Gindesinyo Bala Ini?
Abilidad sang Pawikan sa Paglakbay
● Ginlaragway sang mga researcher ang paglakbay sang pawikan halin sa lugar nga iya ginaistaran pakadto sa iya ginapangitlugan subong “isa sa dalayawon nga abilidad sang mga kasapatan.” Madugay na sila nga interesado sa sini.
Binagbinaga: Kada duha asta apat ka tuig, nagakadto sa baybay ang bayi nga pawikan para mangitlog, dayon ginatabunan ini sing balas. Mga isa ka gatos ang iya maitlog sa isa ka buho. Kon mabuka na ang itlog, nagapalawod ang mga boto. Amo ini ang panugod sang ila dalayawon nga paglakbay nga mahimo mga 12,900 kilometros ang kalayuon. Pagligad sang pila ka tuig, magabalik ang bayi nga pawikan para mangitlog sa baybay diin sila ginboto!
Paano nagalakbay ang mga pawikan? “Daw may kaugalingon na sila nga mapa,” siling sang biologo nga si Kenneth Lohmann sang University of North Carolina sa Estados Unidos sa National Geographic News. Ginapakita sang research nga mahibaluan sang pawikan ang iya nahamtangan paagi sa anggulo kag kabaskugon sang magnetic field sang duta. Bangod sini nga abilidad, ining gamay kag daw makaluluoy nga mga boto sang pawikan makalakbay sing 12,900 kilometros sa bilog nga Atlantiko, “kag nagalakbay sila nga wala sing kaupod nga pawikan,” siling ni Lohmann.
Ano sa banta mo? Ang abilidad bala sang pawikan sa paglakbay natabuan lang, ukon gindesinyo ini?
[Retrato sa pahina 25]
NAHIBALUAN MO BALA?
● Pagkatapos nga makapangitlog ang pawikan, ginatabunan lang niya ini kag ginapabay-an.
● Para makagua sa alukaba, ginagamit sang boto ang iya unto nga ginatawag caruncle, nga nagakapungil lang kon makagua na sia.
● Ang 90 porsiento sang kabuhi sang mga pawikan ara sa dagat.
[Picture Credit Line sa pahina 25]
© Masa Ushioda/WaterF/age fotostock