“Subong sang Kabituonan sang Langit”

“Pabuaron ko ang imo mga binhi subong sang kabituonan sang langit kag subong sang balas nga yara sa baybayon sang dagat.” (Genesis 22:17) Amo ang ginsaad sang Dios sa patriarka nga si Abraham. Apang, ang isa ka guwa kasan-o lang sang publikasyon nga Bible Review, nagapatuhoy sa isa ka daw problema sa sini nga teksto.

Ang Biblia husto sing sientipiko sa pagpaanggid sang kadamuon sang kabituonan sa langit sa binilyon ka balas sa baybayon. Apang, mahimo nga sang dumaan nga mga tion wala mahibal-i nga binilyon ang kadamuon sang mga bituon. Ang Bible Review nagapaathag: “Indi subong sina kadamo ang bituon nga makita sa langit kon wala sing bulig sa mata. Ang mga astronomo nagasiling nga kon wala sing teleskopyo, mga 2,000 pa 4,000 ka bituon lamang ang makita naton sa isa ka masanag nga kagab-ihon.” Ang The World Book Encyclopedia nagasiling nga “mga 6,000 ka bituon ang masanag nga nagasilak agod makita bisan wala sing teleskopyo.”

Paano, nian, ginapaathag sang isa ang talalupangdon nga pagkasibu sang Biblia sa paghimo sini nga pagpaanggid? Ang isa ka paathag amo nga ang Biblia “inspirado sang Dios.” (2 Timoteo 3:16) Apang, ang artikulo sa Bible Review, nagtinguha sa paglikaw sini nga konklusyon paagi sa pagsiling nga ayhan si Abraham isa ka astronomo! Ining medyo makapakibot nga haumhaom ginsundan sang pamangkot: “May teleskopyo na bala ang mga tawo sadto nga nagpakita sa mga bituon nga indi makita sang mata?” Sa pagsakdag sini nga teoriya, ginsambit sang artikulo ang ebidensia nga may mga kristal nga natukiban sa Nineve kag sa iban pa nga dumaan nga mga duog nga mahimo amo ang gingamit subong primitibo nga mga lente.

Apang, wala sing pamatuod nga gingamit sang mga tawo yadtong mga lente sa pagtan-aw sa mga bituon. Kag bisan pa kon may yara mga teleskopyo sadto, ano ang pamatuod nga si Abraham ukon ang manunulat sang Genesis nakagamit sini? Ang matuod, ang saad sang Dios kay Abraham isa lamang sang madamo nga halimbawa sang sientipiko nga pagkasibu sang Biblia. Mahimo nga wala sing bulig sang teleskopyo nga si manalagna Jeremias nagreport sing kaanggid man sini kasibu nga obserbasyon: ‘Ang kasoldadosan sang langit indi maisip, ukon masukob ang balas sang dagat.’—Jeremias 33:22.

[Ginkuhaan sang Laragway sa pahina 25]

Mga laragway sang NASA