Kapitulo 7

Pabaskuga Liwat Yadtong Nahauna nga Gugma!

ANG nahauna nga mensahe ni Jesus para sa kongregasyon sa Efeso, nga sadtong tion isa ka mauswagon nga tupad-baybay nga siudad sang Asia Minor malapit sa isla sang Patmos. Ginsugo niya si Juan: “Sa anghel sang kongregasyon sa Efeso isulat: Amo ini ang ginsiling sang isa nga nagauyat sang pito ka bituon sa iya kamot nga too, nga nagalakat sa tunga sang pito ka kandelero nga bulawan.” (Bugna 2:1) Subong sang sa anom ka mensahe, ginapatalupangod diri ni Jesus ang isa ka bahin nga nagapakita sang iya may awtoridad nga palangakuan. Ginapahanumdom niya ang mga manugtatap sa Efeso nga ang tanan nga gulang yara sa idalom sang iya maamligon nga pagtatap kag nga ginausisa niya ang tanan nga kongregasyon. Tubtob sa aton ika-20 nga siglo, ginpadayon niya ining mahigugmaon nga pagkaulo, nga ginabantayan ang mga gulang kag maluluy-on nga ginabantayan ang tanan nga nagapakig-upod sa kongregasyon. Sa tion kag tion, ginapasibu niya ang mga kahimusan sa sulod sang kongregasyon agod nga magsilak sing masanag pa ang kapawa. Huo, si Jesus amo ang Pangulo nga Manugbantay sang panong sang Dios.—Mateo 11:28-30; 1 Pedro 5:2-4.

² Nian ginpahamtang ni Jesus ang sulundan para sa tanan luwas sa duha sang iya pito ka mensahe paagi sa paggamit sing mainit nga mga pulong sang komendasyon sa iya nagabukas nga mga pulong. Para sa mga taga-Efeso, amo ini ang iya mensahe: “Nahibaluan ko ang imo mga buhat, kag ang imo pagpangabudlay kag mapailubon nga pagbatas, kag nga indi ka makaantos sa malaut nga mga tawo, kag nga ginatilawan mo ang mga nagatawag sang ila kaugalingon nga mga apostol, apang indi sila amo, kag nasapwan mo sila nga dimatuod. Nagapakita man ikaw sing pag-antos, kag nagbatas ka tungod sa akon ngalan, kag wala ikaw paglapyua.” (Bugna 2:2, 3) Sang nagligad nga mga tinuig, ginpaandaman ni apostol Pablo ang mga gulang sa Efeso nahanungod sa “mga lobo nga mapintas,” apostata nga mga manugtublag sa panong, kag ginsilingan niya yadtong mga gulang nga “magpabilin nga nagamata,” bilang pagsunod sa iya wala ginalapyo nga huwaran. (Binuhatan 20:29, 31) Sanglit ginhatagan sila karon ni Jesus sing komendasyon tungod sang ila pagpangabudlay kag pagbatas kag indi pagkalapyo, mahimo gid nga gin-aplikar nila yadto nga laygay.

³ Sa tion man sang adlaw sang Ginuo, naglutaw ang “dimatuod nga mga apostol” nga “nagapamulong sing mga butang nga balingag, sa pagpasunod sa ila sang mga disipulo.” (2 Corinto 11:13; Binuhatan 20:30; Bugna 1:10) May nakita sila nga maayo sa tanan sang nagasumpakilay nga sektaryan nga mga relihion, nagapangangkon sila nga ang Dios wala sing organisasyon, kag ginapanghiwala nila nga si Jesus nakabaton sing gahom sa Ginharian sang 1914. Ginatuman nila ang tagna sa 2 Pedro 3:3, 4: “Sa katapusan nga mga adlaw ang mga mayubiton magaabot nga may pagyubit, nga nagasunod sang ila kaugalingon nga mga kailigbon kag nagasiling: ‘Diin bala ining saad sang iya pag-abot? Kay kutob sang pagtulog sang aton mga ginikanan, ang tanan nagapadayon subong nga amo sila kutob sa ginsuguran sang pagtuga.’”

⁴ Nagarebelde ining mga manugyubit sa ideya nga ipahayag sing dayag ang ila pagtuo. (Roma 10:10) Gingamit nila ang pagsakdag sang mga klero sang Cristiandad kag ang bulig sang mga pamantalaan kag mga estasyon sang TV sa pagpalapnag sing butig nga mga report nahanungod sa ila mga kaupod anay. Napamatud-an wala madugay sang mga matutom nga ang panghambal kag paggawi sining mga manuglimbong indi matuod. Kaangay sang mga taga-Efeso, ang mga Cristiano karon “indi makaantos sa malaut nga mga tao,” gani ginsikway nila sila gikan sa ila mga kongregasyon.a

⁵ Apang, karon, subong sang iya ginhimo sa lima sang pito ka kongregasyon, ginsambit ni Jesus ang isa ka mabug-at nga problema. Nagsiling sia sa mga taga-Efeso: “Apang, amo ini ang akon pamatok sa imo, nga ginbiyaan mo ang imo nahauna nga gugma.” (Bugna 2:4) Indi ini dapat natabo sa ila, kay ginsulatan sila anay ni Pablo sang nagligad nga 35 ka tuig tuhoy sa “daku nga gugma [sang Dios] nga ginhigugma niya sa aton,” kag ginpalig-on niya sila: “Magmanug-ilog kamo sang Dios, subong nga mga anak nga hinigugma, kag maggawi sa gugma, subong nga si Cristo man naghigugma sa inyo.” (Efeso 2:4; 5:1, 2) Dugang pa, ang mga pulong ni Jesus dapat nga natigib sing indi mapanas sa ila tagipusuon: “Si Jehova nga aton Dios isa lamang nga Jehova, kag dapat mo higugmaon si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna kag sa bug-os mo nga kusog.” (Marcos 12:29-31) Nadula sang mga taga-Efeso yadtong nahauna nga gugma.

⁶ Madugay na kita ukon bag-ohan pa lamang nga mga kaupod sa kongregasyon, dapat kita magbantay nga indi madula ang aton nahauna nga gugma kay Jehova. Paano matabo ining pagkadula? Mahimo naton matugutan ang gugma sa aton sekular nga trabaho, ang handum sa pagpangita sing madamo nga kuwarta, ukon ang pagpangita sing kalipay nga mangin daku nga butang sa aton kabuhi. Sa amo mangin mahunahunaon kita sa unod sa baylo sang espirituwal nga butang. (Roma 8:5-8; 1 Timoteo 4:8; 6:9, 10) Ang aton gugma kay Jehova dapat magtiklod sa aton nga tadlungon ina nga mga huyog kag ‘padayon nga pangitaon anay ang ginharian sang Dios kag ang iya pagkamatarong,’ agod ‘magtipon para sa aton kaugalingon sing mga bahandi sa langit.’—Mateo 6:19-21, 31-33.

⁷ Tugutan naton nga ang nagapahulag pirme sa aton sa pag-alagad kay Jehova amo ang tudok nga gugma sa iya. Apresyahon naton sing mabaskog ang tanan nga nahimo para sa aton ni Jehova kag ni Cristo. Subong ginsulat mismo ni Juan sang ulihi: “Sa sini amo ang gugma, indi nga ginhigugma ta ang Dios kundi nga ginhigugma niya kita kag ginpadala ang iya Anak nga katumbasan sang aton mga sala.” Si Juan nagpadayon sa pagsugid sa aton: “Ang Dios gugma, kag ang nagapabilin sa gugma nagapabilin sa Dios kag ang Dios nagapabilin sa iya.” Kabay nga indi gid naton pagtugutan nga mag-ugdaw ang aton gugma kay Jehova, kay Jesucristo, kag sa buhi nga Pulong sang Dios! Sarang naton mapabutyag ining gugma indi lamang sa makugi nga pag-alagad sa Dios kundi paagi man sa pagtuman ‘sining sugo nga nabaton ta sa iya, nga ang nagahigugma sa Dios maghigugma sa iya utod man.’—1 Juan 4:10, 16, 21; Hebreo 4:12; tan-awa man ang 1 Pedro 4:8; Colosas 3:10-14; Efeso 4:15.

“Buhata ang mga Buluhaton Anay”

⁸ Dapat pabaskugon liwat sadtong mga taga-Efeso ang ila gugma anay kon indi nila luyag malaglag. “Busa,” siling ni Jesus sa ila, “dumduma nian kon gikan diin ka napukan, maghinulsol kag buhata ang mga buluhaton anay. Kon indi, makara ako sa imo kag magakuha sang imo kandelero sa iya duog, luwas kon maghinulsol ka.” (Bugna 2:5) Paano ginbaton sang mga Cristiano sa kongregasyon sang Efeso yadtong mga pulong? Wala naton mahibal-an. Kabay kuntani nga naghinulsol sila kag nagmadinalag-on sa pagpukaw liwat sang ila gugma kay Jehova. Kon wala, nian ang ila suga ginpalong kag ang ila kandelero ginkuha. Nadula nila ang ila pribilehiyo sa pagpasilak sang kamatuoran.

⁹ Walay sapayan, may yara si Jesus sining makapalig-on nga pulong para sa mga taga-Efeso: “Apang may imo ka sini gihapon, nga ginadumtan mo ang mga buhat sang mga Nicolaita, nga ginadumtan ko man.” (Bugna 2:6) Sa dimagkubos gindumtan nila ang nagabahinbahin nga sekta, subong nga ginadumtan man ini ni Jesus. Apang, samtang nagaligad ang mga tuig, madamo nga kongregasyon ang wala mamati sa sadtong mga pulong ni Jesus. Ang kakulang sing gugma kay Jehova, sa kamatuoran, kag sa isa kag isa nagresulta sa ila pag-anod sa espirituwal nga kadudulman. Nabahinbahin sila sa madamo sang nagabangigay nga mga sekta. Ginkuha sang “Cristianong” mga manugkopya nga wala sing gugma kay Jehova ang ngalan gid sang Dios gikan sa Griegong mga manuskrito sang Biblia. Ang kakulang sing gugma naghatag man sing lugar para sa pagtudlo sing Babiloniko kag Gresyanhon nga mga doktrina, subong sang kalayuhon nga impierno, purgatoryo, kag Trinidad, sa ngalan sang Cristianismo. Bangod wala sing gugma sa Dios kag sa kamatuoran, ang kalabanan sadtong nagpangangkon nga mga Cristiano nag-untat sa pagbantala sing maayong balita sang Ginharian sang Dios. Gingamhan sila sang makagod nga klero nga klase nga naghimo sang iya kaugalingon nga ginharian diri sa duta.—Ipaanggid ang 1 Corinto 4:8.

¹⁰ Sang magsugod ang paghukom sa panimalay sang Dios sang 1918, ang sektaryan nga klero sang Cristiandad dayag nga nagsakdag sa Inaway Kalibutanon I, kag nagpalig-on sa mga Katoliko kag mga Protestante sa duha ka bahin nga magpatyanay. (1 Pedro 4:17) Indi kaangay sang kongregasyon sa Efeso nga nagdumot sa ginhimo anay sang sekta ni Nicolaus, ang mga relihion sang Cristiandad madugay na nga napuno sing nagasumpakilay, batok sa Dios nga mga doktrina, kag ang ila mga klero nagbuylog sa kalibutan, nga siling ni Jesus indi dapat pakigbahinan sang iya mga disipulo. (Juan 15:17-19) Ang ila mga kongregasyon, nga walay hinalung-ong sa tema sang Biblia, ang Ginharian sang Dios, indi mga kandelero nga nagapasilak sing Makasulatanhon nga kamatuoran, ukon ang ila mga katapo bahin sang espirituwal nga templo ni Jehova. Ang ila nagapanguna nga mga lalaki (kag mga babayi) indi mga bituon kundi ginbuyagyag nga mga katapo sang “tawo sang pagkamalinapason.”—2 Tesalonica 2:3; Malaquias 3:1-3.

¹¹ Apang, ang Juan nga klase, nagguwa sa magamo nga mga adlaw sang nahauna nga inaway kalibutanon nga may gugma kay Jehova kag sa kamatuoran nga nagtiklod sa ila sa pag-alagad sa iya nga may nagadabdab nga kakugi. Ginpamatukan nila ang mga nagtinguha sa pagdala sing sektaryanismo paagi sa halos pag-idolo sa nahauna nga presidente sang Watch Tower Society, nga si ­Charles T. Rus­sell, sang mapatay sia sang 1916. Nadisiplina paagi sa mga paghingabot kag mga kabudlayan, ining Cristianong grupo maathag nga ginhukman subong “maayo gid” sang ila Agalon kag gin-agda sa pagsulod sa iya kalipay. (Mateo 25:21, 23) Nakilala nila sa dalanon sang mga hitabo sa kalibutan, kag sa ila mga eksperiensia, ang katumanan sang tanda nga ginhatag ni Jesus nga magatanda sang iya dimakita nga pag-abot sa paggahom sa Ginharian. Kutob sang 1919 padayon, nagpadayon sila sa pagpakigbahin sa dugang pa nga katumanan sang daku nga tagna ni Jesus: “Kag iwali ining maayong balita sang ginharian sa bug-os napuy-an nga duta subong panaksi sa tanan nga kapungsuran; kag ugaling magaabot ang katapusan.” (Mateo 6:9, 10; 24:3-14) Kon ang ila gugma kay Jehova sa isa ka paagi kulang, ginpadabdab ini kutob sadtong tion padayon.

¹² Sa isa ka maragtason nga kombension, nga gintambungan sang 18,000 sining mga Cristiano, sa Cedar Point, Ohio, E.U.A., Septiembre 5-13, 1922, ang panawag naglanog: “Balik kamo sa latagon, O kamo nga mga anak sang labing mataas nga Dios! . . . Dapat makilala sang kalibutan nga si Jehova amo ang Dios kag nga si Jesucristo amo ang Hari sang mga hari kag Ginuo sang mga ginuo. . . . Busa ibantala, ibantala, ibantala, ang Hari kag ang iya ginharian.” Ang hamili nga ngalan ni Jehova ginpakilala sing kapin pa. Sang 1931 ining mga Cristiano, nga nagtipon sa kombension sa Columbus, Ohio, E.U.A., nalipay sa pagbaton sang ngalan nga ginsambit sang Dios sa tagna ni Isaias—mga Saksi ni Jehova. (Isaias 43:10, 12) Sa guwa sini sang Marso 1, 1939, ang ngalan sang nagapanguna nga balasahon sang organisasyon gin-islan sing Ang Lalantawan nga Nagabantala sang Ginharian ni Jehova, sa amo naghatag sing una nga kadungganan sa aton Manunuga kag sa iya harianon nga pangulohan. Ang mga Saksi ni Jehova, upod ang napabaskog liwat nga gugma kay Jehova, naghinulsol sa ila posible nga kapaslawan sang nagligad sa pagpadungog kag sa pagpadaku sa iya kilala nga ngalan kag Ginharian.—Salmo 106:6, 47, 48.

“Sa Nagdaug”

¹³ Sa katapusan, subong sang ginhimo niya sa iban sang iya mga mensahe, ginpatalupangod ni Jesus ang espiritu sang Dios nga nagapakilala paagi kay Jesus sang mga padya sa pagkatutom. Sa mga taga-Efeso sia nagsiling: “Ang may dulunggan magpamati sa ginasiling sang espiritu sa mga kongregasyon: Sa nagdaug, tugutan ko sa pagkaon sang kahoy sang kabuhi, nga yara sa sulod sang paraiso sang Dios.” (Bugna 2:7) Ang mga nagapamati nga mga dulunggan malangkag sa pagpamati sa sinang importante nga mensahe, bangod nahibaluan nila nga wala ini mag-abot sa pagbuot ni Jesus kundi naghalin ini sa Soberanong Ginuong Jehova paagi sa Iya balaan nga espiritu, ukon aktibo nga puwersa. Paano sila ‘magadaug’? Paagi sa pagsunod sing suod sa mga tikang ni Jesus, nga naghupot sing integridad tubtob sa kamatayon kag gani nakasiling sia: “Magpakaisog kamo! Nadaug ko ang kalibutan.”—Juan 8:28; 16:33; tan-awa man ang 1 Juan 5:4.

¹⁴ Sanglit wala sila nagalaum nga magkabuhi sa dutan-on nga paraiso, paano nga ang hinaplas nga mga Cristiano, subong sang mga taga-Efeso, padyaan sing pagkaon “sang kahoy sang kabuhi, nga yara sa sulod sang paraiso sang Dios”? Indi ini ang napasag-uli nga Paraiso sa duta, kay ang 144,000 ka hinaplas nga mga Cristiano, lakip ang mga katapo sang kongregasyon sa Efeso, ginbakal gikan sa katawhan agod maggahom upod sa Kordero, nga si Cristo Jesus, sa langitnon nga Bukid Sion subong espiritu nga mga anak. (Efeso 1:5-12; Bugna 14:1, 4) Busa, ang ginapatuhuyan diri mahimo gid nga amo ang langitnon nga tulad-hardin nga duog nga napanubli sining mga mandadaug. Didto, “sa paraiso sang Dios,” huo, sa atubangan gid ni Jehova mismo, ining mga mandadaug nga ginhatagan sing pagkadimamalatyon magapadayon sa pagkabuhi sing dayon, subong ginasimbulo diri sang ila pagkaon sang kahoy sang kabuhi.

¹⁵ Ano iya ang matabo sa matutom nga dutan-on nga mga sumalakdag sang 144,000 ka hinaplas? Ang dakung kadam-an sining kaupod nga mga Saksi nagadaug man. Apang ang paglaum nila amo ang pagsulod sa isa ka dutan-on nga paraiso, nga sa diin magainom sila gikan “sa suba sang tubig sang kabuhi” kag makasapo sing pag-ayo gikan sa “mga dahon sang mga kahoy” nga natanom sa higad sadto nga suba. (Bugna 7:4, 9, 17; 22:1, 2) Kon indi ka isa sa sining grupo, kabay nga ikaw man magapabutyag sang imo mainit nga gugma kay Jehova kag magdaug sa pagdaug sang pagtuo. Sa amo matigayon mo ang kalipay sang kabuhi nga walay katapusan sa Paraiso nga duta.—Ipaanggid ang 1 Juan 2:13, 14.

[Mga footnote]

[Mga Pamangkot sa Pagtinuon]

1. Sa anong kongregasyon ginpatuhoy ang nahauna nga mensahe ni Jesus, kag ano ang ginpahanumdom niya sa mga manugtatap?

2. (a) Tungod sa anong maayong mga butang ginhatagan ni Jesus sing komendasyon ang kongregasyon sang Efeso? (b) Ano nga laygay ni apostol Pablo ang mahimo gid nga gintuman sang mga gulang sa Efeso?

3. (a) Paano ang “dimatuod nga mga apostoles” nagtinguha sa paglimbong sa mga matutom sa aton mga adlaw? (b) Anong paandam nahanungod sa mga apostata ang ginhatag ni Pedro?

4. (a) Paano nagpakita ang bugal kag pagkarebelyuso sang mga manugyubit? (b) Ginapakita sang mga Cristiano nga kaangay sila sang mga taga-Efeso paagi sa paghimo sing ano batok sa butigon nga mga manugpamatok?

5. (a) Ano siling ni Jesus ang kaluyahon sang mga taga-Efeso? (b) Ano nga mga pulong ang dapat nadumduman sang mga taga-Efeso?

6. (a) Madugay na kita ukon bag-ohan pa lamang nga mga kaupod sa kongregasyon, batok sa anong katalagman kag mga huyog dapat kita magbantay? (b) Ang gugma sa Dios dapat magtiklod sa aton sa paghimo sing amo?

7. (a) Ano dapat ang nagapahulag sa aton sa pag-alagad kay Jehova? (b) Ano ang ginsiling ni Juan tuhoy sa gugma?

8. Paano siling ni Jesus dapat maghikot ang mga ­taga-Efeso?

9. (a) Ano ang makapalig-on nga pulong ni Jesus para sa mga taga-Efeso? (b) Paano ang mga kongregasyon sang wala na si Juan napaslawan sa pagpamati sa laygay ni Jesus sa mga taga-Efeso?

10. Ano ang relihiosong kahimtangan sa Cristiandad sang 1918?

11. (a) Sin-o nga grupo sang mga Cristiano sa danyag sang kalibutan sang 1918 ang nagbuhat sang mga pulong ni Jesus sa mga taga-Efeso? (b) Ano ang ginhimo sang Juan nga klase kutob sang 1919 padayon?

12. (a) Sa isa ka maragtason nga kombension sang 1922, ano nga panawag ang naglanog? (b) Ano nga ngalan ang ginbaton sang matuod nga mga Cristiano sang 1931, kag ano ang ginhinulsulan nila?

13. (a) Ano nga pagpakamaayo ang naghulat sa mga taga-Efeso kon ‘nagdaug’ sila? (b) Paano ‘magadaug’ ang taga-Efeso nga mga Cristiano?

14. Sa ano mahimo gid nagapatuhoy “ang paraiso sang Dios” nga ginsambit ni Jesus?

15. Ngaa interesado gid ang dakung kadam-an karon sa pagpalig-on ni Jesus nga magdaug?