Nadula Nila ang ila Puloy-an

TAN-AWA ang nagakatabu kataon. Sanday Adan kag Eva ginpagua sa katamnan sang Eden. Nahibal-an mo bala kon ngaa?

Bangod may ginhimu sila nga tuman kalain, butang nga wala ginpahimu sa ila. Ang Dios nagsiling sa ila nga makakaon sila gikan sa kakahoyan sang katamnan. Apang gikan sa isa ka kahoy ang Dios nagsiling nga indi sila magkaon, ukon mapatay sila. Iya lang yadtong kahoy. Subong nahibaloan naton, malain ang magkuha sing butang nga iya sang iban, indi bala?

Isa ka adlaw, sang isahanon si Eva sa katamnan, ang man-ug nakighambal sa iya. Hunahonaa ina! Ginsilingan sini si Eva nga magkaon sing prutas gikan sa kahoy nga gindumilian sa ila sang Dios. Karon, nahibaloan naton nga ang man-ug indi makahambal, indi bala? Gani mahimu gid nga may nagpahambal sa sining man-ug. Sin-o yadto?

Indi yadto si Adan. Gani mahimu gid nga isa yadto sa mga anghel nga ginhimu ni Jehova madugay na antes niya ginhimu ang duta. Ang isa ka anghel nagtuman ka bugalon. Luyag niya nga tumanon sia sang mga tao sa baylo nga si Jehova.

Ining anghel nagpahambal sa man-ug. Ginsilingan niya si Eva nga mangin kaangay sia sa Dios kon kaunon niya ang prutas, kag nagpati sia sa sini. Gani nagkaon sia, kag amo man si Adan. Ginlalis nila ang Dios, kag gani nadula nila ang ila matahom nga puloy-an.

Apang sa pila ka adlaw, patahumon sang Dios ang bug-os nga duta subong sang katamnan sang Eden. Sa ulihi maton-an ta kon paano ka makaambit sa paghimu sini. Apang karon, hibaluon ta kon ano ang natabu kanday Adan kag Eva.