Ang Pagtamod sang Biblia
Paghatag sing Ikapulo—Kinahanglanon Bala Ini?
ANG sekretaryo sang Anglikano nga dioceses sa Bagatnan nga Aprika nabalaka. Pigado sa kuarta ang iya iglesia amo kon ngaa mabudlay sueldohan ang mga ministro. Ang iya solusyon: Ipadaku sa mga parokyano ang paghatag sing ikapulo.
Apang ano gid bala ang paghatag sing ikapulo? Ang iban nagasiling nga isa ini ka paghatag para sa relihioso nga mga katuyoan “ika-10 sang tanan nga imo ginabaton.” Bisan lainlain ang paagi sang pagkalkular sang ikapulo sa nanuhaytuhay nga mga relihion, ginabatyag sang madamo nga ministro nga kinahanglan ipatuman ang paghatag sing ikapulo. “Kanugon gid nga wala na naton ginapadaku ang paghatag sing ikapulo,” siling sang isa ka Katoliko nga pari sa Aprika. Ang Worldwide Church of God, sa isa ka artikulo sang magasin nahanungod sa kon paano malikawan ang kaimulon paagi sa pagpakig-upod sa Dios, nagsiling: “Sa pag-umpisa sang imo relasyon sa Dios, dapat mo anay tumanon ang kasugoan sang Dios tuhoy sa paghatag sing ikapulo.” Ang artikulo nagdugang nga ang mga wala nagahimo sini “nagapangawat sa Dios.”
Apang ginapatuman bala sang Dios sa imo ang paghatag sing ikapulo? Mahimo nga makibot ikaw sa ginasiling sang Biblia nahanungod sini.
Paghatag sing Ikapulo kag ang Kasugoan ni Moises
Ang paghatag sing ikapulo bahin sang hubon sang kasugoan nga ginhatag sang Dios paagi kay Moises sa dumaan nga pungsod sang Israel. Ginpatuman sang kasugoan sa dose ka tribu sang Israel nga sakdagon ang ika-13 ka tribu, ang saserdote nga mga Levinhon, nga wala sing duta nga pinanubli. Paagi sa sini makakonsentrar ang mga Levinhon sa espirituwal nga mga kinahanglanon sang pungsod. (Numeros 18:21-24) Subong mangunguma nga mga tawo, wala ginpatuman sa mga Israelinhon nga kuarta ang ila ihatag sa ikapulo. Sa baylo, kuhaon ini gikan sa patubas sang duta kag gikan sa pag-uswag sang kahayopan. Kon ang patubas kuhaan sing ikapulo kag luyag sang Israelinhon nga kuarta sa baylo ang ihatag, nian dapat sia maghatag sing 20 porsiento sang bili sang patubas.—Levitico 27:30-33.
Ang sugo sang Dios tuhoy sa paghatag sing ikapulo isa ka serioso nga butang. Kon nagsayop ang isa ka Israelinhon kag nagamit niya para sa iya kaugalingon ang ikapulo nga iya ihatag, nian dapat niya tumbasan ini. Paano? Paagi sa paghatag sing ekstra nga 20 porsiento kag maghalad sing sapat nga halad para sa iya sala. (Levitico 5:14-16) Bisan indi tanan sang mga Israelinhon magapakigbahin sa pagkasaserdote, ang tanan makapakigbahin sa pagsakdag sa saserdotenhon nga pag-alagad paagi sa paghatag sing ikapulo. Ini tanan ginlakip sa sugo sang Dios tuhoy sa ikapulo. Busa, nagakabagay ini sa kahimtangan sadtong dumaan nga katawhan. Apang nagakabagay bala ini sa kahimtangan sang katawhan karon? Labi pa ka importante, ginasugo bala ang mga Cristiano nga maghatag sing ikapulo?
Pagbalhin sang Sugo
Pila ka tuig sa tapos mabanhaw si Jesus, ang wala masirkunsidar nga mga di-Judiyo nakombertir sa Cristianismo. “Kinahanglan nga sirkunsidahon sila kag tugnan nga magbantay sang kasugoan ni Moises,” siling sang pila ka Judiyong mga Cristiano. (Binuhatan 15:5) Ang iban wala mag-ugyon. Gani ang mga apostoles ni Jesus kag ang iban pa sang eksperiensiado nga mga Cristiano nagtipon sa Jerusalem agod hambalan ang hulusayon. Luyag nila mahibaloan kon ano ang kabubut-on sang Dios. Ginpatuman bala niya sa mga sumulunod ni Cristo ang Kasugoan ni Moises, nga naglakip sang paghatag sing ikapulo? Gin-asoy ang mga eksperiensia nga nagapakita sang pagbalhin sang pagpakig-angot sang Dios sa mga di-Judiyo, kag ginpamatod-an ini gikan sa matagnaon nga Pulong sang Dios. (Binuhatan 15:6-21) Ano ang desisyon?
Ang sinapol naghiusa sa konklusyon. Ang mga Cristiano indi paglulanan sing Kasugoan ni Moises. Apang, may yara pila ka “mga butang nga kinahanglan” nga dapat tumanon. Isa bala sa sini ang paghatag sing ikapulo? Ang inspirado nga desisyon mabasa: “Ginpakamaayo sang balaan nga espiritu kag namon nga indi na kamo paglulanan pa luwas sining mga butang nga kinahanglan, nga maglihi kamo sa mga butang nga ginhalad sa mga diosdios kag sa dugo kag sa nakuga kag sa pagkamakihilawason.” (Binuhatan 15:25, 28, 29) Sing makawiwili, ang sugo sang Dios tuhoy sa paghatag sing ikapulo wala ginlista sa “mga butang nga kinahanglan” para sa mga Cristiano.
Sang ulihi, ginpaathag ni apostol Pablo nga ang Kasugoan nga katipan sang Dios upod sa Israel gindula sang kamatayon ni Jesus. “Ginpanas [sang Dios] ang mando nga sinulat,” siling niya, “kag ginkuha Niya ini paagi sa paglansang sini sa usok sang pag-antos.” (Colosas 2:14) Wala ini nagakahulugan nga ang mga Cristiano wala sing kasugoan. Sa baylo, gin-islan ang kasugoan nga sa karon amo “ang kasugoan ni Cristo.”—Galacia 6:2; Hebreo 7:12.
Si apostol Pablo nagkabuhi nahisanto sa sining nagbalhin nga kasugoan. Bisan nagapangabudlay sing lakas sa pagtukod sing nanuhaytuhay nga mga kongregasyon, wala gid sia magpangayo sing bayad sa porma sang ikapulo. Sa baylo, ginpas-an niya ang iya kaugalingon nga mga gastos paagi sa pag-obra subong manughimo sing tolda sing part-time lamang. (Binuhatan 18:3, 4) Sia nakasiling nga may bug-os nga pagkabunayag: “Ining mga kamut nagpanghikot sa akon mga kinahanglan kag sa ila sang akon mga kaupod.”—Binuhatan 20:34.
Ano, kon amo, ang gabayan sang mga Cristiano sa paghatag? Pila ang dapat ihatag?
Ang Cristianong Paagi sa Paghatag
Si Jesucristo amo ang pinakamaalwan nga tawo nga nabuhi sa duta. Ang iya halimbawa nagpalig-on sa madamo nga mangin maalwan. “Hatag kamo,” siling niya, “kag kamo hatagan. Sukob nga maayo, dinasok, naligoligo, nga nagaawas, ihatag nila sa imo sabak. Kay sa talaksan nga ginataksan ninyo takson kamo liwat.” (Lucas 6:38) May limite bala sa sini? Wala. Ang mga Cristiano ginapalig-on sa paghatag sing maalwan, nga mahimo kapin pa sa ikapulo kon masarangan nila ini.—Lucas 18:22; Binuhatan 20:35.
Sa pihak nga bahin, mahimo nga magaabot sa isa ka Cristiano ang hinali nga galastohan, ayhan bangod sang aksidente ukon balatian. Ang paghatag sing ikapulo sa iya sueldo sa idalom sina nga mga kahimtangan mahimo nga magadingot sa mga katapo sang iya pamilya sing mga kinahanglanon sang kabuhi. Indi ina mangin Cristiano.—Mateo 15:5-9; 1 Timoteo 5:8.
Ang Cristianong paghatag kinabubut-on. Ginabinagbinag sini nga ang tagsa ka indibidual may tuhay nga mga kahimtangan sa kabuhi. “Kon ang pagkahanda yara,” siling sang Biblia, “ginakahamut-an ini suno sa yara sa tawo, indi suno sa wala sa iya.”—2 Corinto 8:12.
Pila, kon amo, ang dapat ihatag mo? Isa ina ka pamangkot nga ikaw dapat ang magsabat. Ang kadalom sang imo tinagipusuon nga apresasyon para sa Dios—indi ang napat-od nga pormula sang paghatag sing ikapulo—amo ang magapamat-od kon pila ang imo ihatag. Subong ginapanugyan sang Biblia: “Maghimo ang tagsa ka tawo suno sa ginpamat-od niya sa iya tagipusuon, indi nga nagaduhaduha ukon ginapilit, kay ang Dios nagahigugma sa manughatag nga malipayon.” (2 Corinto 9:7) Ang paghatag sing ikapulo isa anay ka aman sa Mosaikong Kasugoan nga katipan agod sakdagon ang templo sang Israel kag ang pagkasaserdote. Para sa mga Cristiano karon, wala ini ginsugo kag indi ini kinahanglanon.