Nagapasalamat Tungod sa Magmata!

DUGANG kag dugang nga bumalasa sining magasin ang nagapasalamat tungod sa kasanagan nga nabaton nila sa tuman kadamo nga topiko. Sa nabagatnan nga Pransya ang mag-asawa nga mga Saksi ni Jehova nakabaton sing masunod nga sulat gikan sa isa ka tawo nga nabilinan nila sing isa ka kopya sang Magmata!

“Mahal nga Ginuo kag Ginang:

“Nahibaluan ko nga ang Dios may iban pa nga butang nga himuon sang sa tumanon ang aton makahalam-ot nga mga paagi sa pagtan-aw sang iya pagpasilabot sa tagsa ka posible nga kahimtangan. Bisan pa indi ako ugyon sa sini gid nga panghunahuna, kombinsido ako nga ang pag-abot ninyo samtang manuglakat ako indi natabuan lamang. May tion ako sadto sa pagbaton sang Agosto 8, 1990 nga guwa sang Magmata! Daw ano kuntani ka daku nga kapaslawan kon nawasi ko ini!

“Ang maalamon nga pag-usisa sa mga serye sang ‘Paggahom sang Tawo Gintimbang sa Timbangan’ nagganyat sang akon interes kag nagpakibot sa akon. Ugyon gid ako sa kon paano ginpresentar ang serye . . . Busa, mahimo bala ako makapangabay sa inyo nga mabaton ko ang masunod nga mga guwa sang Magmata! Indi ko luyag mawasi ang bisan ano sini nga serye.”

Ang mga Saksi ni Jehova isa ka internasyonal nga organisasyon sang kapin sa apat ka milyon ka estudyante sang Biblia nga debotado sa pagbulig sa mga tawo sa paghibalo sing dugang nahanungod sa kalibutan sa palibot nila kag nahanungod sa Pulong sang Dios kag sang katumanan sini. Kon luyag ninyo ang dugang nga impormasyon ukon ang libre nga pagtuon sa Biblia, palihug sulati ang Watch Tower, P.O. Box 2044, 1099 Manila, ukon ang nagakaigo nga direksion nga nalista sa pahina 5.