Gikan sa Amon mga Bumalasa

PMS Dapat ko ipabutyag ang akon sinsero nga mga pasalamat sa inyo tungod sa pagbalhag sing artikulo nga “Pre­menstrual Syn­drome​—⁠Mito Ukon Katunayan?” (Agosto 8, 1995) Ginpangamuyo ko ini nga artikulo, kay indi ko mahangpan kon ngaa kada bulan ginabatyag ko ining makapahuol nga mga balatyagon. Sang mabasa ko ang artikulo, nakabatyag ako sing daku nga kaumpawan; nahangpan ko na karon nga ang akon problema indi bangod sa espirituwal nga kaluyahon.

Y. E., Jamaica

Nagaantos ako sa PMS tubtob sa madumduman ko, apang pirme ko ini ginasikway subong isa lamang ka butang nga dapat ko batason. Ining artikulo nakabulig sa akon sa paghangop nga ang PMS isa ka matuod nga problema, nga takus hambalan.

Y. M., Inglaterra

Sa sulod sang mga 12 ka tuig, ang akon PMS nagatuga sing daku nga kahuol sa akon anak kag sa akon bana. Ginpaathag sining artikulo ang akon mga sintomas sing sibu gid! Ang labi gid nga nagpalipay sa akon amo ang reaksion sang akon indi Saksi nga bana, nga pirme lang nagahikay sa Magmata! Nagpakita sia sing dakung interes sa artikulo kag nagsiling, ‘Nalipay ako nga may yari kita sining artikulo.’

K. O., Japan

Panghilahi Salamat gid sa artikuklo nga “Ang Pagtamod sang Biblia: Panghilahi​—⁠Magpatawad Ukon Indi Magpatawad?” (Agosto 8, 1995) Sa tapos sang tinuig nga pagmaltrato, gindiborsiohan ko ang akon bana sing Makasulatanhon. Walay sapayan, ginpabatyag ako sang pila ka tawo nga nakasala ako bangod sining ginhimo ko, kag ginbatuan ko ining balatyagon sa sulod sang madamong tinuig. Naghunahuna pa gani ako nga ginsikway ako ni Jehova. Apang, ginpabutyag sining artikulo ang madamo sang akon ginabatyag, kag nagpalig-on ini sa akon sing daku.

A. K., Czech Republic

Mga Maskara sa Aprika Ang inyo artikulo nga “The Mean­ing Be­hind the Mask” (August 8, 1995) makapasanag gid. Ginsambit ninyo didto nga ang matuod nga mga Cristiano indi dapat maghupot sing subong sadto nga mga maskara. Apang kamusta ang mga maskara nga ginpatubas subong mga handumanan lamang ukon wala gid magamit para sa relihioso nga mga katuyuan?

J. A., Estados Unidos

Espisipiko nga ginbinagbinag sang amon artikulo ang mga maskara nga gingamit para sa butig relihioso nga mga katuyuan. Ginakilala namon nga may “yara daku nga kinatuhayan sa ulot sang mga maskara nga ginagamit sa pagsimba kag sang mga kopya nga ginatigib para sa industriya sang turismo.” Sa Nakatundan nga kadutaan, inang ginabaligya nga mga maskara mahimo nga wala gid sing relihioso nga mga kahulugan kundi ginatamod sa kabilugan subong isa ka dekorasyon. Busa ang indibiduwal nga mga Cristiano dapat maghimo sing personal nga desisyon sa kon bala ipasundayag ining mga maskara, ginatandaan ang mangin epekto sang paghimo sini sa konsiensia sang iban. (1 Corinto 10:29)​—⁠ED.

Rhinoceros Luyag ko ipabutyag ang akon apresasyon kag pagdayaw sa inyo abilidad sa paghimo sing indi kinahanglanon nga impormasyon nga makalilipay​—⁠bisan gani para sa isa nga kasubong ko nga wala gid anay nagabasa agod maglingawlingaw lamang. Bag-o ko lang natapos ang pagbasa sing “The Animal Under ­Those ­Prized Horns.” (August 8, 1995) Sa masami ginasugdan ko ang pagbasa sa mga artikulo kasubong sini bangod ginakabig ko ini nga akon obligasyon. Apang, pagkatapos sini, pirme ako nagakatingala sa kon daw ano ini ka makalilipay basahon!

J. M., Estados Unidos

Ang Sugilanon ni Celeste Jones Nagabasa ako sang inyo mga magasin sa sulod sang 17 ka tuig. Sa tapos mabasa ang eksperiensia ni Celeste ­Jones sa artikulo nga “How I Ben­efited From God’s Care” (June 22, 1995), nagsulat ako kag nagpabutyag sang akon apresasyon.

M. M., Colombia

Si Celeste Jones napatay sang Oktubre 27, 1995. Antes sia napatay nakabaton sia sing madamo nga sulat gikan sa mga bumalasa sa bilog nga kalibutan nga nagapasalamat sa iya bangod sang iya pagpaambit sang iya mga eksperiensia.​—⁠ED.