Masaker Sa Port Arthur—Ngaa Natabo Ini?
SANG KORESPONSAL SANG MAGMATA! SA AUSTRALIA
SANG Domingo sang hapon, Abril 28, 1996, maayo ang tiempo sa Port Arthur Historical Site, isa ka bantog nga sentro sang mga turista sa Tasmania, Australia. Madamo nga tawo ang nagapanyaga sa Broad Arrow Café. Sang mga 1:30 s.h., sa tapos makakaon ang isa ka 28 anyos blonde sing buhok nga lamharon nga tawo sa guwa nga bahin sang kalan-an, nagsulod sia kag nagpaniro.
Ang mga nagakalaon nagkalahulog nga patay sa ila mga pulungkuan, nga may pagkaon pa sa ila mga baba. Nagsiling ang mga pulis nga “kaangay yadto sang mga bangkay sa patag-awayan.” Sang sa pagpati sang kriminal patay na ang tanan—20 ang iya napatay—matawhay sia nga nagguwa. Sa sulod sang mga segundos, mas madamo ang iya napatay sangsa ginpamatay sang nagligad nga apat ka tuig sa bug-os nga isla nga estado sang Tasmania!
Apang, ang kriminal nagpadayon sang iya pagpamatay, ginapamatay ang iya mga biktima sa pareho nga paagi. Halimbawa, sa alagyan paguwa sa historical site, nakit-an niya si Nanette Mikac upod sa iya kabataan nga babayi. Ginpatay niya si Nanette kag ang iya tatlo-ka-tuig nga anak. Nian, sang nagtinguha nga malagyo ang anom-ka-tuig nga anak, gintiid niya sia kag gintiro samtang nagakuob ini sa likod sang kahoy.
Pagkatapos sadto, sa tollbooth sa guluwaan sang historical site, ginpatay sang kriminal ang tatlo ka nagasakay sa BMW (nga awto) kag ginkuha ang awto. Sa indi tuman kalayo, nakasugata sia sing mag-asawa sa isa pa ka awto. Ginlupot niya ang tawo sa likod sang BMW kag ginpatay ang upod sang tawo nga babayi. Dayon, nagmaneho sia padulong sa malapit nga balay-dalayunan sa Seascape Cottage—mga 2:00 s.h. sang mag-abot sia. Ginsunog niya didto ang BMW kag ginhimo nga hostage ang ginkidnap nga tawo kag ang tigulang nga mag-asawa nga tag-iya sang balay-dalayunan. Ginpatay niya ang 12 pa ka tawo kutob sang maghalin sia sa kalan-an, nagpatay sing 32 na tanan. Madamo sang iban pa ang napilasan.
Pagbantala sang Domingo sang Hapon
Samtang, si Jenny Ziegler kag ang iya pamilya, nga katapo sang Port Arthur nga Kongregasyon sang mga Saksi ni Jehova, nagtipon sang 1:30 s.h. sa paghanda para makigbahin sa ministeryo. Nagpadulong dayon ang pamilya sa Port Arthur Historical Site. Luyag ni Jenny duawon si David Martin, ang mainabyanon nga tag-iya sang balay-dalayunan sa Seascape Cottage. Sang nagligad, sila sang isa pa ka Cristianong utod nga babayi nakahinun-anon sa iya tuhoy sa Biblia.
Paglipas lang gid sang 2:00 s.h., samtang sanday Jenny, ang iya bana, kag ang iya kabataan nagahinampot sa balay-dalayunan, namutikan nila ang aso nga nagahalin sa nasunog nga awto sa ugsaran. Ginpadulog sila sang mga pulis kag ginsilingan sila nga magbalik sa ila ginhalinan. “Daw naghagnok ang palibot,” siling ni Jenny. “Ang mga dalan daw makatilingala nga wala sing tawo.”
Apang, wala gihapon makahibalo nga may natabo gid nga malain, nagliko ang pamilya sa karsada padulong sa magamay nga ginapaliguan nga baybay agod padayunon ang ila ginplano nga pagbantala nga hilikuton. Normal ang tanan didto: Nagalangoy ang mga bata, ang mga tawo nagalakat sa higad sa punta nayon sang baybay, kag ang tigulang nga mag-asawa nagabasa nga nagapungko sa ila awto. “Ginpalapitan sila sang akon bana, kag malipayon sila nga nag-istoryahanay,” siling ni Jenny. Ginsugiran niya sila nga daw may problema sa highway kag nagpanugda nga kon maghalin na sa baybay, mag-agi sila sa lain nga ruta. Nagpakighambal ako sing makadali sa isa ka lamharon nga tawo, kag naghalin kami sa gilayon pagkatapos sadto.”
Nagpadayon ang pamilya Ziegler sa karsada padulong sa Port Arthur Historical Site. “Ang dalan pasulod sa site,” paathag ni Jenny, “nabalabagan sang pila ka awto. Sang ulihi nahibaluan namon nga ginlipdan nila ang mga bangkay sang mga tawo nga natiruhan. Ginsugiran kami sang isa ka tawo: ‘May naghuramentado nga tawo nga nagpaniro; mga 15 ang napatay!’ Ginsilingan kami nga maghalin sa gilayon.”
Makakulugmat nga Katapusan Sini
Ang kakugmat wala pa matapos, subong sang ginsiling ni Jenny: “Ang pagmaneho pauli makakilibang bangod wala namon mahibal-an kon diin na ang kriminal. Kada may masugata kami nga isa pa ka awto, nakulbaan kami basi yara sia sa sulod. Bisan nakapauli na kami nga hilway sa katalagman, nahadlok kami gihapon, sanglit nagapuyo kami sa nabaw-ing nga duog diin ang isa ka tawo nga nakasunar sang lokal nga alagyan madali makapanago. Sanglit nahibaluan sang amon Cristianong mga kauturan kon diin kami nagpadulong sadto nga hapon, gilayon nga nakabaton kami sing mga tawag agod hibaluon nga hilway kami sa katalagman.
“Samtang ginahunahuna namon ang natabo, narealisar namon nga kon nag-abot kami sing tulutemprano sa pagduaw sa tag-iya sang balay-dalayunan, mahimo nga nalakip kami sa mga ginpamatay. Makahaladlok hunahunaon nga mahimo nga ginpuntariya pa gani sang kriminal ang iya pusil sa amon samtang nagapakighambal kami sa mga pulis didto!”
Kapin sa 200 ka pulis ang naglibot sa balay-dalayunan sadtong Domingo sang gab-i, nga nagakuob agod malikawan ang pulupanag-on nga pagtiro sang kriminal. Nagdemanda sia sing helikopter agod makapalagyo, apang sang gab-i napaslawan ang negosasyon. Sang mga 8:00 s.a. sang Lunes, nakit-an ang aso nga nagahalin sa balay. Nakapalagyo ang kriminal, walay sapayan nga may mga paso sia. Ang tatlo ka hostage, lakip ang tag-iya sang balay-dalayunan nga duawon kuntani sang pamilya Ziegler, nasapwan sang ulihi nga patay sa nasunog nga balay, nga nagdugang sa kadamuon sang napatay nga 35.
Ngaa Natabo Ini?
Mga pito ka semana antes sini, sang Marso 13, isa ka kriminal sa Dunblane, Scotland, ang nagsulod sa gymnasium sang isa ka eskwelahan kag ginpaniro ang 16 ka magagmay nga kabataan kag ang ila manunudlo. Nahisuno sa dumaan nga hurubaton sang balita sa telebisyon nga, ‘Kon may maduguon nga hitabo, mangin pangulong dinalan ini sang balita,’ nangin internasyonal ini nga balita. Ang pila ka eksperto sa panimuot nagsiling nga mahimo gintinguhaan sang kriminal sa Australia nga labawan ang kadamuon sang ginpatay sa Dunblane. Sing talalupangdon, sa Estados Unidos, ang ginatawag nga Zodiac killer, nga nagpakibang sa sulod sang mga tinuig sa Siudad sang New York, nagsiling nga gintinguhaan niya nga labawan ang iban pa nga mga kriminal nga iya nahibaluan.
Ang isa pa ka rason nga ginasiling sang madamo nga nangin kabangdanan sang epidemya sang pagpamatay amo ang sekso kag kasingki nga ginapakita sa mga pelikula kag mga video. Ang Herald Sun sa Australia nagreport: “Nakuha ang kabug-usan nga 2000 ka masingki kag pornograpiko nga mga video sa balay sang ginasiling nga kriminal sa Port Arthur nga si Martin Bryant. . . . Natukiban ang tinago nga mga video sang ang igtalupangod ginliso sa papel sang masingki nga mga pelikula sa masaker sa Port Arthur.” Sing kaanggid, ginreport sang Daily News sa New York nga “duha ka kahon sang pornograpiko nga mga video ang yara sa single nga katre” sang nagtu-ad nga Zodiac killer.
Sang nagbantog ang masaker sa Port Arthur, ang pila ka mga estasyunan sang telebisyon nagbag-o gilayon sang ila naiskedyul nga mga programa. Pagkatapos sadto, ang kolumnista nga si Penelope Layland nagsulat sing artikulo nga “Pagkasalimpapaw sang TV sa Kasingki kag Kalisdanan” kag nagsiling: “Sa isa ka paagi, ang indi pagpaguwa sing masingki nga palaguwaon isa lamang ka hapaw kag umalagi nga rutina. Sa buas, sa masunod nga semana, sa masunod nga bulan, ipaguwa liwat sang mga estasyunan sang telebisyon ang masingki nga palaguwaon subong kinaandan.”
Apang, agod mahantop kon ngaa ang kasingki lapnag na gid karon, dapat naton usisaon ang Biblia. Madugay na sini gintagna nga “sa katapusan nga mga adlaw magaabot ang makahalanguyos nga mga tion. Kay ang mga tawo mangin . . . wala sing pagpugong sa kaugalingon, mga mabangis, mga wala sing gugma sa kaayuhan.” (2 Timoteo 3:1-5) Busa, ang paglapnag sang kasingki karon nagapamatuod lamang sing dugang nga yari na kita sa katapusan nga mga adlaw kag nga malapit na ang katapusan sining sistema sang mga butang.—Mateo 24:3-14.
Subong sang panagupnop sang madamo, ang mga demonyo—ang malaut dimakita nga mga espiritu—nadalahig sa paglapnag sang mabangis, ditawhanon nga panimuot. (Efeso 6:12) Sa tapos malaragway ang pagpalayas kay Satanas nga Yawa kag sa iya mga demonyo gikan sa langit, ang Biblia nagasiling: “Kailo sa duta kag sa dagat, kay ang Yawa nagpanaug sa inyo, nga may daku nga kaakig, bangod nahibaluan niya nga may malip-ot lamang sia nga tion.” (Bugna 12:7-9, 12) Yari na kita sa sina nga panag-on sang kailo, kag ginagamit ni Satanas kag sang iya mga demonyo ang bisan anong paagi nga mahimo nila agod sugyuton ang mga tawo sa paghimo sing dugang nga kasingki.
Apang, si Satanas, ang iya mga demonyo, kag ang ila malaut nga kalibutan madula sa indi madugay, kag ang paggahom sang Ginharian sang Dios magapaluntad sing isa ka bag-ong kalibutan sang pagkamatarong. (Daniel 2:44; Mateo 6:9, 10; 2 Pedro 3:13; 1 John 2:17; Bugna 21:3, 4) Si Jenny nagsiling: “Sa karon, ‘nagahibi [kami] upod sa mga tawo nga nagahibi,’ apang handum namon nga ipaambit ang amon paglaum sa Ginharian sa mga tawo sa komunidad nga naapektuhan sing daku sining trahedya.”—Roma 12:15.
[Retrato sa pahina 21]
Ang Broad Arrow Café, diin nagsugod ang masaker
[Map Credit Line sa pahina 20]
Mountain High Maps® Copyright © 1995 Digital Wisdom, Inc.