Sobra nga Ehersisyo

“ANG dikinaandan nga bunga sang kahublagan sa ehersisyo,” siling sang The Toronto Star, amo ang “mga tawo nga wala sing kontrol sa pag-ehersisyo.” Ang Star nagreport nga ang sobra nga pag-ehersisyo nagaapektar sa mga lalaki kag babayi. Ang mga lalaki mahimo nagaehersisyo sing sobra agod pabalikon ang kusog sang pagkapamatan-on, siling sang pila ka doktor kag mga manugterapiya, apang ang sadsaran nga rason nga ang mga babayi nagapasobra sa pag-ehersisyo amo ang malaw-ay nga korte sang lawas kag ang problema sa pagkaon.

Madamo ang nagaehersisyo agod nga mag-ayo ang ila pamatyag kag dagway apang sa ulihi nagaehersisyo sing sobra bangod lamang kinahanglan nga mag-ehersisyo. Si Richard Suinn, isa ka sikologo sa isport kag manuglaygay sa pila ka hubon sa Olimpiada, nagsiling nga ang sobra nga pag-ehersisyo nagakatabo kon ini “nasandig sa emosyonal nga panaad sa baylo sang simple nga pag-ehersisyo.” Kon nagaatipan sining problema, ginatinguhaan sang mga doktor kag mga terapista nga pat-uron kon ano ang nangin epekto sang pag-ehersisyo sa kabuhi sang mga pasyente. Kon ang mga pasyente nagaatubang sing makahalangkat nga karera upod ang pag-atipan sa balay kag kabataan, negatibo ang epekto sang sobra nga pag-ehersisyo sa ila pagkatawo. “Mahimo nga mangin mapagros gihapon sila sa pisikal, apang mahimo nga matublag ang ila pagpakig-angot sa katilingban, sa trabaho kag sa pamilya,” suno kay Dr. Thomas Schwenk, isa ka propesor sang pangpamilya nga medisina.

Ginalista sang Star ang pila ka nagapaandam nga mga tanda nga naangot sa mga giyan sa ehersisyo: ‘Ang pagpili sang mga ehersisyo nga nagaisahanon, subong sang pagbisikleta, paglangoy, pagdalagan, ukon weight lifting; indi mapasibuon sa mga eskedyul sa ehersisyo; ang pagpati nga ang pag-ehersisyo kinahanglanon gid kag indi dapat kalimtan; kag ang pagkaguba sang pila ka bahin sang personal nga kabuhi.’

Walay sapayan nga ang mga tawo nga nagatrabaho sa patag sang pag-ehersisyo nagakilala sa benepisyo sang haganhagan nga ehersisyo, nagapaandam man sila sa makahalalit nga mga epekto sang sobra nga ehersisyo.​—⁠1 Timoteo 4:⁠8.