Kapitulo 19

Pagpat-in sa Israel sang Dios

Palanan-awon 4—Bugna 7:​1-17

Tema: Ginapat-inan ang 144,000, kag ang dakung kadam-an nakit-an nga nagatindog sa atubangan sang trono ni Jehova kag sa atubangan sang Kordero

Tion sang katumanan: Kutob sang paglingkod ni Cristo Jesus sa trono sang 1914 tubtob sa iya Isa ka libo ka Tuig nga Paggahom

¹“Sin-o ang makatindog?” (Bugna 6:17) Huo, sin-o sa pagkamatuod? Kon laglagon na sang dakung adlaw sang kasingkal sang Dios ang sistema ni Satanas, ang mga manuggahom kag katawhan sang kalibutan magapamangkot sina. Para sa ila daw subong nga dulaon sang nagahilapit nga kalaglagan ang tanan nga tawhanon nga kabuhi. Apang amo bala sini ang matabo? Makalilipay nga ang manalagna sang Dios nagapasalig sa aton: “Ang bisan sin-o nga magtawag sa ngalan ni Jehova maluwas.” (Joel 2:32) Ginapamatud-an nanday apostol Pedro kag Pablo ina nga kamatuoran. (Binuhatan 2:​19-21; Roma 10:13) Huo, sila nga nagatawag sa ngalan ni Jehova amo ang maluwas. Sin-o ini sila? Makita naton ini samtang ginapahayag sang masunod nga palanan-awon.

² Makatilingala gid nga may makalampuwas sa adlaw sang paghukom ni Jehova, kay ginalaragway ini sang isa pa ka manalagna sang Dios sa sining mga pulong: “Yari karon! Ang unos ni Jehova, ang iya kasingkal nagaguwa, ang unos nga nagasilhig. Magabalingaso ini sa ulo sang mga malauton. Ang mapintas nga kaakig ni Jehova indi magbalik tubtob nga mahikot niya kag matuman niya ang mga tinutuyo sang iya tagipusuon.” (Jeremias 30:​23, 24) Hilingagawon nga maghimo kita sing mga tikang agod maluwas sa sina nga unos!​—Hulubaton 2:​22; Isaias 55:​6, 7; Sofonias 2:​2, 3.

Ang Apat ka Hangin

³ Antes ipaguwa ni Jehova ining kaalipungot, ang langitnon nga mga anghel may himuon nga isa ka pinasahi nga serbisyo. Nakita ini karon ni Juan sa palanan-awon: “Sa tapos sini nakita ko ang apat ka anghel nga nagatindog sa apat ka pamusod sang duta, nga nagapugong sang apat ka hangin sang duta, agod nga walay hangin nga maghuyop sa duta ukon sa dagat ukon sa bisan ano nga kahoy.” (Bugna 7:1) Ano ang kahulugan sini para sa aton karon? Ining “apat ka hangin” amo ang maathag nga simbulo sang malaglagon nga paghukom nga malapit na buhian sa malaut nga katilingban sang tawo, sa nagaalimbukad nga “dagat” sang malinapason nga katawhan, kag sa mataas nga tulad-kahoy nga mga manuggahom nga nagakuha sang ila supurta kag puwersa gikan sa katawhan sang duta.​—Isaias 57:​20; Salmo 37:​35, 36.

⁴ Wala sing duhaduha nga ining apat ka anghel nagalaragway sa apat ka grupo sang anghel, nga gamiton ni Jesus sa pagpugong sang paghukom tubtob sa gintangdo nga tion. Kon buhian na sang mga anghel ang hangin sang balaan nga kasingkal agod maghuyop sing dungan gikan sa aminhan, bagatnan, sidlangan, kag nakatundan, mangin daku gid ang kahalitan. Mangin kaanggid ini, apang sa makapakibot nga kasangkaron, sa paggamit ni Jehova sa apat ka hangin sa pagpaaplaag sa dumaan nga mga Elaminhon, nga nagdugmok kag naglaglag sa ila. (Jeremias 49:​36-38) Mangin isa ini ka mabaskog nga unos nga kapin ka makahalapay sa “unos” nga gingamit ni Jehova sa paglaglag sa pungsod sang Amon. (Amos 1:​13-15) Wala sing bahin sang organisasyon ni Satanas sa duta ang makatindog sa adlaw sang kaalipungot ni Jehova, kon bindikahon na niya ang iya pagkasoberano sing dayon.​—Salmo 83:​15, 18; Isaias 29:​5, 6.

⁵ Mapat-od bala naton nga ang paghukom sang Dios magahapay sa bug-os nga duta? Pamatii liwat ang iya manalagna nga si Jeremias: “Yari karon! Ang kalaglagan magaabot sa isa ka pungsod pakadto sa isa ka pungsod, kag ang isa ka mabaskog nga bagyo nagapulon gikan sa malayo nga mga ukbong sang duta. Kag sa sadto nga adlaw ang mga bangkay sang mga ginpamatay ni Jehova magalapta halin sa isa ka ukbong sang duta tubtob sa isa ka ukbong.” (Jeremias 25:​32, 33) Ang kadudulman magahil-ob sa sining kalibutan sa tion sining bagyo. Ang nagagahom nga mga ahensya sini uyugon kag madula. (Bugna 6:​12-14) Apang ang palaabuton indi mangin madulom para sa tanan. Para kay sin-o, nian, ginapunggan ang apat ka hangin?

Ang Pagpat-in sa mga Ulipon sang Dios

⁶ Nagpadayon si Juan sa paglaragway kon paano ang iban tandaan para sa kaluwasan, nga nagasiling: “Kag nakita ko nga nagakayab ang isa na man ka anghel gikan sa sidlangan, nga nagadala sang pat-in sang Dios nga buhi; kag nagsinggit sia sa mabaskog nga tingog sa apat ka anghel nga sa ila ginhatag ang gahom sa pagsamad sang duta kag dagat, nga nagasiling: ‘Dili ninyo pagsamara ang duta ukon ang dagat ukon ang kakahuyan, tubtob nga mapat-inan namon ang mga ulipon sang aton Dios sa ila mga agtang.’ ”​—Bugna 7:​2, 3.

⁷ Bisan pa wala ginhingadlan ining ikalima nga anghel, ang tanan nga pamatuod nagapakita nga mahimo gid nga sia ang ginhimaya nga Ginuong Jesus. Nahisuno sa pagka-Arkanghel ni Jesus, ginapakita sia diri nga may awtoridad sa ibabaw sang iban nga mga anghel. (1 Tesalonica 4:​16; Judas 9) Nagakayab sia gikan sa sidlangan, kaangay sang “mga hari gikan sa sidlangan”​—si Jehova kag ang iya Cristo—​nga nagkari sa paghukom, subong sang ginhimo nanday Hari Dario kag Ciro sang ginpaubos nila ang dumaan nga Babilonia. (Bugna 16:​12; Isaias 45:​1; Jeremias 51:​11; Daniel 5:31) Ining anghel nagaanggid man kay Jesus kay gintugyanan sia sa pagpat-in sa hinaplas nga mga Cristiano. (Efeso 1:​13, 14) Dugang pa, kon buhian na ang hangin, si Jesus ang magapanguna sa langitnon nga kasuldadusan sa paghukom sa mga pungsod. (Bugna 19:​11-16) Sing makatarunganon, nian, si Jesus amo ang magasugo nga punggan anay ang paglaglag sa dutan-on nga organisasyon ni Satanas tubtob mapat-inan ang mga ulipon sang Dios.

⁸ Ano ining pagpat-in, kag sin-o ining mga ulipon sang Dios? Ang pagpat-in nagsugod sang Pentecostes 33 C.E. sang ang nahaunang Judiyong mga Cristiano ginhaplasan sing balaan nga espiritu. Sang ulihi, ang Dios nagtawag kag naghaplas sing “katawhan sang mga pungsod.” (Roma 3:​29; Binuhatan 2:​1-4, 14, 32, 33; 15:14) Si apostol Pablo nagsulat tuhoy sa garantiya sang hinaplas nga mga Cristiano nga sila “iya ni Cristo” kag nagdugang nga ang Dios “nagbutang man sang iya pat-in sa amon kag naghatag sang tanda sang magaabot, nga amo, ang espiritu sa amon mga tagipusuon.” (2 Corinto 1:​21, 22; ipaanggid ang Bugna 14:1.) Sa amo, sa tapos maadoptar ining mga ulipon subong espirituwal nga mga anak sang Dios, nagabaton sila sing tanda nga abanse sa ila langitnon nga panublion​—isa ka pat-in, ukon pangako. (2 Corinto 5:​1, 5; Efeso 1:10, 11) Nian makasiling sila: “Ang espiritu gid nagasaksi upod sa aton espiritu nga mga anak kita sang Dios. Kon kita mga anak, nian mga manunubli man kita: mga manunubli matuod sang Dios, apang mga masigkamanunubli ni Cristo, kon magaantos kita kaupod niya agod nga paghimayaon man kita kaupod niya.”​—Roma 8:​15-17.

⁹ “Kon magaantos kita kaupod niya”​—ano ang buot silingon sina? Agod mabaton ang korona sang kabuhi, ang hinaplas nga mga Cristiano dapat magbatas kag magmatutom tubtob sa kamatayon. (Bugna 2:10) Wala ini nagakahulugan nga ‘sa tion nga maluwas, luwas pirme.’ (Mateo 10:​22; Lucas 13:24) Sa baylo, ginalaygayan sila: “Himulati ninyo nga pat-uron ang pagkatinawag kag pagkapinili ninyo.” Kaangay ni apostol Pablo, dapat sila makasiling sa ulihi: “Nakapakig-away ako sang maayong pag-away, natapos ko ang dalaganon, natipigan ko ang pagtuo.” (2 Pedro 1:​10, 11; 2 Timoteo 4:​7, 8) Gani ang pagtilaw kag pagsala sa ginpanganak sang espiritu nga mga anak sang Dios diri sa duta dapat magpadayon tubtob nabutang na sing malig-on ni Jesus kag sang iya kaupod nga mga anghel ang pat-in ‘sa agtang’ nila tanan, nga nagapakilala sa ila sing malig-on kag sing maathag, subong natilawan kag matutom nga “mga ulipon sang aton Dios.” Nian ina nga pat-in mangin permanente nga tanda. Mahimo gid nga kon buhian na ang apat ka hangin sang kapipit-an, ang bug-os nga espirituwal nga Israel napat-inan na, bisan may pila pa nga buhi sa unod. (Mateo 24:​13; Bugna 19:7) Ang bug-os nga katapo mangin kompleto!​—Roma 11:​25, 26.

Pila ang Ginpat-inan?

¹⁰ Si Jesus nagsiling sa mga palat-inan: “Dili mahadlok, diutay nga panong, kay nahamut-an sang inyo Amay ang paghatag sa inyo sang ginharian.” (Lucas 12:32) Ang iban pa nga mga kasulatan, subong sang Bugna 6:​11 kag Roma 11:​25, nagapakita nga ang kadamuon sining diutay nga panong limitado sa pagkamatuod kag, sa kamatuoran, napat-od na. Ang masunod nga mga pulong ni Juan nagapalig-on sini: “Kag nabatian ko ang kadamuon sang mga napat-inan, isa ka gatos kag kap-atan kag apat ka libo ang ginpamat-inan, gikan sa tagsa ka tribo sang mga anak sang Israel: Sa tribo ni Juda napulog-duha ka libo ang ginpat-inan; sa tribo ni Ruben napulog-duha ka libo, sa tribo ni Gad napulog-duha ka libo; sa tribo ni Aser napulog-duha ka libo; sa tribo ni Neftali napulog-duha ka libo; sa tribo ni Manases napulog-duha ka libo; sa tribo ni Simeon napulog-duha ka libo; sa tribo ni Levi napulog-duha ka libo; sa tribo ni Issacar napulog-duha ka libo; sa tribo ni Zabulon napulog-duha ka libo; sa tribo ni Jose napulog-duha ka libo; sa tribo ni Benjamin napulog-duha ka libo ang ginpat-inan.”​—Bugna 7:​4-8.

¹¹ Indi ayhan ini nagapatuhoy sa literal kag undanon nga Israel? Indi, kay wala ginsunod sang Bugna 7:​4-8 ang kinaandan nga paglista sa mga tribo. (Numeros 1:​17, 47) Maathag nga ang katuyuan sang paglista diri indi agod makilala ang undanon nga mga Judiyo suno sa ila mga tribo kundi agod ipakita ang kaanggid nga balayan sang organisasyon para sa espirituwal nga Israel. Balanse ini. Dapat eksakto nga 144,000 ang mga katapo sining bag-ong pungsod​—12,000 gikan sa tagsa sang 12 ka tribo. Wala sing tribo sa sining Israel sang Dios ang pinasahi nga harianon ukon saserdotenhon. Ang bug-os nga pungsod magagahom subong mga hari, kag ang bug-os nga pungsod magaalagad subong mga saserdote.​—Galacia 6:​16; Bugna 20:​4, 6.

¹² Bisan ang kinaugali nga mga Judiyo kag mga Judiyong proselita ang ginhatagan sing nahaunang kahigayunan nga mapilian para sa espirituwal nga Israel, diutay lamang sa sadto nga pungsod ang nagbaton. Busa ginpasangkad ni Jehova ang imbitasyon sa mga Gentil. (Juan 1:​10-13; Binuhatan 2:​4, 7-11; Roma 11:7) Subong sa bahin sang mga taga-Efeso, nga sang una “napain sa estado sang Israel,” ang mga di-Judiyo mahimo na karon mapat-inan sang espiritu sang Dios kag mangin bahin sang kongregasyon sang hinaplas nga mga Cristiano. (Efeso 2:​11-13; 3:​5, 6; Binuhatan 15:14) Nagakaigo, nian, nga ang 24 ka gulang mag-amba sa atubangan sang Kordero: “Gintubos mo sa Dios sang imo kaugalingon nga dugo ang mga tawo sa tagsa ka tribo kag hambal kag katawhan kag pungsod, kag ginhimo sila nga ginharian kag mga saserdote sa aton Dios, kag magagahom sila sa duta.”​—Bugna 5:​9, 10.

¹³ Ang Cristianong kongregasyon isa ka “pinili nga kaliwatan, isa ka harianon nga saserdote, isa ka balaan nga pungsod.” (1 Pedro 2:9) Sa pagbulos sa kinaugali nga Israel subong pungsod sang Dios, ini nangin bag-ong Israel nga “ ‘Israel’ gid.” (Roma 9:​6-8; Mateo 21:43)a Bangod sini, nagakaigo nga ipadala sang utod sa iloy ni Jesus nga si Santiago ang iya sulat “sa napulog-duha ka tribo nga nag-alaplaag,” kon sayuron, sa bug-os kalibutan nga kongregasyon sang hinaplas nga mga Cristiano nga sa ulihi mangin 144,000 sa kadamuon.​—Santiago 1:1.

Ang Israel sang Dios Karon

¹⁴ Sing makawiwili, ginkilala sang nahaunang presidente sang Watch Tower Society, si Charles T. Russell, ang 144,000 nga isa ka literal nga kadamuon sang mga indibiduwal nga magahuman sa espirituwal nga Israel. Sa The New Creation, Tomo VI sang iya Studies in the Scriptures, nga ginbalhag sang 1904, sia nagsulat: “May rason gid kita sa pagpati nga ang pat-od, kag sibu nga kadamuon sang pinili [hinaplas nga mga pinili] makapila nga ginsambit sa Bugna (7:​4; 14:1); nga amo, ang 144,000 ka ‘gintubos gikan sa tunga sang mga tawo.’ ” Sa Light, Tulun-an Uno, nga ginbalhag sang 1930 sang ikaduha nga presidente sang Watch Tower Society, si J. F. Rutherford, ginsiling man ini: “Sa amo ang 144,000 ka katapo sang lawas ni Cristo ginpakita sa asambleya subong pinili kag hinaplas, ukon pinat-inan.” Ang mga Saksi ni Jehova wala gid magbag-o sa ila pagtamod nga literal nga 144,000 ka hinaplas nga mga Cristiano ang nagahuman sa espirituwal nga Israel.

¹⁵ Apang, indi bala takus ang kinaugali nga Israel karon sa pila ka pinasahi nga pabor? Sang tion sa wala pa ang adlaw sang Ginuo, sang ginatukib sang sinsero nga mga estudyante sang Biblia ang madamo sang sadsaran nga mga kamatuoran sang Pulong sang Dios, gindumdom sadto nga sa katapusan sang Panag-on sang mga Gentil ang mga Judiyo sa liwat makatigayon sing pinasahi nga tindog sa atubangan sang Dios. Sa amo, gin-aplikar sang libro ni C. T. Russell nga The Time Is at Hand (Tomo II sang Studies in the Scriptures), nga ginbalhag sang 1889, ang Jeremias 31:​29-34 sa kinaugali nga mga Judiyo, kag nagkomento: “Ang kalibutan saksi sa kamatuoran nga ang silot sa Israel sa idalom sang paggahom sang mga Gentil nagpadayon kutob sang B.C. [607], nga ini nagapadayon pa, kag wala sing rason sa pagpaabot nga ang ila pag-organisar liwat subong organisasyon matabo antes sa A.D. 1914, ang limite sang ila ‘pito ka panahon’​—2520 ka tuig.” Daw subong nga ang mga Judiyo makaeksperiensia sing pagpasag-uli subong isa ka pungsod sadto nga tion, kag ining paglaum daw nagsanag sang 1917, sang ang Balfour Declaration nanaad nga ang Britanya magasakdag sa paghimo sa Palestina nga isa ka pungsudnon nga puluy-an para sa mga Judiyo.

¹⁶ Sa tapos sang nahauna nga inaway kalibutanon, ang Palestina nangin teritoryo sa idalom sang Gran Britanya, kag nabuksan ang dalan agod ang madamo nga mga Judiyo makabalik sa sadto nga duta. Sang 1948 ang politikal nga Estado sang Israel nabun-ag. Wala bala ini nagapakita nga ang mga Judiyo pakamaayuhon sang Dios? Sa sulod sang madamo nga tuig, ang mga Saksi ni Jehova nagpati nga amo sini. Sa amo, sang 1925, nagbalhag sila sing 128-pahina nga libro nga, Comfort for the Jews. Sang 1929 nagbalhag sila sing isa ka matahom nga 360-pahina nga tomo nga, Life, nga gintuyo sa pagganyat sa mga Judiyo kag nagbinagbinag man sang tulun-an nga Job sang Biblia. Daku nga panikasog ang ginhimo, labi na sa Siudad sang Nueva York, nga madalhan ang mga Judiyo sining Mesianiko nga mensahe. Sing makalilipay, may pila ka indibiduwal nga nagbaton, apang ang mga Judiyo sa kabilugan, kaangay sang ila mga katigulangan sang nahaunang siglo, nagsikway sa pamatuod sang presensia sang Mesias.

¹⁷ Maathag nga ang Pagka-Judiyo, subong isa ka katawhan kag isa ka pungsod, indi ang Israel nga ginlaragway sa Bugna 7:​4-8 ukon sa iban nga tagna sang Biblia nga may kaangtanan sa adlaw sang Ginuo. Sa pagsunod sa tradisyon, ang mga Judiyo nagpadayon sa paglikaw sa paggamit sa balaan nga ngalan. (Mateo 15:​1-3, 7-9) Sa pagpaathag sang Jeremias 31:​31-34, ang libro nga Jehovah, nga ginbalhag sang Watch Tower Society sang 1934, may kalig-on nga nagsiling: “Ang bag-ong katipan wala sing kahilabtanan sa kinaugali nga mga kaliwat sang Israel kag sa katawhan sa kabilugan, kundi . . . limitado sa espirituwal nga Israel.” Ang mga tagna sang Biblia tuhoy sa pagpasag-uli wala nagapatuhoy sa kinaugali nga mga Judiyo ukon sa politikal nga Israel, nga isa ka katapo sang Nasyones Unidas kag bahin sang kalibutan nga ginsambit ni Jesus sa Juan 14:​19, 30 kag 18:36.

¹⁸ Sang 1931 ginbaton sang mga ulipon sang Dios sa duta nga may dakung kalipay ang ngalan nga mga Saksi ni Jehova. Nag-ugyon sila sing bug-os tagipusuon sa mga tinaga sang Salmo 97:​11: “Ang kapawa nagasilak sa mga matarong, kag ang kalipay sa mga matadlong sing tagipusuon.” Nahantop nila sing maathag nga ang espirituwal nga Israel lamang ang gindala sa bag-ong katipan. (Hebreo 9:​15; 12:​22, 24) Ang wala sing interes nga kinaugali nga Israel wala sing bahin sa sini, subong man ang katawhan sa kabilugan. Ining paghangop naghawan sang dalan para sa masanag nga pagsilak sang balaan nga kapawa, nga talalupangdon gid sa rekord sang teokratikong maragtas. Ipahayag sini kon paano ipakita ni Jehova sa bugana nga paagi ang iya kaluoy, mahigugmaon nga kaluoy, kag kamatuoran sa tanan nga tawo nga nagapalapit sa iya. (Exodo 34:​6; Santiago 4:8) Huo, ang iban luwas sa Israel sang Dios magabenepisyo sa pagpugong sang mga anghel sa apat ka hangin sang kalaglagan. Sin-o ini sila? Isa ka ayhan sa ila? Tan-awon naton karon.

[Mga footnote]

[Mga Pamangkot sa Pagtinuon]

1. “Sin-o ang makatindog” sa tion sang dakung adlaw sang kasingkal sang Dios?

2. Ngaa makatilingala nga may makalampuwas sa adlaw sang paghukom ni Jehova?

3. (a) Anong pinasahi nga serbisyo nga pagahimuon sang mga anghel ang nakita ni Juan? (b) Ano ang ginasimbulo sang “apat ka hangin”?

4. (a) Ano ang ginalaragway sang apat ka anghel? (b) Ano ang mangin epekto sa dutan-on nga orgnisasyon ni Satanas kon buhian ang apat ka hangin?

5. Paano ang tagna ni Jeremias nagabulig sa aton sa paghangop nga ang mga paghukom sang Dios magalakip sa bug-os nga duta?

6. Sin-o ang magasugo sa mga anghel nga punggan ang apat ka hangin, kag nagatugot ini sing tion para sa ano?

7. Sin-o gid ang ikalima nga anghel, kag anong pamatuod ang nagabulig sa aton sa pagpat-od sang iya identidad?

8. Ano ang pagpat-in, kag san-o ini nagsugod?

9. (a) Anong pagbatas sa bahin sang nagkalabilin sang ginpanganak sang espiritu nga mga anak sang Dios ang kinahanglanon? (b) Daw ano kadugay magapadayon ang pagtilaw sa mga hinaplas?

10. (a) Anong mga kasulatan ang nagapakita nga ang kadamuon sang mga pinat-inan limitado? (b) Pila ang kabug-usan nga kadamuon sang pinat-inan, kag paano sila ginalista?

11. (a) Ngaa ang pagpatuhoy sa 12 ka tribo wala naaplikar sa literal kag undanon nga Israel? (b) Ngaa ginalista sang Bugna ang 12 ka tribo? (c) Ngaa wala sing pinasahi nga harianon ukon saserdotenhon nga tribo sa Israel sang Dios?

12. Ngaa nagakaigo nga ang 24 ka gulang mag-amba sa atubangan sang Kordero sang mga pulong sang Bugna 5:​9, 10?

13. Ngaa nagakaigo nga mapatuhoy sang utod sa iloy ni Jesus nga si Santiago ang iya sulat “sa napulog-duha ka tribo nga nag-alaplaag”?

14. Ano ang nagapakita nga ang mga Saksi ni Jehova wala gid magbag-o sa ila pagtamod nga ang 144,000 amo ang literal nga kadamuon sang mga nagahuman sa espirituwal nga Israel?

15. Antes lamang sang adlaw sang Ginuo, ano ang gindumdom sang sinsero nga mga estudyante sang Biblia nga matigayon sang kinaugali nga mga Judiyo sa pagtakop sang Panag-on sang mga Gentil?

16. Anong mga panikasog ang ginhimo sang mga Saksi ni Jehova agod madalhan ang kinaugali nga mga Judiyo sing Cristianong mensahe, kag ano ang resulta?

17, 18. Ano ang nahangpan sang mga ulipon sang Dios tuhoy sa bag-ong katipan kag sa mga tagna sang Biblia tuhoy sa pagpasag-uli?

Kapitulo 20

Ang Madamo Gid nga Dakung Kadam-an

¹Sa tapos malaragway ang pagpat-in sa 144,000, nagpadayon si Juan sa pagreport sang isa sang labing makakulunyag nga mga bugna sa bug-os nga Kasulatan. Mahimo gid nga naglumpat ang iya tagipusuon sa kalipay samtang ginareport niya ini, nga nagasiling: “Sa tapos sini nagtulok ako, kag yari karon! ang dakung kadam-an nga wala sing tawo nga makaisip, gikan sa tagsa ka pungsod, gikan sa tanan nga tribo kag katawhan kag hambal, nga nagatindog sa atubangan sang trono kag sang Kordero, nga napanaptan sing malaba nga mga panapton nga maputi; nga may mga paklang sa ila mga kamot.” (Bugna 7:9) Huo, ang pagpugong sa apat ka hangin magatugot sang kaluwasan sang isa pa ka grupo luwas sa 144,000 ka katapo sang espirituwal nga Israel: ang dakung kadam-an nga lainlain sing hambal kag gikan sa lainlain nga pungsod.b​—Bugna 7:1.

² Ginhangop sang kalibutanon nga mga komentarista ining dakung kadam-an subong amo ang undanon nga mga di-Judiyo nga nakombertir sa Cristianismo ukon amo ang magakadto sa langit nga Cristianong mga martir. Bisan ang mga Bible Students sang una nagkabig sa ila subong segunda klase nga langitnon, subong ginpatalupangod sang 1886 sa Tomo I sang Studies in the Scriptures, The Divine Plan of the Ages: “Madula nila ang premyo nga trono kag ang balaan nga kinaugali, apang sa katapusan makadangat sila sa pagkabun-ag subong espiritu nga mga persona sang orden nga mas manubo sa balaan nga kinaugali. Bisan pa ini sila nakadedikar na, nalandas sila sang kalibutanon nga espiritu tubtob sa kasangkaron nga sila napaslawan sa paghalad sang ila kabuhi.” Kag tubtob sang 1930, ang panghunahuna ginpabutyag sa Light, Tulun-an Uno: “Ang mga nagahuman sa sining dakung kadam-an napaslawan sa pagbaton sa imbitasyon nga mangin makugi nga mga saksi para sa Ginuo.” Ginlaragway sila subong nagapakamatarong sa kaugalingon nga grupo nga may ihibalo sa kamatuoran apang wala gid manikasog sa pagbantala sini. Magakadto sila sa langit subong segunda klase kag indi sila magaambit sa paggahom upod kay Cristo.

³ Apang, may iban pa nga mga kaupod ang hinaplas nga mga Cristiano nga sang ulihi nangin makugi gid sa pagbantala nga hilikuton. Wala sila nagahandum nga magkadto sa langit. Sa pagkamatuod, ang ila paglaum nahisuno sa titulo sang isa ka pamulongpulong publiko nga ginpatalupangod sang katawhan ni Jehova kutob sang 1918 tubtob sang 1922. Sang primero, amo ini ang “The World Has Ended​—Millions Now Living Will Never Die.”c Wala madugay sa tapos sadto, ang Watch Tower nga magasin sang Oktubre 15, 1923, nagpaathag sang parabola ni Jesus tuhoy sa mga karnero kag mga kanding (Mateo 25:​31-46), nga nagasiling: “Ang mga karnero nagarepresentar sa tanan nga katawhan sang mga pungsod, wala ginpanganak sang espiritu apang may huyog sa pagkamatarong, nga nagakilala sa hunahuna kay Jesucristo subong ang Ginuo kag nagapaabot kag nagalaum sa isa ka mas maayo nga tion sa idalom sang iya paggahom.”

⁴ Mga pila ka tuig sang ulihi, sang 1931, ginpaathag sang Vindication, Tulun-an Uno, ang Ezequiel kapitulo 9, nga nagapakilala sa mga tawo nga natandaan sa agtang para sa kaluwasan sa katapusan sang kalibutan subong amo ang mga karnero sa nasambit nga parabola. Ang Vindication, Tulun-an Tres, nga ginpaguwa sang 1932, naglaragway sang matarong nga panimuot sang tagipusuon sang di-Israelinhon nga tawo nga si Jehonadab, nga nagbuylog kay Hari Jehu nga hinaplas sang Israel sa iya kangga kag nag-upod agod makita ang kakugi ni Jehu sa paglaglag sa dimatuod nga mga relihionista. (2 Hari 10:​15-17) Ang libro nagkomento: “Si Jehonadab nagalaragway ukon nagalandong sa klase sang katawhan sa duta karon sa tion nga ang Jehu nga hilikuton [sa pagwali sang mga paghukom ni Jehova] nagapadayon nga may maayong kabubut-on, wala nagapahisuno sa organisasyon ni Satanas, nagadampig sa pagkamatarong, kag amo ang amligan sang Ginuo sa tion sang Armagedon, luwason sila sa sina nga kagamo, kag hatagan sila sing kabuhi nga wala sing katapusan sa duta. Ini sila nagahuman sa ‘mga karnero’ nga klase.” Sang 1934 maathag nga ginpakita sang The Watchtower nga ining mga Cristiano nga may dutan-on nga paglaum dapat magdedikar kay Jehova kag magpabawtismo. Ang kapawa tuhoy sining dutan-on nga klase nagasanag sing kapin pa.​—Hulubaton 4:18.

⁵ Ang paghangop sa Bugna 7:​9-17 buot na magasilak sing tuman kasanag! (Salmo 97:11) Makapila ginpabutyag sang Watchtower nga magasin ang paglaum nga ang kombension nga gin-iskedyul para sa Mayo 30 tubtob Hunyo 3, 1935, sa Washington, D.C., E.U.A., mangin “isa ka matuod gid nga paumpaw kag benepisyo” sa mga ginlaragway ni Jehonadab. Nangin matuod gid ina! Sa isa ka makapahulag nga pamulongpulong nga “The Great Multitude,” nga ginhatag sa mga 20,000 ka kombensionista, si J. F. Rutherford, presidente sang Watch Tower Society, naghatag sing Makasulatanhon nga pamatuod nga ang modernong-adlaw nga iban nga mga karnero pareho sa dakung kadam-an sang Bugna 7:9. Sa talipuspusan sining pamulongpulong, ang humalambal nagpamangkot: “Mahimo bala magtindog palihog ang tanan nga nagalaum nga mabuhi sing dayon sa duta?” Sang magtindog ang daku nga bahin sang tumalambong, ang presidente nagsiling: “Tan-awa! Ang dakung kadam-an!” May paghagong, nga ginsundan sang mabaskog nga hinugyaw. Daw ano ang kalipay sang Juan nga klase​—kag subong man sang Jehonadab nga grupo! Sang masunod nga adlaw, 840 ka bag-ong mga Saksi ang ginbawtismuhan, ang kalabanan sini nagapangangkon nga bahin sang dakung kadam-an.

Pagpalig-on sa Identidad sang Dakung Kadam-an

⁶ Paano naton masiling sing positibo gid nga ang dakung kadam-an amo ining modernong-adlaw nga grupo sang dedikado nga mga Cristiano nga nagalaum nga mabuhi sing dayon sa duta sang Dios? Nakita anay ni Juan sa palanan-awon ang langitnon nga grupo nga ‘gintubos sa Dios . . . sa tagsa ka tribo kag hambal kag katawhan kag pungsod.’ (Bugna 5:​9, 10) Ang dakung kadam-an may pareho man nga ginhalinan apang tuhay ang ila kaladtuan. Indi kaangay sang Israel sang Dios, ang ila kadamuon wala sing latid. Wala sing tawo nga makasugid sing abanse kon mangin pila sila. Ang ila malaba nga mga panapton ginpaputi sa dugo sang Kordero, nga nagasimbulo nga sila may matarong nga tindog sa atubangan ni Jehova bangod sang ila pagtuo sa halad ni Jesus. (Bugna 7:14) Kag nagawayway sila sing mga paklang sang mga palma, nga nagakilala sa Mesias subong ila Hari.

⁷ Samtang nagatulok sia sa sining palanan-awon, mahimo gid nga ang panghunahuna ni Juan nagbalik sa kapin sa 60 ka tuig nga nagligad sa katapusan nga semana ni Jesus sa duta. Sang Nisan 9, 33 C.E., sang magpanong ang kadam-an agod abiabihon si Jesus pasulod sa Jerusalem, “nagkuha sila sing mga paklang sang mga palma kag nagguwa sa pagsugata sa iya. Kag nagsinggit sila: ‘Luwason ka, ginapangamuyo namon! Bulahan sia nga nagakari sa ngalan ni Jehova, ang hari sang Israel!’ ” (Juan 12:​12, 13) Sa kaangay nga paagi, ang pagwayway sing mga lukay kag ang pagsinggit sa bahin sang dakung kadam-an nagapakita sang ila wala ginapunggan nga kalipay sa pagbaton kay Jesus subong ang gintangdo nga Hari ni Jehova.

⁸ Wala sing duhaduha, ang mga paklang sang mga palma kag ang mga paghinugyaw nagapahanumdom man kay Juan sang Piesta sang mga Tolda sang dumaan nga mga Israelinhon. Para sa sini nga piesta si Jehova nagsugo: “Kag magkuha kamo nga sa inyo sa adlaw nga nahauna sang bunga sang mga kahoy nga maayo, sang mga paklang sang mga palma kag mga sanga sang mga kahoy nga madabong kag sang mga sauce sang sapa, kag magkalipay kamo sa atubangan ni Jehova nga inyo Dios sing pito ka adlaw.” Ang mga paklang sang mga palma gingamit subong tanda sang pagkalipay. Ang temporaryo nga mga tolda pahanumdom nga ginluwas ni Jehova ang iya katawhan gikan sa Egipto, agod magpuyo sa mga tolda sa kahanayakan. “Ang mga dumuluong kag ang mga ilo kag ang mga balo” nagpakigbahin sa sining piesta. Ang bug-os nga Israel dapat “magkalipay.”​—Levitico 23:​40; Deuteronomio 16:​13-15.

⁹ Nagakaigo, nian, nga ang dakung kadam-an, bisan pa indi sila bahin sang espirituwal nga Israel, dapat magwayway sing mga paklang sang palma, kay malipayon kag mapinasalamaton nga ginapadungog nila ang kadalag-an kag kaluwasan sa Dios kag sa Kordero, subong ginasiling diri ni Juan: “Kag nagasinggit sila sa mabaskog nga tingog, nga nagasiling: ‘Ang kaluwasan namon nagagikan sa amon Dios, nga nagalingkod sa trono, kag gikan sa Kordero.’ ” (Bugna 7:10) Bisan pa ginpain na sila gikan sa tanan nga etniko nga mga grupo, ang dakung kadam-an nagasinggit sa isa lamang ka “mabaskog nga tingog.” Paano nila mahimo ini, walay sapayan sang ila nanuhaytuhay nga mga pungsod kag mga hambal?

¹⁰ Ining dakung kadam-an bahin sang isa ka nahiusa gid nga organisasyon sa duta karon nga ginahuman sang nanuhaytuhay nga mga pungsod. Wala sila sing lainlain nga mga talaksan para sa lainlain nga mga pungsod kundi sing palareho ginaaplikar nila ang matarong nga mga prinsipio sang Biblia bisan diin man sila nagapuyo. Wala sila nadalahig sa nasyonalistiko, rebolusyonaryo nga mga lihok kundi ila na ‘ginsalsal ang ila mga espada nga mga punta sang arado.’ (Isaias 2:4) Wala sila nabahinbahin sa mga sekta ukon mga denominasyon, kag sa amo magsinggit sila sing makagulumon ukon nagasumpakilay nga mga mensahe subong sang ginahimo sang mga relihion sang Cristiandad; kag wala man nila ginatugutan ang propesyonal nga klero nga klase nga amo ang magadayaw para sa ila. Wala sila nagasinggit nga ang ila kaluwasan nagagikan sa balaan nga espiritu, kay indi sila mga alagad sang isa ka trinitaryo nga dios. Sa mga 200 ka geograpiko nga mga teritoryo sa bug-os nga duta, nagahiusa sila sa pagtawag sa ngalan ni Jehova samtang nagahambal sila sing isa ka putli nga hambal sang kamatuoran. (Sofonias 3:9) Sing nagakaigo, ginakilala nila sing dayag nga ang ila kaluwasan nagagikan kay Jehova, ang Dios sang kaluwasan, paagi kay Jesucristo, ang Iya Pangulo nga Ahente sang kaluwasan.​—Salmo 3:​8; Hebreo 2:10.

¹¹ Ang modernong teknolohiya nakabulig sa paghimo sa mabaskog nga tingog sang nagahiusa nga dakung kadam-an nga magbaskog pa. Wala sing iban nga relihioso nga grupo sa duta ang nagakinahanglan nga magbalhag sing mga bulig sa pagtuon sa Biblia sa kapin sa 200 ka hambal, kay wala sing iban nga grupo ang interesado sa paglab-ot sa tanan nga katawhan sa duta paagi sa isa ka nahiusa nga mensahe. Subong isa ka dugang pa nga bulig sa sini, sa idalom sang pagdumala sang hinaplas nga Nagadumala nga Hubon sang mga Saksi ni Jehova, ginhimo ang Multilanguage Electronic Phototypesetting System (MEPS). Tubtob sa sini nga tion sang pagsulat, nanuhaytuhay nga porma sang MEPS ang ginagamit sa kapin sa 60 sang mga sanga sang Watch Tower Society sa bug-os nga duta, kag nakabulig ini sa pagbalhag sang ila nagapanguna nga makaduha sa bulan nga magasin, Ang Lalantawan, sa 39 ka hambal sing dulungan. Ang katawhan ni Jehova dulungan man nga nagabalhag sing mga libro, subong sang libro nga Revelation​—Its Grand Climax At Hand!, sa pila ka hambal. Sa amo, ang mga Saksi ni Jehova, nga ang kalabanan sa ila nagahuman sang dakung kadam-an, nagapahamtang kada tuig sing ginatos ka milyon ka publikasyon sa tanan sang kilala nga mga hambal, nagabulig sa dugang pa nga panong gikan sa tanan nga tribo kag mga hambal sa pagtuon sang Pulong sang Dios kag magbuylog sang ila mga tingog sa mabaskog nga tingog sang dakung kadam-an.​—Isaias 42:​10, 12.

Sa Langit Ukon sa Duta?

¹² Paano naton mahibal-an nga ang ‘pagtindog sa atubangan sang trono’ wala nagakahulugan nga ang dakung kadam-an yara sa langit? May maathag gid nga pamatuod sa sini nga punto. Halimbawa, ang Griegong tinaga diri nga ginbadbad “sa atubangan” (e·noʹpion) literal nga nagakahulugan sing “sa panulok [sang]” kag makapila nga gingamit tuhoy sa mga tawo sa duta nga yara “sa atubangan” ukon “sa panulok ni” Jehova. (1 Timoteo 5:​21; 2 Timoteo 2:​14; Roma 14:​22; Galacia 1:20) Sang isa ka okasyon sang ang mga Israelinhon yara sa kahanayakan, si Moises nagsiling kay Aaron: “Isiling sa bug-os nga katilingban sang katawhan sang Israel, ‘Palapit kamo sa atubangan ni Jehova, kay sia nakabati sang inyo mga pagkumod.’ ” (Exodo 16:9) Ang mga Israelinhon wala magkayab sa langit agod magtindog sa atubangan ni Jehova sadto nga okasyon. (Ipaanggid ang Levitico 24:8.) Sa baylo, didto gid sa kahanayakan nagtindog sila sa panulok ni Jehova, kag ang iya igtalupangod yadto sa ila.

¹³ Dugang pa, aton mabasa: “Kon magkari ang Anak sang tawo sa iya himaya . . . tipunon sa atubangan niya ang tanan nga pungsod.”d Ang bug-os nga kaliwatan sang tawo wala sa langit kon matuman ining tagna. Sa pagkamatuod, ang “magakadto sa wala sing katapusan nga pagkalaglag” wala sa langit. (Mateo 25:​31-33, 41, 46) Sa baylo, ang katawhan magatindog sa duta sa panulok ni Jesus, kag iliso niya ang iya igtalupangod sa paghukom sa ila. Sing kaanggid, ang dakung kadam-an yara “sa atubangan sang trono kag sang Kordero” kay nagatindog sila sa panulok ni Jehova kag sang iya Hari, si Cristo Jesus, nga gikan sa ila magabaton sila sing kalahamut-an nga paghukom.

¹⁴ Ang 24 ka gulang kag ang hinaplas nga grupo sang 144,000 ginalaragway nga yara “sa palibot sang trono” ni Jehova kag “sa [langitnon nga] Bukid nga Sion.” (Bugna 4:​4; 14:1) Ang dakung kadam-an indi isa ka saserdotenhon nga klase kag indi makadangat sa sinang nabayaw nga posisyon. Matuod, ginalaragway ini sang ulihi sa Bugna 7:​15 subong nagaalagad sa Dios “sa iya templo.” Apang ining templo wala nagapatuhoy sa nasulod nga santuaryo, ang Labing Balaan. Sa baylo, amo ini ang dutan-on nga luwang sang espirituwal nga templo sang Dios. Ang Griegong tinaga nga na·osʹ, nga ginbadbad diri “templo,” masami nga nagapaalinton sang masangkad nga kahulugan sang bug-os nga edipisyo nga ginpatindog para sa pagsimba kay Jehova. Sa karon, isa ini ka espirituwal nga balayan nga nagalakip sang langit kag duta.​—Ipaanggid ang Mateo 26:​61; 27:​5, 39, 40; Marcos 15:​29, 30; Juan 2:​19-21, New World Translation Reference Bible, footnote.

Bug-os Uniberso nga Pagsinggit sing Pagdayaw

¹⁵ Ang dakung kadam-an nagadayaw kay Jehova, apang may iban pa nga nagaamba man sang iya kadayawan. si Juan nagareport: “Kag ang tanan nga anghel nagtindog sa palibot sang trono kag palibot sang mga gulang kag sang apat ka buhi nga tinuga, kag nagyaub sila sa atubangan sang trono kag nagsimba sa Dios, nga nagasiling: ‘Kabay pa! Ang pagpakamaayo kag himaya kag kaalam kag pagpasalamat kag dungog kag gahom kag kusog mangin sa aton Dios tubtob sa wala sing katubtuban. Kabay pa.’ ”​—Bugna 7:​11, 12.

¹⁶ Sang gintuga ni Jehova ang duta, ang tanan niya nga balaan nga mga anghel “nag-ambahan sing tingob . . . kag naghinugyaw sa kalipay ang tanan nga anak sang Dios.” (Job 38:7) Ang tagsa ka bag-o nga pagpahayag sang katuyuan ni Jehova mahimo nga nagpahulag man sa mga anghel sa pagsinggit sing pagdayaw. Sang ang 24 ka gulang​—ang 144,000 sa ila langitnon nga himaya—​nagsinggit sing mabaskog bilang pagkilala sa Kordero, ang tanan nga iban pa sa langitnon nga mga tinuga sang Dios nagbuylog sa pagdayaw para kay Jesus kag para kay Jehova nga Dios. (Bugna 5:​9-14) Ining mga tinuga nagakalipay na sing tuman sa pagtan-aw sa katumanan sang katuyuan ni Jehova sa iya pagbanhaw sa matutom nga hinaplas nga mga tawo padulong sa isa ka mahimayaon nga kahimtangan sa duog sang mga espiritu. Sa karon, ang tanan sang matutom nga langitnon nga mga tinuga ni Jehova mabaskog nga nagaamba sing pagdayaw samtang nagalutaw ang dakung kadam-an. Sa pagkamatuod, para sa tanan nga alagad ni Jehova, ang adlaw sang Ginuo isa ka makakulunyag nga tion nga mabuhi. (Bugna 1:10) Diri sa duta, isa gid ka pribilehiyo nga makaambit kita sa pag-amba sing pagdayaw paagi sa pagpanaksi sa Ginharian ni Jehova!

Ang Dakung Kadam-an Nagaabot

¹⁷ Kutob sang tion ni apostol Juan kag tubtob sa adlaw sang Ginuo, ang hinaplas nga mga Cristiano nagumon sa identidad sang dakung kadam-an. Nagakaigo, nian, nga ang isa sang 24 ka gulang, nga nagarepresentar sa mga hinaplas nga yadto na sa langit, magpukaw sang panghunahuna ni Juan paagi sa pagpamangkot: “Kag bilang sabat ang isa sang mga gulang nagsiling sa akon: ‘Sin-o bala ini sila nga nagapanapot sing malaba nga mga panapton nga maputi, kag diin sila maghalin?’ Gani sa gilayon nagsiling ako sa iya: ‘Ginuo ko, ikaw ang nakahibalo.’ ” (Bugna 7:​13, 14a) Huo, sarang mapangita sadto nga gulang ang sabat kag ihatag ini kay Juan. Nagapahangop ini nga ang mga binanhaw sa 24 ka gulang nga grupo mahimo nga nadalahig sa pagpaalinton sing balaan nga mga kamatuoran karon. Para naman sa ila bahin, natukiban sang Juan nga klase nga yari pa sa duta ang identidad sang dakung kadam-an paagi sa pagpanilag sing maayo sang ginahimo ni Jehova sa palibot nila. Nahangpan nila dayon ang masanag nga pag-idlab sang balaan nga kapawa nga nagpasanag sa teokratiko nga palibot sang 1935, sa sibu nga tion ni Jehova.

¹⁸ Sang katuigan 1920 kag sang maaga nga bahin sang katuigan 1930, ginpadaku sang Juan nga klase ang langitnon nga paglaum, sa mga publikasyon kag sa pagbantala nga hilikuton. Mahimo nga ang bug-os nga kadamuon sang 144,000 kompletohon pa. Apang dugang pa nga kadamuon sang mga nagapamati sa mensahe kag nagapakita sing kakugi sa pagpanaksi nga hilikuton ang nagapakita sing interes sa pagkabuhi sing dayon sa Paraiso nga duta. Wala sila nagahandum nga magkadto sa langit. Indi amo sina ang pagkatawag sa ila. Indi sila bahin sang diutay nga panong kundi sa baylo sang iban nga mga karnero. (Lucas 12:​32; Juan 10:16) Ang pagkilala sa ila sang 1935 subong dakung kadam-an sang iban nga mga karnero isa ka palatandaan nga ang pagpili sa 144,000 malapit na makompleto sadto.

¹⁹ Ginasakdag bala sang mga estadistika ining konklusyon? Huo. Sang 1938, sa bug-os nga kalibutan, 59,047 ka saksi ni Jehova ang nagpakigbahin sa ministeryo. Sa sini, 36,732 ang nag-ambit sa mga emblema sa tuigan nga pagsaulog sang Memoryal sang kamatayon ni Jesus, sa amo nagapakita nga sila may langitnon nga pagtawag. Sang mga tuig kutob sadto, ang kadamuon sining mga umalambit amat-amat nga nagbuhin, sa masami bangod natapos na sang matutom nga mga saksi ni Jehova ang ila dutan-on nga kabuhi paagi sa kamatayon. Sang 1987 8,808 lamang ang nag-ambit sa mga emblema sang Memoryal​—0.1 porsiento lamang sang 8,965,221 nga nagtambong sa sadto nga bug-os globo nga pagsaulog.

²⁰ Sang magdabdab ang ikaduha nga inaway kalibutanon, mabaskog nga nagpanikasog si Satanas nga punggan ang pag-ani sa dakung kadam-an. Ang hilikuton ni Jehova gindumilian sa madamo nga pungsod. Sa tion sadtong madulom nga mga adlaw, kag sa wala pa mapatay sang Enero 1942 si J. F. Rutherford, presidente sang Watch Tower Society, nabatian sia nga nagsiling: “Ti . . . daw subong bala nga ang dakung kadam-an indi na gali magadaku.” Apang tuhay ang nangin direksion sang balaan nga pagpakamaayo! Sang 1946 ang kadamuon sang mga Saksi nga nagaalagad sa bug-os nga kalibutan naglumpat sa 176,456​—ang kalabanan sini bahin sang dakung kadam-an. Sang 1987 3,395,612 ka Saksi ang nagaalagad kay Jehova sing matutom sa 210 ka nanuhaytuhay nga kadutaan​—isa gid ka DAKUNG KADAM-AN! Kag nagapadayon sa pag-uswag ang kadamuon.

²¹ Sa amo ang pag-ani sa katawhan sang Dios sa tion sang adlaw sang Ginuo nagahisanto sing bug-os sa palanan-awon ni Juan: nahauna ang hilikuton sa pagtipon sa mga nagkalabilin sang 144,000; nian ang pagtipon sa dakung kadam-an. Subong gintagna ni Isaias, sa karon “sa katapusan nga bahin sang mga adlaw,” ang katawhan sang tanan nga pungsod nagapanong agod mag-​ambit sa putli nga pagsimba kay Jehova. Kag, sa pagkamatuod, nagakalipay kita sa pag-apresyar sa pagtuga ni Jehova sing “bag-ong mga langit kag bag-ong duta.” (Isaias 2:​2-4; 65:​17, 18) Ginatipon sang Dios ang “tanan nga butang kay Cristo, ang mga butang sa langit kag ang mga butang sa duta.” (Efeso 1:10) Ang hinaplas nga mga manunubli sang langitnon nga Ginharian —pinili sa sulod sang mga siglo kutob sang adlaw ni Jesus—​amo ang “mga butang sa langit.” Kag karon, ang dakung kadam-an sang iban nga mga karnero nagalutaw subong amo ang mga nauna sa “mga butang sa duta.” Ang imo pag-alagad nahisuno sa sina nga kahimusan mahimo magkahulugan sing dayon nga kalipay para sa imo.

Ang mga Pagpakamaayo sang Dakung Kadam-an

²² Paagi sa balaan nga alagyan, si Juan nakabaton sing dugang pa nga impormasyon tuhoy sining dakung kadam-an: “Kag sia [ang gulang] nagsiling sa akon: ‘Ini amo sila ang nagguwa sa dakung kapipit-an, kag ginlabhan nila ang ila mga panapton nga malaba kag ginpaputi ini sa dugo sang Kordero. Busa yara sila sa atubangan sang trono sang Dios; kag nagahalad sila sa iya sing balaan nga pag-alagad sa adlaw kag gab-i sa iya templo; kag ang Isa nga nagalingkod sa trono magahumlad sang iya layanglayang sa ibabaw nila.’ ”​—Bugna 7:​14b, 15.

²³ Sa isa ka nagligad nga okasyon, nagsiling si Jesus nga ang talipuspusan sang iya presensia nga may himaya sang Ginharian amo ang “dakung kapipit-an nga wala pa sing subong nga nahanabo kutob sa ginsuguran sang kalibutan tubtob karon, wala, kag indi na gid mahanabo.” (Mateo 24:​21, 22) Sa katumanan sina nga tagna, buhian sang mga anghel ang apat ka hangin sang duta agod laglagon ang sistema sang kalibutan ni Satanas. Ang una nga malaglag amo ang Babilonia nga Daku, ang bug-os kalibutan nga emperyo sang butig nga relihion. Nian, sa talipuspusan sang kapipit-an, luwason ni Jesus ang mga nagkalabilin sang 144,000 sa duta, upod sa madamo gid nga dakung kadam-an.​—Bugna 7:​1; 18:2.

²⁴ Paano makalipikar ang mga indibiduwal sang dakung kadam-an para sa kaluwasan? Ginasugiran sang gulang si Juan nga ila “ginlabhan ang ila mga panapton nga malaba kag ginpaputi ini sa dugo sang Kordero.” Sa iban nga mga pulong, nagpakita sila sing pagtuo kay Jesus subong Manunubos nila, nagdedikar kay Jehova, nagsimbulo sang ila dedikasyon paagi sa pagpabawtismo sa tubig, kag “nagahupot sing maayong konsiensia” paagi sa ila matadlong nga paggawi. (1 Pedro 3:​16, 21; Mateo 20:28) Sa amo, matinlo sila kag matarong sa mga mata ni Jehova. Kag ginahuptan nila ang ila kaugalingon nga “wala sing dagta sa sining kalibutan.”​—Santiago 1:27.

²⁵ Dugang pa, sila nangin makugi nga mga saksi ni Jehova​—“nagahalad sa iya sing balaan nga pag-alagad sa adlaw kag gab-i sa iya templo.” Isa ka bala sa sining dedikado nga dakung kadam-an? Kon amo, pribilehiyo mo nga mag-alagad kay Jehova nga wala sing untat sa dutan-on nga luwang sang iya dakung espirituwal nga templo. Sa karon, sa idalom sang pagtuytoy sang mga hinaplas, ang dakung kadam-an nagahimo tubtob sa sini nga tion sang mas daku nga bahin sang pagpanaksi nga hilikuton. Walay sapayan sang sekular nga mga salabton, ginatos ka libo sa ila ang naghatag sing lugar para sa bug-os tion nga pag-alagad subong mga payunir. Apang yara man ikaw ukon wala sa sina nga grupo, bilang isa ka dedikado nga katapo sang dakung kadam-an, makakalipay ikaw nga bangod sang imo pagtuo kag mga buhat ginapakamatarong ikaw subong abyan sang Dios kag ginaabiabi subong bisita sa iya layanglayang. (Salmo 15:​1-5; Santiago 2:​21-26) Sa amo ‘ginahumlad [ni Jehova] ang iya layanglayang’ sa ibabaw sang mga nagahigugma sa iya kag, subong isa ka maayong tagbalay, ginaamligan niya sila.​—Hulubaton 18:10.

²⁶ Ang gulang nagapadayon: “Indi na sila paggutumon ukon pag-uhawon pa, ang adlaw indi na magsilak sa ila ukon ang bisan ano pa nga kasingkal sang init, kay ang Kordero nga yara sa tunga sang trono mangin ila manugbantay, kag magatuytoy sa ila sa mga tuburan sang tubig nga nagahatag sing kabuhi. Kag ang Dios magapahid sang tagsa ka luha sa ila mga mata.” (Bugna 7:​16, 17) Huo, maabiabihon gid si Jehova! Apang daw ano kadalom ang kahulugan sining mga pulong?

²⁷ Binagbinagon naton ang tagna nga may kaanggid sa sini nga mga pulong: “Amo ini ang ginsiling ni Jehova: ‘Sa tion nga nahamut-an ginsabat ko ikaw, kag sa adlaw sang kaluwasan gintabangan ko ikaw . . . Indi sila paggutumon ukon pag-uhawon, ang init ukon ang adlaw indi magsakit sa ila. Kay ang Isa nga nagakaluoy sa ila magatuytoy sa ila, kag sa ubay sang mga tuburan sang tubig ubayan niya sila.’ ” (Isaias 49:​8, 10; tan-awa man ang Salmo 121:​5, 6.) Ginbalikwat ni apostol Pablo ang isa ka bahin sining tagna kag gin-aplikar ini sa “adlaw sang kaluwasan” nga nagsugod sang Pentecostes 33 C.E. Sia nagsulat: “Kay sia [Jehova] nagasiling: ‘Sa tion nga nahamut-an ginpamatian ko ikaw, kag sa adlaw sang kaluwasan gintabangan ko ikaw.’ Yari karon! Karon amo ang tion nga nahamut-an. Yari karon! Karon amo ang adlaw sang kaluwasan.”​—2 Corinto 6:2.

²⁸ Ano ang aplikasyon sadto sang saad nahanungod sa indi pagkagutom ukon pagkauhaw ukon pag-antos sing masakit nga init? Sa pagkamatuod, ang mga Cristiano sang nahaunang siglo nag-antos sing literal nga gutom kag kauhaw kon kaisa. (2 Corinto 11:​23-27) Apang, sa espirituwal nga paagi, bugana sila. Gin-amanan sila sing bugana, amo kon ngaa wala sila gingutom ukon gin-uhaw sa espirituwal nga mga butang. Dugang pa, wala pagtuguti ni Jehova nga ang init sang iya kaakig magdabdab batok sa ila sang ginlaglag niya ang Judiyong sistema sang mga butang sang 70 C.E. Ang mga pulong sang Bugna 7:​16 may kaanggid nga espirituwal nga katumanan para sa dakung kadam-an karon. Upod sa hinaplas nga mga Cristiano, sila nagaagom sing bugana nga espirituwal nga mga aman.​—Isaias 65:​13; Nahum 1:​6, 7.

²⁹ Kon ikaw isa sa sina nga dakung kadam-an, ang maayo nga kahimtangan sang imo tagipusuon magatiklod sa imo sa “pag-amba sa kalipay,” walay sapayan sang dapat mo batason nga mga kinawad-on kag mga pag-ipit sa tion sang nagaluya na nga mga tinuig sang sistema ni Satanas. (Isaias 65:14) Sa sina nga kahulugan, bisan sa karon, sarang ‘mapahiran [sang Kordero] ang tagsa ka luha gikan sa imo mga mata.’ Wala na sing peligro nga ang masakit nga “adlaw” sang malaglagon nga paghukom sang Dios magahalit sa imo, kag kon buhian na ang apat ka hangin sang kalaglagan, mahimo nga maluwas ikaw gikan sa “masakit nga init” sang kaakig ni Jehova. Kon matapos na ina nga kalaglagan, ang Kordero magatuytoy sa imo agod makabenepisyo ikaw sing bug-os gikan sa makapapagsik nga “mga tuburan sang tubig sang kabuhi,” nga nagalaragway sa tanan nga aman nga ginahimo ni Jehova agod nga makatigayon ikaw sing kabuhi nga wala sing katapusan. Ang imo pagtuo sa dugo sang Kordero mabindikar kay ikaw amat-amat nga bayawon sa tawhanon nga kahimpitan. Kamo nga bahin sang dakung kadam-an mangin tumalagsahon sa tunga sang katawhan kay “minilyon” ang indi na kinahanglan mapatay! Sa pinakabug-os nga kahulugan, ang tagsa ka luha mapahiran na gikan sa inyo mga mata.​—Bugna 21:4.

Paghimo sa Pagtawag nga Sigurado

³⁰ Daw ano ka makatilingala nga talan-awon ang ginabuksan sa aton sining mga pulong! Si Jehova mismo yara sa iya trono, kag ang tanan niya nga alagad, langitnon kag dutan-on, nagahiusa sa pagdayaw sa iya. Ginaapresyar sang iya dutan-on nga mga alagad kon daw ano ka makapulunaw nga pribilehiyo ang makaambit sa sining mabaskog nga koro sang pagdayaw. Sa dili madugay, hikuton ni Jehova kag ni Cristo Jesus ang paghukom kag ang singgit mabatian: “Ang dakung adlaw sang ila kasingkal nag-abot, kag sin-o bala ang sarang makatindog?” (Bugna 6:17) Ang sabat? Pila lamang sa katawhan, lakip ang mga napat-inan na sa 144,000 nga nabilin pa sa unod kag ang dakung kadam-an sang iban nga mga karnero nga ‘magatindog,’ kon sayoron, maluwas upod sa ila.​—Ipaanggid ang Jeremias 35:​19; 1 Corinto 16:13.

³¹ Bangod sining kamatuoran, ang hinaplas nga mga Cristiano sang Juan nga klase nagapanikasog sing mabaskog sa “paglambot sa tulumuron nga padya sang langitnon nga pagtawag sang Dios paagi kay Cristo Jesus.” (Filipos 3:14) Nakahibalo gid sila sing bug-os nga ang mga hitabo sa sining mga adlaw nagakinahanglan sing pinasahi nga pagbatas sa ila bahin. (Bugna 13:10) Sa tapos sang matutom nga pag-alagad kay Jehova sa madamong tinuig, nagapabilin sila sa pagtuo, nga nagakalipay nga ang ila ngalan “nasulat sa langit.” (Lucas 10:​20; Bugna 3:5) Ang mga katapo sang dakung kadam-an nakahibalo man nga ‘sia [lamang] nga nakabatas tubtob sa katapusan ang maluwas.’ (Mateo 24:13) Samtang ang dakung kadam-an subong isa ka grupo ginatandaan nga magaguwa sa dakung kapipit-an, ang mga indibiduwal sa sini dapat magpanikasog sa pagpabilin nga matinlo kag aktibo.

³² Wala sing pamatuod nga ang bisan ano nga bahin nga napain sa sining duha ka grupo ‘magatindog’ sa adlaw sang kasingkal ni Jehova. Ano ang kahulugan sini para sa minilyon nga kada tuig nagapakita sing pagtahod sa halad ni Jesus paagi sa pagtambong sa pagsaulog sang Memoryal sang iya kamatayon apang wala pa magpakita sing pagtuo sa halad ni Jesus tubtob sa punto nga mangin dedikado, bawtismado nga mga alagad ni Jehova, nga aktibo sa pag-alagad sa iya? Dugang pa, kamusta naman sila nga sang una aktibo apang gintugutan nila ang ila tagipusuon nga “mabug-atan sang . . . mga kabalaka sang kabuhi”? Kabay nga ang tanan nga subong sina magbugtaw, kag magpabilin nga nagamata, agod ‘magmadinalag-on sa paglikaw sa sining tanan nga butang nga mahanabo, kag sa pagtindog sa atubangan sang Anak sang tawo’​—si Jesucristo. Ang tion malip-ot na!​—Lucas 21:​34-36.

[Mga footnote]

[Mga Pamangkot sa Pagtinuon]

1. Sa tapos malaragway ang pagpat-in sa 144,000, anong iban pa nga grupo ang nakita ni Juan?

2. Paano ginlaragway sang kalibutanon nga mga komentarista ang dakung kadam-an, kag paano gintamod bisan sang mga Bible Students sang una ining grupo?

3. (a) Anong paglaum ang gintanyag sa pila sang matarong sing tagipusuon nga sang ulihi nangin makugi sa pagbantala nga hilikuton? (b) Paano ginpaathag sang The Watch Tower sang 1923 ang parabola sang mga karnero kag sang mga kanding?

4. Paano ang kapawa tuhoy sa dutan-on nga klase nagsanag sang 1931? sang 1932? sang 1934?

5. (a) Ano nga identipikasyon sang dakung kadam-an ang ginhimo sang 1935? (b) Sang ginpangabay ni J. F. Rutherford sang 1935 ang mga kombensionista kon sin-o ang may paglaum nga mabuhi sing dayon sa duta sa pagtindog, ano ang natabo?

6. (a) Ngaa mahangpan naton sing maathag nga ang dakung kadam-an amo ang modernong-adlaw nga grupo sang dedikado nga mga Cristiano nga nagalaum nga mabuhi sing dayon sa duta? (b) Ano ang ginasimbulo sang malaba nga mga panapton nga maputi sang dakung kadam-an?

7, 8. (a) Ang pagwayway sing mga paklang sang mga palma wala sing duhaduha nga nagpahanumdom kay apostol Juan sang anong mga hitabo? (b) Ano ang kahulugan sang kamatuoran nga ang mga katapo sang dakung kadam-an nagawayway sing mga paklang sang palma?

9. Nagbuylog ang dakung kadam-an sa anong malipayon nga pag-amba?

10. Paano ang dakung kadam-an makasinggit sing nahiusa paagi sa isa ka “mabaskog nga tingog” walay sapayan sang nanuhaytuhay nga mga pungsod kag mga hambal?

11. Paano ang modernong teknolohiya nakabulig sa dakung kadam-an sa pagpabaskog pa sang ila mabaskog nga tingog?

12, 13. Sa anong paagi ang dakung kadam-an ‘nagatindog sa atubangan sang trono kag sang Kordero’?

14. (a) Sin-o ang ginalaragway nga yara “sa palibot sang trono” kag “sa [langitnon] nga Bukid Sion”? (b) Bisan pa ang dakung kadam-an nagaalagad sa Dios “sa iya templo,” ngaa wala ini nagahimo sa ila nga isa ka saserdotenhon nga klase?

15, 16. (a) Ano ang reaksion sa langit sa pag-abot sang dakung kadam-an? (b) Ano ang reaksion sang espiritu nga mga tinuga ni Jehova sa tagsa ka bag-o nga pagpahayag sang iya katuyuan? (c) Paano kita sa duta makabuylog sa pag-amba sing pagdayaw?

17. (a) Anong pamangkot ang ginpautwas sang isa sang 24 ka gulang, kag ang kamatuoran nga mapangita sang gulang ang sabat nagapahangop sing ano? (b) San-o ginsabat ang pamangkot sang gulang?

18, 19. (a) Anong paglaum ang ginpadaku sang Juan nga klase sang katuigan 1920 kag katuigan 1930, apang sin-o ang nagbaton sang mensahe sa nagadugang nga kadamuon? (b) Ang identipikasyon sang dakung kadam-an sang 1935 nagpakita sing ano tuhoy sa 144,000? (c) Ano ang ginapakita sang estadistika sang Memoryal?

20. (a) Sa tion sang Inaway Kalibutanon II, ano ang ginkomento sa pribado lamang sang presidente sang Sosiedad tuhoy sa dakung kadam-an? (b) Anong mga kamatuoran ang nagapakita karon nga ang dakung kadam-an daku matuod?

21. (a) Paano ang pag-ani sa katawhan sang Dios sa tion sang adlaw sang Ginuo nahisuno sing bug-os sa palanan-awon ni Juan? (b) Paano natuman ang pila ka importante nga mga tagna?

22. Anong dugang pa nga impormasyon ang nabaton ni Juan tuhoy sa dakung kadam-an?

23. Ano ang dakung kapipit-an nga gikan sa amo ‘magaguwa’ ang dakung kadam-an?

24. Paano makalipikar ang mga indibiduwal sang dakung kadam-an para sa kaluwasan?

25. (a) Paano ang dakung kadam-an nagahalad kay Jehova sing “balaan nga pag-alagad sa adlaw kag gab-i sa iya templo”? (b) Paano ‘ginahumlad [ni Jehova] ang iya layanglayang’ sa ibabaw sang dakung kadam-an?

26. Anong iban pa nga pagpakamaayo ang maagom sang dakung kadam-an?

27. (a) Paano si Isaias nagtagna sing butang nga kaanggid sa mga pulong sang mga gulang? (b) Ano ang nagapakita nga ang tagna ni Isaias nagsugod nga matuman sa Cristianong kongregasyon sang adlaw ni Pablo?

28, 29. (a) Paano natuman ang mga pulong ni Isaias sang nahaunang siglo? (b) Paano nagakatuman ang mga pulong sang Bugna 7:​16 tuhoy sa dakung kadam-an? (c) Ano ang mangin resulta sang pagtuytoy sa dakung kadam-an padulong sa “mga tuburan sang tubig sang kabuhi”? (d) Ngaa ang dakung kadam-an mangin tumalagsahon sa tunga sang katawhan?

30. Anong makatilingala nga talan-awon ang ginabuksan sa aton sa palanan-awon ni Juan, kag sin-o ang ‘makatindog’?

31. Paano ang katumanan sang palanan-awon ni Juan magaapektar sa mga Cristiano, sang hinaplas kag sang dakung kadam-an?

32. Anong hilingagawon nga kahimtangan ang ginapadaku sang kamatuoran nga duha lamang ka grupo ang ‘magatindog’ sa adlaw sang kasingkal ni Jehova?

[Kahon sa pahina 23]

Ang mga Pagpatpat Iya sang Dios

Sa sulod sang madamo nga dekada ang Juan nga klase namangkot tuhoy sa identidad sang dakung kadam-an apang wala sila makakita sing makaalayaw nga paathag. Ngaa? Masapwan naton ang sabat sa mga pulong sang matutom nga si Jose, sang sia magsiling: “Indi bala iya sang Dios ang mga pagpatpat?” (Genesis 40:8) San-o kag paano ginapatpat sang Dios ang katumanan sang iya mga tagna? Sa masami, kon ini natalana na nga matuman ukon yara sa dalanon sang pagkatuman agod nga ang ila mensahe maathag nga mahantop sang iya nagapangusisa nga mga alagad. Ining paghangop ginahatag “sa pagtudlo sa aton, agod nga paagi sa aton pagbatas kag paagi sa pagpabakod sang Kasulatan may paglaum kita.”​—Roma 15:4.

[Kahon sa pahina 26]

Ang mga katapo sang dakung kadam-an

◼ nagagikan sa tanan nga pungsod kag tribo kag katawhan kag hambal

◼ nagatindog sa atubangan sang trono ni Jehova

◼ naglaba sang ila malaba nga mga panapton nga maputi sa dugo sang Kordero

◼ nagapadungog sang kaluwasan kay Jehova kag kay Jesus

◼ magaguwa sa dakung kapipit-an

◼ nagaalagad kay Jehova sa iya templo sa adlaw kag gab-i

◼ nagabaton sang mahigugmaon nga pag-amlig kag pag-atipan ni Jehova

◼ ginatuytuyan ni Jesus padulong sa mga tuburan sang tubig sang kabuhi