Olangalire ku Yehova Akurhuliriza

1. Fasiriya ehali Abayahudi balirimo omu buhungiro.

WAZA gurhe Abayahudi baliri omu buhungiro e Babiloni baliri bachiyunva. Balibwene gurhe echihugo chabo chalimbulwa. Eju y’ebyaha byabo n’ebya b’eshekuliza, babakula omu chihugo chabo n’okubarhuma omu chindi chihugo. (2 Ny. 36:15, 16, 20, 21) Aliko, Abayahudi baliri buhungiro e Babiloni, baligwerhe obuhuru b’okukola ebi balonzeze omu kalamo kabo ka buli lusiku. (Yer. 29:4-7) Chiro akaba ntyo, akalamo kabo karhaliyorohere, arhanali akalamo kali ntyo ka bakachishogere kulama. Gurhe baliri bachiyunva eju y’eyola hali? Tala ebi muntu muguma mwimana waliri omu buhungiro aderhaga: “Rhwaliri rhwayikala eburhambi bw’enyinji zizibu-zibu ze Babiloni. Amango rhwaliri rhwayibuka Esayuni rhwaliri rhwalira.” (Zb. 137:1) Abaliri buhungiro baliri bavunika omurhima, banalikenere kurhulirizwa. Aliko si, ngahe bakapatire echirhulirizo?

2-3. a) Bichi Yehova alijirire Abayahudi baliri buhungiro? b) Bichi rhwaganirako mu gunola mwazi?

² Yehova ali “Mungu w’oburhulirize boshi.” (2 Ko. 1:3) Yewe nka Mungu w’obuzigire, anayunva obusime amango ali arhuliriza boshi bali hofi naye. Yehova alimenyere oku banene omu baliri buhungiro bakayemerere obuhane n’okushuba kumugalukira. (Isa. 59:20) Bobola, myaka erhalukire 100 embere baje buhungiro, Yehova alifuherere omulebi Isaya ayandike echitabu chiyirikirwe oku zino lyage. Bichi byarhumaga Yehova abwira Isaya ayandike echola chitabu? Isaya ayandikire ntya: “‘Rhuliriza, rhuliriza, abantu bani,’ intyo ku Mungu wenyu aderhere.” (Isa. 40:1) Nechi, kugerera eby’omulebi Isaya ayandikaga, Yehova alihere Abayahudi baliri buhungiro echirhulirizo balikenere.

³ Kuguma n’abola Bayahudi baliri buhungiro, nerhu rhunakenera echirhulirizo buli mango. Mu gunola mwazi, rhwaganira ku njira 3 Yehova alirhulirize mw’Abayahudi baliri buhungiro: 1) Alilaganyize okw’ababalira abahungamire, 2) ali bahere obulangalire, n’echa 3) alibarhabere kurhuleza obuba bwabo. Oku rhunali rhwaganira kw’ezola njira, olole gurhe wakayunguka n’ebinwa bya Yehova bihebere omurhima.

YEHOVA W’OBUBABALE BUNENE ANARHUBABALIRA

4. Gurhe Yehova anayerekana okw’ali Mungu w’obubabale bunene? (Isaya 55:7)

⁴ Yehova ali “Mungu w’obubabale bunene.” (2 Ko. 1:3) Aliyerekene eyola ngeso amango alaganya okw’ababalira abaliri buhungiro bakahungamire. (Osome Isaya 55:7.) Aderhere ntya: “Omu buzigire bwimana bwani bw’esiku n’amango, nji nakuyunvira obonjo.” (Isa. 54:8) Gurhe Yehova akayerekene obonjo bwage? Chiro akaba Abayahudi bowe nka lubaga baliri bahurana n’engaruka z’ebijiro byabo, Yehova alibalaganyize oku barhakayorhere e Babiloni esiku n’amango. Bakayorhere buhungiro mu chihe chilebe. (Isa. 40:2) Ebyola bikwanene kuba eyi byalirhulirize Abayahudi balihungamire banalilonzeze kusimisa Yehova!

5. Bulagurhe rhugwerhe empanvu zinene z’okusimiswa n’obubabale bwa Yehova kulusha Abayahudi bahekwaga buhungiro?

⁵ Bichi birhuyigirize? Yehova aba tayari kuyereka abakozi bage obubabale bunene. Zene rhugwerhe mpanvu zinene z’okusimiswa n’obubabale bwa Yehova kulusha Abayahudi baliri buhungiro. Bulagurhe? Bulala rhumenyere ebi Yehova ajirire y’ababalira ebyaha byerhu. Hahwere amagana m’emyaka Isaya aderhe obola bulebi, Yehova arhuma Omugala muzigirwa oku gulu y’ahana enchungu oku banya-byaha boshi bahungamire. Bulala Yesu afire eju yerhu, Yehova akababalira ebyaha byerhu loshi-loshi. (Mdo. 3:19; Isa. 1:18; Efe. 1:7) Bisimisize okubona rhunakolera Mungu w’obubabale bunene!

6. Okuchiseza oku bubabale bwa Yehova kwakarhulerhera nyungu zihe? (Olole n’efoto.)

⁶ Ebinwa byarongozwaga na Yehova bili omu Isaya 55:7 byakarhurhuliriza amango rhuchiyunvirhe rhuli banya-magosa. Baguma mu rhwewe, nkabaga bakagenderera kuchiyunva bali banya-magosa eju y’ebyaha bajiraga mira chiro bakaba babihungamire. Byakagenderera kuba ntyo nka rhuli rhwalibuka eju y’engaruka z’amagosa merhu. Aliko, akaba rhwahungamire ebyaha byerhu, rhwanahindamwire olugenzi lwerhu, rhwakachizera oku Yehova arhubabalire. N’amango Yehova amachishoga kubabalira arhakachiyibuka ebyaha byerhu. (Huzanya na Yeremia 31:34.) Bulala Yehova arhagenderera kuwaza oku byaha byerhu bya mira, nerhu rhurhakwanene kugenderera kubiwazako. Eby’akamaro emwa Yehova bili bilala rhuli rhwajira zene, s’arhali amagosa rhwajiraga mira. (Eze. 33:14-16) Hanola hofi-hofi, Darha w’obubabale bunene arhukulira loshi-loshi engaruka z’amagosa merhu.

7. Bichi byakarhushunika rhubone abashamuka akaba rhwabishire echaha chikomere?

⁷ Bichi rhukwanene kujira akaba ezamiri yizarhuluma bulala rhwabishire echaha chikomere? E Bibliya erhubwirire oku rhwakalonza oburhabale bw’abashamuka. (Yak. 5:14, 15) Aliko, nkabaga birhakarhuyorohera okubabwira ebintu bibi byoshi rhwajirire. Aliko, rhukwanene kuyunva rhushunikirwe kuyegera abola balume bemana, n’akaba rhwahungamire, Yehova n’abalume ashimikire barhuyereka obubabale n’obuzigire. Rhuganire oku bilolere okuntu Yehova arhulirizaga mwene-werhu Arthur,a ey’ezamiri zage zaliri zaluma. Arthur aderhere ntya: “Naliri nalola epornografi mu mwaka muguma. Aliko enyuma y’okuyunviriza ejambo liderhere oku bilolere ezamiri, nahungama echaha chani emwa mukani n’emunda abashamuka bali. Enyuma w’ahola, nayunva namahumuka. Aliko, nagenderera kuchiyunva indi munya-magosa eju y’ebyola najiraga. Abashamuka banyibusa oku Yehova arhandekereraga. Anarhuhereza obuhane bulala arhuzigire. Ebinwa byabo binja byalimpumire oku murhima byanantabala mpindamule amawazo mani.” Zene, Arthur ali akola nka painiya na mugwasi w’akasi. Bihebere omurhima okumenya oku rhukahungama Yehova arhuyereka olukogo.

YEHOVA ANARHUHA OBULANGALIRE

8. a) Bulangalire buhe Yehova alihere Abayahudi baliri buhungiro? b) Nk’ok’olwandiko lwa Isaya 40:29-31 luderhere, gurhe Abayahudi balihungamire bakachiyunvirhe eju y’obulangalire Yehova abahaga?

⁸ Oku mawazo m’abantu, Abayahudi baliri buhungiro bakabonekene nka nta bulangalire bagwerhe. Oburhegesi bw’Egulu Lyoshi bwe Babiloni bwalimenyikene oku burhaliri bwashwekula abantu bahekerwe buhungiro. (Isa. 14:17) Aliko Yehova alihere olubaga lwage obulangalire. Alilaganyize okw’akalikwire olubaga lwage na ntacho chakamubuzize. (Isa. 44:26; 55:12) Abababiloni baliri nka luchuchu lugeke omu masu ma Yehova. (Isa. 40:15) Amango wamabuha oluchuchu lunatumuka. Intyo ku byakanayorohere Yehova kushwekula olubaga lwage omu Babiloni. Gurhe obola bulangalire bwakarhabere Abayahudi? Bwakabarhulirize. Aliko, obola bulangalire bwakajirire na binene kulusha echola. Isaya ayandikire ntya: “Balala bagwerhe obulangalire bashuba kugwarha emisi.” (Osome Isaya 40:29-31.) Nechi, obulangalire bwabo bwakashubire kubahereza emisi; bakabere nka bihobera bili byabalala omu chalege bulala obulangalire baliherhe bwakashubire kubahereza emisi mihyahya.

9. Bulagurhe Abayahudi bakachizerere oku Yehova akabashwekwire kurhenga omu buhungiro e Babiloni?

⁹ Kandi, Yehova alihere abaliri omu buhungiro empanvu z’okulangalira ebilagane byage. Nka gurhe? Omu kuwaza oku bulebi bwabaga bwayenere. Balimenyere okw’Abaasiriya babaga bahimire moko ekumi m’obwami bwe Izraeli n’okuheka abantu omu buhungiro. (Isa. 8:4) Balibwene gurhe Abababiloni balimbula e Yerusalemu n’okuheka abalilamiremo buhungiro. (Isa. 39:5-7) Balichibwenere gurhe batomora amasu g’Omwami Sedekiya n’okumuheka e Babiloni. (Yer. 39:7; Eze. 12:12, 13) Buli choshi Yehova abaga alebere chaliyenere. (Isa. 42:9; 46:10) Ebyola byoshi bikwanene kuba eyi byalikomeze obwemere bwabo okw’echilagane cha Yehova ch’okubashwekula nacho nji chayenera!

10. Bichi byakarhurhabala rhugenderere kugwarha obulangalire mu zinola siku z’obuzinda?

¹⁰ Bichi birhuyigirize? Amango rhwamachiyunva rhugwerhe omulago, obulangalire bwakarhurhuliriza n’okurhurhabala rhushube rhugwarhe emisi. Ebintu mu linola gulu bili byagenderera kubiha bwenene, n’abanzi ba Mungu bagwerhe emisi bali bagenderera kurhupinga. Chiro akaba ntyo, rhurhakwanene kuvunika omurhima. Yehova arhuhere obulangalire bwinja bwenene k’okuderha, akalamo k’esiku n’amango kali m’omurhula n’obulanzi b’okuli. Rhukwanene kubika obola bulangalire omu bwenge n’omu murhima. Nka rhurhajirire ntyo, obulangalire bwerhu bwakaba nka kulala omuntu akaba yalola ebustani ekwirire bwenene, aliko ey’arhayibona bwinja bulala y’ayilolera omu dirisha ligwerhe echiyo chizingire. Nka gurhe “rhwakashuka echola chiyo,” y’obulangalire bwerhu buyorha bukomere? Buli mango rhwakagenda rhwarhola akasanzi rhwanachapa omu bwenge gurhe akalamo nji kaba kenja bwenene omu gulu lihyahya. Rhwakasoma ebitabu, rhwakalola evideo, changwa rhwanayimpa enyimpo ziderhere oku bulangalire bwerhu. Rhwakanabwira Yehova omu sala oku bilolere ebilagane rhuli rhwalingiriza n’enyorha rhubone gurhe byayenera.

11. Bichi byarhabalaga mwali-werhu muguma waligwerhe echibazo ch’amagala ashube agwarhe emisi?

¹¹ Waza gurhe obulangalire bwalirhabere mwali-werhu oyirikirwe Joy, waligwerhe ebibazo by’amagala bikomere. Aderhere ntya: “Amango naliri nayunva byanchubukire, naliri nabwira Yehova okuntu ndi nachiyunva eyi nanyinji bwinja okw’ali anyunva. Mw’ebyola bisanzi, Yehova aliri ampa ‘emisi echubukire ey’olugero.’” (2 Ko. 4:7) Kandi, Joy aliri achapa omu bwenge okuntu nj’aba omu gulu lihyahya amango “ntaye nji wachiderha mpu: ‘Nalwere.’” (Isa. 33:24) Nerhu nka rhufungulire Mungu omurhima gwerhu goshi n’okuseza obwenge oku bulangalire bwerhu, rhwakashuba kugwarha emisi.

12. Mpanvu zihe rhugwerhe z’okugwarha obulangalire omu bilagane bya Yehova? (Olole n’efoto.)

¹² Nk’oku Yehova ahaga Abayahudi baliri buhungiro mpanvu zinene z’okunihira ebilagane byage, intyo k’onoko nerhu arhuhere mpanvu zinene z’okugwarha obulangalire omu bilagane byage zene. Ba nka wawaza oku bulebi rhuli rhwachibonera gurhe yi bwayenera. Omufano, rhuli rhwachibonera gurhe Oburhegesi bw’Egulu Lyoshi, k’okuderha e Amerike ne Angletere okuntu bugwerhe “olunda lukomere n’olunokere.” (Da. 2:42, 43) Kandi yirhwayunva emyazi oku bilolere “emisisi hantu haguma oku handi,” rhunali rhwagenderera kuhubiri “abantu b’amashanja moshi.” (Mt. 24:7, 14) Obola bulebi n’ebindi bintu binene, binarhurhuliriza n’okukomeza obwemere bwerhu omu bilagane bya Yehova birhaza kuyenera.

YEHOVA ANARHURHULIRIZA AMANGO RHUGWERHE OBUBA

13. a) Bibazo bihe Abayahudi balihurene nabyo amango bashwekulwa? b) Nk’oku biyerekenwe omu Isaya 41:10-13, nka gurhe Yehova alirhulirize Abayahudi barhengaga buhungiro?

¹³ Chiro akaba oku Yehova alirhulirize Abayahudi baliri buhungiro omu kubaha obulangalire bwinja, alimenyere oku bakahurene ebigeregezo omu mango bakalikwirwe. Yehova alilebere k’oku buzinda b’obuhungiro bw’Abayahudi, hakabere omwami ogwerhe emisi wakalimbwire amashanja mazungulukire e Babiloni, n’okuja arhera e Babiloni. (Isa. 41:2-5) Echola chakarhumire Abayahudi bayubaha si? Yehova alirhulirize abantu bage embere w’echihe omu kuderha ntya: “Orhayubahaga bulala indi haguma nawe. Orhalagaga bulala indi Mungu wawe.” (Osome Isaya 41:10-13.) Okuderha oku “indi Mungu wawe” bichi alonzaga kubabwira? Arhalilonzeze kuyibusa Abayahudi oku bakwanene kumuharamya bulala baliyinji echola. S’ahubwe aliri alonza kubayibusa oku buli mango aba haguma nabo.​—Zb. 118:6.

14. Bindi bichi Yehova alijirire omu kurhabala Abayahudi yi barhagwarha obuba?

¹⁴ Yehova alibarhabere kandi yi barhagwarha obuba omu kubayibusa emisi n’obumenyi bwage burhagwerhe mipaka. Alihemere Abayahudi baliri buhungiro balole enyenyezi z’omuchalege. Alibabwirire okw’arhalemaga enyenyezi konyine, si kandi ayinji buli nyenyezi omu zino lyayo. (Isa. 40:25-28) Bisimisize bwenene okubona kangana gurhe ayinji ezino lya buli mukozi wage! N’akaba Yehova aligwerhe obuhashe b’okulema enyenyezi, arhakabula obuhashe b’okurhabala abantu bage. Kweri, nta mpanvu n’enguma Abayahudi baliri buhungiro baligwerhe y’okugwarha omulago changwa y’okuyubaha.

15. Nka gurhe Mungu abaga arheganyize Abayahudi baliri buhungiro oku byakabahikire?

¹⁵ Yehova alirheganyize kandi abantu bage oku byakabahikire. Omu chigabi ch’oburhanzi che chitabu cha Isaya, Mungu abwira abantu bage ntya: “Muje omu byumba byenyu bya ndani, munachinge emilyango. Muchibishe mu bisanzi bigeke kugera ah’oburhe bwahwera.” (Isa. 26:20) Byakashobokana okw’Abayahudi balikulikire obola bwerekezi amango Mwami Koreshi arhera e Babiloni. Omuntu onabala engani wa mira w’Omugiriki, aliderhere okw’amango Koreshi aja omu Babiloni, “alihere [abasoda bage] erhegeko oku bayirhe buli muntu yeshi babugana embuga.” Ba nka wawaza buba bungana gurhe abantu balilamire omu Babiloni bakagwarhire! Aliko, Abayahudi baliri buhungiro nkabaga barhakayubahire bulala balikengere obwerekezi bwa Yehova.

16. Bulagurhe rhurhakwanene kuchiyunva rhuyubahire oku bilolere amango merhu mayinjire? (Olole n’efoto.)

¹⁶ Bichi birhuyigirize? Hanola hofi rhwahurana amalibuko makulu marhasaga kubaho omu ngani y’akalamo k’abantu. Amango amalibuko nji mahwanza, hofi abantu boshi nji bachiyunva ebintu bibachubukire n’okugwarha obuba. Aliko, abantu ba Yehova bowe nanga. Rhumenyere oku Yehova ali Mungu werhu. Nji rhwayorha buzira kushaganyika eyi rhunamenyere “ok’obuchunguke [bwerhu] buli hofi.” (Lu. 21:28) Chiro n’amango amashanja machihebere haguma nji marhurhera, rhwegenderere kuyorha buzira kushanganyika. Yehova nj’akolesa bamalayika yi barhulanga n’okurhuha obwerekezi b’okuyokola akalamo kerhu. Gurhe nji rhwahabwa obola bwerekezi? Kugera buno rhurhaza kumenya. Aliko, byakashobokana oku nji rhwahabwa obwerekezi buli nk’obola kugerera ebibaga byerhu. Omu njira eli nk’eyola, nji rhwaba nka rhwamaja “omu byumba byerhu bya ndani,” aha nji rhwapata obulanzi. Gurhe rhwakachirheganya oku birhulingirize? Rhukwanene kugwarha obwira bukomere haguma na bene-berhu na bali-berhu, okukenga oku bulonza obwerekezi bw’echiteokrasi, n’okuchizera oku Yehova ali ayerekeza olubaga lwerhu.​—Ebr. 10:24, 25; 13:17.

17. Nka gurhe wakagenderera kulonzeza echirhulirizo emwa Yehova?

¹⁷ Chiro akaba okw’Abayahudi baliri buhungiro baliri omu hali ekomere, Yehova alibalaganyize okw’abahereza echirhulirizo bakenere. Nerhu arhujirira oko kon’okola. Bobola chiro hakarhengerera echibazo choshi-choshi omu kalamo kerhu, rhukwanene kugenderera kulangalira echirhulirizo cha Yehova. Rhugwerhe obwemere okw’anababalira abakozi bage bemana n’okubashishikala. Ogenderere kukomeza obwemere bwawe. Orhanahira okayibagira oku bulala Yehova ali Mungu wawe ntacho okwanene kuyubaha.