Walo ka Dolyar ang Isa ka “Pint”

SA IYA libro nga The Tarnished Door, ginausisa ni John Crewd­son ang tema tuhoy sa balod sang mga imigrante, legal kag dilegal, nga nagabaha sa Estados Unidos, labi na gikan sa Mexico. Sa sini naghatag man sia sing kapawa sa ginahalinan sang pila ka dugo nga nagakadto sa mga banko sang dugo sa E.U.

Ginalaragway niya kon paano nausoy sang Bor­der Pa­trol sang E.U. ang pila sang dilegal nga mga imigrante sa El Paso, Tex­as, paagi sa ila dugo: “Ang una nga ginadulugan para sa ‘patrol sang siudad’ amo ang sentro sang ­blood plas­ma nga malapitlapit sa taytay, isa sang siam ka sentro sa Bagatnan nga El Paso nga nagabakal sing dugo gikan sa mga nagatalabok sa dulunan sang Mex­ico sa $8 ka dolyar ang isa ka pint—ang katumbas sang isa ka adlaw nga suweldo sa Juárez [sa Mex­ico]—dayon ibaligya ini sing $20 sa mga ospital kag sa mga laboratoryo sa pagpanalawsaw. Ang mga sentro nagapasayod sa ila mga bintana nga ang regular nga donor makakita sing tubtob sa $81 kada bulan, kag ang lamang nga ginapangabuhian sang madamo sa Juárez amo ang mga banko sang dugo.

“Si Williams [opisyal sang Bor­der Pa­trol] masami nga makakita sing mga donor nga taga-Juárez nga nagakadto sa sentro sing makaduha kada semana sa sulod sang mga tinuig agod magbaligya sang ila dugo.” Busa wala sing nakahibalo kon ano nga sahi sang dugo ang nagakadto sa mga banko sang dugo.

Para sa mga Cristiano, nga nagatahod sa pagkabalaan sang dugo gikan sa pagtamod sang Dios, ining komersio sa dugo indi mabaton. Ang mga lider sang nahaunang Cristianong kongregasyon nagsulat: “Kay ginpakamaayo sang balaan nga espiritu kag namon nga indi na kamo paglulanan pa luwas sining mga butang nga kinahanglan, nga maglihi kamo . . . sa dugo . . . Kon mahalungon kamo nga maglikaw sa sining mga butang, magaayuhan kamo. Maayong lawas sa inyo!”—Binuhatan 15:28, 29.