Mga Butang nga Indi Maguba sang Bagyo nga si Andrew

MAY mga bagyo nga mas makahalalit sang sa iban nga mga bagyo.a Ang iban ginakabig subong mabaskog lamang nga madlos, nga nagadala sing mabunok nga ulan kag nagaluka sang mga kahoy. Nian nagbunal si Bagyo Andrew sa bagatnan nga Florida (Agosto 24, 1992) kag sa Louisiana (Agosto 26, 1992), si Bagyo Iniki sa Kaui, Hawaii (Septiembre 12, 1992), kag si Bagyo Omar sa Guam (Agosto 28, 1992).

Binilyon ka dolyar ang bili sang mga ginpangguba sini. Dinosena ka tawo ang napatay sa Florida. Linibo ka pamilya ang nadulaan sing balay. Dalidali nga nagkadto ang mga ahente sang pasiguro sa naguba nga mga balay agod pangitaon ang mga tag-iya kag bayaran sila sing tseke.

Ang report halin sa Relief Committee of Jehovah’s Witnesses sa Fort Lauderdale nagsiling nga 518 sa 1,033 ka balay sang mga Saksi ni Jehova sa rehiyon ang sarang pa makay-o. Sa kabilugan, indi magkubos sa 50 porsiento sang tanan nga balay sa banas ni Andrew ang naguba. Sa tapos sang bagyo, ang mga tag-iya sang mga balay nga mahimo pa istaran nagtinguha sa pagpamala sang ila mga kasangkapan kag mga kurtina kag sa pagsilhig sang mga sagbot halin sa nadugmok nga kisame nga gin-anod sang madamol nga ulan nga naglusot sa nabuslot nga mga atop. Madamo ang daw indi makaagwanta sa pagtulok sa ila naguba nga mga balay. Ayhan ang natam-an gid amo ang mga nagaistar sa indi tanto kalig-on nga mga mobile home ukon mga trailer.

Wala sing Ginlaktawan ang Bagyo nga si Andrew

Ang isa sina nga mag-asawa amo sanday Leonard kag Terry Keiffer. Sang ginduaw nila liwat ang ila komunidad sang mga mobile home sa Siudad sang Florida, dapat nila ipakilala ang ila kaugalingon sa isa ka checkpoint sang militar agod makasulod sa sini nga duog. Ang ila nakita amo ang isa ka komunidad sang mga mobile home nga kon tulukon daw naigo sang ginatos ka bomba​—nga wala sing bisan anong luhobluhob. Ang mga kahoy naluka. Ang pinanid sang naguba nga aluminum, nga amo anay ang mga dingding kag mga atop sang mga balay, nagaburambod sa mga kahoy kag nagakabit sa mga sanga nga daw subong sang makahalam-ot nga mga dekorasyon sang piesta. Ang mga alambre sang koryente nabugto bisan diin, ang kahoy nga mga poste nagkalatumba nga daw subong sang mga palito sang posporo. Ang mga awto nagbinaliskad kag nadugmok.

Si Bob van Dyk, nga ang iya bag-o nga balay gindeklarar nga dibagay istaran, naglaragway sang kahimtangan sa iya balay: “Ang kisame narusmak, kag nagdugmok sang madali madugmok, nagbali sang madali mabali kag nagpahadlok sa amon, nga madali mahadlukan.”

Ang personal nga mga pagkabutang, mga hampanganan, mga bayo, mga retrato, mga libro, nagakinay-ag sa palibot subong masubo nga mga pahanumdom sang nagligad nga estilo sang pagkabuhi. Ang isa ka masubo nga itom nga kuring nagdayandayan sa tunga sang kagulub-an. Nagbalikid ini nga daw nagapamangkutanon sa mag-asawa nga Kieffer. Ang magagmay nga mga tiki nagakinamang sa anay hamili nga mga pagkabutang sang iban nga tawo. Mapanimahuan ang pan-os nga mga pagkaon, nga naula gikan sa naguba nga mga repridyeretor. Makita bisan diin ang masingki nga kagulub-an​—tanan bangod sa madlos, mabaskog nga mga madlos, nga nagahuyab sa kadasigon nga kapin sa 260 kilometros por ora.

Masubo gid ang mga tag-iya kag mga nagailistar sa sining mga balay. Pagligad sang madamo nga tinuig nga nagtukod sila sing pamilya kag nagkabuhi nga mag-ulupod sa ila kaugalingon pinasahi nga mga puluy-an, nagbalik sila pagkatapos sang bagyo kag naabtan nga nadugmok kag nagalinapta ang tanan nga butang. Nasalbar sang mag-asawa nga Keiffer ang pila nila ka butang sa ila una nga pagduaw, apang indi gid sila maributay samtang ginapamaluskay nila ang kagulub-an nga nabilin. Walay sapayan sini nagaapresyar gid sila nga buhi gihapon sila kag makaalagad sa Dios.

Wala sing ginlaktawan ang bagyo nga si Andrew. Ang dalagku nga mga balaligyaan, mga pabrika, dalagku nga mga bodega​—ginsalakay tanan sang kinaugali. Ang mga talaksan sa pagtukod sang maluya nga tawo wala makapasar sa pagtilaw.

Ang Labing Maayo kag Labing Malain sang Tawhanon nga Kinaugali

Nagsugod sa pag-inabot ang bulig sa Florida gikan sa bug-os nga pungsod sang maorganisar ang nanuhaytuhay nga mga ahensia sa pagtabang. Ang Nagadumala nga Hubon sang mga Saksi ni Jehova sa Brooklyn, Nueva York, naghulag gilayon kag nagtangdo sing relief committee ukon komite sa pagtabang agod magpanghikot sa Fort Lauderdale Assembly Hall. Naghatag man sila sing daku nga kantidad sang kuwarta agod ipamakal sing mga materyales, mga pagkaon, kag mga butang nga pang-emerhensia. Subong resulta, ang mga Saksi isa sa una nga nagtabang kag nagsugod sa pagpanawag sing mga boluntaryo. Sa kamatuoran, madamo ang nagkadto bisan pa wala gintawag.

Nag-inabot ang Saksi nga mga manugpangabudlay gikan sa California, North Carolina, Oregon, Washington State, Pennsylvania, Missouri, kag madamo pa nga mga duog. Ang Regional Building Committee sang Virginia nga masami nagapatindog sing mga Kingdom Hall nagpadala sing isa ka grupo sang 18 ka Saksi agod kay-uhon ang mga atop. Naglakbay sila sing 18 ka oras. Ang mga manugtabang nagkuha sing bakasyon ukon leave of absence kag naglakbay sing ginatos kag linibo pa gani ka milya, agod makalab-ot sa ila mga masigka-Saksi nga nasit-an.

Ang isa ka daku gid nga bulig amo ang grupo nga naghalin sa Charleston sang South Carolina. May eksperiensia sila sa Bagyo Hugo sang 1989. Nahibaluan nila kon ano ang paabuton kag sa gilayon nag-organisar sila sing bulig nga mga suplay, lakip ang de-koryente nga mga generator kag mga materyales nga galamiton sa pagpatindog. Sa sulod sang duha ka semana, mga 800 ka balay ang napamala sang mga boluntaryo kag madamo nga mga atop ang ila nakay-o.

Madamo sang di-Saksi nga mga tiayon kag mga kaingod ang nakabenepisyo gikan sa bulig nga gintanyag sang mga Saksi nga manugkay-o. Si Ron Clarke nga taga-West Homestead nagreport: “Nahamuot gid sa sini tanan ang ditumuluo nga mga tiayon. Nakahibi sila kag daw indi makapati sa nahimo para sa ila sang mga Saksi.” Nahanungod sa ditumuluo nga bana sang isa ka Saksi, nagdugang sia: “Daw indi sia makapati​—yadto didto karon ang mga Saksi nga nagatakod sing atop para sa iya.”

Ang isa pa ka Saksi nagsugid tuhoy sa iya di-Saksi nga mga kaingod nga iya ginausisa kada gab-i. OK kuno sila. Sang ikalima nga adlaw, indi na makapugong ang asawa kag naghibi sia. “Wala na kami sing lampin para sa amon bata. Malapit na maubos ang amon pagkaon para sa bata. Wala na kami sing bastante nga pagkaon kag tubig.” Ang bana nagakinahanglan sing lima ka galon sang gasolina apang wala sia sing mabaklan. Sa amo gid gihapon nga adlaw, gindul-ong sang Saksi ang tanan nila nga kinahanglanon gikan sa Kingdom Hall nga sentro sang mga bulig. Ang asawa nakahibi sa pagpasalamat. Ang bana nagdonar para sa hilikuton sa pagbulig.

Importante gid ang ginhimo sang mga gulang kag ministeryal nga mga alagad sang kongregasyon nga nagbuligay sa pag-organisar sing bulig sa nanuhaytuhay nga mga Kingdom Hall nga nakay-o sa nabagyuhan nga duog. Walay kalapyo nga ginpangita nila ang tanan nga mga Saksi kag ginhibalo ang ila mga kinahanglanon. Sa kabaliskaran, ang isa ka opisyal sang Air Force ginbalikwat nga nagsiling nahanungod sa panikasog sa pagbulig sa isa ka duog: “Ang tanan nga hepe luyag mangin mga hepe, apang wala sing bisan sin-o ang luyag mangamot kag aktuwal nga maninlo.”

Ang labing maayo kag labing malain nga mga kinaiya sang tawo nagaguwa sa tion sang mga kalamidad. Ang isa ka halimbawa sang naulihi amo ang pagpangawat. Ang isa ka pamilya sang mga Saksi namat-od nga salbaron man lang ang ila repridyeretor kag makina nga panglaba agod gamiton sa sentro sang bulig sa lokal nga Kingdom Hall. Nagkadto sila sa hall agod kuhaon ang trak. Sa wala pa sila makabalik, ginkawat ining duha ka butang!

Ang isa ka nakasaksi sang natabo nagreport: “Samtang nagalabay kami sa nabagyuhan nga mga kalye, nakita namon ang mga balay nga may paandam batok sa mga kawatan. Ang iban sang mga paandam nagasiling, ‘Ang mga Kawatan Dapat Mapatay’ kag, ‘Tiruhon ang mga Kawatan.’ Ang isa pa gid nagasiling, ‘Duha ka kawatan ang natiro. Ang isa napatay.’ Ang mga balaligyaan kag dalagku nga mga balaligyaan gin-ati.” Suno sa isa ka sarhento sang 82nd Airborne Division, sa dimagkubos isa ka kawatan ang nadakpan kag ginpatay sang mga tawo.

Madamo ang nadakpan. Daw subong bala nga sa bisan diin nga kalamidad ang mga kriminal handa sa pagdagit kaangay sang buwitre nga mga pispis. Kag bisan ang ginatawag nga ordinaryo nga mga tawo nasulay sa pagpangawat. Ang relihion, maayong pamatasan, kag ang moral daw wala sing kusog kon ginasulay sa pagkuha sing mga butang nga wala sing bayad.

Ang Magmata! ginsugiran nga sang primero ginkawat sang naarmasan nga mga kawatan ang wala sing bala nga mga riple sang pila ka soldado. Ang iban nga mga soldado nabatian sa pagsiling nga ginatamod nila ang Kingdom Hall nga sentro sang bulig subong isa ka tuburan sa desyerto “bangod,” siling nila, “wala kamo nagadala sing mga pusil.”

“Indi Manimuko Lamang”

Ano ang natun-an sang mga Saksi ni Jehova gikan sa ila mga naeksperiensiahan sa kinaugali nga kalamidad? Sugdi sa gilayon ang espirituwal nga mga hilikuton. Si Ed Rumsey, isa ka manugtatap sa Homestead, nagsiling sa Magmata! nga ang isa ka doble nga Kingdom Hall handa na para sa mga miting sang Mierkoles pagligad sang bagyo sang Lunes. Ang iban sang mga atop ginlupad, ang mga kisame narusmak, kag nagsulod ang tubig. Madasig nga ginkay-o sang mga boluntaryo ang mga Kingdom Hall agod gamiton sa mga miting kag subong sentro sa pagdumala sang hilikuton sa pagbulig sa ila nabagyuhan nga duog. May mga kusina nga ginpatindog agod lutuan sing pagkaon para sa mga biktima kag sa nagabulig nga mga manugpangabudlay.

Si Fermín Pastrana, isa ka gulang sang Princeton Spanish Congregation, nagreport nga pito ka pamilya sa iya kongregasyon sang 80 ka Saksi ang nadulaan sing balay. Ano nga remedyo ang ginpanugda niya sa iya mga masigka-Saksi? “Mangasubo kamo kon luyag ninyo mangasubo. Apang indi kamo magpanimuko lamang. Mangin aktibo sa pagbulig sa iban, kag, sa kasangkaron nga mahimo, magguwa sa ministeryo. Indi pagwasiha ang aton Cristianong mga miting. Lubara ang sarang malubad, apang indi pagpaligbi ang wala sing solusyon.” Subong resulta, ang mga Saksi wala madugay nga nakita liwat nga nagabantala kag nagadul-ong sing bulig nga pagkaon sa kabalayan. Wala mapalid ni Andrew ang ila kakugi.

‘Maibakwit Na Kami sa Madason nga Tion!’

Si Sharon Castro, 37-anyos nga babayi nga taga-Cutler Ridge nagsugid sang iya sugilanon sa Magmata!: “Namat-od ang akon amay nga indi kami mag-ibakwit. Ginbatyag niya nga sanglit ang nagligad nga bagyo naglikaw sa baybayon sang Florida, amo man ang himuon ni Andrew. Indi niya gani luyag nga tabunan sing playwud ang amon mga bintana. Maayo na lang, naghapit ang akon manghod nga lalaki kag nag-insister sia nga tabunan sing plywud ang mga bintana. Ang iya ginhimo amo gid ang nagluwas sang amon kabuhi. Naguba kuntani ang amon mga bintana, kag mahimo nga nadugmok man kami.

“Sang mga alas 4:30 s.a., napatay ang koryente. Makahaladlok ang gahod sa guwa. Daw subong ini sang daku nga tren. Mabatian ang rinagaak samtang ang mga kahoy kag mga tinukod nagakalabaak kag nagakalabali. Nasapwan namon sang ulihi nga ang makahaladlok nga igot amo gali ang gahod sang malaba nga mga lansang sa amon atop nga naghalalog. Ang alibungan ginlupad, kag ikatlo nga bahin sang atop ang nadala. Ang resulta, kami nga 12, lakip ang akon baldado nga iloy kag ang akon 90-anyos nga lola, nagpasilong sa natung-an nga kuwarto nga wala sing mga bintana. Nagdumdom gid kami nga mapatay na kami.”

Ano nga leksion ang natun-an niya gikan sa eksperiensia? “Sa madason nga tion nga paibakwiton nila kami, maibakwit na kami​—nga wala sing pulupamangkot. Mamati na kami sa mga paandam. Nakatuon man ako sa pagpaambit kag sa pagkabuhi sa diutay lamang. Kag nahibaluan ko nga OK lang ang maghibi, mangasubo, kag dayon batunon ang hangkat sang natabo.”

Mga Reaksion sang Pamantalaan

Bisan ang media nakatalupangod kon daw ano ka organisado ang mga Saksi. Ang Savannah Evening Press may ulong-dinalan nga “Nasapwan sang mga Saksi ni Jehova nga Ginaabiabi Sila sa South Florida,” kag ang The Miami Herald nagbalita: “Ang mga Saksi Nag-atipan sang Ila mga Kaupod​—kag sa Iban.” Nagsiling ini: “Wala sing bisan sin-o sa Homestead ang nagsira sang ila mga puwerta sa mga Saksi ni Jehova sini nga semana​—bisan may mga puwerta pa sila nga masira. Mga 3,000 ka Saksi nga boluntaryo gikan sa iban nga mga estado ang nagtipon sa nabagyuhan nga duog, una agod buligan ang ila mga kaupod, kag dayon ang iban man. . . . Ang bisan ano nga militar nga organisasyon mahimo nga mahisa sa pagkasibu, disiplina kag pagkaepisyente sang mga Saksi.”

Anad na ang mga Saksi sa pag-organisar sing mga operasyon sa pagpakaon sa madamo sa ila mga asambleya kag mga kombension. Dugang pa, nakaorganisar sila sing ginatos ka Regional Building Committee sa bilog nga kalibutan sa pagpatindog sing mga Kingdom Hall kag dalagku nga mga Assembly Hall. Sa amo, nakahanas sila sing mga tawo nga handa sa pagbulig sa pila ka oras lamang nga pahibalo.

Apang, may isa pa ka kabangdanan​—ang ila panimuot. Ang amo gihapon nga report nagpadayon: “Wala sing burukrasya. Wala sing tinikalay. Sa baylo, ang mga nagapangabudlay malipayon gid kag nagabuligay walay sapayan kon daw ano kainit, kahigko ukon kapoy na.” Paano ina ginpaathag? Ang isa ka Saksi nagsabat: “Bangod ini sang kaangtanan sa Dios nga nagapahulag sa amon nga ipakita ang gugma sa iban.” Butang ina nga indi makuha ni Andrew, ang Cristianong gugma sang mga Saksi.​—Juan 13:​34, 35.

Ang isa ka makawiwili nga pagpaanggid amo nga ang mga Saksi daw nakatuon gikan sa mga kahoy. Subong sini ang ginsiling sang isa nga nakasaksi: “Samtang nagalibot ako, natalupangdan ko ang ginatos sang dalagku nga Ficus nga mga kahoy nga naluka kag natumba sa duta. Nangusog sila batok sa madlos bangod sang ila puno, kag malapad apang manabaw ang ila mga gamot. Sa pihak nga bahin, ang kalabanan sang niwangon kag mataas nga puno sang palma nga mga kahoy nagpabilin nga nagatindog. Naghapay sila upod sa madlos, ang iban naubusan sing mga dahon, apang ang kalabanan nagpabilin nga nagatindog gihapon.”

Ang mga Saksi may madalom nga mga gamot sang pagtuo sa Pulong sang Dios kag mapasibusibuon sa ila mga reaksion. Indi ang mga pagkabutang kag mga balay ang labing importante sa ila. Sa dimagkubos buhi sila kag makaalagad gihapon kay Jehova walay sapayan sang kalamidad. Ang kabuhi isa ka butang nga wala makuha sa ila ni Andrew.

Paano Ini Ginahimo?

Ang kompanya sang Anheuser Busch nagdonar sing isa ka trak sang ilimnon nga tubig. Pag-abot sini, ginpamangkot sang drayber ang mga opisyal kon diin niya idul-ong ang tubig. Ginsugiran sia nga ang organisado lamang amo ang mga Saksi. Sa kamatuoran, sa sulod sang isa ka semana sa tapos magbunal si Andrew, mga 70 ka trak sang mga suplay ang nag-abot sa Fort Lauderdale Assembly Hall of Jehovah’s Witnesses.

Ang isa ka boluntaryo didto nagreport: “Gani ginbaton namon ang isa ka trak sang ilimnon nga tubig. Sa gilayon ginlakip namon ini sa iban pa nga mga kalan-on nga ginapadala namon sa nagapanagtag nga mga sentro sa mga Kingdom Hall. Ginpaambit ini sa kauturan kag sa mga kaingod sa sadtong duog nga nagakinahanglan sini.” Ang isa ka kompanya sang papel sa Washington State nagdonar sing 250,000 ka paper plate.

Sang primero, ang mga awtoridad sang siudad nagapadala sing di-Saksi nga mga boluntaryo sa mga Kingdom Hall, nga nagasiling, ‘Sila lamang ang organisado sing nagakaigo.’ Sang ulihi ang militar nagsaylo kag nagsugod sa pagpatindog sing mga sentro sang bulig nga kalan-on kag tubig kag sing mga tolda nga mga siudad.

Ang orihinal nga sentro sang mga Saksi gintukod sang relief committee sa Fort Lauderdale Assembly Hall, nga mga 60 kilometros sa aminhan sang natam-an sang bagyo nga duog sa palibot sang Homestead. Agod mabuhinan ang lulan, gintukod ang isa ka mayor nga sentro sa Plant City Assembly Hall malapit sa Orlando, mga 400 kilometros sa aminhan-katundan sang nabagyuhan nga duog. Ang kalabanan sang bulig nga mga materyales ginadala didto agod bakibakion kag putson. Ginaorder sang komite ang iya mga kinahanglanon gikan sa Plant City kada adlaw, kag dalagku nga mga trak ang nagalakbay sing lima ka oras sa pagdul-ong sini sa Fort Lauderdale.

Nian ining sentro nga estasyon nagasuplay sing pagkaon, mga materyales, tubig, mga generator, kag iban pa nga mga kinahanglanon sa tatlo ka Kingdom Hall nga nakay-o sa sentro sang nabagyuhan nga duog. Didto, ang sangkol nga mga Saksi nag-organisar sing mga grupo sa pagtukod kag sa pagpaninlo agod duawon ang ginatos ka balay nga nagakinahanglan sing igtalupangod. Ang mga kusina kag mga linya sa pagkaon ginbuksan man sa palibot sang Kingdom Hall, kag gin-abiabi ang bisan sin-o nga nagakinahanglan sing bulig. Bisan gani ang pila sang mga soldado nagkaon man kag sang ulihi nakit-an nga nagahulog sing mga donasyon sa kahon-alamutan.

Samtang ang mga lalaki masako sa pagkay-o sang mga balay, ang iban sang mga babayi nagaluto sing mga pagkaon. Ang iban naman nagaduaw sa mga tawo nga masapwan nila agod ipaambit sa ila ang paathag sang Biblia tuhoy sa kinaugali nga mga kalamidad kag sa paghatag man sing kahon sang pagkaon nga bulig sa mga nagakinahanglan sini. Ang isa sini amo si Teresa Pereda. Ang iya balay naguba, kag ang mga bintana sang iya awto nadugmok​—apang ang iya awto puno sing mga kahon sang pagkaon para sa iya mga kaingod. Ang iya bana, si Lazaro, masako sa pagpangabudlay sa isa sang mga Kingdom Hall.​—Manugwali 9:11; Lucas 21:​11, 25.

Para sa madamo sang walay balay, ang dalayunan nasapwan sa mga puluy-an sang mga Saksi nga wala matandog ni Andrew. Ang iban nag-istar sa mga trailer nga ginpahulam ukon gindonar para sa sina nga katuyuan. Ang iban nagsaylo sa tolda nga mga siudad nga gintukod sang militar. Ang iban pa gid nagbiya na sa ila mga balay nga wala na nagalaum nga makay-o pa ini kag naglumon sa mga abyan kag mga paryente sa iban nga mga bahin sang pungsod. Wala sila sing balay ukon trabaho. Wala sing koryente, wala sing tubig, wala sing nagakaigo nga sistema sa pag-atipan sang higko​—gani ginpili nila ang labing maayong solusyon para sa ila.

Ginpabutyag sang isa ka Espanyol nga Saksi ang isa ka leksion nga natun-an sang tanan: “Nagapasalamat gid kami sa leksion nga natun-an namon nahanungod sa aton mga tulumuron sa kabuhi. Kay man, makapangabudlay ikaw sing 15 ukon 20 ka tuig sa pagtukod sang imo puluy-an, nga nagatipon sing materyal nga mga butang, kag nian sa isa ka oras lamang, madula ini tanan. Nagabulig ini sa aton nga kilalahon ang aton mga tulumuron sa espirituwal, nga himuon ang kabuhi nga simple lamang kag hunahunaon gid ang pag-alagad kay Jehova.”

Subong gid ini sang ginsiling ni apostol Pablo: “Ang bisan ano nga sa akon sadto daug, ginbilang ko nga kadulaan tungod kay Cristo. Sa pagkamatuod ginabilang ko ang tanan nga butang subong nga kadulaan bangod sang labaw gid nga kabilyanan sang pagkilala kay Cristo Jesus nga akon Ginuo. Tungod sa iya gin-antos ko ang kadulaan sang tanan nga butang kag ginabilang sila nga mga sagbot, agod nga maagom ko si Cristo.”​—Filipos 3:​7, 8.

Ang kinaugali nga mga kalamidad isa ka bahin sang kabuhi sa aton kalibutan karon. Kon mamati kita sa mga paandam sang mga awtoridad, mahimo nga maluwas man lang naton ang aton kabuhi. Mahimo nga madula ang mga balay kag mga pagkabutang, apang ang kaangtanan sang isa ka Cristiano sa “Dios sang tanan nga paglipay” dapat pabakuron. Bisan pa ang iban mahimo mapatay sa isa ka kalamidad, si Jesus nanaad sing pagkabanhaw para sa ila sa bag-ong kalibutan sang Dios sa isa ka napasag-uli nga duta​—isa ka duta nga indi na liwat makakita sing pag-antos kag kamatayon bangod sang kinaugali nga mga kalamidad.​—2 Corinto 1:​3, 4; Isaias 11:9; Juan 5:​28, 29; Bugna 21:​3, 4.

[Mga footnote]

[Kahon sa pahina 20]

Nakibot Gid

Ang isa ka grupo sang 11 ka puti nga Saksi naglakbay halin sa Tampa, Florida, agod magbulig. Nagdala sila sing mga suplay kag nagsugod sa pagkay-o sang atop sang isa ka itom nga Saksi. Sang mag-abot ang di-Saksi nga hinablos, indi sia makapati sa iya nakita​—nakibot gid sia nga ang isa ka grupo sang puti nga mga Saksi una nag-abot sa iya kag ginakay-o ang balay sang iya tiyo. Nahamuot gid sia nga nagbulig man sia sa pagkay-o.

Nagsiling sia nga sa madason nga tion nga magkadto ang mga Saksi sa iya balay, mangabay sia sing pagtuon sa Biblia. Samtang nagapakighambal sa taga-Tampa nga grupo, nangin maathag nga tagadidto man gali sia. Sa walay pagpalantang ang isa sang mga gulang sa grupo naghimo sing kahimusan para sa pagtuon sa Biblia sa masunod nga semana! Subong sang ginsiling sang isa ka Saksi, nagapamatuod ini nga indi lamang sa mga puwertahan ikaw manuktok agod manaksi​—makapanuktok man ikaw sa mga atop!

[Retrato sa Pahina 15]

Wala sing ginlaktawan ang bagyo nga si Andrew, kag pila lamang ka tinukod ang nakaagwanta

Ang mobile home sang mga Keiffer —kag ang nabilin sa sini

[Retrato sa Pahina 16]

Si Rebecca Pérez, ang iya mga anak nga babayi, kag ang 11 pa nga nakalampuwas sa sining diutay nga duog

Nag-abot ang militar agod punggan ang kinawatay (naibabaw nga tuo); ginkawatan nga mga balaligyaan (tuo)

Ginlalas sang bagyo ang mga atop, kag ginpamaliskad ang mga salakyan

[Retrato sa Pahina 17]

Gin-organisar ang bulig sa mga Kingdom Hall

Ang mga mobile home nagburambod sa mga kahoy; ang mga hampanganan sang bata napabay-an nga nagakinay-ag sa kutson; ang literatura sang Biblia lakip sa mga nagalinapta; ang mga Saksi, subong ni Teresa Pereda, nagdul-ong sing mga suplay sa ila mga kaingod

Gindonar nga mga materyales para sa pagpatindog. Pagpainpain sang mga panapton

[Retrato sa Pahina 18]

Ang mga boluntaryo gikan sa bug-os nga Estados Unidos nagbulig sa hilikuton sa pagbulig