Ginpakahuy-an sang Isa ka Kudu ang mga Leon

SANG nagligad nga tuig sa Bagatnan nga Aprika, isa ka daku nga antelope​—isa ka toro nga kudu​—ang nagtindog sa atubangan sang game park sang isa ka malahalon nga otel sa Lowveld. Alerto sia kag tuman ka makahas tan-awon, gani indi katingalahan nga naakig ang tumandok nga lider nga kudu sa sining makahas nga pag-agaw sang iya teritoryo. Isa ka nakasaksi ang nagreport sang pag-atake sang lider nga kudu: “Nagpusnga sia, nagkahig sa duta kag naghanda sa pagsalakay. Ginataya ang iya mga sungay, nagsalakay sia. Sang maigo niya ang pangayaw nga kudu kinulbaan sing tuman ang tumandok nga kudu.” Wala malingkang ang pangayaw. Liwat nga nagsalakay ang tumandok nga kudu. Sa gihapon wala sing resulta. Sa daku nga kaakig kag sa nagatap-ok nga yab-ok, “ginpamali sang tumandok nga lider ang tanan nga mga kahoy sa palibot antes sia magpalagyo.” Wala na sia magbalik, ayhan naghinakop nga ang bag-uhan indi gid malutos.

Bisan ang mga hari sang kagulangan wala man sing nahimo. Ang manugbantay sang lasang nga si Carlson Mathebula nagreport nga ginlibutan sang 12 ka leon ang kudu. Nagsiling sia tuhoy sini nga engkwentro: “Sang hinali duha ka babayi nga leon ang nagsaruso sa iya. Upod ang mabaskog nga pagngurob ginluksuhan sang isa ang likod sang kudu samtang ang isa nagsaruso sa kilid sini kag gin-ukuban ang iya liog. . . . Pareho sila nga natumba sa duta nga hinadlukan kag wala na makagiho. Isa pa ka babayi nga leon ang nag-entra sa engkwentro. Ginsaruso niya ang kudu kag ginpatiran ang mga tiil sini agod tumbahon, apang padayon lamang ini nga nagatindog.” Naugot sing tuman ang 12 ka leon nga wala nila matumba ining daku nga kudu amo nga “ginguba nila ang galamiton sa pagtakus sang ulan, ang galamiton sa pagpamunyag sing tanom kag ang muwebles sa guwa antes magkuyampad sa kahuya.”

Paagi lamang sa pagpabilin nga nagatindog, ginpalayas sini nga kudu ang panong sang mga kudu sa ila teritoryo kag gintabog ang mga leon. Ang report sa Sunday Times sang Johannesburg, South Africa, nagsiling nga tuman gid kadaku sini nga kudu nga nagabug-at sing 300 kilos kag human sa saway. Si G. Keith Calder, nga amo ang naglilok sang saway nga kudu, nagsiling: “Kadayawan gid para sa akon nga nasal-an ini sang mga leon kag sang kudu nga matuodtuod gid.”