Pamangkot sang mga Pamatan-on . . .

Paano Makabulig sa Akon ang Cristianong mga Miting?

“Sa banta ko ang mga iglesia wala nagabulig sa imo sa pag-uswag sa espirituwal. Buot ko silingon, yara sa isa ka tawo kon bala luyag niya mangin espirituwal ukon indi.”—19-anyos nga si Kevin.

HUSTO si Kevin sa madamo nga butang. Yara matuod sa tagsa ka tawo ang pagpamat-od “kon bala luyag niya mangin espirituwal ukon indi.” Apang sanglit ginabasa mo ining artikulo, mahimo gid nga mas luyag mo mangin espirituwal. Walay sapayan, mahimo indi ka pat-od, kon ano gid ang espirituwal nga tawo ukon paano ikaw mangin subong sini.

Sa simple nga hambal, ang espirituwal nga tawo isa nga nagapasakop sang iya mga panghunahuna, mga opinyon, kag mga buhat sa pagtuytoy sang Labing Mataas nga Dios, nga si Jehova. Ginabinagbinag niya ang iya Manunuga sa iya adlaw-adlaw nga mga desisyon, mga tulumuron, ukon mga ulunahon sa kabuhi. Kon sa aton pa, ang espirituwal nga tawo may huyog sa Dios.

Subong isa ka tin-edyer, mahimo masapwan mo nga “ang kabalaka sa sining sistema sang mga butang” nagaupang sa imo espirituwal nga pagtubo. (Mateo 13:22) Makapaluya man nga dapat ka makig-upod sa bug-os nga adlaw sa imo mga kabutho nga mahimo ‘nahuyog sa paghimo sing malaut sa tanan nga tion.’ (Genesis 6:5) Mahimo pa gani nga ang iban ‘nagayubit kag nagahambal sing malaut,’ ginapabudlayan ka sa pagsentro sang imo painuino sa kon ano ang husto. (Salmo 73:8) Kag kon ang imo mga ginikanan ukon iban pa nga mga katapo sang pamilya lain sing relihion sa imo, mahimo nga diutay lamang, kon may yara gid man, ang ila espirituwal nga pagpalig-on sa imo. Ano ang imo mahimo agod mabatuan ining negatibo nga mga impluwensia kag magtubo sa espirituwal?

Ang isa ka butang nga mahimo mo amo ang regular nga pagtambong sa mga miting sa Kingdom Hall sang mga Saksi ni Jehova. Indi katulad sang serbisyo sa mga simbahan, ang mga miting didto nagapalig-on sa imo nga padayunon ang “diosnon nga debosyon subong imo tulumuron” kag nagabulig sa imo sa pagtubo gikan sa espirituwal nga pagkabata padulong sa espirituwal nga pagkahamtong.​—1 Timoteo 4:​7; Efeso 4:​13, 14.

Mga Miting nga Nagabulig sa Imo sa Pagtuon

Sa kapin sa 63,000 ka kongregasyon sa bug-os nga duta, ginasunod sang mga Saksi ni Jehova ang laygay sang Biblia nga ‘tipunon ang katawhan, ang mga lalaki kag ang mga babayi kag ang mga magamay . . . agod nga magpamati sila kag magtuon sila.’ (Deuteronomio 31:12) Gani madamo ka sing masapwan nga mga pamatan-on kaangay mo sa tunga sang mga Saksi.

Ang mga Saksi ni Jehova sa bug-os nga kalibutan nagaambit sa pareho nga programa sa edukasyon. Ginahuman ini sang lima ka semanal nga mga miting, ang kada isa mga isa ka oras sa kalabaon. Ang lima ka miting amo:

Miting Publiko​—isa ka diskurso sa Biblia nga nagapadaku sang isa ka tema sang Biblia.

Pagtinuon sa Lalantawan​—isa ka maid-id nga pagtuon sang mga panudlo sang Biblia nga ginagamit ang Lalantawan nga magasin, ang panguna nga publikasyon sang mga Saksi ni Jehova.

Teokratikong Eskwelahan sa Ministeryo​—nagatudlo sing mga kalantip sa paghambal para sa Cristianong ministeryo.

Miting sa Serbisyo​—nagapakita sing mga paghinun-anon kag mga pagpasundayag sang epektibo nga mga metodo sa pagtudlo para sa pamalaybalay kag pagtuon sa Biblia nga ministeryo.

Pagtinuon sang Kongregasyon sa Libro​—pamangkot-kag-sabat nga paghinun-anon sang diutay nga mga grupo nga ginagamit ang isa ka bulig sa pagtuon sa Biblia​—sa masami sa pribado nga mga puluy-an.

Ang mga programa sa edukasyon sa sining mga miting makabulig sa imo sa pagtuon “bisan sang madalom nga mga butang sang Dios.” (1 Corinto 2:​10; Hulubaton 2:5) Apang, may iban pa nga mga benepisyo gikan sa pagtambong.

“Subong nga ang Salsalon Nagapatalom sang Salsalon”

“Mahapos mangin Cristiano upod sa iban nga nagaalagad man sa Dios,” siling sang 15-anyos nga si Michelle. “Apang mas mabudlay sa eskwelahan, bangod ang imo mga kabutho may tuhay nga mga talaksan kag mga tulumuron.” Busa, ang isa ka benepisyo sang pagtambong sa mga miting amo ang kahigayunan sa pagpakig-upod sa mga masigkatumuluo.

Ang maalam nga si Hari Solomon nagsiling: “Subong nga ang salsalon nagapatalom sang salsalon, sa amo ang tawo nagapatalom sang kinaalam sang isa.” (Hulubaton 27:​17, The New English Bible) Kon kaisa, ang aton espiritual nga “kinaalam,” kon sayoron, ang aton espirituwal nga ihibalo kag paghangop, dapat bairon. Apang subong nga ang pagpatalom sa isa ka literal nga kutsilyo nagakinahanglan sing kalantip kag sing husto nga mga gamit, gani man dapat ka makig-upod sa husto nga mga tawo, sa ila nga may ikasarang sa “pagpaambit sing espirituwal nga dulot sa imo.”​—Roma 1:11.

Sa Kingdom Hall, masapwan mo ina nga mga tawo, sang nanuhaytuhay nga edad, rasa, kag nasyonalismo. Halangpunon nga mahuyog ka sa imo mga katubotubo. Apang, talupangda ilabi na ang mga nakahinguyang sing madamo nga tinuig sa pag-alagad sing matutom kay Jehova. (Levitico 19:32) Ang ila eksperiensia sa kabuhi upod ang ila madalom nga ihibalo sa Biblia makabulig sa imo sing daku. Paano mo sila makilala? Pamangkuta sila, subong sang, ‘Paano ka nakasulod sa kamatuoran?’ ukon, ‘Kamusta ang pag-alagad sa latagon sang bata pa ikaw?’ Mahimo nga makahatag sila sing pila ka espiriuwal nga mga dulot para sa imo!

Matuod, kon nagapalapit sa iban sa kongregasyon, mahimo nga kaangay sa 12-anyos nga si Craig ang batyagon mo, nga nagsiling: “Nahadlok ako anay magpakighambal sa mga may edad. Nagdumdom ako nga kon makahambal ako sing sayop, laygayan nila ako.” Nahibaluan na karon ni Craig nga ang iya ginbatyag anay indi matuod. “Komportable na ako sa pagpakighambal sa ila karon,” paathag niya. Ngaa indi man manikasog sa pagpakig-upod sa mga hamtong sa espirituwal sa kongregasyon? Magahatag ini sa imo sing dimabilihan nga kahigayunan nga mapanilagan kag mailog ang hamtong nga mga Cristiano.​—2 Tesalonica 3:9.

Isa ka “Dila sang mga Tinudluan”

Ang isa pa ka butang nga palauswagon amo ang imo ikasarang sa pagtudlo. Halimbawa, mapaalinton mo bala sing maathag ang mga kamatuoran sang Biblia? Makuha mo bala ang igtalupangod sang tumalambong? Makahibalo ka bala magbasa nga may balatyagon? Si manalagna Isaias nagsiling: “Ang Soberanong Ginuong Jehova naghatag sa akon sang dila sang mga tinudluan.” (Isaias 50:4) Kag paagi sa paghanas, ikaw man makatigayon sing dila sang mga tinudluan. Ang isa ka miting nga ilabi na nga makabulig sa imo sa sini amo: ang Teokratikong Eskwelahan sa Ministeryo. Nakabuylog ka na bala sa sina nga eskwelahan?

Ang Teokratikong Eskwelahan sa Ministeryo gindesinyo sa pagtudlo sa mga Cristiano sa pagpakighambal sa iban. Wala ini sing latid sa edad, ni kinahanglan ang bawtismo. Apang, dapat makahibalo ka magbasa kag magsulat, aktibo nga nagapakig-upod sa kongregasyon, kag nagakabuhi nahisanto sa Cristianong mga prinsipio. Paano nagapanghikot ining eskwelahan sa ministeryo?

Sa tapos makapalista, itangdo ka sa paghatag sing malip-ot nga pamulongpulong tuhoy sa isa ka ispisipiko nga tema sa Kasulatan. Ihanda ini sing maayo. Halimbawa, ang dugang nga impormasyon tuhoy sa imo tema masami nga makita paagi sa pagpanalawsaw sa mga publikasyon sang Biblia nga ginagamit ang Watch Tower Publications Indexes kag pagbinagbinag sang insiklopedia sang Biblia nga Insight on the Scriptures.a Kon kinahanglan mo ang bulig sa sini, pamangkuta ang imo mga ginikanan ukon ang isa ka eksperiensiado nga Cristiano. Ang pagpanalawsaw nga imo himuon makadugang sing daku sa imo pamulongpulong kag makapadasig sang imo espirituwal nga pagtubo.​—Hulubaton 2:​1-5.

Kon magpamulongpulong ka sa atubangan sang kongregasyon, ang kalipikado nga ministro nga nagadumala sang eskwelahan magapamati sa imo sing maayo. Sa tapos sini, magahatag sia sing nagakaigo nga pagpalig-on kag laygay pasad sa impormasyon nga masapwan sa Theocratic Ministry School Guidebook, isa ka publikasyon nga gindesinyo sa pagbulig sa mga humalambal publiko. Pamatii sing maayo ang laygay. Wala ini ginatuyo sa pagmulay ukon sa pagpakahuya sa imo. Ang mga panugda nga ginatanyag bulig sa imo. Kon ikaw “padayon nga magaukod sa pagbasa sa publiko,” ang imo espirituwal nga pag-uswag “makita sang tanan nga tawo.”​—1 Timoteo 4:​13-15.

‘Dayawa si Jehova Paagi sa Imo mga Bibig’

Ang isa pa ka paagi sa pagtubo sa espirituwal sa Cristianong mga miting amo ang pagboluntaryo sa pagsabat ukon sa pagkomento kon ginapangabay ang tumalambong. Ang abanse nga paghanda amo ang sekreto.b Apang ayhan nabudlayan ka sa pagkomento bisan pa nakahanda ka para sa miting. Sa sina nga mga kaso, mangayo sing bulig kay Jehova. Si Hari David nangamuyo: “O Jehova, kabay nga patikabon mo ang akon mga bibig, agod nga ang akon baba magapahayag sing pagdayaw sa imo.”​—Salmo 51:15.

Dumduma: Ang sabat indi kinahanglan nga malaba ukon masibod agod makapalig-on. Subong sang ginsiling sang 12-anyos nga si Rachel: “Sa baylo nga magkomento sing malaba, ang pagkomento mahimo nga isa lamang ka dinalan.” Sa primero, mahimo nga mabudlayan ka sa pagkomento sa mga miting, kag mahimo nga mangayo ka sing bulig, apang sa ulihi, mabatyagan mo ang subong sa nabatyagan ni Rachel. Sia nagpaathag: “Kon maghatag ka sang imo kaugalingon nga komento, imo gid ina, kag ginapabugal mo ini.” Dugang pa, magatubo ikaw sa espirituwal subong resulta sang imo mga panikasog.

Indi mahapos nga mangin mahunahunaon sa espirituwal sa maiyaiyahon nga kalibutan karon. Apang kon ikaw regular nga nagatambong sa mga miting, maid-id nga nagahanda, nagapakigbahin, kag nagapanikasog sa pagpakig-upod sa mga hamtong, ang Cristianong mga miting makabulig gid sa imo sa pagtubo sa espirituwal.

[Mga footnote]

[Mga piktyur sa pahina 21]

Ang Teokratikong Eskwelahan sa Ministeryo nakahanas sing linibolibo ka pamatan-on agod mangin manunudlo sang Pulong sang Dios