Kapitulo 42

Ang Bag-ong Langit kag ang Bag-ong Duta

¹ Ining mahimayaon nga palanan-awon padayon nga nagapahayag samtang ginadala sang anghel si Juan pabalik sa ginsuguran sang Isa ka Libo ka Tuig nga Paggahom. Ano ang iya ginalaragway? “Kag nakita ko ang bag-ong langit kag ang bag-ong duta; kay ang nahaunang langit kag ang nahaunang duta nagtaliwan, kag wala na ang dagat.” (Bugna 21:​1) Nakita ang isa ka makabibihag nga talan-awon!

² Mga ginatos ka tuig sa wala pa ang adlaw ni Juan, si Jehova nagsiling kay Isaias: “Kay yari karon, ako nagatuga sing bag-ong mga langit kag bag-ong duta; kag ang una nga mga butang indi na pagdumdumon ukon mag-abot sa painuino.” (Isaias 65:​17; 66:22) Una nga natuman ini nga tagna sang magbalik ang matutom nga mga Judiyo sa Jerusalem sang 537 B.C.E. sa tapos sang ila 70-ka-tuig nga pagkatapok sa Babilonia. Sa sadto nga pagpasag-uli, nagporma sila sing isa ka natinluan nga katilingban, ang “bag-ong duta,” sa idalom sang isa ka bag-ong sistema sang panguluhan, ang “bag-ong mga langit.” Apang, ginpatuhuyan ni apostol Pedro ang dugang pa nga aplikasyon sang tagna, nga nagasiling: “Apang suno sa iya saad nagahulat kita sing bag-ong mga langit kag bag-ong duta diin nagapuyo ang pagkamatarong.” (2 Pedro 3:13) Ginapakita karon ni Juan nga ining saad ginatuman sa tion sang adlaw sang Ginuo. “Ang nahaunang langit kag ang nahaunang duta,” ang organisado nga sistema sang mga butang ni Satanas pati ang balayan sang panguluhan sini nga naimpluwensiahan ni Satanas kag sang iya mga demonyo, magataliwan. Ang magamo nga “dagat” sang malauton, rebelyuso nga katawhan indi na magaluntad. Sa baylo sini mangin amo “ang bag-ong langit kag bag-ong duta”​—isa ka bag-ong dutan-on nga katilingban sa idalom sang bag-ong panguluhan, ang Ginharian sang Dios.​—Ipaanggid ang Bugna 20:11.

³ Si Juan nagapadayon: “Kag nakita ko ang siudad nga balaan, ang Bag-ong Jerusalem, nga nagapanaug halin sa langit gikan sa Dios kag naaman subong sang nobya nga napunihan nga sa iya bana.” (Bugna 21:​2) Ang bag-ong Jerusalem amo ang nobya ni Cristo, nga ginahuman sang hinaplas nga mga Cristiano nga nagapabilin nga matutom tubtob sa kamatayon kag nga ginbanhaw agod mangin mga hari kag mga saserdote upod sa ginhimaya nga si Jesus. (Bugna 3:​12; 20:6) Subong nga ang dutan-on nga Jerusalem nangin amo ang lingkuranan sang panguluhan sa dumaan nga Israel, ang mahimayaon nga Bag-ong Jerusalem kag ang iya Nobyo nagahuman sang panguluhan sang bag-ong sistema sang mga butang. Amo ini ang bag-ong langit. Ang ‘nobya nga nagapanaug halin sa langit,’ indi literal, kundi sa kahulugan nga ginapatuhoy sini ang iya igtalupangod sa duta. Ang nobya sang Kordero mangin amo ang iya matutom nga kabulig sa pagpalakat sang matarong nga panguluhan sa ibabaw sang tanan nga katawhan. Isa ka pagpakamaayo sa pagkamatuod para sa bag-ong duta!

⁴ Ginasugiran kita ni Juan sing dugang pa: “Kag nabatian ko ang mabaskog nga tingog gikan sa trono nga nagasiling: ‘Yari karon! Ang kayangkayang sang Dios upod sa mga tawo, kag magapuyo sia kaupod nila, kag sila mangin iya katawhan. Kag ang Dios gid magaupod sa ila.’ ” (Bugna 21:3) Sang maghimo si Jehova sing Kasuguan nga katipan upod sa bag-o pa lang nga pungsod sang Israel sadto, sia nanaad: “Kag ipahamtang ko ang akon tabernakulo sa tunga ninyo, kag ang akon kalag indi magkangil-ad sa inyo. Kag magalakat ako sa tunga ninyo kag mangin inyo Dios, kag kamo mangin akon katawhan.” (Levitico 26:​11, 12) Nagahimo man karon si Jehova sing kaanggid nga saad sa matutom nga mga tawo. Sa tion sang isa ka libo ka tuig nga Adlaw sang Paghukom, sila mangin pinasahi gid nga katawhan para sa iya.

⁵ Sa tion sang Isa ka Libo ka Tuig nga Paggahom, si Jehova “magapuyo” sa tunga sang katawhan sa isa ka temporaryo nga kahimusan, kag ginatiglawas sia sang iya harianon nga Anak, si Jesucristo. Apang, sa katapusan sang Isa ka Libo ka Tuig nga Paggahom, kon itugyan na ni Jesus ang Ginharian sa iya Amay, indi kinahanglan ang harianon nga tiglawas ukon manugpatunga. Si Jehova magapuyo sa espirituwal nga paagi upod sa “iya katawhan” sa permanente kag direkta nga paagi. (Ipaanggid ang Juan 4:​23, 24.) Daw ano ka mataas nga pribilehiyo para sa napasag-uli nga katawhan!

⁶ Si Juan nagapadayon sa pagsiling: “Kag pahiran niya ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa, kay ang nahaunang mga butang nagtaliwan.” (Bugna 21:​4) Sa liwat, ginapahanumdom kita sang nauna nga inspirado nga mga saad. Ginpaabot man ni Isaias ang tion nga ang kamatayon kag ang paglalaw madula na kag ang kasubo buslan sang paghugyaw. (Isaias 25:​8; 35:​10; 51:​11; 65:19) Ginapalig-on karon ni Juan nga ining mga saad may dalayawon nga katumanan sa tion sang isa ka libo ka tuig nga Adlaw sang Paghukom. Una anay ang dakung kadam-an magaagom sing mga pagpakamaayo. “Ang Kordero, nga yara sa tunga sang trono,” nga nagapadayon sa pagbantay sa ila, “magatuytoy sa ila sa mga tuburan sang tubig nga nagahatag sing kabuhi. Kag ang Dios magapahid sang tagsa ka luha sa ila mga mata.” (Bugna 7:​9, 17) Apang sa ulihi ang tanan nga banhawon kag magatuo sa mga aman ni Jehova mangin didto upod sa ila, nga nagakalipay sa paraiso sa espirituwal kag pisikal nga paagi.

⁷ “Sa sina nga tion,” siling ni Isaias, “ang mga mata sang mga bulag pamuklaton, kag ang mga igdulungog sang mga bungol mabuksan.” Huo, “sa sina nga tion ang piang magalumpat subong sang usa, kag ang dila sang apa magaamba sa kalipay.” (Isaias 35:​5, 6) Sa sina man nga tion, “magapatindog sila sing mga balay kag puy-an sila; kag magatanom sila sing mga ulubasan kag magakaon sang bunga nila. Indi sila magpatindog kag iban ang magapuyo; indi sila magtanom kag iban ang magakaon. Kay subong sang mga adlaw sang kahoy mangin amo ang mga adlaw sang akon katawhan; kag ang akon mga pinili magakalipay sing malawig sa binuhatan sang ila mga kamot.” (Isaias 65:​21, 22) Gani indi sila paggabuton gikan sa duta.

⁸ Daw ano ka makatilingala nga mga silak sang palaabuton ang nagapuno sang aton hunahuna samtang nagapamalandong kita sa sining mga saad! Makatilingala nga mga aman ang ginatigana para sa matutom nga katawhan sa idalom sang mahigugmaon nga panguluhan sang langit. Tuman bala kaayo ina nga mga saad agod magmatuod? Mga damgo lamang bala ini sang isa ka tigulang nga tawo nga gintapok sa isla sang Patmos? Si Jehova mismo nagasabat: “Kag ang Isa nga nagalingkod sa trono nagsiling: ‘Yari karon! Ginahimo ko nga bag-o ang tanan nga butang.’ Nagsiling man sia: ‘Isulat ini, kay ining mga pulong matutom kag matuod.’ Kag nagsiling sia sa akon: ‘Natuman sila! Ako ang Alpha kag ang Omega, ang ginsuguran kag ang katapusan.’ ”​—Bugna 21:​5, 6a.

⁹ Daw subong bala nga si Jehova nagpirma para sa matutom nga katawhan sing isa ka garantiya, ukon titulo sang pagpanag-iya, sa sining palaabuton nga mga pagpakamaayo. Sin-o ang mangahas sa pagduhaduha sina nga Garantisador? Ti, sigurado gid ining mga saad ni Jehova sa bagay nga nagahambal sia nga subong natuman na ini: “Natuman sila!” Indi bala si Jehova amo “ang Alpha kag ang Omega . . . , ang Isa nga amo karon kag amo anay kag amo ang magakari, ang Labing Gamhanan”? (Bugna 1:8) Sa pagkamatuod amo sia! Sia mismo nagsiling: “Ako ang nahauna kag ako ang katapusan, kag luwas sa akon wala sing Dios.” (Isaias 44:6) Subong amo sini, makainspirar sia sing mga tagna kag makatuman sini sa tagsa ka detalye. Daw ano ka makapalig-on sang pagtuo! Gani nagasaad sia: “Yari karon! Ginahimo ko nga bag-o ang tanan nga butang”! Sa baylo nga duhaduhaan kon bala ining mga kalatingalahan mahanabo gid, dapat kita magpalibog: ‘Ano ang akon personal nga ginahimo agod mapanubli ko ini nga mga pagpakamaayo?’

“Tubig” Para sa mga Ginauhaw

¹⁰ Si Jehova mismo ang nagasiling: “Ang ginauhaw paimnon ko nga wala sing bayad sa tuburan sang tubig sang kabuhi.” (Bugna 21:​6b) Agod mabulong ina nga kauhaw, dapat mangin mahunahunaon ang isa ka tawo sang iya espirituwal nga kinahanglanon kag mangin handa sa pagbaton sang “tubig” nga ginaaman ni Jehova. (Isaias 55:​1; Mateo 5:3) Ano nga “tubig”? Ginsabat ni Jesus mismo ina nga pamangkot sang nagapanaksi sia sa isa ka babayi sa tupad sang bubon sa Samaria. Ginsingganan niya sia: “Ang bisan sin-o nga nagainum sang tubig nga akon ihatag sa iya indi na gid pag-uhawon, kundi ang tubig nga akon ihatag sa iya mangin tuburan sa sulod niya nga nagaibwal sa kabuhi nga wala sing katapusan.” Ina nga “tuburan sang tubig sang kabuhi” nagailig gikan sa Dios paagi kay Cristo subong aman niya sa pagpasag-uli sa katawhan sa himpit nga kabuhi. Kaangay sang Samaritana, dapat gid kita malangkag sa pag-inum gikan sa sina nga tuburan! Kag kaangay sadto nga babayi, dapat gid kita mangin handa nga talikdan ang kalibutanon nga mga interes agod isugid sa iban ang maayong balita!​—Juan 4:​14, 15, 28, 29.

Ang mga Magadaug

¹¹ Ang mga magainum sa sinang makapabugnaw nga “tubig” dapat man magdaug, subong amo ang padayon nga ginsiling ni Jehova: “Ang nagadaug magapanubli sini, kag ako mangin iya Dios kag sia mangin akon anak.” (Bugna 21:​7) Ini nga saad kaanggid sa mga tagna nga masapwan sa mga mensahe sa pito ka kongregasyon; busa, ining mga pulong mahimo gid nga naaplikar una sa tanan sa hinaplas nga mga disipulo. (Bugna 2:​7, 11, 17, 26-28; 3:​5, 12, 21) Ang espirituwal nga kauturan ni Cristo sa bug-os nga mga dag-on malangkagon nga nagpaabot sang pribilehiyo nga mangin bahin sang Bag-ong Jerusalem. Kon magdaug sila, subong nga si Jesus nagdaug, matuman ang ila ginalauman.​—Juan 16:33.

¹² Ginapaabot man sang dakung kadam-an gikan sa tanan nga pungsod ini nga saad. Dapat man sila magdaug, nga nagaalagad sing matutom sa Dios tubtob nga magguwa sila sa dakung kapipit-an. Nian magasulod sila sa ila dutan-on nga panublion, ‘ang ginharian nga gin-aman para sa ila kutob pa sa pagtukod sang kalibutan.’ (Mateo 25:34) Ini sila kag ang iban pa sang dutan-on nga mga karnero sang Ginuo nga makapasar sa pagtilaw sa katapusan sang isa ka libo ka tuig ginatawag nga “mga balaan.” (Bugna 20:9) Magatigayon sila sing balaan kag mahigugmaon nga kaangtanan upod sa ila Manunuga, si Jehova nga Dios, subong mga katapo sang iya bug-os uniberso nga organisasyon.​—Isaias 66:​22; Juan 20:​31; Roma 8:21.

¹³ Ginalauman ining daku nga palaabuton, importante gid nga ang mga Saksi ni Jehova karon magpabilin nga matinlo gikan sa makadagta nga mga butang sang kalibutan ni Satanas! Dapat kita mangin malig-on, mabakod, kag determinado agod indi kita maguyod sang Yawa upod sa sahi sang mga tawo nga ginalaragway diri ni Jehova mismo: “Apang sa mga matalaw, ang dimatinuuhon, ang nadagtaan, sa mga manugpatay, mga makihilawason, mga manugbabaylan, mga diwatahan, kag ang tanan nga butigon, ang ila bahin mangin sa linaw nga nagadabdab sing kalayo kag asupre, nga amo ang ikaduha nga kamatayon.” (Bugna 21:​8) Huo, dapat likawan sang manunubli ang mga buhat nga naghigko sining daan nga sistema sang mga butang. Dapat sia magdaug paagi sa pagpabilin nga matutom sa atubangan sang tanan nga pag-ipit kag mga pagsulay.​—Roma 8:​35-39.

¹⁴ Ang Cristiandad, bisan pa nagapangangkon sia nga nobya ni Cristo, ginapakilala sang makangilil-ad nga mga buhat nga ginalaragway diri ni Juan. Gani magakadto sia sa dayon nga kalaglagan upod sa nabilin nga bahin sang Babilonia nga Daku. (Bugna 18:​8, 21) Subong man, ang bisan sin-o sa hinaplas ukon sang dakung kadam-an nga magahimo sina nga kalautan, ukon magsugod sa pagpalig-on sini, nagaatubang sing kalaglagan nga wala sing katapusan. Kon magpadayon sila sa sini nga buhat, indi nila mapanubli ang mga saad. Kag sa bag-ong duta, ang bisan sin-o nga magtinguha sa pagpakilala sina nga mga buhat pagalaglagon sa gilayon, kag magakadto sa ikaduha nga kamatayon nga wala sing paglaum nga banhawon.​—Isaias 65:20.

¹⁵ Talalupangdon subong mga mandadaug amo ang Kordero, si Jesucristo, kag ang iya nobya nga 144,000, ang Bag-ong Jerusalem. Daw ano ka nagakaigo, nian, nga ang Bugna dapat dalhon sa daku nga talipuspusan paagi sa hingapusan, wala sing tupong nga danyag sang Bag-ong Jerusalem! Ginalaragway karon ni Juan ang katapusan nga palanan-awon.

[Mga Pamangkot sa Pagtinuon]

1. Ano ang ginalaragway ni Juan sang gindala sia sang anghel pabalik sa ginsuguran sang Isa ka Libo ka Tuig nga Paggahom?

2. (a) Paano ang tagna ni Isaias nahanungod sa bag-ong langit kag bag-ong duta natuman sa ginpasag-uli nga mga Judiyo sang 537 B.C.E.? (b) Paano naton nahibaluan nga may dugang pa nga aplikasyon ang tagna ni Isaias, kag paano ginatuman ining saad?

3. (a) Ano ang ginlaragway ni Juan, kag ano ang Bag-ong Jerusalem? (b) Paano ang Bag-ong Jerusalem ‘nagapanaug halin sa langit’?

4. Ano nga saad ang ginhatag sang Dios nga kaanggid sa iya ginsaad sa bag-o maporma sadto nga pungsod sang Israel?

5. (a) Paano ang Dios magapuyo upod sa katawhan sa tion sang Isa ka Libo ka Tuig nga Paggahom? (b) Paano ang Dios magapuyo upod sa katawhan sa tapos sang Isa ka Libo ka Tuig nga Paggahom?

6, 7. (a) Anong daku nga mga saad ang ginapahayag ni Juan, kag sin-o ang magaagom sining mga pagpakamaayo? (b) Paano ginalaragway ni Isaias ang paraiso nga espirituwal kag pisikal?

8. Ano ang ginasiling ni Jehova mismo tuhoy sa pagkamasaligan sining daku nga mga saad?

9. Ngaa ining palaabuton nga mga pagpakamaayo sarang matamod subong sigurado na nga matuman?

10. Ano nga “tubig” ang ginatanyag ni Jehova, kag ano ang ginalaragway sini?

11. Ano nga saad ang ginahatag ni Jehova, kag sa kay sin-o una nga naaplikar ining mga pulong?

12. Paano ang saad ni Jehova sa Bugna 21:7 matuman sa dakung kadam-an?

13, 14. Agod mapanubli ang dakung mga saad sang Dios, dapat determinado kita nga likawan ang anong mga buhat, kag ngaa?

15. Sin-o ang talalupangdon nga mga mandadaug, kag paagi sa anong palanan-awon nga ang Bugna ginadala sa isa ka daku nga talipuspusan?

Kapitulo 43

Ang Masanag nga Siudad

Palanan-awon 16—Bugna 21:​9–​22:​5

Tema: Ang paglaragway sa Bag-ong Jerusalem

Tion sang katumanan: Sa tapos sang dakung kapipit-an kag sang pagtagbong kay Satanas sa kadadalman

¹ Gindala sang anghel si Juan sa kahanayakan agod ipakita sa iya ang Babilonia nga Daku. Gindala karon sang isa sang amo gihapon nga grupo sang mga anghel si Juan sa isa ka mataas nga bukid. Daw ano nga pagkatuhay ang iya nakita! Ang yari diri indi ang dimatinlo, imoral nga siudad kaangay sang Babiloniko nga makihilawason, kundi ang Bag-ong Jerusalem​—putli, espirituwal, balaan—​kag nagapanaug ini halin sa langit.​—Bugna 17:​1, 5.

² Bisan ang dutan-on nga Jerusalem wala makatigayon sing subong sini nga himaya. Ginasugiran kita ni Juan: “Nian nag-abot ang isa sang pito ka anghel nga may pito ka yahong nga puno sing pito ka katapusan nga kalalat-an, kag nagpakighambal sia sa akon nga nagasiling: ‘Kari ka, ipakita ko sa imo ang nobya, ang asawa sang Kordero.’ Gani gindala niya ako sa gahom sang espiritu sa isa ka daku kag mataas nga bukid, kag ginpakita sa akon ang balaan nga siudad sang Jerusalem nga nagapanaug halin sa langit gikan sa Dios kag may himaya sang Dios.” (Bugna 21:​9-11a) Gikan sa mataas nga bahin sadtong mataas nga bukid, gin-usisa ni Juan ang matahom nga siudad sa bug-os nga matahom nga detalye sini. Ang mga tawo sang pagtuo nalangkag sa pag-abot sini kutob sang mahulog ang katawhan sa sala kag kamatayon. Sa katapusan nag-abot na ini! (Roma 8:​19; 1 Corinto 15:​22, 23; Hebreo 11:​39, 40) Amo ini ang matahom nga espirituwal nga siudad, nga ginahuman sang 144,000 ka matutom nga mga manughupot sing integridad, masanag sa pagkabalaan sini kag nagapabanaag sang himaya gid ni Jehova. Amo ini ang daku nga talipuspusan sang Bugna!

³ Ang Bag-ong Jerusalem makahalawathawat sa iya katahom: “Ang iya kapawa kaangay sa malahalon gid nga bato, nga daw haspe nga matin-aw subong sang kristal. Ini may daku kag mataas nga pader kag may napulog-duha ka gawang, kag sa mga gawang may napulog-duha ka anghel, kag sa gawang nasulat ang mga ngalan sang napulog-duha ka tribo sang mga anak sang Israel. Sa sidlangan may tatlo ka gawang, sa aminhan tatlo ka gawang, sa bagatnan tatlo ka gawang, kag sa katundan tatlo ka gawang. Kag ang pader sang siudad may napulog-duha ka sadsaran, kag sa ila ang napulog-duha ka ngalan sang napulog-duha ka apostoles sang Kordero.” (Bugna 21:​11b-14) Daw ano ka nagakaigo nga ang una nga impresyon nga ginrekord ni Juan amo ang nagainggat nga kasanag! Masanag subong isa ka bag-o nga nobya, ang Bag-ong Jerusalem isa ka nagakaigo nga tiayon para kay Cristo. Nagainggat gid ini, subong amo ang nagakaigo para sa isa ka tinuga sang “Amay sang langitnon nga mga kapawa.”​—Santiago 1:17.

⁴ Sa 12 ka gawang sini, nasulat ang mga ngalan sang 12 ka tribo sang Israel. Busa, ining simbuliko nga siudad ginahuman sang 144,000, nga ginpat-inan “gikan sa tagsa ka tribo sang mga anak sang Israel.” (Bugna 7:​4-8) Nahisanto sa sini, sa sadsaran nga mga bato yara ang mga ngalan sang 12 ka apostoles sang Kordero. Huo, ang Bag-ong Jerusalem indi ang undanon nga pungsod sang Israel nga napasad sa 12 ka mga anak ni Jacob. Amo ini ang espirituwal nga Israel, nga napasad sa “mga apostoles kag sa mga manalagna.”​—Efeso 2:20.

⁵ Ang simbuliko nga siudad may daku nga pader. Sang dumaan nga panahon, ang mga pader sang siudad ginapatindog subong kalig-unan batok sa mga kaaway. Ang “daku kag mataas nga pader” sang Bag-ong Jerusalem nagapakita nga sia may kalig-unan sa espirituwal. Wala sing kaaway sang pagkamatarong, wala sing isa nga dimatinlo ukon dibunayag, ang makasulod. (Bugna 21:27) Apang para sa mga pasudlon, ang pagsulod sa sining matahom nga siudad kaangay sa pagsulod sa Paraiso. (Bugna 2:7) Sa tapos gintabog si Adan, may mga querubin nga ginpabantay sa orihinal nga Paraiso agod indi makasulod ang dimatinlo nga mga tawo. (Genesis 3:24) Sing kaanggid, may mga anghel sa tagsa ka alagyan sang balaan nga siudad nga Jerusalem agod mapasalig ang espirituwal nga kalig-unan sang siudad. Sa pagkamatuod, sa bug-os nga katapusan nga mga adlaw, ginabantayan sang mga anghel ang kongregasyon sang hinaplas nga mga Cristiano, nga nangin amo ang Bag-ong Jerusalem, batok sa Babiloniko nga higko.​—Mateo 13:41.

Pagtakus sa Siudad

⁶ Ginpadayon ni Juan ang iya pagsaysay: “Kag ang nagpakighambal sa akon may inugtakus nga tabun-ak nga bulawan, agod takson niya ang siudad kag ang mga gawang kag ang mga pader sini. Kag ang siudad kuwadrado, pareho ang kalabaon kag ang kasangkaron. Kag gintakus niya sang tabun-ak ang siudad, napulog-duha ka libo ka estadio; kag pareho man sini ang iya kasangkaron kag ang kataason. Gintakus man niya ang pader sini, isa ka gatos kag kap-atan kag apat ka maniko, suno sa takus sang tawo, nga amo man ang takus sang anghel.” (Bugna 21:​15-17) Sang matakus ang santuaryo sang templo, gingarantiyahan sini ang katumanan sang mga katuyuan ni Jehova tuhoy sa sini. (Bugna 11:1) Karon, ang pagtakus sang anghel sa Bag-ong Jerusalem nagapakita nga ang mga katuyuan ni Jehova indi gid mabalhin kon tuhoy sa sining mahimayaon nga siudad.a

⁷ Daw ano ka talalupangdon nga siudad ini! Isa ka himpit nga kubiko nga may takus nga 12,000 ka estadio (mga 2,220 km) sa palibot, kag ginalibutan sing pader nga 144 kubiko, ukon 64 metros, sa kataason. Wala sing literal nga siudad nga subong sina kadaku. Magakobre ini sang teritoryo nga mga 14 ka beses ang kadakuon sa modernong Israel, kag magataas ini sing halos 650 kilometros sa kahawaan! Ang Bugna ginhatag paagi sa mga tanda. Gani, ano ang ginasugid sa aton sining mga takus nahanungod sa langitnon nga Bag-ong Jerusalem?

⁸ Ang 144-kubiko-kataas nga mga pader nagapahanumdom sa aton nga ang siudad ginahuman sang 144,000 ka gin-adoptar sa espirituwal nga mga anak sang Dios. Ang numero nga 12 nga makita sa 12,000-estadio nga takus sang siudad​—nga palareho ang kalabaon, kasangkaron, kag kataason—​malaragwayon nga ginagamit sa organisasyonal nga mga kahimusan sa tagna sang Biblia. Busa, ang Bag-ong Jerusalem isa ka maayo gid nga organisasyonal nga kahimusan sa pagtuman sang dayon nga katuyuan sang Dios. Ang Bag-ong Jerusalem, upod si Hari Jesucristo, amo ang Ginharian nga organisasyon ni Jehova. Nian yara man ang korte sang siudad: isa ka himpit nga kubiko. Sa templo ni Solomon, ang Labing Balaan, nga nagaunod sang simbuliko nga representasyon sang presensia ni Jehova, isa ka himpit nga kubiko. (1 Hari 6:​19, 20) Daw ano ka nagakaigo, nian, nga ang Bag-ong Jerusalem, nga ginaiwagan sang himaya ni Jehova mismo, makita subong isa ka himpit kag daku nga kubiko! Ang tanan nga takus sini nabalanse sing himpit. Isa ini ka siudad nga wala sing diperensya ukon depekto.​—Bugna 21:22.

Malahalon nga mga Materyales sa Pagpatindog

⁹ Ginpadayon ni Juan ang iya paglaragway: “Ang pader haspe, kag ang siudad puraw nga bulawan nga pareho katin-aw sang kristal. Ang mga sadsaran sang pader sang siudad napunihan sang tagsa ka sahi sang malahalon nga bato: ang nahauna haspe, ang ikaduha sapiro, ang ikatlo kalsedonia, ang ikap-at esmeralda, ang ikalima sardonika, ang ikan-um kornalina, ang ikapito krisolito, ang ikawalo berilo, ang ikasiam topasio, ang ikanapulo krisopraso, ang ikanapulog-isa hasinto, ang ikanapulog-duha amatista. Kag ang napulog-duha ka gawang mga napulog-duha ka perlas, ang tagsa sang mga gawang isa ka perlas. Kag ang dalan sang siudad puraw nga bulawan, matin-aw pareho sang kristal.”​—Bugna 21:​18-21.

¹⁰ Ang pagkahuman sang siudad masanag gid. Sa baylo sang kinaandan nga dutan-on nga mga materyales sa pagpatindog subong sang lunang ukon bato, nabasa naton ang haspe, putli nga bulawan, kag “tagsa ka sahi sang malahalon nga bato.” Daw ano ka nagakaigo nga nagalaragway ini sang langitnon nga mga materyales sa pagpatindog! Wala na sing matahom pa sa sini. Ang dumaan nga kaban sang katipan nabalawan sing puraw nga bulawan, kag sa Biblia ini nga elemento masami nga nagalaragway sang mga butang nga maayo kag mapuslanon. (Exodo 25:​11; Hulubaton 25:​11; Isaias 60:​6, 17) Apang ang bug-os nga Bag-ong Jerusalem, kag bisan ang malapad nga dalan sini, nahuman sang “puraw nga bulawan pareho sa matin-aw nga kristal,” nga nagalaragway sang katahom kag duna nga bili nga indi mahanduraw.

¹¹ Wala sing tawhanon nga platero ang makahimo sing bulawan nga subong sina kapuraw. Apang si Jehova amo ang Batid nga Manug-ulay. Nagalingkod sia “subong manug-ulay kag manugpapuraw sang pilak,” kag ginapapuraw niya ang indibiduwal, matutom nga mga katapo sang espirituwal nga Israel “kaangay sang bulawan kag kaangay sang pilak,” ginakuha gikan sa ila ang tanan nga higko. Ang mga indibiduwal lamang nga ginpapuraw kag gintinluan ang magahuman sa ulihi sa Bag-ong Jerusalem, kag sa sining paagi ginapatindog ni Jehova ang siudad paagi sa buhi nga mga materyales nga nagainggat sa pinakamataas nga sahi sang espirituwal nga kaputli.​—Malaquias 3:​3, 4.

¹² Bisan ang mga sadsaran sang siudad matahom, kay napunihan ini sang 12 ka malahalon nga mga bato. Ginapahanumdom sini ang Judiyong mataas nga saserdote sang dumaan nga panahon, nga sa tion sang seremonyal nga mga adlaw nagasuksok sia sing ephod nga napunihan sing 12 ka nanuhaytuhay nga malahalon nga bato nga daw kaanggid sa mga ginlaragway diri. (Exodo 28:​15-21) Sa pagkamatuod indi gid ini natabuan lamang! Sa baylo, ginapadaku sini ang saserdotenhon nga katungdanan sang Bag-ong Jerusalem, nga sa sini si Jesus, ang dakung Mataas nga Saserdote, amo ang “kapawa.” (Bugna 20:​6; 21:​23; Hebreo 8:1) Subong man, ang mga benepisyo sang pag-alagad ni Jesus subong mataas nga saserdote ipadala sa katawhan paagi sa Bag-ong Jerusalem. (Bugna 22:​1, 2) Ang 12 ka gawang sang siudad, nga ang tagsa isa ka perlas nga matahom gid, nagapahanumdom sang ilustrasyon ni Jesus nga nagpaanggid sang Ginharian sa isa ka perlas nga may daku nga bili. Ang tanan nga magasulod sa sining mga gawang nagpakita sing matuod nga apresasyon sa espirituwal nga mga butang.​—Mateo 13:​45, 46; ipaanggid ang Job 28:​12, 17, 18.

Isa ka Siudad sang Kapawa

¹³ Sang tion ni Solomon, nagapangibabaw sa Jerusalem ang templo nga ginpatindog sa pinakamataas nga duog sang siudad sa Bukid Moria sa aminhan. Apang kumusta ang Bag-ong Jerusalem? Si Juan nagasiling: “Kag wala ako sing nakita nga templo sa sulod sini, kay si Jehova nga Dios nga Labing Gamhanan amo ang templo sini, subong man ang Kordero. Kag ang siudad wala nagakinahanglan sing adlaw ukon sang bulan nga magsilak sa sini, kay ang himaya sang Dios amo ang nagaiwag sini, kag ang suga sini amo ang Kordero.” (Bugna 21:​22, 23) Sa kamatuoran, indi na kinahanglan nga magtukod sing literal nga templo diri. Ang dumaan nga templo sang mga Judiyo isa lamang ka sulundan, kag ang katunayan sadto nga sulundan, ang dakung espirituwal nga templo, nagluntad sugod sang ginhaplas ni Jehova si Jesus subong Mataas nga Saserdote sang 29 C.E. (Mateo 3:​16, 17; Hebreo 9:​11, 12, 23, 24) Ang templo nagapahangop man sing saserdotenhon nga klase nga nagahalad sing mga halad kay Jehova para sa katawhan. Apang tanan nga bahin sang Bag-ong Jerusalem mga saserdote. (Bugna 20:6) Kag ang dakung halad, ang himpit nga tawhanon nga kabuhi ni Jesus, ginhalad sing makaisa. (Hebreo 9:​27, 28) Dugang pa, si Jehova personal nga mapalapitan sang bisan sin-o nga nagakabuhi sa siudad.

¹⁴ Sang maglabay ang himaya ni Jehova kay Moises sa Bukid Sinai, ginpasilak sini ang nawong ni Moises sing tuman kasanag sa bagay nga gintabunan niya ini gikan sa iya mga masigka-Israelinhon. (Exodo 34:​4-7, 29, 30, 33) Mahanduraw mo bala, nian, ang kasanag sang siudad nga permanente nga ginaiwagan sang himaya ni Jehova? Ina nga siudad wala sing gab-i. Wala ini nagakinahanglan sing literal nga adlaw ukon bulan. Magaiwag ini sing dayon. (Ipaanggid ang 1 Timoteo 6:16.) Ang Bag-ong Jerusalem ginapaliguan sa sina nga sahi sang masilaw nga kasanag. Sa pagkamatuod, ining nobya kag ang iya Nobyo nga Hari nangin kapital sang bug-os uniberso nga organisasyon ni Jehova​—ang iya “babayi,” “ang Jerusalem sa hitaas”​—nga tuhoy sa sini si Isaias nagtagna: “Ang adlaw indi na mangin imo kapawa sa adlawon, kag ang bulan indi na maghatag sang kasilaw sang iya kapawa sa imo. Kag si Jehova mangin dayon nga kapawa sa imo, kag ang imo Dios imo himaya. Ang imo adlaw indi na magtunod, kag ang imo bulan indi na magtaliwan kay si Jehova mangin imo dayon nga kapawa, kag ang mga adlaw sang imo paglalaw matapos.”​—Isaias 60:​1, 19, 20; Galacia 4:26.

Isa ka Kapawa Para sa mga Pungsod

¹⁵ Ini man gihapon nga tagna ang nagtagna: “Kag ang mga pungsod magaabot sa imo kapawa, kag ang mga hari sa kasanag sang imo pagdilag.” (Isaias 60:3) Ginapakita sang Bugna nga ining mga pulong magalakip sa Bag-ong Jerusalem: “Kag ang mga pungsod magalakat sa kasanag sini, kag ang mga hari sang duta magadala sang ila himaya sa sini. Kag ang mga gawang sini indi nga mas-a pagtakpan sa adlaw, kag walay gab-i didto. Kag dalhon nila ang himaya kag ang dungog sang mga pungsod sa sini.”​—Bugna 21:​24-26.

¹⁶ Sin-o ining “mga pungsod” nga nagalakat paagi sa kapawa sang Bag-ong Jerusalem? Sila ang mga tawo, nga sang una bahin sang mga pungsod sining malaut nga kalibutan, nga nagapauyon sa kapawa nga ginapasilak sining mahimayaon nga langitnon nga siudad. Ang nagapanguna sa ila amo ang dakung kadam-an, nga nagguwa na gikan sa “tanan nga mga pungsod kag mga tribo kag katawhan kag mga hambal” kag nagasimba sa Dios sa adlaw kag gab-i kaupod sa Juan nga klase. (Bugna 7:​9, 15) Sa tapos manaug ang Bag-ong Jerusalem halin sa langit kag magamit ni Jesus ang mga yabi sang kamatayon kag sang Hades sa pagbanhaw sa mga patay, buylugan sila sang minilyon pa, gikan sa “mga pungsod,” nga naghigugma kay Jehova kag sa iya Anak, ang tulad-Kordero nga Bana sang Bag-ong Jerusalem.​—Bugna 1:18.

¹⁷ Sin-o, nian, “ang mga hari sang duta” nga “nagadala sang ila himaya sa sini”? Indi sila literal nga mga hari sang duta subong isa ka grupo, kay sila malaglag samtang nagapakig-away batok sa Ginharian sang Dios sa Armagedon. (Bugna 16:​14, 16; 19:​17, 18) Mahimo bala nga ang mga hari amo ang pila sang mataas sing posisyon nga mga tawo sang mga pungsod nga nangin bahin sang dakung kadam-an, ukon sila bala ang binanhaw nga mga hari nga nagapasakop sa Ginharian sang Dios sa bag-ong kalibutan? (Mateo 12:42) Indi gid, kay sa daku nga bahin, ang himaya sini nga mga hari kalibutanon kag madugay na nga nadula. “Ang mga hari sang duta,” nian, nga nagadala sang ila himaya sa Bag-ong Jerusalem mahimo gid nga amo ang 144,000 nga “ginbakal . . . gikan sa tagsa ka tribo kag hambal kag katawhan kag pungsod” agod maghari upod sa Kordero, si Jesucristo. (Bugna 5:​9, 10; 22:5) Ginadala nila ang ila hatag-Dios nga himaya sa siudad agod magdugang sing kasanag sa sini.

¹⁸ Si Juan nagapadayon: “Apang wala sing bisan sin-o nga dimatarong ukon nagahimo sing kangil-aran ukon butig nga makasulod sa sini; amo lamang sila nga nasulat sa linukot sang kabuhi sang Kordero.” (Bugna 21:​27) Wala sing bisan ano nga nadagtaan sang sistema sang mga butang ni Satanas ang mangin bahin sang Bag-ong Jerusalem. Bisan pa ang mga gawang sini permanente nga bukas, wala sing bisan sin-o nga “nagahimo sing kangil-aran kag butig” ang tugutan sa pagsulod. Wala sing mga apostata sa sadto nga siudad ukon bisan sin-o nga mga katapo sang Babilonia nga Daku. Kag kon may magtinguha sa pagtamay sa siudad paagi sa pagpalain sa palaabuton nga mga katapo samtang yari pa sila sa duta, ang ila panikasog walaon. (Mateo 13:​41-43) Ang “mga nasulat [lamang] sa linukot sang kabuhi sang Kordero,” ang 144,000, ang makasulod sa ulihi sa Bag-ong Jerusalem.b​—Bugna 13:​8; Daniel 12:3.

Ang Suba sang Tubig sang Kabuhi

¹⁹ Ang masanag nga Bag-ong Jerusalem magapadala sing dakung mga pagpakamaayo sa katawhan sa duta. Amo sini ang masunod nga natun-an ni Juan: “Kag ginpakita niya sa akon ang suba sang tubig sang kabuhi, nga matin-aw subong sang kristal, nga nagailig gikan sa trono sang Dios kag sang Kordero sa tunga sang dalan sini.” (Bugna 22:​1, 2a) San-o magailig ining “suba”? Sanglit nagailig ini “gikan sa trono sang Dios kag sang Kordero,” matabo lamang ini sa tapos magsugod ang adlaw sang Ginuo sang 1914. Amo yadto ang tion para sa hitabo nga ginpahibalo sang budyong kag sang daku nga pahibalo: “Karon nag-abot ang kaluwasan kag ang gahom kag ang ginharian sang aton Dios kag ang awtoridad sang iya Cristo.” (Bugna 11:​15; 12:10) Sa wala pa ina nga petsa, “ang Kordero” wala ginpalingkod sa trono subong Mesianikong Hari. Dugang pa, sanglit ang suba nagailig sa tunga sang dalan sang Bag-ong Jerusalem, ang tion sang katumanan sang palanan-awon dapat nga sa tapos sang kalaglagan sang kalibutan ni Satanas, kon ang Bag-ong Jerusalam ‘manaug gikan sa langit halin sa Dios.’​—Bugna 21:2.

²⁰ Indi ini ang una nga tion nga ang nagahatag-kabuhi nga tubig gintanyag sa katawhan. Sang yari sia sa duta, naghambal si Jesus tuhoy sa tubig nga nagahatag sing kabuhi nga walay katapusan. (Juan 4:​10-14; 7:​37, 38) Dugang pa, buot na mabatian ni Juan ang mahigugmaon nga imbitasyon: “Ang espiritu kag ang nobya nagasiling: ‘Kari!’ Kag ang nagapamati magsiling: ‘Kari!’ Kag ang ginauhaw magkari; ang buot magkuha sang tubig sang kabuhi sa walay bayad.” (Bugna 22:17) Ining imbitasyon ginapalanog bisan karon, nagapakita nga matigayon na ang isa ka bahin sang tubig sang kabuhi. Apang sa bag-ong kalibutan, ina nga mga tubig magailig gikan sa trono sang Dios kag paagi sa Bag-ong Jerusalem kaangay sang suba.

²¹ Ano ining “suba sang tubig sang kabuhi”? Ang literal nga tubig isa ka importante nga elemento para sa kabuhi. Ang tawo mabuhi bisan indi makakaon sing pila ka semana, apang kon wala sing tubig sa mga isa ka semana, mapatay sia. Ang tubig inugtinlo man kag importante sa kapagros. Sa amo, ang tubig sang kabuhi nagalaragway sa isa ka butang nga kinahanglanon para sa kabuhi kag kapagros sang katawhan. Si manalagna Ezequiel ginhatagan man sing palanan-awon tuhoy sini nga “suba sang tubig sang kabuhi,” kag sa iya palanan-awon, ang suba nag-ilig gikan sa templo sa Jerusalem kag pakadto sa Patay nga Dagat. Nian, milagro sang mga milagro! Yadtong patay, nalatom sang kemikal nga tubig nangin matab-ang nga tubig nga dagaya sa isda! (Ezequiel 47:​1-12) Huo, ang suba sa palanan-awon nagbuhi sang butang nga patay anay, nagapalig-on nga ang suba sang tubig sang kabuhi nagalaragway sa aman sang Dios paagi kay Jesucristo agod ipasag-uli ang himpit nga kabuhi sa “patay” nga kaliwatan sang tawo. Ining suba subong “katin-aw sa kristal,” nga nagapakita sang pagkaputli kag pagkabalaan sang mga aman sang Dios. Indi ini kaangay sang nadagtaan sing dugo, makamamatay nga “mga tubig” sang Cristiandad.​—Bugna 8:​10, 11.

²² Ang suba nagahalin sa “trono sang Dios kag sang Kordero.” Nagakaigo ini, kay ang sadsaran sang nagahatag-kabuhi nga mga aman ni Jehova amo ang halad nga gawad, kag gin-aman ini bangod ‘ginhigugma gid [ni Jehova] ang kalibutan sa bagay nga ginhatag niya ang iya bugtong nga Anak, agod nga ang bisan sin-o nga magpakita sing pagtuo sa iya indi mawala kundi may kabuhi nga wala sing katapusan.’ (Juan 3:16) Ang tubig sang kabuhi nagadalahig man sa Pulong sang Dios, nga ginpatuhuyan man subong tubig sa Biblia. (Efeso 5:26) Apang, ang suba sang tubig sang kabuhi nagalakip indi lamang sang kamatuoran kundi sang tagsa ka iban pa nga aman ni Jehova, pasad sa halad ni Jesus, sa pagtubos sa matinumanon nga mga tawo gikan sa sala kag kamatayon kag hatagan sila sing kabuhi nga wala sing katapusan.​—Juan 1:​29; 1 Juan 2:​1, 2.

²³ Sa tion sang Isa ka Libo ka Tuig nga Paggahom, ang mga benepisyo sang gawad iaplikar sing bug-os paagi sa pagkasaserdote ni Jesus kag sang iya 144,000 ka kabulig nga mga saserdote. Sing nagakaigo, nian, ang suba sang tubig sang kabuhi nagailig sa tunga sang dalan sang Bag-ong Jerusalem. Ginahuman ini sang espirituwal nga Israel, nga upod kay Jesus nagahuman sang matuod nga binhi ni Abraham. (Galacia 3:​16, 29) Busa, kon ang tubig sang kabuhi mag-ilig sing bugana sa tunga sang malapad nga dalan sang simbuliko nga siudad, “ang tanan nga pungsod sang duta” may bug-os nga kahigayunan sa pagpakamaayo sang ila kaugalingon paagi sa binhi ni Abraham. Ang saad ni Jehova kay Abraham matuman sing bug-os.​—Genesis 22:​17, 18.

Mga Kahoy sang Kabuhi

²⁴ Sa palanan-awon ni Ezequiel, ang suba nagsulog pa, kag nakita sang manalagna nga nagtubo sa duha ka pangpang sini ang tanan nga sahi sang hamunga nga mga kahoy. (Ezequiel 47:12) Apang ano ang nakita ni Juan? Amo ini: “Kag sa sini nga pangpang sang suba kag sa sina nga pangpang may mga kahoy sang kabuhi nga nagapatubas sing napulog-duha ka sari sang bunga, nga nagapatubas sang ila bunga kada bulan. Kag ang mga dahon sang mga kahoy bulong sa mga pungsod.” (Bugna 22:​2b) Ining “mga kahoy sang kabuhi” dapat man nagalaragway sa bahin sang aman ni Jehova sa paghatag sing dayon nga kabuhi sa matinumanon nga katawhan.

²⁵ Daw ano ka bugana ang ginaaman ni Jehova para sa nagabaton nga mga tawo! Indi lamang sila makaambit sa sadtong makapabugnaw nga tubig kundi makapanguha man sila gikan sa sadtong mga kahoy sing walay untat nga sahi sang makapabaskog nga mga prutas. O, kon nangin kontento lamang ang aton una nga mga ginikanan sa kaanggid ‘katahom’ nga aman sa Paraiso sang Eden! (Genesis 2:9) Apang karon yari na ang bug-os globo nga Paraiso, kag si Jehova nagahimo pa gani sing aman paaagi sa mga dahon sadtong simbuliko nga mga dahon para sa “pagbulong sa mga pungsod.”c Superyor sa bisan ano nga bulong, herbal ukon indi, nga ginagamit karon, ang makapabugnaw nga paggamit sining simbuliko nga mga kahoy magabayaw sang matinuuhon nga katawhan sa espirituwal kag lawasnon nga kahimpitan.

²⁶ Yadtong mga kahoy, nga bugana nga ginabunyagan sang suba, mahimo nga dugang pa nga nagalaragway sa 144,000 ka katapo sang asawa sang Kordero. Samtang sa duta nagainum man ini sila sang aman sang Dios para sa kabuhi paagi kay Jesucristo kag ginatawag nga “dalagku nga mga kahoy sang pagkamatarong.” (Isaias 61:​1-3; Bugna 21:6) Nakapatubas na sila sing bugana nga espirituwal nga bunga sa kadayawan ni Jehova. (Mateo 21:43) Kag sa tion sang Isa ka Libo ka Tuig nga Paggahom, magapakigbahin sila sa pag-aplikar sang gawad nga mga aman nga amo ang “bulong sa mga pungsod” gikan sa sala kag kamatayon.​—Ipaanggid ang 1 Juan 1:7.

Wala Na sing Gab-i

²⁷ Pagsulod sa Bag-ong Jerusalem​—sa pagkamatuod, wala na sing kapin ka dalayawon nga pribilehiyo! Hunahunaa lamang​—sila nga kubos anay, dihimpit nga mga tawo magasunod kay Jesus sa langit agod mangin bahin sang mahimayaon gid nga kahimusan! (Juan 14:2) Si Juan nagahatag sing ideya sang mga pagpakamaayo nga maagom nila, nga nagasiling: “Wala na sing pagpanghimalaut. Apang ang trono sang Dios kag sang Kordero mangin sa siudad, kag ang iya mga ulipon magahalad sa iya sing balaan nga pag-alagad; kag makita nila ang iya nawong, kag ang iya ngalan mangin sa ila mga agtang.” (Bugna 22:​3, 4) Sang mangin malaut ang Israelinhon nga pagkasaserdote, ginpakamalaut ini ni Jehova. (Malaquias 2:​2) Ang dimatinuuhon nga “panimalay” sang Jerusalem ginhukman ni Jesus nga biniyaan. (Mateo 23:​37-39) Apang sa Bag-ong Jerusalem, “wala na sing pagpanghimalaut.” (Ipaanggid ang Zacarias 14:11.) Ang tanan nga pumuluyo sini natilawan sa kalayo sang mga pagtilaw diri sa duta, kag bangod nagdaug sila, ‘isuklob [nila] ang pagkadimadinulunton kag pagkadimamalatyon.’ Sa ila bahin, nahibaluan ni Jehova, subong nga nahibaluan man niya tuhoy kay Jesus, nga sila indi gid magtalikod. (1 Corinto 15:​53, 57) Dugang pa, “ang trono sang Dios kag sang Kordero” mangin didto, nagahimo sang posisyon sang siudad nga may kalig-unan sing dayon.

²⁸ Kaangay ni Juan, ang tanan nga palaabuton nga mga katapo sinang langitnon nga siudad “mga ulipon” sang Dios. Bilang amo sina, ang ngalan sang Dios kitaon nga nasulat sa agtang, nga nagapakilala sa ila subong Tag-iya nila. (Bugna 1:​1; 3:12) Kabigon nila nga isa ka bilidhon nga pribilehiyo ang paghalad sa iya sing balaan nga pag-alagad subong bahin sang Bag-ong Jerusalem. Sang yari si Jesus sa duta, naghatag sia sing makakulunyag nga saad sa sinang palaabuton nga mga manuggahom, nga nagasiling: “Malipayon ang mga putli sing tagipusuon, kay makita nila ang Dios.” (Mateo 5:8) Daw ano ka malipayon ining mga ulipon nga makita sing aktuwal kag simbahon si Jehova sa personal!

²⁹ Si Juan nagapadayon: “Subong man, wala na sing gab-i, kag wala sila nagakinahanglan sing kapawa sang suga ukon sang adlaw, kay si Jehova mangin ila kapawa.” (Bugna 22:​5a) Ang dumaan nga Jerusalem, kaangay sang bisan ano nga siudad sa duta, nagasandig sa adlaw para sa kapawa kon adlaw kag sa kapawa sang bulan kag sa artipisyal nga suga kon gab-i. Apang sa langitnon nga Bag-ong Jerusalem, ina nga kapawa indi kinahanglanon. Ang siudad sug-an ni Jehova mismo. Ang “gab-i” mahimo gamiton sa malaragwayon nga kahulugan, nagapatuhoy sa kalamidad ukon pagbulag kay Jehova. (Miqueas 3:​6; Juan 9:​4; Roma 13:​11, 12) Indi gid matabo ina nga sahi sang gab-i sa mahimayaon, masanag nga presensia sang labing gamhanan nga Dios.

³⁰ Ginahinakpan ni Juan ining matahom nga palanan-awon paagi sa pagsiling tuhoy sa sining mga ulipon sang Dios: “Kag magahari sila tubtob sa walay katubtuban.” (Bugna 22:​5) Matuod, sa katapusan sang isa ka libo ka tuig, ang mga benepisyo sang gawad maaplikar na sing bug-os, kag ipresentar ni Jesus ang nahimpit nga kaliwatan sang tawo sa iya Amay. (1 Corinto 15:​25-28) Kon ano ang plano ni Jehova para kay Jesus kag sa 144,000 sa tapos sina, wala kita makahibalo. Apang ginapasalig kita sang Bugna nga ang ila pribilehiyo nga balaan nga pag-alagad kay Jehova magapadayon tubtob sa walay katubtuban.

Ang Makalilipay nga Talipuspusan sang Bugna

³¹ Ang pagkatuman sining palanan-awon tuhoy sa Bag-ong Jerusalem, ang nobya sang Kordero, amo ang makalilipay nga talipuspusan nga ginatudlo sang Bugna, kag nagakaigo gid. Ang tanan sang mga masigka-Cristiano ni Juan sang nahaunang siglo nga amo ang una nga ginpatuhuyan sang libro nagpaabot sa pagsulod sa sina nga siudad subong dimamalatyon nga espiritu nga kaupod nga mga manuggahom ni Jesucristo. Ang nagkalabilin sang hinaplas nga mga Cristiano nga buhi pa karon sa duta may amo man nga paglaum. Sa amo ang Bugna nagapadulong sa dakung talipuspusan sini, samtang ang nakompleto na nga nobya nagahiusa sa Kordero. Masunod, paagi sa Bag-ong Jerusalem, ang mga kaayuhan sang halad nga gawad ni Jesus iaplikar sa katawhan, agod nga sa ulihi ang tanan nga matutom magasulod sa kabuhi nga walay katapusan. Sa sining paagi ang nobya, ang Bag-ong Jerusalem, subong matutom nga kabulig sang iya Nobyo nga Hari, magapakigbahin sa dayon nga pagtukod sing matarong nga bag-ong duta​—tanan sa himaya sang aton Soberanong Ginuong Jehova.​—Mateo 20:​28; Juan 10:​10, 16; Roma 16:27.

³² Daw ano nga kalipay ang aton ginabatyag, nian, samtang nagahingapos kita sa aton pagbinagbinag sang tulun-an sang Bugna! Nakita naton nga napaslawan sing bug-os ang katapusan nga mga panikasog ni Satanas kag sang iya binhi kag natuman ang matarong nga mga paghukom ni Jehova. Ang Babilonia nga Daku dapat madula sing dayon, nga sundan sang tanan nga walay paglaum nga malaut nga mga elemento sang kalibutan ni Satanas. Si Satanas mismo kag ang iya mga demonyo itagbong sa kadadalman kag sa ulihi laglagon. Ang Bag-ong Jerusalem magagahom upod kay Cristo gikan sa mga langit samtang nagakatabo ang pagkabanhaw kag paghukom, kag sa ulihi ang nahimpit nga katawhan makaagom sing kabuhi nga walay katapusan sa Paraiso nga duta. Daw ano kaathag nga ginalaragway sang Bugna ining tanan nga butang! Daw ano kabaskog nga ginapalig-on sini ang aton determinasyon nga ‘ibantala ining walay katapusan nga maayong balita subong makalilipay nga balita sa tagsa ka pungsod kag tribo kag hambal kag katawhan’ sa duta karon! (Bugna 14:​6, 7) Nagapanikasog ka bala sing bug-os sa sining daku nga hilikuton?

³³ Upod ang aton tagipusuon nga puno gid sing pasalamat, talupangdon naton ang nagahinakop nga mga pulong sang Bugna.

[Mga footnote]

[Mga Pamangkot sa Pagtinuon]

1, 2. (a) Sa diin gindala sang anghel si Juan agod makita niya ang Bag-ong Jerusalem, kag ano nga pagkatuhay ang matalupangdan naton diri? (b) Ngaa amo ini ang dakung talipuspusan sang Bugna?

3. Paano ginalaragway ni Juan ang katahom sang Bag-ong Jerusalem?

4. Ano ang nagapakita nga ang Bag-ong Jerusalem indi ang undanon nga pungsod sang Israel?

5. Ano ang ginapakita sang “daku kag mataas nga pader” sang Bag-ong Jerusalem kag sang kamatuoran nga may mga anghel nga ginpabantay sa tagsa ka alagyan?

6. (a) Paano ginalaragway ni Juan ang pagtakus sa siudad, kag ano ang ginapakita sining pagtakus? (b) Ano mahimo ang nagapaathag nga ang takus nga gingamit “suno sa takus sang tawo, nga amo man ang takus sang anghel”? (Tan-awa ang footnote.)

7. Ano ang talalupangdon nahanungod sa mga takus sang siudad?

8. Ano ang ginapahangop sang (a) 144-kubiko-kataas nga mga pader sang siudad? (b) 12,000-estadio nga takus sang siudad? (c) himpit nga kubiko nga korte sang siudad?

9. Paano ginalaragway ni Juan ang mga materyales sa pagpatindog sang siudad?

10. Ano ang ginapahangop sang kamatuoran nga ang siudad nahuman sang haspe, bulawan, kag sang “tagsa ka sahi sang malahalon nga bato”?

11. Ano ang nagapasalig nga ang mga nagahuman sa Bag-ong Jerusalem magainggat sa pinakamataas nga sahi sang espirituwal nga pagkaputli?

12. Ano ang ginapahangop sang kamatuoran nga (a) ang mga sadsaran sang siudad napunihan sang 12 ka malahalon nga mga bato? (b) ang mga gawang sang siudad mga perlas?

13. Ano ang masunod nga ginasiling ni Juan tuhoy sa Bag-ong Jerusalem, kag ngaa ang siudad wala nagakinahanglan sing bisan anong literal nga templo?

14. (a) Ngaa indi kinahanglan sang Bag-ong Jerusalem ang adlaw kag ang bulan sa pagsilak sa sini? (b) Ano ang gintagna sang tagna ni Isaias tuhoy sa bug-os uniberso nga organisasyon ni Jehova, kag paano ang Bag-ong Jerusalem nadalahig sa sini?

15. Anong mga pulong sang Bugna nahanungod sa Bag-ong Jerusalem ang kaanggid sa tagna ni Isaias?

16. Sin-o “ang mga pungsod” nga magalakat paagi sa kapawa sang Bag-ong Jerusalem?

17. Sin-o “ang mga hari sang duta” nga “magadala sang ila himaya” sa Bag-ong Jerusalem?

18. (a) Sin-o ang indi pagpasudlon sa Bag-ong Jerusalem? (b) Sin-o lamang ang tugutan sa pagsulod sa siudad?

19. (a) Paano ginalaragway ni Juan ang Bag-ong Jerusalem subong nagapadala sing mga pagpakamaayo sa katawhan? (b) San-o magailig ang “suba sang tubig sang kabuhi,” kag paano naton nahibal-an?

20. Ano ang nagapakita nga matigayon na ang isa ka bahin sang tubig sang kabuhi?

21. Ano ang ginalaragway sang “suba sang tubig sang kabuhi,” kag paano ang palanan-awon ni Ezequiel tuhoy sa sining suba nagabulig sa aton sa paghibalo?

22. (a) Sa diin nagahalin ining suba, kag ngaa nagakaigo ini? (b) Ano ang nadalahig sa tubig sang kabuhi, kag ano ang ginalakip sining simbuliko nga tubig?

23. (a) Ngaa nagakaigo nga ang suba sang tubig sang kabuhi nagailig sa tunga sang malapad nga dalan sang Bag-ong Jerusalem? (b) Anong balaan nga saad kay Abraham ang matuman kon ang tubig sang kabuhi magailig sing bugana?

24. Ano karon ang nakita ni Juan sa duha ka pangpang sang suba sang tubig sang kabuhi, kag ano ang ginalaragway sini?

25. Anong bugana nga aman ang ginahimo ni Jehova para sa nagabaton nga mga tawo sa bug-os globo nga Paraiso?

26. Ano mahimo ang ginalaragway man sang mga kahoy sang kabuhi, kag ngaa?

27. Anong dugang pa nga mga pagpakamaayo ang ginasambit ni Juan para sa mga may pribilehiyo sa pagsulod sa Bag-ong Jerusalem, kag ngaa ginasiling nga “wala na sing pagpanghimalaut”?

28. Ngaa nasulat ang ngalan sang Dios sa agtang sang mga katapo sang Bag-ong Jerusalem, kag anong makakulunyag nga palaabuton ang yara sa atubangan nila?

29. Ngaa nagasiling si Juan tuhoy sa langitnon nga Bag-ong Jerusalem nga “wala na sing gab-i”?

30. Paano ginahinakpan ni Juan ang matahom nga palanan-awon, kag ano ang ginapasalig sa aton sang Bugna?

31. (a) Anong talipuspusan ang ginatandaan sang palanan-awon tuhoy sa Bag-ong Jerusalem? (b) Ano ang himuon sang Bag-ong Jerusalem para sa iban pa nga mga matutom sang katawhan?

32, 33. Ano ang natun-an naton gikan sa Bugna, kag ano dapat ang mangin aton tinagipusuon nga sabat?

Kapitulo 44

Ang Bugna kag Ikaw

¹ Sang mabasa ang makalilipay nga paglaragway sa Bag-ong Jerusalem, mahimo nga napahulag ka sa pagpamangkot: ‘Maabot gid bala ang butang nga tuman katahom?’ Ginasabat ni Juan ina nga pamangkot paagi sa pagreport sang masunod nga ginhambal sang anghel: “Kag nagsiling sia sa akon: ‘Ining mga pulong salaligan kag matuod; huo, si Jehova nga Dios sang inspirado nga mga pulong sang mga manalagna nagpadala sang iya anghel sa pagpakita sa iya mga ulipon sang kinahanglan matabo sing madali. Kag, yari karon! Makari ako sing madali. Malipayon ang nagatuman sang mga pulong sang tagna sining linukot.’ ” (Bugna 22:​6, 7) Ang tanan nga matahom nga mga saad sang Bugna matuman gid! Nagahambal sa ngalan ni Jesus, ang anghel nagsiling nga si Jesus makari sa indi madugay, “sing madali.” Mahimo gid nga amo ini ang pagkari ni Jesus “subong sang makawat” agod laglagon ang mga kaaway ni Jehova kag umpisahan ang daku kag makalilipay nga talipuspusan sang Bugna. (Bugna 16:​15, 16) Busa, dapat naton ipahisuno ang aton kabuhi sa mga pulong “sining linukot,” ang Bugna, agod hukman nga malipayon sa sina nga tion.

² Sa tapos sang bugana gid nga bugna, halangpunon nga si Juan nalipay gid sing daku: “Ako nga si Juan amo ang nakabati kag nakakita sining mga butang. Kag sa tapos ko ini mabatian kag makita, nagyaub ako sa pagsimba sa tiilan sang mga anghel nga nagpakita sini sa akon. Apang nagsiling sia sa akon: ‘Halong ka! Dili paghimua ina! Isa lamang ako ka masigkaulipon mo kag sang imo mga kauturan nga mga manalagna, kag sang mga nagatuman sang mga pulong sining linukot. Simbaha ang Dios.’ ” (Bugna 22:​8, 9; ipaanggid ang Bugna 19:10.) Ining makaduha ginhambal nga paandam nga indi pagsimbahon ang mga anghel sibu gid sa tion sang adlaw ni Juan, kay ang iban nagapadayon sina nga pagsimba ukon nagapangangkon sing pinasahi nga mga bugna gikan sa mga anghel. (1 Corinto 13:​1; Galacia 1:​8; Colosas 2:18) Karon, ginapadaku sini ang kamatuoran nga dapat naton simbahon ang Dios lamang. (Mateo 4:10) Indi naton dapat pagdagtaan ang putli nga pagsimba sing pagsimba kay bisan sin-o ukon sa bisan ano.​—Isaias 42:​5, 8.

³ Si Juan nagapadayon: “Nagsiling man sia sa akon: ‘Dili pagpat-ini ang mga pulong sang tagna sining linukot, kay ang gintalana nga tion malapit na. Ang malaut magahimo sa gihapon sing malaut, kag ang mahigko magahimo sa gihapon sing kahigkuan, kag ang matarong magahimo sa gihapon sing matarong, kag ang balaan magbalaan sa gihapon.’ ”​—Bugna 22:​10, 11.

⁴ Ang hinaplas nga nagkalabilin karon nagtuman sang mga pulong sang anghel. Wala nila ginpat-inan ang mga pulong sang tagna. Ti, ang una gid nga guwa sang Zion’s Watch Tower and Herald of Christ’s Presence (Hulyo 1879) nagbalhag sing mga komento tuhoy sa madamo nga bersikulo sang Bugna. Subong ginpatalupangod namon sa amon nagabukas nga kapitulo, sa sulod sang mga tuig ang Watch Tower Society nagbalhag sing iban pa makapasanag nga libro tuhoy sa Bugna. Karon ginapatalupangod namon liwat sa tanan nga mahigugmaon sa kamatuoran ang gamhanan nga mga tagna sang Bugna kag ang katumanan sini.

⁵ Kon luyag sang mga tawo nga indi pagsapakon ang mga paandam kag laygay sa Bugna, pabay-i sila! “Ang malaut magahimo sa gihapon sing malaut.” Kon amo sini ang luyag nila, sila nga nagapabilin sa kahigkuan sining matinuguton nga dag-on mahimo mapatay sa sina nga kahigkuan. Sa indi madugay, ang mga paghukom ni Jehova himuon sing bug-os, sugod sa pagkalaglag sang Babilonia nga Daku. Ang mahagop nga mga tawo magmaukod sa pagpamati sa mga pulong sang tagna: “Pangitaa si Jehova . . . Pangitaa ang pagkamatarong, pangitaa ang pagkahagop. Ayhan malipdan kamo sa adlaw sang kaakig ni Jehova.” (Sofonias 2:3) Sa ila nga nakadedikar na kay Jehova, “ang matarong magahimo sa gihapon sing pagkamatarong, kag ang balaan magbalaan sa gihapon.” Nahibaluan sang mga maalam nga ang temporaryo nga bentaha gikan sa sala indi mapaanggid sa dayon nga mga pagpakamaayo nga maagom sang mga magapadayon sang pagkamatarong kag pagkabalaan. Ang Biblia nagasiling: “Padayon nga usisaa ninyo ang inyo kaugalingon kon yara kamo sa pagtuo, padayon nga tilawi ninyo ang inyo kaugalingon kon ano kamo.” (2 Corinto 13:5) Pasad sa dalanon nga imo pilion kag huptan, mabaton mo ang imo padya.​—Salmo 19:​9-11; 58:​10, 11.

⁶ Si Jehova, ang Hari nga dayon, nagahambal karon sa mga bumalasa sang Bugna sa katapusan nga tion sa tagna, nga nagasiling: “Yari karon! Makari ako sing madali, kag dala ko ang padya nga ihatag ko, sa paghatag sa tagsa ka tawo suno sa iya buhat. Ako ang Alpha kag ang Omega, ang nahauna kag ang naulihi, ang ginsuguran kag ang katapusan. Malipayon ang mga nagalaba sang ila mga panapton, agod may kinamatarong sila sa pagkaon sang bunga sang kahoy sang kabuhi, kag sa pagsulod sa mga gawang sang siudad. Sa guwa yara ang mga ido kag ang mga espiritista kag ang makihilawason kag ang mga manugpatay kag ang mga nagasimba sa mga diosdios kag ang tagsatagsa nga nagahigugma kag nagahimo sang butig.”​—Bugna 22:​12-15.

⁷ Sa liwat, ginapadaku ni Jehova nga Dios ang iya dayon nga pagkasoberano kag ang kamatuoran nga ang iya mga katuyuan sa ginsuguran himuon niya sa katapusan. Sia “makari sing madali” sa paghukom kag sa pagpadya sa mga nagapangita sa iya sing hanuot. (Hebreo 11:6) Ang iya mga talaksan amo ang basehan kon sin-o ang padyaan kag kon sin-o ang sikwayon. Ang klero sang Cristiandad naghikot kaangay sang “apa nga mga ido,” nga nagapabulagbulag sa mga bisyo nga ginalaragway diri ni Jehova. (Isaias 56:​10-12; tan-awa man ang Deuteronomio 23:​18, New World Translation Reference Bible, footnote.) Sa pagkamatuod, sila ‘naghigugma kag naghimo’ sing butig nga mga doktrina kag panudlo kag ginsikway nila sing bug-os ang laygay ni Jesus sa pito ka kongregasyon. Busa, wala sila sing bahin sa Bag-ong Jerusalem.

⁸ Ang hinaplas nga mga Cristiano lamang nga ‘nagalaba [gid] sang ila mga panapton’ agod mangin matinlo sa mga mata ni Jehova ang may pribilehiyo sa ‘pagkadto sa mga kahoy sang kabuhi.’ Kon sayuron, mabaton nila ang kinamatarong kag titulo sa dimamalatyon nga kabuhi sa ila langitnon nga katungdanan. (Ipaanggid ang Genesis 3:​22-24; Bugna 2:​7; 3:​4, 5.) Sa tapos sila mapatay bilang mga tawo, magasulod sila sa Bag-ong Jerusalem paagi sa pagkabanhaw. Ang 12 ka anghel magapasulod sa ila, samtang balabagan nila ang bisan sin-o nga nagahimo sing kabutigan ukon kahigkuan bisan pa nagapangangkon sila nga may langitnon nga paglaum. Ang dakung kadam-an sa duta ‘naglaba [man] sang ila mga panapton nga malaba kag ginpaputi ini sa dugo sang Kordero’ kag dapat nga huptan nila ang ila matinlo nga tindog. Mahimo nila ini paagi sa paglikaw sa mga bisyo nga batok sa amo nagapaandam si Jehova, subong man sa pagtuman sang laygay ni Jesus sa iya pito ka mensahe sa mga kongregasyon.​—Bugna 7:​14; kapitulo 2 kag 3.

⁹ Sang makatapos si Jehova, si Jesus naghambal. Naghatag sia sing mga pulong sang pagpalig-on sa mga matarong sing tagipusuon nga nagabasa sang Bugna, nga nagasiling: “Ako, si Jesus, nagpadala sang akon anghel sa inyo sa pagpanaksi sa inyo sining mga butang para sa mga kongregasyon. Ako ang gamot kag kaliwat ni David, kag ang masanag nga kabugwason.” (Bugna 22:​16) Huo, ining mga pulong para gid sa “mga kongregasyon.” Isa ini ka mensahe, una sa tanan, para sa kongregasyon sang hinaplas nga mga Cristiano sa duta. Ang tanan sa Bugna ginpatuhoy una sa tanan sa hinaplas nga mga Cristiano, nga magapuyo sa Bag-ong Jerusalem. Paagi sa sina nga kongregasyon, ang dakung kadam-an may pribilehiyo man nga makahangop sining hamili nga matagnaon nga mga kamatuoran.​—Juan 17:​18-21.

¹⁰ Si Jesucristo gintugyanan sang pagpaalinton sang Bugna kay Juan kag paagi sa iya sa kongregasyon. Si Jesus amo “ang gamot kag kaliwat ni David.” Naghalin sia kay David suno sa unod kag sa amo kalipikado nga mangin Hari sang Ginharian ni Jehova. Sia man mangin “Dayon nga Amay” ni David, kag sa amo “gamot” ni David. (Isaias 9:​6; 11:​1, 10) Sia ang permanente, dimamalatyon nga Hari sa linya ni David, nagatuman sang katipan ni Jehova kay David, kag “ang masanag nga kabugwason” nga gintagna sang adlaw ni Moises. (Numeros 24:​17; Salmo 89:​34-37) Sia ang “kabugwason” nga nagasilak, nga bangod sini nagapamanagbanag ang kaadlawon. (2 Pedro 1:19) Ang tanan nga pangdaya sang dakung kaaway nga Babilonia nga Daku wala makapugong sining mahimayaon nga pagsilak.

Magsiling: “Kari!”

¹¹ Karon turno na ni Juan sa paghambal. Gikan sa tagipusuon nga puno sing apresasyon sa tanan nga nakita niya kag nabatian, sia nagatuaw: “Kag ang espiritu kag ang nobya padayon nga nagasiling: ‘Kari!’ Kag ang bisan sin-o nga makabati magsiling: ‘Kari!’ kag ang bisan sin-o nga ginauhaw magkari; ang bisan sin-o nga luyag mag-inum sing tubig sang kabuhi sa walay bayad.” (Bugna 22:​17) Ang mga benepisyo sang halad nga gawad ni Jesus indi para lamang sa 144,000, kay bukas ining imbitasyon. Ang nagapahulag nga espiritu ni Jehova nagapanghikot paagi sa nobya nga klase, amo kon ngaa ang mensahe padayon nga ginapalanog sing maathag gid: “Mag-inum sing tubig sang kabuhi sa walay bayad.” (Tan-awa man ang Isaias 55:​1; 59:21.) Ang bisan sin-o nga ginauhaw sa pagkamatarong ginaagda sa “pagkari” kag batunon ang bugana nga aman ni Jehova. (Mateo 5:​3, 6) Daw ano ang pribilehiyo sang tanan nga palaabuton nga dutan-on nga klase nga nagabaton sining imbitasyon sang hinaplas nga Juan nga klase!

¹² Kutob sang maaga nga bahin sang katuigan 1930, ang nagadugang nga kadamuon sang dakung kadam-an ‘nagapamati’​—nagahatag sing igtalupangod sa imbitasyon. Kaangay sang ila hinaplas nga mga masigkaulipon, natigayon nila ang matinlo nga tindog sa atubangan ni Jehova. Ginakalangkagan nila ang tion nga ang Bag-ong Jerusalem manaug halin sa langit agod dalhon ang mga pagpakamaayo sa katawhan. Sa tapos mabatian ang makapukaw nga mensahe sang Bugna, ang dakung kadam-an wala lamang nagasiling sing “Kari!” kundi aktibo nga ginatipon nila ang iban pa pasulod sa organisasyon ni Jehova, ginahanas ini sila sa pagbantala man: “Ang bisan sin-o nga ginauhaw magkari.” Gani ang kadamuon sang dakung kadam-an padayon nga nagadugang, kay kapin sa 3,000,000 sa ila sa kapin sa 200 ka kadutaan sa bilog nga duta ang nagapakigbahin upod sa kubos sa 9,000 sang hinaplas nga nobya nga klase sa paghatag sing imbitasyon sa ‘pag-inum sang tubig sang kabuhi sa walay bayad.’

¹³ Masunod, si Jesus liwat ang nagahambal, nga nagasiling: “Nagapanaksi ako sa tanan nga makabati sang mga pulong sang tagna sining linukot: Kon ang bisan sin-o magdugang sa sining mga butang, idugang sa iya sang Dios ang mga kalalat-an nga nasulat sa sining linukot; kag kon ang bisan sin-o magbuhin sang mga pulong sang linukot sining tagna, kuhaon sang Dios ang iya bahin gikan sa mga kahoy sang kabuhi kag gikan sa balaan nga siudad, mga butang nga nasulat sa sining linukot.”​—Bugna 22:18, 19.

¹⁴ Ang mga katapo sang Juan nga klase dapat magtalupangod sa “tagna” sang Bugna. Indi nila dapat pagtaguon ini ukon dugangan. Ang mensahe sini dapat ipabantala sing dayag, “gikan sa mga atop sang balay.” (Mateo 10:27) Ang Bugna gin-inspirar sang Dios. Sin-o bala ang mangahas nga islan ang bisan isa lang ka tinaga nga ginpamulong sang Dios kag ginpaliton paagi sa isa nga amo karon ang nagagahom nga Hari, si Jesucristo? Sa pagkamatuod, ina nga tawo takus nga madula sa pagtinguha sang kabuhi kag mag-antos sing mga kalalat-an nga dapat mag-abot sa Babilonia nga Daku kag sa bug-os nga kalibutan.

¹⁵ Nagadugang karon si Jesus sing katapusan nga pulong sang pagpalig-on: “Sia nga nagapanaksi sining mga butang nagasiling, ‘Huo; Makagari ako sing madali.’ ” (Bugna 22:​20a) Si Jesus amo “ang matutom kag matuod nga saksi.” (Bugna 3:14) Kon nagapanaksi sia sa mga palanan-awon sang Bugna, matuod gid ini. Sia kag si Jehova nga Dios makapila magpadaku sang kamatuoran nga sila magakari “sing madali,” ukon sa indi madugay, sa sini nga tion ginsiling ina ni Jesus sing ikalima. (Bugna 2:​16; 3:​11; 22:​7, 12, 20) Ang katuyuan sang ‘pagkari’ amo ang paghikot sang paghukom sa dakung makihilawason, sa politikal nga “mga hari” kag sa tanan nga iban pa nga nagapamatok sa “ginharian sang aton Ginuo [Jehova] kag sang iya Cristo.”​—Bugna 11:​15; 16:​14, 16; 17:​1, 12-14.

¹⁶ Ang imo pagkahibalo nga si Jehova kag si Jesus magakari sing madali dapat magpalig-on sa imo nga “dumdumon gid ang pag-abot sang adlaw ni Jehova.” (2 Pedro 3:12) Ang daw kalig-unan sang duta sang sistema sang mga butang ni Satanas indi matuod. Ang daw kadalag-an nga matigayon sang langit sang kalibutanon nga mga manuggahom sa idalom ni Satanas umalagi lamang. Ining mga butang magataliwan. (Bugna 21:1) Ang lamang nga pagkapermanente masapwan kay Jehova, sa iya Ginharian sa idalom ni Jesucristo, kag sa iya ginsaad nga bag-ong kalibutan. Indi gid ina pagkalipati!​—1 Juan 2:​15-17.

¹⁷ Kon amo, kabay nga tugutan mo ang imo natun-an sa Bugna nga mag-impluwensia sa imo kabuhi sing daku. Wala bala ang imo pagpasiplat sa langitnon nga presensia ni Jehova magpadaku sa imo hunahuna sang labaw nga himaya kag pagkabalaan sang aton Manunuga? (Bugna 4:​1–​5:14) Daw ano nga pribilehiyo ang pag-alagad sa sina nga Dios! Kabay nga ang imo apresasyon sa iya pagkabalaan magpahulag sa imo nga hunahunaon sing serioso ang laygay ni Jesus sa pito ka kongregasyon kag likawan ang mga butang subong sang materyalismo, pagsimba sa mga diosdios, imoralidad, pagkaalabaab, apostata nga sektaryanismo, ukon bisan ano nga makahimo sang imo pag-alagad nga indi kalahamut-an kay Jehova. (Bugna 2:​1–​3:22) Ang ginhambal ni apostol Pedro sa Juan nga klase naaplikar man sa prinsipio sa dakung kadam-an: “Nahisuno sa Balaan nga Isa nga nagtawag sa inyo, mangin balaan man kamo sa tanan ninyo nga paggawi.”​—1 Pedro 1:​15, 16.

¹⁸ Dugang pa, kabay nga mapahulag ka sa nabag-o nga kakugi samtang ginawali mo “ang tuig sang maayong kabubut-on sa bahin ni Jehova kag ang adlaw sang pagtimalos sa bahin sang aton Dios.” (Isaias 35:​4; 61:2) Kon bala sa diutay nga panong ukon sa dakung kadam-an, kabay nga ikaw makigbahin sing bug-os nga mahimo sa pagbantala tuhoy sa pagbubo sang pito ka yahong sang kaakig ni Jehova, nagasugid sang mga paghukom sang Dios sa kalibutan ni Satanas. Sa amo man nga tion, ibuylog ang imo tingog sa makalilipay nga pagbantala sing maayong balita nga wala sing katapusan tuhoy sa natukod na nga Ginharian ni Jehova kag sang iya Cristo. (Bugna 11:​15; 14:​6, 7) Ukuri ining hilikuton sing madagmit. Kag kabay nga ang paghangop nga kita yari na sa adlaw sang Ginuo magpahulag sa madamo nga wala pa nagaalagad kay Jehova nga magbuylog sa hilikuton nga pagwali sing maayong balita. Kabay nga ini man sila mag-uswag padulong sa pagdedikar sang ila kabuhi sa Dios sa tuyo nga magpabawtismo. Dumduma, “ang gintalana nga tion malapit na”!​—Bugna 1:3.

¹⁹ Sa amo, upod kay Juan, kita hugot nga nagapangamuyo: “Kabay pa! Kari, Ginuong Jesus.” Kag si Juan, ang tigulang nga apostol, nagdugang: “Kabay nga ang dibagay nga kaluoy ni Ginuong Jesucristo mangin sa mga balaan.” (Bugna 22:​20b, 21) Kabay nga ini mangin sa inyo man tanan nga nagabasa sining publikasyon. Kabay nga may pagtuo kamo nga ang dakung talipuspusan sang Bugna malapit na, agod nga ikaw man makabuylog sa amon sa hanuot nga “Kabay pa!”

[Mga Pamangkot sa Pagtinuon]

1. (a) Ano nga pasalig liwat ang ginhatag sang anghel kay Juan tuhoy sa tanan nga matahom nga mga saad sa Bugna? (b) Sin-o ang nagasiling, “Makari ako sing madali,” kag san-o ining “pagkari”?

2. (a) Ano ang reaksion ni Juan sa pagkabugana sang Bugna, kag ano ang ginsugid sang anghel sa iya? (b) Ano ang matun-an naton gikan sa ginhambal sang anghel, “Halong ka!” kag, “Simbaha ang Dios”?

3, 4. Ano ang padayon nga ginsugid sang anghel kay Juan, kag paano gintuman sang hinaplas nga nagkalabilin ang iya mga pulong?

5. (a) Ano kon luyag sang mga tawo nga indi pagsapakon ang mga paandam kag laygay sa Bugna? (b) Ano dapat ang mangin reaksion sang mga mahagop kag mga matarong?

6. Ano ang ginasiling ni Jehova sa iya katapusan nga paghambal sa mga bumalasa sang Bugna sa tagna?

7. (a) Para sa ano si Jehova “makari sing madali”? (b) Ngaa ang klero sang Cristiandad wala sing bahin sa Bag-ong Jerusalem?

8. (a) Sin-o lamang ang “magakadto sa mga kahoy sang kabuhi,” kag ano ang kahulugan sini? (b) Paano ‘ginlabhan [sang dakung kadam-an] ang ila mga panapton nga malaba,’ kag paano nila ginahuptan ang matinlo nga tindog?

9. Anong mga pulong ang ginahambal ni Jesus, kag sa kay sin-o una gid nga ginapatuhoy ang iya mensahe kag ang bug-os nga Bugna?

10. Ngaa gintawag ni Jesus ang iya kaugalingon (a) “ang gamot kag ang kaliwat ni David”? (b) “ang masanag nga kabugwason”?

11. Anong bukas nga imbitasyon ang ginapresentar karon ni Juan, kag sin-o ang mahimo magabaton sini?

12. Paano ang dakung kadam-an nagasabat sa imbitasyon sang Bugna 22:​17?

13. Anong paandam ang ginahatag ni Jesus?

14. Paano ginatamod sang Juan nga klase “ang tagna” sang Bugna?

15. Ano ang kahulugan sang ginhambal ni Jesus nga sia “nagapanaksi sining mga butang” kag “magakari ako sing madali”?

16. Sa pagkahibalo nga si Jehova nga Dios kag si Jesus magakari sing madali, anong desidido nga paghulag ang dapat mo himuon?

17. Paano ikaw dapat maapektuhan sang imo apresasyon sa pagkabalaan ni Jehova?

18. Sa ano ikaw dapat makigbahin sing bug-os nga mahimo, kag ngaa madagmit ining hilikuton karon?

19. Ano ang nagahinakop nga mga pulong sang tigulang nga si apostol Juan, kag ano ang reaksion mo sa sini?