Tubtob sa mga Dulunggan sang Isa ka Bata
ISA ka adlaw, sang gamay pa ako, isa ka lalaki ang nagduaw sa amon puluy-an sa Coeburn, Virginia, E.U.A., kag samtang ginasugilanon niya ang akon amay, ginsugilanon ako sang iya kaupod agod malingaw ako. Ang iya ginhambal naglaragway sing larawan sang isa ka paraiso nga duta, diin makahampang ako upod sa ilahas nga mga sapat nga indi magahalit sa akon. (Isaias 11:6-9) Ginpaathag niya nga indi na gani ako mapatay kundi mabuhi sing dayon diri mismo sa duta. Katahom gid sini nga palaabuton! Ang ginsiling sang lalaki tuhoy sa pagkabuhi sa duta nakaapektar gid sa akon sing daku.—Isaias 25:8; Bugna 21:3, 4.
Handum Para sa Isa ka Relihion
Bangod sang madamo nga problema sa pag-asawahay, nagdiborsio ang akon mga ginikanan pila ka tuig sang ulihi, kag nagpuyo ako upod kay Nanay. Wala gid sia sing interes sa relihion. Gani nagmatumato ako sa pagtambong sa Sunday school sa bisan anong simbahan nga lalakton lang gikan sa amon puluy-an. Sang ulihi namana liwat si Nanay, kag nagsaylo kami upod sa akon amay-amay sa Indiana. Apang, kada tig-ilinit, nagakadto ako sa Virginia agod duawon si Tatay.
Si Tatay nangin isa ka Mormon wala madugay pagkatapos sang diborsio, kag gintinguhaan niya nga ipatudok sa akon ang iya bag-o nasapwan nga relihion. Sang tig-ilinit sang 1960, sang nagaedad ako sing walo ka tuig, ginbawtismuhan niya ako. Apang, kon didto ako sa Indiana, nagatambong ako sa bisan anong simbahan nga malapit sa balay. Tanan sila nagatudlo nga kon maayo kita, magakadto kita sa langit kag kon malain kita, magakadto kita sa impierno diin paantuson kita. Sanglit nabatyagan ko nga indi mahangpan sang tanan ang akon luyag nga magpuyo sa duta sa baylo nga sa langit, wala ko ginsugiran ang bisan sin-o tuhoy sini.
Sang nagaedad ako sing 11 anyos, nagsaylo si Tatay sa Oregon. Ginluyahan ako sing daku kag naugot gid. Ang akon amay-amay isa ka ateista kag alkoholiko, kag ginayaguta niya ako bangod sang akon pagtuo. Ginbansagan niya ako nga si Inday Nagapabuotbuot, kag kon maghibi na ako, nagasiling sia: “Ngaa indi ka magpanawag sa imo Dios agod buligan ka niya?” Wala sing isa sa balay ang interesado sa Dios. Masubo yadto, kag mabudlay nga mga tuig. Gin-abusuhan ako sa pisikal, sa hambal, kag sa sekso. Nagakaumpawan ako paagi sa pagpakighambal sa Dios bangod pirme ko mabatyagan nga sia lamang ang isa nga nagaulikid sa akon.
Ginbiyaan ni Nanay ang akon amay-amay, kag nauntat ang pag-abuso. Apang, imol kami kaayo, kag ginbudlayan si Nanay sa pagsagod sa amon. Sang 13 anyos na ako, nagbalik kami sa Virginia agod duawon ang akon tiya. Isa sia ka mabuot, sinsero nga babayi nga isa ka Baptist. Palangga ko gid sia. Sang ginpangabay niya ako nga updan sia sa simbahan, nagpasugot ako. Nag-upod pa gani si Nanay, kag nadumduman ko kon daw ano kasadya ang magpuyo didto upod anay sa amon pamilya. Pagkatapos sang amon pagduaw, hinadlukan ako nga magpauli. Nahadlok ako nga kon magpauli ako, madalahig ako sa imoralidad. Gani ginpangabay ko ang akon tiya nga paistaron niya ako, kag ginpasugtan ako ni Nanay nga magpabilin.
Ginbaklan ako sang akon tiya sing King James nga bersion sang Biblia. Nalipay gid ako sa sini kag ginabasa ang bahin sini kada gab-i. Nabasahan ko sa katapusan nga kapitulo sang Biblia nga “kon ang bisan sin-o magdugang sa sining mga butang, idugang sa iya sang Dios ang mga kalalat-an nga nasulat sa sining tulun-an.” (Bugna 22:18, 19 King James Version) Gani nangatarungan ako, ‘Paano ako makapati nga ang Libro sang Mormon bahin sang balaan nga Kasulatan?” Sa amo, namat-od ako nga mangin isa ka Baptist.
Walay sapayan nga napat-od ko nga naglain ang buot ni Tatay sang ginsulatan ko sia tuhoy sa akon desisyon, ang iya lamang ginkomento amo nga nalipay sia nga nagasimba ako. Pirme ko ginaupdan ang amon ministro sa Baptist sa puluy-an sang mga tawo agod agdahon sila sa amon mga tent revival. Nagpati ako nga ginahimo ko ang kabubut-on sang Dios paagi sa pagduaw sa mga tawo sa ila mga puluy-an kag sa pagpakighambal sa ila tuhoy sa dalanon ni Jesus.
Apang, daku gihapon ang akon handum nga magpuyo sa isa ka paraiso nga duta sangsa langit. Apang nabasahan ko ang masunod nga dinalan sa Biblia, kag nakahatag ini sa akon sing paglaum: “Pangabay, kag igahatag ini sa inyo; pangitaa, kag masapwan ninyo ini; magpanuktok, kag pagabuksan kamo: kay ang bisan sin-o nga nagapangabay pagahatagan; kag sia nga nagapangita makasapo; kag sia nga nagapanuktok pagabuksan.”—Mateo 7:7, 8, KJ.
Pagpamana kag Pamilya
Sang masunod nga tuig nagbalik ako agod magpuyo upod kay Nanay sa Indiana. Sang 15 anyos lamang ako, namana ako, nagbusong, kag nagbiyahe sakay sa bus padulong sa bagatnan nga California. Indi ko pa kilala sing maayo ang pamilya sang akon bana, apang luyag ko nga batunon nila ako. Mga Pentecostal sila, kag ginsugiran ako sang magulang nga babayi sang akon bana tuhoy sa mga dulot sa paghambal sing lainlain nga mga hambal. Gani sang mag-upod ako sa ila serbisyo sa pangamuyo isa ka gab-i, nangamuyo ako nga tugutan ako nga makahambal sing iban nga mga hambal.
Sang hinali, sa tion sang serbisyo nadaug ako sing isa ka pinasahi nga balatyagon. Nagpalangurog ako, kag ang akon dila nagwiriwiri nga indi makontrol. Nagsinggit ang manugbantala nga nagsulod sa akon ang espiritu, kag ginpikpik niya ako sa likod. Pagkatapos, ginhakos ako sang tanan kag ginsilingan ako kon daw ano ka makadalayaw nga gingamit ako sang Dios sa sining paagi. Apang ginligban ako kag ginhadlukan. Wala ko mahangpan kon ano ang akon ginhambal.
Wala madugay sang ulihi, nakatigayon ako sing mga komplikasyon sang akon pagbata sang amon una nga anak. Ginsilingan sang pastor sang simbahan ang akon bana nga gindugangan sang Dios ang akon kasakit sa pagpanganak bangod indi sia isa ka Cristiano. Nagahilibion nga nagpalapit sa akon ang akon bana kag nagsiling nga kon sa banta ko makabulig ini, magapabawtismo sia. Ginsilingan ko sia nga napat-od ko nga wala ginapahog sang Dios ang mga tawo agod mag-alagad sa iya.
Pagguwa sa Simbahan
Isa ka Domingo, pagkatapos sang iya sermon, nangayo sing amot ang pastor sa kongregasyon. Ang simbahan kinahanglan nga kay-uhon bangod nahalitan ini sang linog. Sang ginpasa ang pinggan sa koleksion, ginbutang ko ang tanan ko nga kuwarta. Pagkatapos maisip ang kuwarta, sa baylo nga pasalamatan ang kongregasyon, ginlaygayan sila sang pastor nga buksan ang ila mga bulsa kag mga tagipusuon para sa sining takus nga tulumuron. Nian liwat niya nga ginpasa ang pinggan. Wala na ako sing kuwarta, gani sa daku nga kahuya dalidali ko nga ginpasa ang pinggan. Gilayon nga gin-isip liwat sang pastor ang kuwarta, kag sa liwat wala gani magpasalamat sa ila, nagsiling sia nga kulang pa ini. “Wala sing isa ang makahalin tubtob indi naton makuha ang kuwarta nga kinahanglanon sa paghimo sing hilikuton sang Dios,” siling niya.
Nagahulat ang akon bana sa guwa, kag nahibaluan ko nga ginatak-an na sia. Indi lang sia ang ginatak-an. Gintak-an ako sa pagkadimapinasalamaton sang pastor. Gani upod sa akon lapsag nga akon ginakugos kag sing mga luha nga nagatululagay sa akon guya, nagguwa ako sa simbahan sa atubangan sang tanan. Nanumpa ako nga indi na gid ako magsulod sa bisan anong simbahan. Walay sapayan nga wala na ako nagakadto sa simbahan, wala ako mag-untat sa pagtuo sa Dios. Ginbasa ko gihapon ang akon Biblia kag gintinguhaan nga mangin isa ka maayo nga asawa.
Pagtuon sa Kamatuoran sang Biblia
Sang matawo ang amon ikaduha nga bata, ginsugilanon sang amon mga abyan nga nagsaylo sa Texas ang tag-iya sang ila ginaarkilahan nga paarkilahan sa amon ang balay nga ila ginaistaran. Sang manuglakat na ang akon abyan nga si Pat, ginsilingan niya ako nga may isa ka babayi nga nakautang sa iya sing kuwarta kag magaabot sia agod bayaran ini. Ginpangabay ako ni Pat nga ipadala ini sa iya sa Texas. Pila ka adlaw sang ulihi, duha ka babayi ang nanuktok sa amon ganhaan. Naghunahuna nga dala nila ang kuwarta, ginpasulod ko sila gilayon. Ginpaathag ko nga nagsaylo na si Pat apang ginsilingan niya ako nga magakari sila. “Ti, maayo gid si Pat,” siling ni Charlene Perrin, isa sang mga babayi. “Nanamian gid kami magtuon upod sa iya.”
“Ano?” pamangkot ko. “Pagtuon? Basi nagsala kamo.” Ginpaathag ni Charlene nga nakasugod sila sing isa ka pagtuon sa Biblia upod kay Pat. Sang mahibaluan nga nagsaylo na si Pat, ginpamangkot ako ni Charlene kon luyag ko magtuon sa Biblia. “Aba huo,” sabat ko sing masinaligon. “Tudluan ko kamo sing tanan nga luyag ninyo mahibaluan.” Ginpabugal ko ang akon pagbasa sing Biblia, kag ginhunahuna ko nga mapalig-on ko sila.
Ginpakita sa akon ni Charlene ang libro nga Ang Kamatuoran nga Nagadul-ong sa Kabuhi nga Dayon, kag ginbasa namon ang Salmo 37:9: “Ang mga malauton pagautdon, apang yadtong nagasalig kay Jehova amo ang magapanag-iya sing duta.” Nakibot ako. Sa akon mismo kaugalingon nga Biblia, nagasiling nga ang mga tawo magapanag-iya sing duta. Pagkatapos sadto, madamo ako sang ginpamangkot sa gilayon. Nagyuhum si Charlene kag nagsiling: “Aba, hinayhinay lang! Isaisahon lang naton.” Ginpaathag niya ang pagkinahanglan sing isa ka regular, sistematiko nga pagtuon sa Biblia. Sa gilayon, gin-agda niya ako sa Kingdom Hall, ang ngalan sang duog tilipunan sang mga Saksi ni Jehova.
Ginsugiran ko si Charlene tuhoy sa akon eksperiensia sa pinggan sang koleksion kag indi ko na luyag magbalik sa simbahan. Ginpaathag niya sa akon ang Mateo 10:8, nga nagasiling: “Nagbaton kamo nga wala sing bayad, maghatag nga wala sing bayad.” Ginpaathag niya nga wala sing pinggan sang koleksion nga ginapasa sa mga miting sang mga Saksi ni Jehova kag ang tanan nga donasyon boluntaryo. Nagsiling man sia nga may isa ka kahon-alamutan sa tilipunan kag ang mga tawo nga luyag mag-amot makahulog sing amot sa sini kon luyag nila. Namat-od ako nga tilawan liwat ang relihion.
Samtang nagatuon ako, natun-an ko kon ngaa naglain ang akon pamatyag sang maghambal ako sing iban nga hambal sa simbahan sang Pentecostal. Ang dulot sang Dios sa paghambal sa nanuhaytuhay nga hambal ginhatag sa unang mga Cristiano agod maghatag sing pamatuod nga yara sa ila ang iya balaan nga espiritu. Ining milagruso nga dulot nagpaposible man sang praktikal nga katuyuan sa paghimo sing kamatuoran sang Biblia nga matigayon sang mga tawo sa nanuhaytuhay nga kadutaan nga nagtipon sing tingob sang Pentecostes 33 C.E. (Binuhatan 2:5-11) Apang, ang Biblia nagasiling nga ang dulot sang Dios sa paghambal sing lainlain nga mga hambal magauntat, nga natabo gid pagkatapos mapatay ang mga apostoles. (1 Corinto 13:8) Apang agod bulagon ang hunahuna sang katawhan, ginpahanabo ni Satanas kag sang iya mga demonyo ang iban sa pagwiriwiri nga indi mahangpan, nga nagpapati sa iban nga may balaan sila nga espiritu sang Dios.—2 Corinto 4:4.
Pagpamatok sang Pamilya
Sang ulihi, nahangpan ko ang katuyuan sang Dios para sa duta kag nga indi ako dapat mangin bahin sang malauton nga kalibutan. (Juan 17:16; 18:36) Natun-an ko man nga dapat ko utdon ang tanan ko nga kaangtanan sa Babilonia nga Daku, nga isa ka simbolo nga gingamit sa Biblia para sa bug-os kalibutan nga emperyo sang butig nga relihion. (Bugna 18:2, 4) Sang ginsugiran ko si Tatay nga mapabawtismo ako, sa sini nga tion subong isa sang mga Saksi ni Jehova, naakig sia. Ginpangabay niya ako nga indi mangin isa ka Saksi. Amo yadto ang una nga tion nga nakit-an ko sia nga nagahibi. Naghibi ako upod sa iya, kay indi ko gid luyag nga masaklaw sia. Apang nahibaluan ko nga nasapwan ko ang kamatuoran kag nga indi ko matalikdan si Jehova.
Namatok ang akon bug-os nga pamilya nga mangin isa ako sang mga Saksi ni Jehova. Temporaryo ako nga nag-untat sa pagtambong sa mga miting. Nabuhinan sini ang pagpamatok gikan sa mga katapo sang akon pamilya, apang ginsubuan gid ako. Nahibaluan ko nga indi gid ako magmatawhay tubtob nga indi ko paghimuon ang kabubut-on ni Jehova. Sang tigpalanyaga isa ka adlaw, naghapit ako sa balay ni Charlene kag ginsilingan sia nga kinahanglan ko nga magpabawtismo. “Sa banta mo indi ayhan kinahanglan nga magbalik ka anay sa pagtambong sa mga miting?” pamangkot niya. Ginsilingan ko sia nga determinado na ako karon nga wala sing makaupang sa akon sa pagdedikar kay Jehova. Nabawtismuhan ako sang Septiembre 19, 1973.
Kapin sa 23 ka tuig na ang nagligad. Sing mapinasalamaton kutob sadto gintahod sang akon pamilya ang akon desisyon, kag wala sing isa sa ila ang nagapilit sa akon nga biyaan ang kamatuoran, nga ginaapresyar ko gid sing daku. Apang, ang akon subang nga bata nga babayi, si Kim, amo pa lamang ang nangin isa ka Saksi. Ang iya matutom nga pag-alagad kay Jehova nangin isa ka daku nga tuburan sing pagpalig-on sa akon sa sulod sang mga tinuig.
Isa ka Halandumon nga Pagkit-anay
Sang 1990, sang magbalik ako sa Coeburn, Virginia, agod magduaw, ginpangabay ko si Nanay nga maghapit sa Kingdom Hall agod makit-an ko kon ano oras magasugod ang mga miting sa Domingo. Sang pag-agi namon sa driveway, nagsiling sia nga nagapuyo kami sadto anay sa isa ka balay sa likod lamang sang tilipunan, sa pihak sang riles sang tren. Ang balay madugay na nga nasunog, kag ang lamang nga nabilin amo ang tisa nga simburyo. “Bata ka pa sadto,” siling niya, “sobra sa tatlo ukon apat ka tuig.”
Sang Domingo mainit ako nga gin-abiabi sa Kingdom Hall. Sang masugilanon ko si Stafford Jordan, nasambit ko nga sang bata pa ako nagaistar ako sa balay nga yara anay sa likod sang Kingdom Hall. Gintulok niya ako sing maayo. “Nadumduman ko na ikaw!” tuaw niya. “Ikaw yadtong bata nga babayi nga gumon ang buhok nga daw amo sini kataas [ginsenyas niya sang iya kamot]. Ginakobrehan namon ini nga teritoryo sang masugilanon sang akon kaupod ang imo amay. Gintinguhaan ko nga lingawon ikaw paagi sa pagsugilanon sa imo tuhoy sa Paraiso.”
Wala ako makatingog. Naipit ang akon tingog samtang ginasugiran ko sia tuhoy sa akon pagpangita sa kamatuoran sang Biblia. “Sang bata pa ako, gintanom mo ang mga binhi sang kamatuoran sa akon diutay nga tagipusuon!” siling ko. Nian ginsugiran niya ako nga may paryente ako sa bahin sang akon lolo, si Stephen Dingus, nga nangin isa ka matutom nga Saksi. Wala gid sia ginasapak sang inyo pamilya, kay batok gid sila. “Pat-od nga ipabugal ka gid niya!” siling ni Utod Jordan.
Kon ginapamensar ko ang mga tuig nga ginhinguyang ko sa sulod sang organisasyon ni Jehova, nagapasalamat gid ako sa gugma kag kaayo nga ginpakita sa akon. Huo, may mga tion gihapon nga ginasubuan ako kon yara ako sa Kingdom Hall kag makita ang mga pamilya nga nagaalagad sing tingob kay Jehova, kay sa masami nagatambong ako nga nagaisahanon. Apang gilayon ko nga ginadumdom nga kaupod ko si Jehova. Pirme sia nagatulok, kag kon nabaton sang akon tagipusuon ang kamatuoran nga ginhambal sa mga dulunggan sang isa ka diutay nga bata madamo nga tuig na ang nagligad, gintugutan niya ini nga magtubo kag mamukadkad.
“Salamat, Utod Jordan,” siling ko, “sa paghinguyang sing tion sa pagsugid tuhoy sa Paraiso sa isa ka masabad nga bata nga babayi!”—Panugiron ni Louise Lawson
[Retrato sa pahina 13]
Upod kay Stafford Jordan sang nakita ko sia liwat sang 1990