Yara sa Katalagman ang Inyo Anak!

Ang pagmolestia sa inyo mga anak isa ka malaw-ay nga katunayan sa sining balatianon nga kalibutan. Ang magasin nga Lear’s nagsiling: “Mas madamo sa aton ang naapektuhan sini sangsa kanser, sangsa balatian sa tagipusuon, sangsa AIDS.” Busa ginabatyag sang Magmata! ang obligasyon nga paalistuhon ang mga bumalasa sini sa sining katalagman kag kon ano ang sarang mahimo sa sini.​—Ipaanggid ang Ezequiel 3:​17-21; Roma 13:​11-13.

SINING karon nga tinuig ang bug-os nga globo nagprotesta batok sa pagmolestia sa kabataan. Apang ang igtalupangod sang media, nga puno sing bantog nga mga tawo nga nagabuyagyag sang ila mga eksperiensia nga sila gin-abusuhan sang bata pa sila, nagdul-ong sa pila ka popular nga sayop nga paghangop. Ang iban nagpati nga ini tanan nga hinambal nahanungod sa pag-atake sa kabataan amo lamang ang pinakabag-o nga uso. Apang, ang matuod, wala sing bag-o nahanungod sa sinang seksuwal nga pag-atake. Halos subong ini kadugay sa maragtas sang tawo.

Isa ka Dumaan nga Problema

Mga 4,000 ka tuig ang nagligad, ang mga siudad sang Sodoma kag Gomorra bantog sa malaut nga moral. Mahimo gid nga ang isa sang madamo nga bisyo sang rehiyon amo ang seksuwal nga kailigbon sang isa ka adulto sa isa ka bata. Ginalaragway sang Genesis 19:4 ang isa ka buang sa sekso nga kadam-an sang mga Sodomanhon “halin sa bata tubtob sa tigulang” nga nagtinguha sa paglugos sa duha ka lalaki nga bisita ni Lot. Binagbinaga: Ngaa mapukaw ang mga bata pa nga lalaki sang ideya nga luguson ang mga lalaki? Maathag nga nakita na nila ang tiko nga buhat sa sekso nga homoseksuwalidad.

Pagligad sang mga siglo, ang pungsod sang Israel nagsaylo sa rehiyon sang Canaan. Nalatom gid ini nga pungsod sang incesto, sodomanhon, bestialidad, prostitusyon, kag bisan gani sang paghalad sing magagmay nga kabataan sa demonyo nga mga diosdios amo kon ngaa ining malaut nga mga buhat espesipiko nga gindumilian sa Kasuguan Mosaiko. (Levitico 18:​6, 21-23; 19:29; Jeremias 32:35) Walay sapayan sang mga paandam gikan sa Dios, ginsunod sang rebelyuso nga mga Israelinhon, lakip sang pila sang ila mga manuggahom, ining talamayon nga mga buhat.​—Salmo 106:​35-38.

Apang, ang dumaan nga Gresya kag Roma, mas malaut pa sangsa Israel sa sining bahin. Kinaandan sa sining duha ka pungsod ang pagpatay sa mga lapsag, kag sa Gresya isa ka ginabaton sadto nga buhat ang seksuwal nga pagpakigrelasyon sang adulto nga mga lalaki sa mga bata nga lalaki. Ang tagsa ka siudad sang dumaan nga Gresya madamo sing mga balay diin makita ang mga bata nga lalaki para sa prostitusyon. Sa Romanong Emperyo, ang prostitusyon sang mga bata tuman ka lapnag amo kon ngaa pinasahi nga mga buhis kag mga kapiestahan ang gintukod sing espesipiko para sa sini nga negosyo. Sa mga arena, ang mga bata nga babayi ginalugos kag ginapilit nga makighirop sa mga sapat. Kaanggid man nga mga kapintas ang lapnag sa madamo pa sang dumaan nga mga pungsod.

Kamusta sa aton modernong panahon? Tuman na bala ka sibilisado ang katawhan nga ining makakulugmat nga mga buhat sa sekso magdagsa karon? Indi mabaton sang mga estudyante sang Biblia ini nga ideya. Nahibaluan gid nila nga ginlaragway ni apostol Pablo ang aton dag-on subong “makahalanguyos nga panahon nga mabudlay pakigbagayan.” Detalyado nga ginsambit niya ang lapnag nga gugma sa kaugalingon, ang gugma sa pagpangalipay, kag ang pagkalusod sang kinaugali nga gugma sa sulod sang pamilya nga nagalapnag sa modernong katilingban kag nagdugang pa: “Ang malaut nga mga tawo kag mga malimbong magalain kag magalain pa.” (2 Timoteo 3:​1-5, 13; Bugna 12:​7-12) Naglain pa bala ang pagmolestia sa kabataan, nga masami ginahimo sang “malaut nga mga tawo kag mga malimbong?”

Isa ka Hilingagawon nga Problema

Ang mga pag-atake sa kabataan masami nga ginatago, amo kon ngaa gintawag ini nga ayhan amo ang labing wala mareport nga krimen. Walay sapayan sina, ina nga mga krimen maathag nga nagdugang sang nagligad nga mga dekada. Sa Estados Unidos, ang Los Angeles Times nagsurbe tuhoy sini. Nasapwan sini nga 27 porsiento sang mga babayi kag 16 porsiento sang mga lalaki ang gin-abusuhan sa sekso sang bata pa sila. Bisan pa makapakibot ining mga estadistika, mas mataas pa ang mga estimasyon nga mahalungon nga ginhimo sa Estados Unidos.

Sa Malaysia, ang mga report tuhoy sa pagmolestia sa kabataan nagsaka sing apat ka pilo sang nagligad nga dekada. Sa Thailand, mga 75 porsiento sang mga lalaki sa isa ka surbe ang nagbaton nga sila nakagamit sing bata nga mga pampam. Sa Alemanya, ginabanta sang mga opisyales nga subong kadamo sa 300,000 ka bata ang ginaabusuhan sa sekso kada tuig. Suno sa Cape Times sang Bagatnan nga Aprika, ang kadamuon sang mga report tuhoy sa sina nga mga pag-atake nagtimbuok sing 175 porsiento sa sulod sang nagligad nga tatlo ka tuig. Sa Netherlands kag Canada, nasapwan sang mga mananalawsaw nga mga ikatlo nga bahin sang tanan nga kababayin-an ang gin-abusuhan sa sekso sang bata pa sila. Sa Finland, 18 porsiento sang mga lin-ay nga yara sa ikasiam nga grado (15 ukon 16 anyos) kag 7 porsiento sang mga bata nga lalaki ang nagreport nga sila nakaagi sing seksuwal nga pagpakighirop upod sa isa nga sa dimagkubos magulang sa ila sing lima ka tuig.

Sa nanuhaytuhay nga mga pungsod makatulublag nga mga report ang naburuka nahanungod sa relihioso nga mga kulto nga nagaabuso sa kabataan paagi sa sadistiko nga seksuwal nga mga buhat kag pagtormento. Sa masami, ang mga nagareport nga sila mga biktima sina nga mga krimen wala ginapatihan kag ginakaluy-an.

Gani ang pagmolestia sa kabataan indi bag-o ukon tumalagsahon; ining problema nga isa ka epidemia karon madugay na nga nagaluntad. Ang epekto sini mahimo nga mangin makahalapay. Madamo nga biktima sini ang nagabatyag nga wala na sila sing pulos kag may manubo nga pagtahod sa ila kaugalingon. Ginlista sang mga eksperto sa sini nga patag ang pila sang kinaandan nga epekto sang incesto sa mga bata nga babayi, subong sang paglayas, pag-abuso sa droga kag alkohol, kapung-aw, pagtuyo sa paghikog, delingkwensia, pagkasalamwanan, indi makatulog, kag nabudlayan sa pagtuon. Ang madugay nga mga epekto mahimo nagalakip sang mapigaw nga ikasarang subong ginikanan, pagkalas-ay sa seksuwal nga paghirupay, indi pagsalig sa mga lalaki, pagpakasal sa pedophile (adulto nga may seksuwal nga interes sa bata), lesbianismo, prostitusyon, kag pagmolestia sa kabataan.

Ining mga epekto sarang malikawan sang isa nga biktima; kag indi mapakamatarong sang bisan sin-o ang sayop nga paggawi bangod lamang gin-atake man sia sa sekso sang una. Ang pag-abuso wala nagakahulugan nga ang mga biktima sini mangin imoral ukon delingkwente sa ulihi; kag wala man sini ginadula ang personal nga responsabilidad sang mga biktima sa mga desisyon nga himuon nila sa ila kabuhi sa ulihi. Apang ining kinaandan nga mga resulta para sa mga biktima matuod gid nga mga katalagman. Nagadugang ini sing pagkahilingagawon sa pamangkot, Paano naton maamligan ang kabataan gikan sa pagmolestia?