Nagbag-o ang Pagpati sang isa Ka Maestra
◼ SANG nagligad nga mga tinuig, ang isa ka maestra sa Batumi, sa pungsod sang Georgia, namangkot sa iya mga estudyante tuhoy sa Napulo ka Sugo. Nagdayaw gid sia kay nasaulo ini sang isa niya ka estudyante nga si Anna. Nasabat man ni Anna sing maayo ang iban pa nga mga pamangkot tuhoy sa Biblia. Naintriga gid ang maestra, amo nga ginpamangkot niya si Anna kon ngaa madamo sia sing nahibaluan. Sang ginsugiran sia ni Anna nga nagatuon sia sa Biblia upod sa mga Saksi ni Jehova, ginsapar niya ini kag naghambal nga ang mga Saksi mga panatiko.
Isa ka bes, ginsugo sini nga maestra ang iya mga estudyante nga magsulat sing essay tuhoy sa kabuhi sa Georgia kag sa mga problema nga ginaatubang sini. Sa konklusion sang iya essay, si Anna nagsulat: “Ang bisan ano nga panikasog sang tawo nga bag-uhon ang nagakatabo indi gid magmadinalag-on bangod ang Jeremias 10:23 nagsiling, ‘Nahibaloan ko nga ang dalanon sang tawo wala sa iya kaugalingon, wala sa tawo nga nagalakat sa pagmando sang iya mga tikang.’ Ang tanan nga problema masolbar lamang sang Ginharian sang Dios.”
Pagkaaga, ginpadayaw sang maestra ang essay ni Anna sa iya mga klasmeyt kag nagsiling: “Nanamian gid ako kay pinasahi ang essay ni Anna, kag sia mismo ang nagsulat sini. Ginpaathag niya kon paano mabag-o ang kahimtangan sang kalibutan.” Nanamian man ang maestra sa batasan ni Anna, kag gindayaw niya sia sa atubangan sang iya mga klasmeyt bangod sang iya maayo nga paggawi kag disente nga pamayo.
Sang nagkadto ang mga Saksi ni Jehova sa ila balay, ginsilingan sila sang maestra nga sang una nagapati sia nga mga panatiko sila, pero nagbag-o ini bangod sa estudyante niya nga si Anna. Sang 2007, nagtambong ang maestra sa anibersaryo sang kamatayon ni Jesucristo upod sa mga Saksi ni Jehova kag namati gid sia sing maayo sa programa.
Pagkatapos sini, nagsiling ang maestra ni Anna nga nagdayaw gid sia mga Saksi ni Jehova kay madamo sila sing nahibaluan sa Biblia. Sa karon, regular sia nga nagatuon sa Biblia upod sa mga Saksi. Wala sing duhaduha nga kaangay sini nga maestra, bukas man ang imo hunahuna agod hibaluon kon ngaa subong sini ang pagpati kag paggawi sang iban. Ngaa abi indi ka mangabay sa mga Saksi ni Jehova sang isa ka pagtuon sa Biblia?
[Retrato sa pahina 21]
Nagasulat si Anna sang iya essay