Pahina Dos

“Nagasaylosaylo sila sing lugar nga daw mga gypsy, nagatulog sa mga pipo sang konstruksion, sa madamo sing ilaga nga mga bodega sang mga tinukod nga wala na ginagamit ukon sa mga pamusod sang kalye sa makaluluoy nga mga kahimtangan. Ang ila katre amo ang gingisigisi nga mga pamantalaan, ang ila panapton gurisnay. Ang ila mga adlaw ginahinguyang sa pagpanonto, sa prostitusyon kag sa diutay nga mga krimen. Ginabiktima nila ang isa kag isa sa ila subong man ang mga nagalalabay.” Sin-o sila? Amo ang mga kabataan sa kalye nga nagapuyo sa daku nga siudad sang Latin Amerika, report sang magasin nga Time. Apang mahimo nga sila amo ang wala puluy-an nga pamatan-on sang halos tanan nga daku nga siudad sa kalibutan. Minilyon sila, kag nagadamo pa sila sa wala sing tupong nga kadasigon.