Ang Nahibaluan sang Wala Pa Matawo nga Bata

ANG panalawsaw kasan-o lang nagapamatuod nga ang wala pa matawo nga kiring ginaapektohan indi lamang sang ginakaon sang iloy, sang mga bulong nga ginagamit niya, ukon kon bala nagapanigarilyo sia ukon wala. Mabatian man sang kiring ang ginapamatian sang iloy kag mahimo gid nga naapektohan man.

Sa pag-ilustrar: Ang direktor sang musika sang Hamilton Phil­har­mon­ic Or­ches­tra sa Ontario, Can­ada, nagreport nga sang bata pa sia, ang nanuhaytuhay nga komposisyon sang musika nga iya ginaensayo daw makatilingala nga pamilyar sa iya, bisan pa wala pa niya ini makit-i sang una. Makatilingala nga ang cello nga bahin pirme nga pamilyar sa iya. Ginsugiran niya ang iya iloy, nga isa ka propesyonal nga cellist, nahanungod sini. Sang ginsugiran niya ang iya iloy kon ano nga musikal nga komposisyon ang ginaensayo niya sang mamangkot sia, ang misteryo nalubad. Sang ginabusong sia sang iya iloy, paathag niya, amo gid ini ang mga piesa nga ginaensayo niya!

Karon, suno sa kolumnista sang pamantalaan nga si Erma Bombeck, ang Britaniko nga magasin sa medisina nagareport nahanungod sa problema nga ginatawag sang magasin nga “pagkagiyan sang kiring sa drama.” Ang wala pa matawo nga mga bata nagakagiyan sa mga drama sa TV nga ginapamatian sang ila iloy. “Kuntani nahibaluan ko na ini sang ginabusong ko pa ang akon kabataan,” siling ni Bombeck. “Wala ako nagahalin sa atubangan sang ‘The Waltons,’” isa ka mapuslanon nga programa sa telebisyon sang nagligad nga tinuig. Sia nagdugang: “Indi katingalahan nga may kabataan kita nga luyag nga ang ila dulunggan buhuan sa edad nga 2, naga-date sa edad nga 9 kag nagakuha sang ila kaugalingon nga apartment sa edad nga 13.”