Masubo Bisan Madamo sing Gadyet Para sa Komunikasyon
KADAMO gid subong sing paagi sa komunikasyon. Puede ka makatawag, maka-text, maka-e-mail, maka-chat, kag iban pa. Pero ngaa madamo gihapon ang ginasubuan?
Sa ila libro nga Loneliness—Human Nature and the Need for Social Connection, gintun-an sing maayo sang mga researcher nga sanday John T. Cacioppo kag William Patrick ang topiko parte sa kasubo. Nagsiling sila nga suno sa isa ka pagtuon, “ang pirme nga pag-internet mahimo magresulta sa pagdamo sang mga tawo nga ginasubuan kag gina-depress kay wala na sila personal nga nagakitaay ukon nagaistoryahanay.”
Ang kasakuon subong isa man ka rason kon ngaa halos wala na nagakitaay kag nagaistoryahanay ang mga tawo. Sa masami, indi makita sang nagatawag sa telepono ukon nagapadala sing mensahe sa kompyuter ang yuhum kag balatyagon nga ginapabutyag sa mata sang iya ginaistorya.
Ini nga mga sitwasyon nagakatabo indi lamang sa mga ulubrahan, kundi ilabi na sa sulod sang panimalay. Madamo nga pamilya subong ang wala na nagadungan kaon ukon nagainistoryahanay. Bangod sa kompyuter, ang tin-edyer nga mga kabataan daw may kaugalingon nga kalibutan. Pero bisan pa madamo sing gadyet para sa komunikasyon, madamo gihapon nga pamatan-on ang ginasubuan.
Bisan ang pag-asawahay mahimo man maguba bangod sa kasubo. Ang mag-asawa nga wala nagaistoryahanay daw pareho sa duha ka tawo nga nagaistar sa isa ka balay pero ang kada isa may kaugalingon nga kalibutan. Tama gid kasubo kon magbatyag ang isa nga nagaisahanon bisan pa updanay sila sang iya bana ukon asawa.
Ang mga nagasolo nga ginikanan mahimo nga ginasubuan man. Ang mga gadyet sa komunikasyon amo ang isa sa mga rason kon ngaa indi na sila makaistoryahanay sang ila kabataan. Madamo man nga single ang ginasubuan kay gusto nila nga may makaupod na sa kabuhi pero wala sila sing palamanhon ukon palangasaw-on.
May malain nga mga epekto ang kasubo. Mahimo magresulta ini sa pagpahubog, pagkaadik sa droga, sobra nga panginaon, imoralidad, kag paghikog pa gani. Gani importante nga mahibaluan naton kon ngaa nasubuan kita. Amo ini ang una nga tikang para mabatuan naton ang kasubo.