Makahalapay nga Baha sa Australia

HANDURAWA ang baha nga nagtabon sang duog nga subong kadaku sa Gran Britanya, Pransya, kag Alemanya kon tingubon. Ti, amo sina ang natabo sang nagligad nga tuig sa Queensland, Australia. Ang Charleville, isa ka banwa nga malapit sa tunga sang ginbaha nga duog, gin-ibakwit. Tatlo ka libo ka pumuluyo ang nagdayon sa mga tolda sa mataas nga duog sa lokal nga erport. Ang iban ginsalbar gikan sa atop sang mga balay paagi sa helikopter.

Isa ka diutay nga grupo sang 35 ka tawo nga nagapakig-upod sa Charleville Congregation sang mga Saksi ni Jehova ang nagdangop sa isa ka Saksi nga may propiedad nga nahamtang sa mataas nga duog nga 10 kilometros ang kalayuon sa guwa sang banwa. Nangin base ini sang pagpanghikot sa pagbulig sa mga nadulaan sing balay.

Sa gilayon, ang mga Saksi nagsugod sa paghatag sing bulig. Sa Dalby, 550 kilometros ang kalayuon, isa ka grupo sang mga boluntaryo ang ginporma agod magtinlo sang ginbahaan nga mga balay. Sa Roma, 270 kilometros ang kalayuon, nangolekta ang mga Saksi sing mga kalan-on kag iban pa nga emerhensya nga mga suplay, subong sang mga habol kag mga panapton. Sa tapos mausisa paagi sa helikopter ang halit nga nahimo, nagpanong ang mga boluntaryo​—kapin sa isa ka gatos.

Ginlaragway nila ang ginbaha nga duog subong “indi mahanduraw.” Singko sintimetros sang lunang kag balas ang nagtabon sa tanan nga butang. Ang nadugmok nga mga kasangkapan nagalinapta sa sulod sang mga kuwarto, ang mga alpombra naguba, ang de-koryente nga mga aplayanses nalunod, ang mga awto nagbinaliskad. Yara bisan diin ang baho sang napan-os nga kalan-on, sang nahuluman nga mga kahoy, kag sang mga higko.

Nagsugod sa pagpanghikot ang mga boluntaryo. Sang Sabado, Abril 28, isa ka semana lamang sa tapos sang baha, ang mga balay kag mga ugsaran sang mga Saksi sa Charleville matinlo na kag matahom tulukon. Apang, indi lamang pagtinlo ang kinahanglanon. Ginpasag-uli sang grupo sang mga boluntaryo ang koryente sa balay kag ginpangay-o ang mga awto kag ang mga aplayanses sa balay. Ang mga manugbutang sing alpombra nagbutang sing bag-o nga mga alpombra; ang mga manughimo sing kabinet naghimo kag nagtakod sing bag-o nga mga kabinet; ang mga panday, mga manugpintura, kag mga tubero nagpangay-o.

Ang resulta: Duha ka semana sa tapos sang baha, ang tanan nga Saksi nakabalik na sa ila ginkay-o nga mga balay. Apang, indi lamang mga masigka-Saksi ang ginbuligan sang mga boluntaryo. Sang gintinluan sang isa ka grupo ang balay sang isa ka Katoliko, sulitsulit niya nga ginpabutyag ang iya katingala.

Sa Brisbane gindayaw ang mga Saksi sa radyo bangod sang ila ginhimo sa tion sang baha. Kag sa Charleville, madamo nga tawo ang nakibot sa madasig nga paghulag sang mga Saksi. Ang isa ka tawo nga nagapamatok anay sa ila nabatian nga nagsiling: “May kaisog pa kita sa pagtabog sa ila gikan sa aton puwertahan.”