Mga Saksi ni Jehova Nabindikar sa Baisay Kon Sin-o ang Magaatipan sa Bata
SI Ingrid Hoffman nakig-away sugod pa sang tungatunga sang nagligad nga dekada agod nga sia ang magaatipan sa iya duha ka anak. Taga-Austria sia, natawo kag ginpadaku nga isa ka Romano Katoliko. Namana sia sing pareho niya nga Katoliko, kag nagbun-ag sing isa ka anak nga lalaki sang 1980 kag sing anak nga babayi sang 1982. Apang sang 1983 ang mag-asawa nagdiborsio; sila nga duha nagtinguha nga amo ang magaatipan sa kabataan. Nagsumbong ang amay nga ang relihion sang iloy—nangin isa sia sang mga Saksi ni Jehova—magahalit sa kabataan, magadingot sa ila sing normal, nagakaigo nga pagpadaku. Ginsambit niya ang mga hulusayon subong sang pagpangindi sang mga Saksi sa pagsaulog sing pila ka selebrasyon nga kinaandan sa iya pungsod kag ang ila paglikaw sa pagpatughong sing dugo.—Binuhatan 15:28, 29.
Ining daw matarong nga mga argumento wala makakombinsi. Ginsikway sang una nga korte nga nagbista kag sang gin-apelaran nga korte ang mga pangangkon sang amay kag ginhatag sa iloy ang pag-atipan sa kabataan. Apang, sang Septiembre 1986, ginbaliskad sang Korte Suprema sang Austria ang desisyon sang manubo nga korte. Nagsiling ini nga ining mga desisyon naglapas sa Austrian Religious Education Act, isa ka kasuguan nga nagaobligar sa natawo-sa-Katoliko nga kabataan nga edukaron subong mga Katoliko. Ang korte nagdesisyon man nga indi para sa daku nga kaayuhan sang kabataan kon tugutan sila nga padakuon subong mga Saksi ni Jehova!
Ano nga tikang ang ginhimo ni Ingrid Hoffman batok sa sadtong athagon nga dimakatarunganon nga pagpamatok sa relihion? Sang Pebrero 1987 ang iya kaso ginpresentar sa European Commission of Human Rights. Sang Abril 13, 1992, ginsumiter sining komisyon, nga ginatapuan sang mga hukom nga nagatiglawas sa nanuhaytuhay nga katapo nga mga pungsod sang European Community ang kaso agod bug-os nga pamatian sang European Court of Human Rights.
Nagdesisyon ang korte sang Hunyo 23, 1993. Ini nagsiling: “Ang European Court nagabaton busa nga indi alangay nga pagtratar ang ginpakita kag ang kabangdanan sinang indi alangay nga pagtratar amo ang relihion; ining konklusion ginasuportahan sang ginapahangop kag ginasiling sa nasulat nga opinyon sang Korte Suprema [sang Austria] tuhoy sa praktikal nga mga resulta sang relihion sang aplikante. May ginadampigan inang indi alangay nga pagtratar.” Nagsiling pa ini nga “ang pagtimbangtimbang [sang Korte Suprema] sa mga katunayan tuhay sa manubo nga mga korte, nga may pangatarungan nga ginasakdag sing dugang pa sang opinyon sang isa ka eksperto sa sikolohiya. Walay sapayan sang posible nga mga argumento sa kabaliskaran, ang magkatuhay nga pagtamod bangod lamang sang pagkatuhay sa relihion indi mabaton.”
Sa boto nga lima kontra sa apat, ang mga hukom nagdesisyon pabor kay Ingrid Hoffman kag batok sa Austria, nagasiling, sa epekto, nga ang Austria dimakatarunganon nga nagdesisyon batok sa iya bangod sang iya relihion kag naglapas sang iya kinamatarong sa pagpadaku sang iya pamilya. Dugang pa, sa boto nga walo kontra sa isa, ginhatagan sia sang hukom sing danyos.
Ining talalupangdon nga kadalag-an para sa relihioso nga kahilwayan natigayon pagligad lamang sang isa ka bulan nga natigayon ang isa man ka kadalag-an sa sini gihapon nga korte—ang kaso ni Kokkinakis v. Gresya, nga nagpamatuod nga ginlapas sang Gresya ang kinamatarong sang isa ka tawo sa pagtudlo sang Pulong sang Dios sa balay kag balay. Ang mga nagahigugma sa kahilwayan sa bug-os nga kalibutan nagakasadya kon ang mga paninguha sa pagpugong sang relihioso nga kahilwayan maupangan kag ang personal nga mga kinamatarong sa pagsimba sa Dios kag magpadaku sing pamilya suno sa mga prinsipio sang Biblia ginaamligan.