Nagapaandam ang mga Sientipiko
“ANG mga tawo kag ang kinaugali nga kalibutan magabungguanay. . . . Pika ka dekada na lang ang nabilin agod malikawan ang mga peligro [sa palibot].”
Ining paandam, nga ginhatag sang UCS (Union of Concerned Scientists), ginbalhag sa Annals, isa ka medikal nga pamantalaan sang Canada. Kon magpadayon ang peligruso sa kabuhi nga mga buhat sang tawo, dugang sang report, “mahimo [ini] magpabag-o gid sang kalibutan amo nga indi na ini makasakdag sang kabuhi sa paagi nga aton nahibaluan.”
Ang pila sang ginsambit nga hilingagawon nga mga problema nga dapat lubaron amo ang pagnipis sang ozone; polusyon sa tubig; pagkalbo sang kagulangan; paglamgod sang duta; kag ang pagkaubos sang mga espesyi, nga sa katuigan 2100 mahimo magalakip sang ikatlo nga bahin sang tanan nga espesyi nga nagakabuhi karon. “Ang paghilabot naton sa nagasandiganay nga kahimusan sang kabuhi,” siling sang UCS, “mahimo bangdan sang lapnag nga mga epekto, nga nagalakip sang pagkalusod sang biolohiko nga sistema nga may mga pagbag-o nga indi naton mahangpan sing bug-os.”
Ang mga kabalaka sang UCS gin-ugyunan sang kapin sa 1,600 ka sientipiko sa bug-os nga kalibutan, lakip ang 104 nga mandadaug sang Nobel nga padungog. Suno sa UCS, “ining dumaan na nga mga katapo sang pangkalibutan nga komunidad sang mga sientipiko nagpaandam sa bug-os nga katawhan nga kinahanglan bag-uhon ang aton pagdumala sang duta agod malikawan ang daku nga pag-antos sang tawo.”
Nagaugyon ang Biblia nga ang tawo amo matuod ang “nagalaglag sang duta.” (Bugna 11:18) Ginakilala pa gani sini nga kinahanglan bag-uhon ang pagdumala sa kalibutan. (Jeremias 10:23; Daniel 2:44) Sa katunayan, nagasaad ang Biblia nga inang pagbag-o mahanabo, indi paagi sa panikasog sang tawo, kundi paagi sa Ginharian sang Dios, ang langitnon nga panguluhan nga gintudlo ni Jesus nga ipangamuyo sang iya mga sumulunod.—Salmo 145:16; Isaias 11:1-9; Mateo 6:9, 10.
[Picture Credit Line sa pahina 31]
Retrato: Godo-Foto