Pagdula sing Sayop nga mga Pagtamod Tuhoy sa mga Saksi ni Jehova

SAMTANG nagapamalaybalay, nasumalang sang duha ka Saksi ni Jehova ang isa ka lalaki nga nagsiling nga indi sia interesado. Mahipos nga naghalin ang duha ka Saksi, apang samtang nagalakat sila sa higad sang dalan natalupangdan nila nga nagasunod sa ila ang lalaki. “Dali lang anay!” panawag sang lalaki. “Luyag ko mangayo sing pasaylo. Wala ako sing nahibaluan tuhoy sa mga Saksi, kag nagapati ako nga madamo nga tawo ang may sayop nga pagtamod tuhoy sa inyo.”

Nagpakilala ang lalaki nga sia si Renan Domin­guez, ang tsirman sang programa sang Ro­ta­ry ­Club sang ­South ­San Fran­cis­co, California. Nangabay sia kon puwede makakadto ang isa ka Saksi sa ­club kag maghatag sing pamulongpulong tuhoy sa mga pagpati kag mga hilikuton sang mga Saksi ni Jehova. Isa ka a­gen­da ang ginhimos. Ang Saksi magahambal sa sulod sing 30 minutos kag sabton ang mga pamangkot gikan sa mga tumalambong. Si Er­nest Gar­ret, isa ka madugay na nga Saksi sa San Fran­cis­co, ang ginpangabay sa pagpamulongpulong sa Ro­ta­ry ­Club sang Agosto 17, 1995, kag ginsugid niya ang masunod:

“Namensar ako kag nangamuyo kon ano ang ihambal ko sa mga katapo sang Ro­ta­ry ­Club, nga mga lider sa negosyo kag komunidad, subong sang mga nagatrabaho sa bangko, mga abogado kag mga doktor. Medyo nagpanalawsaw ako kag nasapwan nga ang katuyuan sang Ro­ta­ry ­Club amo ang pagpalig-on sa komunidad. Gani ginpresentar ko sa ila ang impormasyon sa pahina 23 sang brosyur nga Jehovah’s Witnesses in the Twentieth Century, nga natig-uluhan ‘Prac­ti­cal Val­ue of the ­Good ­News to ­Your Com­mu­ni­ty.’ ”a

“Ginpaathag ko nga ang mga Saksi ni Jehova isa ka impluwensia sa sining katuyuan. Sa kada adlaw sang semana, ang mga Saksi ni Jehova nagapanuktok sa mga ganhaan sang ila komunidad. Tuyo nila nga impluwensiahan ang ila mga kasilingan sa pagtigayon sing isa ka malig-on nga pamilya​—⁠kag ang isa ka malig-on nga yunit sang pamilya nagaresulta sa isa ka malig-on nga komunidad. Kon mas madamo nga pamilya ang maimpluwensiahan sang mga Saksi ni Jehova nga magkabuhi suno sa Cristianong mga prinsipio, nagabuhin man ang pagkadelingkwente, imoralidad, kag krimen sa komunidad. Naluyagan gid sang mga katapo ining mga impormasyon bangod nagahisanto ini sa mga tulumuron sang Ro­ta­ry ­Club.”

“Ngaa Wala Kamo Nagaentra sa Politika?”

“Sang ang miting ginbuksan para sa mga pamangkot, ang isa sang una nga mga pamangkot amo: ‘Ngaa wala kamo nagaentra sa politika kag sa gobierno?’ Nian ang ginuo nga nagpamangkot sining pakiana nagdugang: ‘Ti, ang Biblia nagasiling: “Ibayad kay Cesar ang butang nga iya ni Cesar.” ’ Ginsilingan ko sia nga nagaugyon gid kita sa sina nga pinamulong kag ginasunod ini sing bug-os. Ginsiling ko nga ang kalabanan nga mga tawo nga nabatian ko nga nagakutlo sinang kasulatan wala nagakutlo sang kasugpon sini, nga nagasiling: ‘Ibayad sa Dios ang mga butang nga iya sang Dios.’ (Mateo 22:21) Sa amo, makahinakop kita nga ang tanan indi iya ni Cesar. May pila ka butang nga iya sang Dios. Obligasyon naton nga hibaluon kon ano ang mga butang nga iya ni Cesar kag ano ang mga butang nga iya sang Dios.

“Ginpakita ko sa iya nga sang ginpamangkot si Jesus kon ‘makatarunganon bala ang magbayad sing buhis kay Cesar ukon indi?’ wala sia magsabat sing huo ukon indi. Sia nagsiling: ‘Ipakita sa akon ang kuwarta sa buhis,’ isa ka Romanong denario. Namangkot sia: ‘Kay sin-o bala ini dagway kag sinulatan?’ Sila nagsiling: ‘Kay Cesar.’ Nian nagsiling sia: ‘Busa, ibayad kay Cesar ang mga butang nga iya ni Cesar.’ (Mateo 22:​17-20) Sa aton pa, ibayad ang buhis kay Cesar bangod nagatigayon kita sing mga serbisyo gikan kay Cesar kag nagakaigo nga magbayad kita sing buhis para sa sini. Ginpaathag ko nga ang mga Saksi ni Jehova nagabayad sang ila mga buhis kag wala ginadayaan ang gobierno sa kon ano ang para sa sini.

“Nian nagsiling ako nga ang mga Saksi ni Jehova wala nagapati nga utang nila kay Cesar ang ila kabuhi. Nagapati sila nga utang nila nga simbahon ang Dios, kag ginabayaran nila ini sa iya sing nagakaigo. Gani kon ginakuha naton ini nga panindugan, indi naton tuyo nga indi pagtahuron si Cesar. Ginasunod naton ang tanan nga kasuguan ni Cesar, apang kon may pagsumpakilay, matinahuron naton nga ginapili nga sundon ang Dios subong manuggahom sangsa mga tawo. Ang lalaki nga namangkot sining pakiana nagsiling sa atubangan sang bug-os nga grupo: ‘Indi ko mabais ina!’

“Nasabat man namon ang madamo nga pamangkot tuhoy sa aton pagbantala nga hilikuton. Pagkatapos sang miting madamo nga katapo ang nagpalapit kag nagpangamusta kag nagsiling nga ugyon gid sila sa amon​—⁠nga ang pamilya amo ang sadsaran sang isa ka malig-on nga komunidad. Nian ginhatagan namon ang tagsa ka katapo sing brosyur nga Jehovah’s Witnesses in the Twentieth Century.

“Pagkatapos sadtong miting ginteleponohan ako sang tsirman sang programa si G. Domin­guez, kag ginpamangkot ako kon makakadto ako sa iya opisina, kay madamo pa sia sing ipamangkot tuhoy sa amon mga pagtuluuhan. Nakasugilanon kami sing maayo tuhoy sa madamong kasulatan. Luyag gid niya nga ipaathag ko ang amon tindog tuhoy sa dugo. Nagboluntaryo sia nga indi sia mismo magpatayon sing dugo, kag nagdayaw gid sia sa impormasyon nga ginhatag ko sa iya gikan sa brosyur nga How Can Blood Save Your Life? amo nga gin-agda niya ako nga magpamulongpulong liwat sa mga miembro sang ­club tuhoy sa amon tindog sa dugo. Gin-agda ko ang isa pa ka Saksi, si Don Dahl, nga updan ako sa sini nga programa. Nagakadto sia sa mga ospital agod ipaathag ang isyu sa dugo upod sa mga doktor kon dapat operahan ang mga Saksi. Magkaupod nga ginpaathag namon sing maid-id kon paano kami nagakooperar sa mga doktor kag sa administrasyon sang ospital paagi sa pagpaathag sang amon Makasulatanhon nga panindugan kag pagtanyag sing madinalag-on nga mga alternatibo sa pagpatayon sing dugo.”​—⁠Levitico 17:​10-12; Binuhatan 15:​19-21, 28, 29.

‘Tugutan Mo Bala nga Mapatay ang Imo Anak?’

“Pagkatapos sang miting isa ka lalaki ang nagpalapit sa akon kag namangkot sing pribado: ‘Buot mo silingon tugutan mo nga mapatay ang imo anak nga lalaki kon maaksidente sia kag yara sa emer­gen­cy ­room nga masulog nga ginadug-an?’ Ginpasalig ko sia nga nahangpan ko ang iya ginabatyag, kay may anak ako nga lalaki kag napatay sia sa paglupok sang eroplano sa Lockerbie, Scotland, sang 1988. Sa pagsabat sa iya pamangkot, ginsilingan ko anay sia nga indi ko luyag nga mapatay ang akon anak.

“Indi kami batok sa mga doktor, batok sa medisina, ukon batok sa ospital. Indi kami mga ­faith heal­er. Kinahanglan namon ang serbisyo sang medikal nga propesyon. Nagasalig kami sa Dios kag nagapati nga ang iya mga panuytoy tuhoy sa dugo para sa amon mapinadayunon nga kaayuhan. Ginalaragway sang Biblia ang Dios subong ‘ang Isa nga nagatudlo sa imo sa kapuslanan, ang Isa nga nagatuytoy sa imo sa dalanon nga dapat mo laktan.’ (Isaias 48:17) Ginhatagan niya ang iya Anak sing ikasarang sa pagbanhaw sang patay. Si Jesus nagsiling: ‘Ako ang pagkabanhaw kag ang kabuhi. Sia nga nagatuo sa akon, bisan mapatay sia, mabuhi liwat; kag ang tagsa nga nagakabuhi kag nagatuo sa akon indi na gid mapatay. Nagapati ka bala sa sini?’​—⁠Juan 11:​25, 26.

“Ang ginapangabay lamang namon nga hangpon sang mga doktor amo nga ang amon ginatindugan sugo sang amon konsiensia kag indi ini mabag-o. Indi namon ini mabag-o subong nga indi namon mabag-o ang sugo sang Dios batok sa panghilahi. Indi kami makapangabay sa Dios kag magsiling, ‘Dios ko, may kahimtangan bala nga puwede ako makapanghilahi?’ Nian ginsilingan ko ini nga lalaki: ‘Ginpamangkot mo ako kon tugutan ko ang akon anak nga lalaki nga mapatay paagi sa indi pagpatayon sing dugo. Kon itugot mo, luyag ko ikaw pamangkuton kon bala tugutan mo ang imo anak nga lalaki nga mapatay sa pag-alagad sa militar sang bisan ano nga pungsod?’ Gilayon sia nga nagsabat kag sing positibo, ‘Huo! Bangod obligasyon niya ini!’ Nagsiling ako: ‘Tugutan mo ang imo anak nga lalaki nga mapatay bangod sa isa ka kabangdanan nga ginapatihan mo. Tuguti ako nga himuon man ini sa akon anak nga lalaki.’

“Ang talalupangdon nga resulta sining tanan amo nga ang tsirman sang programa, si G. Dominguez, nag-agda sa amon sang akon asawa nga magpanihapon upod sa iya kag sa iya asawa. Nagapati sia nga biktima man ang iya asawa sing sayop nga impormasyon kag sayop nga mga pagtamod tuhoy sa mga Saksi ni Jehova. Husto sia. Sayop ang iya natigayon nga impormasyon. Masadya kami sadto nga gab-i, kag ang iya asawa namangkot sing madamong pakiana tuhoy sa amon kag sa amon hilikuton, diin gintugutan niya kami sa pagsabat sing detalyado. Sang masunod nga adlaw nagtelepono sia kag nagsiling nga nalipay gid ang iya asawa nga nakilala niya kami sang akon asawa kag nagapati sia nga maayo kami nga mga tawo.

“Padayon ko nga ginduaw sing regular si G. Dominguez, kag nagpakita sia sing daku nga interes sa Biblia. Ginsilingan niya ako: ‘Ginapalig-on ko ikaw nga kontakon ang mga tsirman sang programa sang tanan nga Ro­ta­ry ­Club sa Great­er San Fran­cis­co Bay kag magtanyag sa paghatag sing pamulongpulong nga kaanggid sang ginhatag mo sa amon ­club. Mahimo mo magamit ang akon ngalan subong reperensia, kag kon pamangkuton nila ako, malipay ako sa paghatag sa imo sang pinakamataas nga rekomendasyon nga imbitahon subong dinapit nga manugpamulongpulong.’

“Ang mga Ro­ta­ry ­Club makit-an sa bug-os nga kalibutan. Indi ayhan nga ang iban nga ­club sa Estados Unidos kag sa bug-os nga kalibutan magaabiabi man sa mga presentasyon sang mga Saksi ni Jehova?”

[Footnote]

[Laragway sa pahina 20]

Si G. Renan Dominguez, sa wala, kag si Utod Ernest Garrett