Ginsakdag sang Korte sa Europa ang mga Kinamatarong sang Isa ka Iloy

Suno sa manunulat sang Magmata! sa Pransia

SANG Disiembre 16, 2003, ang European Court of Human Rights sa Strasbourg, Pransia, nagdesisyon nga ang mga korte sa Pransia nakasala sing relihioso nga pagpasulabi kontra kay Séraphine Palau-Martínez, nga isa sa mga Saksi ni Jehova.

Sang 1996, si Séraphine ginhatagan sing pahanugot nga diborsiohan ang iya bana, nga nag-abandona sa iya sang nagligad nga duha ka tuig. Ginhatag sa iya ang kinamatarong nga atipanon ang ila duha ka bata. Apang sang 1997, nga sadto halos tatlo ka tuig kag tunga na nga nagapuyo ang mga bata upod sa ila iloy, wala gin-uli sang amay ang mga bata sa tapos sila mamasyar. Si Séraphine nagsaysay: “Sang ginsugat ko ang mga bata sa eskwelahan, ang prinsipal nagtawag sing pulis. Gintugutan lamang ako nga makita ang akon mga bata sa atubangan sang mga pulis agod pat-uron nga wala ako nagapakighambal sa ila tuhoy sa akon relihion. Daw isa ako ka kriminal. Ginsilingan nila ako nga madala ko lamang pauli ang mga bata kon pirmahan ko ang isa ka sertipikasyon nga nagapasalig nga indi ako makighambal sa ila tuhoy sa Dios ukon sa Biblia ukon updon sila sa Cristianong mga miting.”

Nangayo sing bulig si Séraphine sa korte. Apang, sang 1998, ang Court of Appeal sang Nîmes nagdesisyon nga ang kinamatarong sa pag-atipan sa mga bata ihatag sa amay. Ginpakamatarong sang korte ang desisyon sini paagi sa matigdas kag sobra nga pagmulay sa mga prinsipio nga ginapatihan sini nga ginatudlo sang mga Saksi ni Jehova sa ila mga bata. “Masakit gid,” hinumdom ni Séraphine, “akusahan nga ginahalitan ko ang mga bata, samtang ginahimo ko lamang ang tanan agod hatagan sila sang ginahunahuna ko nga pinakamaayo sa ila​​—⁠ang padakuon sila nga isa ka Cristiano.”

Sang ang Cour de Cassation, nga amo ang supreme court of appeal sang Pransia, nag-ugyon sa appellate court (korte nga nagarepaso sang kaso), si Séraphine nagdesisyon nga ipasaka ang kaso sa European Court of Human Rights. Sa 6-kontra-1 nga desisyon sini, nagsiling ini nga “wala gid nagaduhaduha ang Korte nga ang court of appeal sang [Pransia] may pagpasulabi nga nagdesisyon sa ulot sang duha ka ginikanan pasad sa relihion sang aplikante. . . . Pagpakita ini sing paboritismo.” Naghinakop ini nga ang desisyon sang korte sang Pransia wala ginpasad sa ikasarang ni Séraphine sa pag-atipan sa iya mga bata—butang nga wala gid ginduhaduhaan—ni sa aktual nga ebidensia kundi sa “kabilugan nga mga obserbasyon tuhoy sa mga Saksi ni Jehova.” Bangod sining relihioso nga pagpasulabi kag paglapas sa mga kinamatarong ni Séraphine, ang Korte nagmando nga bayaran sang Pransia ang danyos kag mga nagasto sa kaso.

Naghisanto ini sa desisyon sang European Court of Human Rights sang Hunyo 1993 sa kaanggid nga kaso diin ang Korte naghinakop nga ang Austria nagpakita sing pagpasulabi kontra kay Ingrid Hoffmann, nga isa sa mga Saksi ni Jehova, pasad sa iya relihion.⁠a “Nahisanto sa desisyon sa kaso ni Hoffmann,” siling sang Pranses nga magasin tuhoy sa layi nga La Semaine juridique, “nagapamatuod ini nga ang desisyon tuhoy sa awtoridad sang ginikanan indi lamang dapat ipasad sa relihion.” Ang abogado ni Séraphine nagsiling: “Ini nga desisyon importante gid, kay ang naestablisar na nga desisyon sang Korte sa nauna nga mga kaso kaanggid sa sini wala nagabag-o sa pag-insister sa kinamatarong sang mga Saksi ni Jehova nga mga ginikanan sa isa ka walay ginadampigan nga desisyon.”

Sang ginpamangkot kon ano ang masiling niya sa desisyon, si Séraphine, nga nagapuyo karon sa Espanya, nagsiling: “Nalipay gid ako kag naumpawan. Sang ginkuha sa akon ang akon mga bata bangod sang akon relihion kag wala ko sila makita sa sulod sang lima ka tuig, daku gid ini nga pagtilaw sa akon, apang ginpabaskog ako ni Jehova. Nagalaum ako nga ini nga desisyon magabulig man sa iban nga may problema subong sa akon.”

[Nota]

[Retrato sa pahina 12]

Séraphine