Mangin Determinado

ANO ang kapuslanan sang imo pag-eskwela? Makakuha ka sing kaalam, kag suno sa Biblia ang “kaalam pangapin.” (Manugwali 7:12) Ngaa? Halimbawa: Imadyina nga nagalakat ka sa isa ka delikado nga lugar. Ano ang gusto mo—ikaw lang isa ukon may upod ka nga mga abyan nga makabulig sa imo? Gani, kon nakaeskwela ka, amo ini ang pila sa madamo nga “abyan” nga pirme makabulig sa imo:

• Ikasarang sa pagdesisyon. Kon mag-eskwela ka, makatigayon ka sang ginasiling sang Biblia nga “kaalam kag paghangop.” (Hulubaton 3:21, Maayong Balita nga Biblia, HPV) Makabulig ini sa imo nga masolbar ang imo mga problema sa baylo nga magpabulig na lang pirme sa iban.

• Pagpakig-angot sa iban. Ginalaygayan sang Biblia ang mga Cristiano nga palambuon ang mga kinaiya nga pagkamapinasensiahon kag pagpugong sa kaugalingon. (Galacia 5:22, 23) Sa imo pagpakig-angot sa lainlain nga mga tawo sa eskwelahan, mapalambo mo ini nga mga kinaiya pati na ang pagkamabinatason, pagkamatinahuron, kag pagkamaluluy-on, nga makabulig gid sa imo pirme.

• Mapuslanon nga paghanas. Ang pag-eskwela makatudlo sa imo sang kapuslanan sang maayo nga mga batasan nga makabulig sa imo sa pagpangita sing obra. Isa pa, samtang nagadugang ang imo nahibaluan sa mga nagakatabo sa imo palibot, nagadugang man ang imo paghangop sa imo kaugalingon kag kon ano ang mas importante sa imo. (Hulubaton 14:15) Bangod sini, makapanindugan ka sa imo mga prinsipio sing matinahuron.—1 Pedro 3:15.

Tandai: Bangod kinahanglan mo ang edukasyon, indi makabulig sa imo kon sagad mo pamensar ang mga butang nga indi mo nagustuhan sa eskwelahan. Sa baylo, mangin determinado paagi sa pagbinagbinag sang mapuslanon nga mga butang nga nasambit na. Kag basi may mapensaran ka nga dugang pa!

Tilawi nga himuon ini dayon. Pamensara kon ngaa luyag mo gid magmadinalag-on sa imo pag-eskwela.