eyi bali balembera amabi n’obulyalya. Balibwene gurhe Shetani n’ebindi bilemwa binene by’ekiroho byaliri byakola haguma nabo byachijira bigamba ku Yehova. (Mwa. 3:1; 6:1, 2; Yud. 6) E Biblia eganirire ku malayika muguma mwimana wabugananaga na muzimu muguma ogwerhe emisi amulwisa. (Da. 10:13) Kandi, kurhenga omu mango ma Adamu na Eva, bamalayika babwene gurhe bantu bageke bwenene babachishogere kukolera Yehova. Chiro akaba ntyo, abola bamalayika bemana bagenderere kukolera Yehova oku bwimana. Bamenyere ok’omu kasanzi kakwanene, Mungu nj’amala obulyalya boshi.

12. Bichi byakarhurhabala kulembera?

¹² Nka gurhe rhwakayiganya okulembera kwa bamalayika? Kuguma na bamalayika, rhwakaba rhuli rhwahurana obupinzani n’okukolerwa kubi. Aliko kuguma nabo, rhugwerhe obwemere oku Mungu nj’akula amalumwa moshi omu kasanzi kakwanene. Bobola kuguma na bamalayika bemana, rhurhakwanene kuleka kujira amenja.” (Gal. 6:9) Mungu arhulaganyize okw’arhurhabala rhulembere. (1 Ko. 10:13) Rhwakasalira Yehova arhurhabale n’eroho lyage lichesibwa yi rhugala kulembera n’okugwarha obusime. (Gal. 5:22; Kol. 1:11) Gurhe si akaba oli wahurana obupinzani? Olangalire Yehova bwenene orhanayubahaga. Buli mango, Yehova akurhabala n’okukuhereza emisi.​—Ebr. 13:6.

BAMALAYIKA BANARHABALA Y’ECHIBAGA CHIYORHA CHICHERE

13. Ngabane ehe eli kwago-kwago bamalayika bagwerhe mu zinola siku z’obuzinda? (Matayo 13:47-49)

¹³ Mu zinola siku z’obuzinda Yehova ahere bamalayika engabane eli kwago-kwago. (Osome Matayo 13:47-49.) Akasi k’okuhubiri yikalerha amamiliyoni m’abantu ba buli buko. Baguma mubo bali bachihangana kuhindamula akalamo kabo yi baba Bakristu b’okuli, aliko abandi nanga. Bamalayika bahabirwe engabane “y’okukula abantu babi omu banya-kunali.” Echola chiyerekene oku bagwerhe engabane y’okurhabala echibaga chiyorhe chichere. Kweri, rhurhakaderha oku balala banaleka kukolera Yehova eju y’empanvu zilebe, barhakachifa bagalukire. Kurhanali kuderha oku harhakachirhengerera ebibazo omu chibaga. Nechi rhukwanene kuchizera oku bamalayika bali bakola bwenene omu kurhabala ebibaga biyorhe bichere.

14-15. Nka gurhe rhwakayiganya okuntu bamalayika banachihangana kukola y’echibaga chiyorha omu hali nyinja y’ekiroho? (Olole n’efoto.)

¹⁴ Nka gurhe rhwakayiganya bamalayika oku bilolere okuntu banalaga oku busafi bw’ekiroho bw’echibaga? Kuli kujira echerhu chigabi omu kuntu echibaga chigenderere kugwarha olugenzi luchere n’ehali nyinja y’ekiroho. Yi rhugala kujira ntyo, rhukwanene kulanga omurhima gwerhu omu kuchishoga abera benja, n’okuyaka amashumi moshi mabi makarhurhebeka. (Zb. 101:3) Kandi, rhukwanene kurhabala bene-berhu na bali-berhu bagenderere kubera bemana ku Yehova. Omufano, bichi rhukwanene kujira nka rhwamamenya ok’owerhu Mukristu ajirire echaha chikomere? Bulala rhuzigire oyola mwene-werhu changwa mwali-werhu, rhukwanene kumubwira aje kuganira n’abashamuka. Akaba oyola muntu arhajirire ntyo, rhukwanene kumenyesa abashamuka. Rhulonzeze oyola ozambire ekiroho apate oburhabale juba-juba!​—Yak. 5:14, 15.

¹⁵ Ech’okugayisa, baguma omu banajira ebyaha bikomere banakulwa omu chibaga. Omu hali eli nk’eyola, “rhwanaleka kukomerana” nabo.d (1 Ko. 5:9-13) Okujira ntyo, kwarhabala echibaga chiyorhe chichere. Echindi, amango rhwamachishoga okurhakomerana n’abantu bakulirwe omu chibaga, rhwanaba eyi rhwamabayereka obwinja. Bulala amango rhwamakenga ehano lya Yehova ly’okurhabakomera, rhwanaba eyi rhwamabarhabala babone oku bibahemere bagalukire Yehova. Nka bamajira ntyo, rhwagwarha obusime haguma na Yehova na bamalayika.​—Lu. 15:7.

16. Mu njira zihe bikuhemere ochihangane kuyiganya bamalayika?

¹⁶ Rhugwerhe olukengo l’okubona ebilemwa by’ekiroho n’amasu merhu m’obwemere n’okukola haguma na bamalayika! Leka rhuyiganye ezila ngeso zabo zinja nk’obwirhohye bwabo, obuzigire bwabo oku bantu, okulembera kwabo, n’okuntu banalaga oku lugenzi n’ehali nyinja y’ekiroho y’echibaga. Nka rhuyiganyize bamalayika bemana, nerhu rhwaba chigabi ch’omulala gw’abakozi ba Yehova esiku n’amango.