Kapitulo 10

Ang Ginharian nga “Indi Malaglag”

¹ Ang mga hitabo sa kalibutan sa kada adlaw nagapadaku sa kamatuoran nga ang mga tawo wala makasapo sing kalipay paagi sa pagsikway sa pagkasoberano ni Jehova kag, sa baylo, nagtinguha sa paggahom sa ila kaugalingon. Wala sing sistema sang tawhanon nga pangulohan ang nakahatag sing palareho nga kaayohan sa katawhan. Bisan pa napauswag sang mga tawo ang ila sientipiko nga ikasarang nga wala sing katulad, wala nila madula ang sala, masugpo ang balatian kag ang kamatayon, indi bisan sa isa sang ila mga sakop. Sa kabaliskaran, ang mga pungsod nagpadayon sa pag-imbento sing bag-o kag kapin ka makahaladlok nga mga hinganiban. Ang kriminal nga kasingki nagbugana. Ang teknolohiya, kakagud kag pagkawala sing hinalung-ong nagdagta tanan sa duta, tubig kag hangin. Ang nagatimbuok nga implasyon kag ang pagkawala sing trabaho nagpabudlay gid para sa madamu sa pagtigayon sing mga kinahanglanon sang kabuhi. Wala na sing paglaum ang mga tawo nga makaguwa gikan sa sining kahimtangan.​—⁠Manugwali 8:9.

² Ano ang sabat? Ang Ginharian sang Dios, nga para sa amo gintudloan ni Jesus ang iya mga sumulunod nga mangamuyo. (Mateo 6:​9, 10) Daw ano kita ka mapasalamaton nga ang paumpaw nga dalhon sini tuman na kalapit karon!

³ Sugod pa sang 1914 C.E., ang Ginharian sang Dios sa mga kamut ni Jesucristo nagpanghikot na.a Sadto nga tuig ang mga hitabo nga nakita ni Daniel sa matagnaon nga palanan-awon aktuwal nga natabo sa langit. Ang “Dumaan sang mga Adlaw,” si Jehova nga Dios, naghatag sa Anak sang tawo, si Jesucristo, sing “pagbulut-an kag himaya kag ginharian, agod nga ang tanan nga katawhan, mga pungsod kag mga hambal mag-alagad sa iya.” Nagreport tuhoy sa sini nga palanan-awon, si Daniel nagsulat: “Ang iya pagbulut-an dayon nga pagbulut-an nga indi magtaliwan, kag ang iya ginharian indi malaglag.” (Daniel 7:​13, 14) Paagi sa sining Ginharian pahanabuon sang Dios nga ang mga mahigugmaon sa pagkamatarong makaagom sing dimaisip nga maayong mga butang nga iya gintuyo sang ginbutang niya ang aton unang tawhanon nga mga ginikanan sa Paraiso.

⁴ Ang matutom nga mga sakop sang Ginharian interesado gid sa balayan kag sa pagpanghikot sining pangulohan. Luyag nila mahibaloan kon ano ang ginahimu sini karon, kon ano ang himuon sini sa palaabuton kag kon ano ang ginakinahanglan sa ila. Ginausisa nila ini sing maayo, kag samtang ginahimu nila ini, ang ila apresasyon sa sini nagadugang kag ginasangkapan nila ang ila kaugalingon agod sugiran ang iban nahanungod sini.​—⁠Salmo 48:​12, 13.

Ang Makapapagsik-Tagipusuon nga Pag-usisa

⁵ Ang isa sang una nga mga butang nga ginapahayag sina nga pag-usisa amo nga ining Mesianikong Ginharian isa ka ekspresyon sang pagkasoberano ni Jehova. Sia ang naghatag sing “pagbulut-an kag himaya kag ginharian” sa iya Anak. Sa amo, sang maggahom ining Ginharian, ang mga tingog sa langit nagakaigo nga nagsiling: “Ang ginharian sang kalibutan nangin ginharian sang aton Ginuo [Jehova nga Dios] kag sang iya Cristo, kag sia [Jehova] magahari tubtob sa walay katubtuban.” (Bugna 11:​15) Gani ang tanan nga butang nga aton makita nahanungod sining Ginharian kag ang ginahimu sini nagapapalapit sa aton kay Jehova. Nagapatubo ini sa aton sing handum nga magpasakop sa iya pagkasoberano tubtob sa walay katubtuban.

⁶ Daw ano kaayo nga ginpalingkod ni Jehova sa trono si Jesucristo subong Iya kabulig nga manuggahom! Subong ang Batid nga Manugpangabudlay nga gingamit sang Dios sa paghimu sang duta kag sang tawo, labaw kay bisan sin-o nahibaloan ni Jesus ang aton mga kinahanglanon. Dugang pa, ginpakita niya kutob sa ginsuguran sang maragtas sang tawo ang iya ‘kalipay para sa mga anak sang mga tawo.’ (Hulubaton 8:​30, 31; Colosas 1:​15-17) Daku gid ina nga gugma amo kon ngaa sia mismo nagkari sa duta kag ginhatag ang iya kabuhi subong gawad para sa ila. Sa amo ginbuksan niya para sa aton ang paagi nga kita mahilway gikan sa sala kag kamatayon kag ang kahigayunan para sa dayon nga kabuhi.​—⁠Mateo 20:28.

⁷ Isa ini ka malig-on, nagapadayon nga pangulohan. Ang nagapadayon nga kinaiya sini ginapasalig sang kamatuoran nga si Jehova mismo wala sing kamatayon. (Habacuc 1:​12; Salmo 146:​3-5, 10) Tuhay sa tawhanon nga mga hari, si Jesucristo, ang isa nga gintugyanan ni Jehova sing pagkahari, indi man mamalatyon. (Roma 6:​9; 1 Timoteo 6:​15, 16) Kaupod kay Cristo sa langitnon nga trono amo ang 144,000 ka iban pa, matutom nga mga alagad sang Dios nga ginkuha gikan sa “tagsa ka tribu kag hambal kag pungsod.” Ini sila man, ginhatagan sing dimamalatyon nga kabuhi. (Bugna 5:​9, 10; 1 Corinto 15:​42-44, 53) Ang kalabanan sa ila didto na sa mga langit, kag ang nagkalabilin sa ila nga yari pa sa duta nagahuman sa “matutom kag mainandamon nga ulipon” nga klase, nga sing matutom nagapauswag sang mga intereses sang Ginharian diri.​—⁠Mateo 24:​45-47.

⁸ Sa dili madugay karon, sa gintangdo nga tion ni Jehova, ang iya hubon nga manuglaglag magahikot sa pagtinlo sang duta. Laglagon nila sing dayon ang mga tawo nga bangod sang ila kaugalingon nga pagpili wala nakakilala sa Dios, nagadumili sa pagkilala sang iya pagkasoberano, kag nagayaguta sa mahigugmaon nga mga aman nga iya ginhimu paagi kay Jesucristo. (2 Tesalonica 1:​6-9) Mahanabo ini sa adlaw ni Jehova, ang madugay na ginahulat nga tion sa pagbindikar sa iya subong ang Soberano sang Uniberso.

⁹ Ang tanan dimatuod nga relihion, kag subong man ang tanan nga pangulohan sang tawo kag ang ila hangaway, nga ginmaniobra sang dimakita malauton nga manuggahom sining kalibutan, laglagon sing dayon. Ang tanan nga nagapakilala sang ila kaugalingon subong bahin sining kalibutan paagi sa pagpaduyog sa maiyaiyahon, dibunayag, imoral nga paagi sang pagkabuhi utdon sa kamatayon. Si Satanas kag ang iya mga demonyo painon gikan sa mga pumuluyo sang duta, kag bilangguon sa sulod sang isa ka libo ka tuig. Daw ano nga paumpaw ina para sa tanan nga nagahigugma sang pagkamatarong!​—⁠Bugna 18:​21, 24; 19:​11-16, 19-21; 20:​1, 2.

Ang mga Tulumuron Sini—Kon Paano Malab-ot

¹⁰ Bug-os nga tumanon sining Mesianikong Ginharian ang orihinal nga katuyoan sang Dios para sa duta. (Genesis 2:​8, 9, 15; 1:​28) Tubtob sa karon, napaslawan ang tawo sa pagtuman sina nga katuyoan. Apang, “ang napuy-an nga duta” ginpasakop sa Anak sang tawo, si Jesucristo. Ang tanan nga makalampuwas sa paghukom ni Jehova sa sining daan nga sistema magapanghikot sing nahiusa sa idalom ni Cristo subong Hari, malipayon nga magahimu sang tanan nga iya isugo agod nga ang duta mangin bug-os globo nga Paraiso. (Hebreo 2:​5-9) Ang tanan nga katawhan magakalipay sa binuhatan sang ila mga kamut kag magabenepisyo sing bug-os gikan sa bugana nga patubas sang duta.​—⁠Salmo 72:​1, 7, 8, 16-19; ipaanggid ang Isaias 65:​21, 22.

¹¹ Sang gintuga si Adan kag si Eva himpit sila, kag katuyoan sadto sang Dios nga ang duta pun-on sang ila mga anak, tanan may himpit nga hunahuna kag lawas. Sa idalom sang paggahom sang Ginharian, ina nga katuyoan mahimayaon nga matuman. Kinahanglan sini dulaon ang tanan nga epekto sang sala, kag sa sina nga katuyoan si Cristo nagaalagad indi lamang subong Hari kundi subong Mataas nga Saserdote man. Sing mapailubon buligan niya ang iya matinumanon nga mga sakop sa pagbenepisyo gikan sa nagatumbas-sala nga bili sang iya ginhalad nga tawhanon nga kabuhi. Ang bulag nga mga mata magamuklat. Ang bungol nga mga dulunggan mabuksan. Ang unod nga ginpakurinot sang edad ukon balatian magalab-as subong sang isa ka bata. Ang balatian nga indi na mapaayo magahatag sing dalan sa mapagsik nga kapagros. Magaabot ang adlaw nga wala na sing isa ang may rason sa pagsiling, “Nagamasakit ako,” bangod ang mahinadlukon sa Dios nga mga tawo hilwayon gikan sa lulan sang sala kag sa makapasubo nga mga epekto sini.​—⁠Ipaanggid ang Isaias 33:​22, 24; 35:​5, 6; Job 33:​25; Lucas 13:​11-13.

¹² Apang, agod malab-ot ang kahimpitan, indi lamang lawas kag hunahuna ang papagruson. Nagalakip ini sing nagakaigo nga pagpakita sing mga kinaiya sang persona ni Jehova, bangod ang tawo ginhimu sa ‘dagway sang Dios, suno sa iya kaangay.’ (Genesis 1:​26) Sa sina nga katuyoan, daku nga edukasyon ang kinahanglanon. Isa ini ka Bag-ong Kahimusan nga sa diin “magapuyo ang pagkamatarong,” gani, subong gintagna ni manalagna Isaias, “ang mga pumuluyo sang mapatubason nga duta magatuon sing pagkamatarong.” (2 Pedro 3:​13; Isaias 26:9) Ining kinaiya nagadul-ong sa paghidait​—⁠sa ulot sang katawhan sang tanan nga pungsod, sa tunga sang suod nga mga magkaupod, sa pamilya kag, labaw sa tanan, sa Dios mismo. (Isaias 32:​17; Salmo 85:​10-13) Sila nga magatuon sing pagkamatarong amat-amat nga tudluan sing kabubut-on sang Dios para sa ila. Samtang ang gugma para sa mga dalanon ni Jehova amat-amat nga magapanggamut sa ila tagipusuon, sundon nila ini sa tagsa ka bahin sang ila kabuhi. Ang himpit nga tawo nga si Jesus nakasiling, ‘Nahimu ko pirme ang kalahamut-an sa akon Amay.’ (Juan 8:​29) Daw ano ka makalilipay ang kabuhi kon mangin matuod ina sa tanan nga katawhan!

Ang mga Katigayonan nga Hayag Na

¹³ Ang kalahamut-an nga mga katigayonan sang Ginharian hayag na sa mga tawo nga may mga mata sang pagtuo. Ang masunod nga mga pamangkot kag mga Kasulatan nga binalikwat magapahanumdom sa inyo sang pila sini, subong man sing mga butang nga sarang kag dapat himuon karon sang tanan nga sakop sang Ginharian:​

Batok kay sin-o ang hari una nga naghikot, kag ano ang resulta? (Bugna 12:​7-10, 12)

Ang pagtipon sa katapusan nga mga katapo sang ano nga grupo ginhatagan sing gilayon nga igtalupangod sa tapos si Cristo naglingkod sa trono? (Mateo 24:​31; Bugna 7:​1-4)

Sa Mateo 25:​31-33, ano pa nga hilikuton ang gintagna ni Jesus nga himuon niya sa tapos sang iya paglingkod sa trono kag antes laglagon ang malauton?

Paano ining hilikuton ginahimu? Sin-o ang nagapakigbahin sa sini? (Mateo 24:​14; Salmo 110:​3; Bugna 14:​6, 7)

Ngaa wala ini mapunggi sang politikal kag relihioso nga mga manugpamatok? (Binuhatan 5:​38, 39; Zacarias 4:6)

Subong resulta sang edukasyonal nga hilikuton nga ginahimu, ano nga mga pagbalhin ang natabo na sa kabuhi sang mga tawo nga nagapasakop sa paggahom sang Ginharian? (Isaias 2:​4; 1 Corinto 6:​9-11)

Ang Nagapadayon nga Kinaiya sang Ginharian

¹⁴ Sa tapos sang pagtagbong kay Satanas kag sa iya mga demonyo sa kadadalman, si Jesucristo upod sa iya 144,000 ka kaupod nga mga manunubli magagahom sa sulod sang isa ka libo ka tuig. (Bugna 20:6) Sa sulod sina nga tion ang katawhan dalhon sa kahimpitan. Ang tanan nga pangulohan kag awtoridad kag gahom nga batok kay Jehova pagadulaon. Sa tapos sina, ibalik ni Jesus ang Ginharian sa iya Amay, “agod nga ang Dios mangin tanan sa tanan.”​—⁠1 Corinto 15:​24,28.

¹⁵ Busa ang palangakoan ni Jesus may kaangtanan sa duta magabalhin. Walay sapayan, ang iya paggahom mangin “walay katapusan” kag ang iya Ginharian “indi malaglag.” (Daniel 7:​14) Sa anong kahulugan? Sa kahulugan nga ang awtoridad sa paggahom indi pag-ihatag sa mga kamut sang iban nga may tuhay nga mga tulumuron. Ang mga katigayonan sang Ginharian ‘indi nga mas-a malaglag.’ Ang himuon sang Ginharian sa pagbindikar sang ngalan ni Jehova kag sang iya katuyoan sa sini nga duta magatindog tubtob sa walay katubtuban.

[Footnote]

Repaso nga Paghinun-anon

● Ngaa ang Ginharian sang Dios amo lamang ang solusyon sa mga palaligban sang tawo? San-o ini nagsugod sa paggahom?

● Ano ang labi na nga makagalanyat sa imo nahanungod sa Ginharian sang Dios kag ano ang himuon sini? Ngaa?

● Ano nga mga katigayonan sang Ginharian ang makita na naton? Ano ang aton bahin sa sini?

[Mga Pamangkot]

1, 2. (a) Ano nga kamatuoran ang ginapadaku sa kada adlaw sang mga hitabo sa kalibutan, kag paano? (b) Ano ang lamang nga solusyon?

3. (a) May kaangtanan sa sining Ginharian, ano ang natabo sa langit sang 1914 C.E.? (b) Ngaa importante yadto sa aton?

4. Interesado gid kita sa anong mga detalye sang Ginharian, kag ngaa?

5. (a) Paano ginapakita sang Kasulatan kon kay sin-o pagkasoberano ang ginpabutyag paagi sa Mesianikong Ginharian? (b) Gani paano kita naapektohan sang aton naton-an nahanungod sa Ginharian?

6. Ngaa interesado gid kita nga si Jesucristo amo ang kabulig nga Manuggahom ni Jehova?

7. (a) Tuhay sa paggahom sang bisan sin-o nga tawo, ngaa ining pangulohan magapadayon? (b) Ano ang kaangtanan sang “matutom kag mainandamon nga ulipon” sa langitnon nga pangulohan?

8, 9. (a) Anong nagabahinbahin, makapalain nga mga impluensia ang dulaon sang Ginharian? (b) Gani, kon indi naton luyag mangin mga kaaway sang Ginharian sang Dios, ano nga mga organisasyon kag mga hilikuton ang dapat naton likawan?

10. (a) Paano himuon sang Mesianikong Ginharian ang katuyoan ni Jehova para sa duta? (b) Ano ang mangin kahulugan sini para sa katawhan nga nagapuyo sa duta sa amo nga tion?

11. (a) Paano ang pagkahimpit sang hunahuna kag lawas mahanabo para sa mga sakop sang Ginharian? (b) Ano ang ilakip sini?

12. (a) Ano pa ang kinahanglanon sang tawhanon nga pagkahimpit? (b) Paano ina matigayon, kag ano ang mangin resulta sini?

13. Gamita ang mga pamangkot sa ibabaw sa pagpadaku sang mga katigayonan sang Ginharian kag kon ano busa ang dapat naton ginahimu.

14. (a) Daw ano kadugay magagahom si Cristo? (b) Ano ang mahimu sa sulod sinang tion?

15. Paano matuod nga ining Ginharian ‘indi nga mas-a malaglag’?