Malapit Na ang Paraiso!

Ang malain nga mga butang nga nagakatabo karon sa duta nagapakita nga malapit na ang Paraiso. Ang Biblia nagsiling nga makakita kita sing magamo nga mga tion antes mag-abot ang Paraiso. Nagakabuhi kita karon sa sina nga mga tion! Yari ang pila ka butang nga siling sang Biblia mahanabo:

Dalagku nga mga inaway. “Ang pungsod magatindog batok sa pungsod kag ang ginharian batok sa ginharian.” (Mateo 24:7) Nagmatuod ini nga tagna. Sugod sang tuig 1914, duha ka daku nga inaway kag madamo nga diutay nga mga inaway ang natabo. Minilyon ka tawo ang napatay sa sini.

Lapnag nga balatian. May ‘mga kamatay sa nagkalainlain nga mga duog.’ (Lucas 21:11) Nagmatuod bala ini? Huo. Minilyon ka tawo ang napatay bangod sa kanser, balatian sa tagipusuon, anos, malaria, AIDS, kag iban pa nga mga balatian.

Kakulang sa kalan-on. Sa bug-os nga duta may mga tawo nga wala sing bastante nga makaon. Minilyon ka tawo ang nagakapatay sa gutom kada tuig. Isa pa ini ka tanda nga ang Paraiso malapit na mag-abot. Ang Biblia nagasiling: “May kakulang sa kalan-on.”—Marcos 13:8.

Mga linog. “May . . . mga linog sa nagkalainlain nga mga duog.” (Mateo 24:7) Nagmatuod man ini sa aton tion. Kapin sa isa ka milyon ka tawo ang napatay sa mga linog halin sang 1914.

Malaut nga mga tawo. Ang mga tawo mangin “mga mahigugmaon sang kuwarta” kag “mga mahigugmaon sang kaugalingon.” Sila mangin “mga mahigugmaon sang kinasadya sa baylo sang sa Dios.” Ang mga anak mangin “mga malalison sa mga ginikanan.” (2 Timoteo 3:1-5) Wala ka bala nagaugyon nga madamo nga tawo karon ang kaangay sina? Wala nila ginatahod ang Dios, kag ginagamo nila ang mga tawo nga nagatinguha sa pagtuon tuhoy sa Dios.

Krimen. Ang ‘pagkamalinapason magabuad’ man. (Mateo 24:12) Mahimo gid nga magaugyon ikaw nga ang krimen mas grabe karon sangsa nagligad nga mga tinuig. Ang mga tawo bisan diin may peligro nga basi kawatan sila, tuntuhon, ukon halitan.

Ini tanan nga butang nagapakita nga malapit na ang Ginharian sang Dios. Ang Biblia nagasiling: “Kon makita ninyo nga nagakahanabo ining mga butang, hibalua ninyo nga ang ginharian sang Dios malapit na.” (Lucas 21:31) Ano ang Ginharian sang Dios? Amo ini ang langitnon nga panguluhan sang Dios nga magadala sang Paraiso sa sini nga duta. Ang Ginharian sang Dios amo ang magabulos sa mga panguluhan sang tawo.—Daniel 2:44.