Ini nga Kudu Nakadumdom
SANG KORESPONSAL SANG MAGMATA! SA BAGATNAN NGA APRIKA
ANG maambong nga lalaki nga kudu, nga isa ka antelope nga may makadalayaw nagabalulon nga mga sungay kag dikinaandan nga mga dulunggan, nagataas sing halos 150 sentimetros tubtob sa abaga kon hustuhan na ang kadakuon. Ang babayi, walay sapayan nga pirme wala sing mga sungay, makilal-an bangod sang iya malapad nga mga dulunggan. Ang kudu isa ka mahuluy-on nga sapat, nga pirme alisto kag handa sa pagdalagan agod manago. Sa amo, ang natabo kay Karen sa Zimbabwe makatilingala.
Subong sang ginreport sa African Wildlife nga magasin, ang isa ka babayi nga tinday nga kudu, nga nakit-an nga nasalawid sa alambre nga kudal, ginluwas kag ginhatag kay Karen, nga nagpasuso sini sa bibiron sa sulod sang pila ka semana. Nabuhi ini kag nagpabilin sa bakahan diin nagapuyo si Karen kag ang iya pamilya, nga pirme nagahampang sa kabataan kag sa mga ido. Apang, nagpakadto-pakari ini sa kakahuyan, kag sang magdaku na sia, wala na ini makit-an sa bakahan.
Mga duha ka tuig sang ulihi, samtang nagamaneho sa dalan sang bakahan, nakibot si Karen nga ang nagabusong nga kudu nga baka wala magpalagyo sang mag-abot ang iya salakyan. Wala man ini magpalagyo sang ginpalapitan niya ini. Sa sini nga tion narealisar niya nga amo ini ang sapat nga ginpasuso niya anay sa bibiron, gani naghambal sia sing mahinay samtang hinayhinay sia nga nagapalapit sa iya. Nakilal-an man sia sang baka, kay ginduko sini ang iya ulo kag ginsulusinghutan sia samtang gintugutan niya sia sa paghakos sa iya!
Mga duha ka bulan sang ulihi, didto liwat ang baka malapit sa dalan—sa sini nga tion upod sa gamay nga tinday. Nahangpan ni Karen nga may pagpabugal nga ginapakilala sa iya sang inang ang tinday, nga nagpahikap man sa iya. Amo man sini ang natabo mga pila ka semana sang ulihi sang daw hungod gid nga ginhulat sang baka si Karen.
Pila pa ka bulan ang nagligad, ginsiling sang pila ka mangunguma nga nakit-an nila ini man nga kudu nga baka nga may nagaburambod nga pisi sa iya liog. Gintinguhaan nila nga palapitan ang baka agod hubaron ang pisi, apang nagdalagan ini. Gani ginpangita sia ni Karen sa kakahuyan, nga nagapanawag sa iya. Wala madugay, nagguwa ini kag nagpalapit sa iya. Mainulikdon nga nagdala si Karen sing pila ka tinapay, nga paborito gid anay sang baka, kag samtang ginakaon ini nga pagkaon, gin-utod sang bana ni Karen ang nagapabudlay nga pisi.
Ang maathag nga kaangtanan nga nagdugay sing malawig sa tunga sang tawo kag sang sapat nagdala sing daku nga kalipay sa sini nga pamilya.